Просмотр кода страницы Беляев, Г. Бур ань мунiс... и кольччис миянкöд

1925 вося кöч-сентябрь 15 лунö “Югыд туйын” Н.Шахов - Сандрик Микол гижö, телеграф пö вайис дженьыдик юöр, мый Москваын сентябрь 13 лунö кулöма А.А.Суханова. Водзö газетас шуöма: “Тайö юöрыс дойдас сьöлöмсö быдöнлысь, кодi тöдлiс Агния Андреевнаöс кыдзи вынсö жа- литтöг уджалысьöс да бур мортöс”.

В.Савин кык лун мысти “Югыд туйын” жö дой кылана йöлöгаöн шыасьö Москваысь воöм тайö юöр вылас. Дугдывтöг по висис коми челядьöс да грамота нач тöдтöм нывбабаясöс югдöдöм вöсна. “Гижöднад он вермы висьтавны сылысь мывкыдсö, бур сьöлöмсö, тöждысьöмсö... А коми кыв пондаыд кутшöма Агния Андреевналöн сьöлöмыс висьлiс!” Веськыда пö тшöктöмöн тшöктiс унджык гижны комиöн газетö, ёна радейтлiс коми театр, вopcic и котыртавлiс драмкружокъяс, вуджöдалiс роч пьесаяс, ассьыс гижалiс. А кор пö “Сыкомтевчук” кутiс кусны, ёна пыр дивитiс миянöс. Тшöктывлöма и Виктор Алексеевичöс унджык пьеса гижны, кöсйысьöма весиг öти тема ассьыс сетны! Абу тай весьшöрö Виттор шуöма газетас казьтылана гижöдторсö тадз: “Бур ань миян мунiс”.

И збыльысь, тыдалö, быд тöдсаöс шемöсмöдöма А. Сухановалöн кулöмыс. Колö чайтны, абу куш сы вöсна, мый Агния вöлöма том на (сöмын 41 арöс) да мичаник нывбабаöн. Казьтывлöма шань ёртсö А.Н.Чеусова (Коми издательствоын найö кыкöн вöчöмаöсь медводдза öтувъя воськовъяс), мам кодь сьöлöма морт йылысь гижлöма Спирö Прокö - П.С.Попов (Агния Андреевна ордын Кöрткерöсса школаын велöдчысь). Казьтылöма вöлi пöрысь арлыднас нин И.Г.Коюшев, комынöд воясö Коми областьöн веськöдлысь, а кызьöдъясас - Додзса псевдонима коми гижысь, КАПП-са член, И.В.Изъюров, мукöд... Тайö сöмын сiйö казьтылöмъясыс, кодъяс веськавлiсны менам, öти морт син улö. А код тöдас, мыйта вöлi ставыс!

Мыйла но унаöн да сэтшöм шоныда казьтылöмаöсь? Вöлöма мыйысь. Но ставсö, мед кöть дженьыдика, сьöрсьöн-бöрсьöн.

Чужлöма Агния Вомынса Першинскöй грездын вель крепыда олысь Дарья Максимовна да Андрей Алексеевич Даныциковъяс семьяын 1884 вося тöв шöр 23 (сэкся ног—11) лунö. Ичöтнас велöдышталöма нин грамотаас батьыс. Сэсся ичöт школа, водзö - земскöй училище, Сыктывдiн карын прогимназия, учитель удж öнiя Кöрткерöс да Кулöмдiн районъясын. Сiйöс казьтылысьяс индöны лолыслысь медся тöдчанасö: пыр пö кылiс сьöлöм дойсö миян пемыдлун вöсна да медводдзаяс лыдын босьтчис лöсьöдны коми школа. Кор Коми муын выль культура да быдöнлы вылö (массöвöй) школа лöсьöдны кöсйысьяс медсясö вензисны на, позьö-ö да колö-ö велöдны чужан кывйöн, А.А. Суханова босьтчöма нин тайö уджас. Но öд ай-мам сёрни вылын кö велöдны, сы могысь колö литература. И сиктса писькöс да сюсь учительница босьтчöма лöсьöдны коми гижöдъяссö ачыс, сэсся кыскöма таö и медматыс тöдса профессиональнöй гижысьсö - Кöрткерöсас олысь Михаил Лебедев-Юсьöс. Агния Суханова йылысь сёрнитiгöн либö гижигöн оз öтчыд ковмы шуны “медводдзаöн”, “медöдйö”, “медтэрыба” - уна “мед”. Тайöс позьö вöчны, кутны кö тöд вылын, кыдзи сiйö гижöма, вуджöдалöма коми вылö, чукöртöма- бöрйöма сöмын на чужысь национальнöй школалы колана-лöсяланасö, кор чöв усьлыны абу лэдзлöма мукöдлы. Öньö Агни нима том нывбаба пуöма удж вылас, абу сетлöма аслыс некутшöм личöд. Тадз и сэк, кор сиктсьыс корасны карö “Коми комиссияö”, и уоноса то öти ног, то мöд ног шусьысь юкöдын да юкöдулын (отдел да подотдел) уджалiгöн, то 1920 вося медводдза лунсяньыс издательствоын (дзик медводдзаöн сiйöс да А.Н.Чеусоватö буретш и корöма В.А.Молодцов, коми книга лэдзанiнас нач медводдза жö юралысьыс). И тадзи öд во бöрся во да, позьö шуны, лун и вой! Содтöд - пöшти пыр вöлöмны тшыгйöсь, коркö пö вöлi зöр сетыштасны неуна, коркö изтöм жö кутшöмкö нянь муртса. “Сылöн мудзлытöм тöждысьöмöн лöсьöдöма öнöдз школалы став коми литературасö”, - гижöма 1925 воас Сандрик Микол. А издательствоöн абу кö и меддыр веськöдлысьясысь öти тöдiс, мый шуны. Сöмын “Школаын лыддьысянтор” сборникын петöма А.Сухановалöн 100 сайö гижöд! Дасъясöн - мукöд изданиеын. Дерт, Öньö Агни висьмöма чахоткаöн, кыдзи и ёна унаöн сэкся коми интеллигенцияысь. Сiйö мунöма 1925 вося гожöмнас Башкирияö, надейтчöмаöсь на видзны татшöм шань нывбабатö да, гашкö, отсалас пö, юыштас кö кумыс. Сёр! Мöдöдасны на ещö Москваö, но дзик жö нин нинöм оз вермыны вöчны. Сэнi и дзебöмаöсь. Стöча кö, кöнi—??? (И.Г.Коюшев уна во мыстиыд, тыдалö, ылалöма: сылöн казьтылöмъясын шуöма, кулiс пö Уфаын, кöнi ачым сэки тшöтш вöлi. А “История коми литературы” коймöд томын, помас, кулашнiннас индöма Усть-Сысольск. Сэнi неладнö индöма и чужан лунсö: январь 24 лун пö).

Со кымын во нин абу Öньö Агни. А нимыс-эм! Сiйö колис, сы вöсна мый мортыс ловсö пуктытöдз “пещитчöма” (В.Савин) став комисö югыдлань вöрзьöдöм-нуöдöм вöсна.

Г. Беляев

Коми му. – 1999. – 23 января