Просмотр кода страницы Беляев, Г. Сылöн бордъя вояс


== '''Сылöн бордъя вояс''' ==

== '''Март 6 лунö Иван Изъюровлы тырис эськö 85 арöс''' ==
<blockquote>Сiйö некор асьсö эз пуктыв гырысьяс, воддзаяс лыдас, буракö. Аддзис асьсö кыськö мöд-коймöд радъяссьыс. Чайта да, гашкö, тадз аддзис асьсö нöшта и сы вöсна, мый НКВД-лöн ыджыдалöмыс кызь во кежлö (кöть сэтчö пырö и война) торклiс сылысь творческöй лов шысö.

- Me öд, Генадей, абу ыджыд гижысь. Некор кыз книгаястö эг лэдзлы.

Но висьт-повестьтö да очерктö сы мында гижис — мед эськö мукöдлы енмыс сетас та мындасö. А выльсö пыр бура кылiс-казялiс.

Буракö, тшöтш и сы вöсна, мый некор эз эновтчыв журна- листикаысь. Некöн! Весиг фронт вылас — некор эз пов таысь да эз öтдортчы. Кызь арöс тырттöдз на лоис збыль вылас веськöдлыны «Ударник» журналöн, кöть ciйö пeтic мöд редактор ним улын. Кор Ко- миö воис телевидение, 54 арöсаöн эз повзьы видлыны тайö выль сикас журналистикасö. Сылы и тайö колö вöлi.

Вежöрыд тай велалöма сiдз: эм тэнад тöдса бур йöзыс вель уна. И нэм кежлад мед эськö найö колины. Но олöмас сiдз оз овлы. Кодкö да кодкö усьö-гылалö, и казялан — мыйкö да кодкö оз тырмы. Ыргыны заводитö быттьö кодарсянькö...

Эз ло Иван Изъюров. Иван Васильевич. Позтыкерöсысь Матвей Микайлö Иван Васька Иван.

Думыштан да, мортыс олiс бергалiс на пöвстын, кодъяс вуджисны Коми и Россияса, весиг СССР-са да став мирса легенда-мойдъясö. Со лыддя сылысь «Ыркыд лысваа асывъяс» очеркысь олöм-казьтылöмсö да син водзö сувтö: 14 ли 15 арöса вöй детинка пырö Сыктывдiн карса öнiя Бабушкин нима улич вылын сулалысь кык судта керкаö. Сэнi Коми книга лэдзанiн.Кутшöм могöн том мортыс? - юасьö пырысьыслысь мелi гöлöса нывбаба, а мöдыс висьталö, Позтыса клублы пö выль коми пьесаяс колöны, спектакасьны нинöм серти. Сэсся коркö дыр мысти тöдмалас, мый нывбабаыс - Агния Андреевна Суханова, комияслы югыд нима, шондi сьöлöма морт. А сылы паныд пукалöма мужичöй...

«Лöсьöдчи нин бöр петны, но пызан дорын пукалысь мужичöйыд юалiс менсьым:

А тэ менö он тöд? Нёбдiса Виттор ме, гашкö, кывлiн? - и паськыда , нюммунiс.

Ме синъясöс паськöдöмöн видзöдi Нёбдiнса Виттор вылö, кодöс матысянь эг на аддзыв...

Кольöм тöвнас на ми Позтыса клубын сувтöдiм сылысь «Шондi петiгöн дзоридз косьмис» пьесасö. Ме сэнi Иван Сигеровсö вopci. Аддзылi öтчыд Нёбдiнса Витторсö и карын, карса Народнöй домын спектакльын. Сувтöдiсны сэнi сылысь «Райын» пьесасö, ачыс Нёбдiнса Виттор вopcic Сюзь Матвейсö. Ёна меным воис сьöлöм вылö спектакльыс. Гашкö, сы бöрын и заводитi ворсны ачым балалайка вылын.

Me висьталi та йылысь аслыс Нёбдiнса Витторлы.

- Со кутшöм тэ ещö артист вöлöмыд, трустö!»

Гылыда серöктö нималана нин поэт-драматург - артист-режиссёр... да нöшта и «Югыд туйса» редактор: öд тöдмасис сылысь Иван Сигеровсö ворсыськöд, кодi кöть и «сэтшöм жö ичöтик, шег кодь ачыс», но со и кывбуръяс гижысь Изъюр Иванöн висьтасьö. Тайö шегйыслы шуö, селькорöн пö лоан. И кывбуръястö ыстан, видзöдлам. Гашкö, меысь бурджыка кутан гижны.

Детинкасö буретш тайö сёрниыс, тыдалö, борд вылö помöдз лэптiс. 1925 вося гожöмнас «Югыд туй» газетын петöма Изъюр Иванлöн «Мöсъяс баксöны» гижöд. Ним улас пасйöма: «Романысь юкöн». А гижысьлы 15 арöс. Вот тадз! Мöд во помнас кутiс петны «Ордым» журнал, а сэнi лои йöзöдöма сылысь и кывбуръяс.

Тöдöмысь, абу ставыс тайö öти сёрнисяньыс петöма Изъюр Иванлöн. Колö кутшöмкö енби, тыдалö, кор асьтö он на тöд, но и сэксянь нэм кежлад паметяд югыдöн кольö ю дорын гожся стрададырся ыркыд лысваа асыв. Лöкчим дорын дзирдалысь шондiа асывсяньыс и босьтчö казьтывны очеркас ассьыс олöмсö

Иван Васильевич, кор эз на некод тöд, мый сiйöс виччысьöны и ловтö садьмöдысь мича асывъяс, и бушкола лунвойяс. Быттьö пырмунiгмоз, но панассö босьтiгöн на сiйö шуö:

«И век жö уна виччысянаыс збыльмö, пуктан кö ассьыд вына киястö найöс матыстöм вылö...»

Сэсся этшаысь сёрнисö сiдз кежöдлö, мед висьтавны аслас «ки пуктылöм» йылысь - аслас старанньö йылысь. А пырджык бур йöз йылысь, кодъяс ciйöc туйдöмаöсь, велöдöмаöсь, отсалöмаöсь. А та серти кö, Позтыкерöсысь петöм детинкалöн туйвизьыс - сiйö вель стöча миянлысь история пасъялöм.

Мед, колöкö, сöрöны öнi быдторсö найö, кодъясöс чизрöдлö 1917 воысь, но мый сiйö ceтic сьöд пемыд коми йöзыслы (буретш сьöд пемыдыслы), воссьö Лöкчим вожса вöръясö вошöм грездысь Матвей Микайлö Иван Васькалöн медыджыд пиыс серти, пöрысь дырйиыс нин гижöм казь- тылöмъяс серти. Лыддьöй найöс. А ме сылысь босьтыштала-нетшкыштала туй дор пасъяссö сöмын тайö «Ыркыд лысваа асывъяс» очерксьыс.

«Бать менам лыддьысьны ни гижны эз кужлыв, нэм чöжыс крестöн кырымасьлiс... Мам менам кужö вöлi лыддьысьны и кырымасьны».

Мамсянь пöльыс, Павел Öльöш, вöвлöма адöй удал вöралысьöн. И судзсянаджык олöма. Лючкиджык керка вöлöма сылöн, весиг горничаа -  сöстöм жыръя. И кор пö Позтыас воöма медводдза велöдысь, сiйö олöма Павел Öльöш ордын, горничаас. Со кытысянь И. В. Изъюров мамлöн, Павел Öльöш нывлöн лыддьысьны-кырымасьны кужöмыс.

«Мам менö ичöтысянь велöдiс лыддьысьны. Кутшöм книгаяс вермисны сэки лоны сиктад? Сöмын молитвенникъяс, енъяс да святöйяс йылысь. Батюшкоöн да енмöн миянöс повзьöдлiсны… Но миян челядь дырйи кадыс лоис мöд, школаясысь попъястö вöтлiсны, и мöд сикас книгаяс заводитiсны воны школаад. Сиктъясад воссялiсны клубъяс, лыддьысян керкаяс... Позтыса школаын нин миянöс велöдысь Текуса Максимовна Маегова дорйис школьникъясöс попысь, кодi вöлi скöрмас да партаад люкöдас ли кучкас весиг.

Школаö первойысь ме мyнi вит арöсöн. Дерт, школаö менö эз босьтны. Кутшöм на велöдчысь!

Мöд вонас век жö босьтiсны… Регыд и пуксьöдiсны мöд классö...

(«Пуктан кö ассьыд вына киястö...»).

Кор помалi сиктса школаад велöдчöмтö... менö мам телегаа вöлöн лэччöдiс карö мöд тшупöда школаö... Карса школаясö велöдчыны кутiсны воны и сиктса челядь - крестьяна пиян...

Сэки öд велöдчысьясыдлы общежитиеясыд эз вöвны, меным ковмис корсьны квартира... Менам шуд вылö, ме веськалi зэв бур семьяö...

Позьö шуны: «воши» ме книгаяс пöвстад! Школаса библиотекаöн веськöдлiс естествознание да зоология велöдысь Николай Степанович Холопов. Зэв авъя да шань, бур сьöлöма морт öдйö казялiс книгаяс дiнö менсьым кыссьöмсö, корис лоны сылы отсасьысьöн.

Öтчыд Николай Степанович чургöдiс: меным книга да шуис:

- На, лыддьы... Гижысьыс тэнад земляк - Кöрткерöсын олö».

Иван Изъюровлöн выльысь медводдза книгаыс — «Кор дзоридзалö льöм» (1957 во).

«Выльысь медводдзаöн» лоис эсiйö сьöд кызь во бöрас. Сы вылын меным гижöма «Геннадий Беляевлы авторсянь. И. Изъюров. 26/Х-58 во». Тöд вылын кутсьö, быттьöкö тайö вöлi Визинын, районса культура керкаын. Волiсны сэтчö коми гижысьяс - сёрнитiсны, книгаяснас вузасисны. «Кор дзоридзалö льöм» книга висьталö Изъюровлöн ловнас выльысь кыпалöм йылысь. Сэтчö чукöртöма вель кузь кадся гижöдъяс. Со воддза висьт помас - «Олöм вежигöн» - сулалö «1935-57 во», а «Мо- ряклöн трубка» помысь лыддям «1945 во. Карельскöй фронт». Мукöд висьтыс медсясö 1951 —1955 вося.

Видзöдала выльысь да, ме эськö öнi, гашкö, ас мозыс жö шуи, мый ciйö абу, дерт, медся ыджыд коми гижысь. Либö тадз: абу коми кывйöн медся мичаа вöдитчысь. Да и выльтор вылас, и художественнöй гижöдъясас шыасьны вывтi тэрмасис. Коркö смелмöдчылi «Миян грездса нывъяс» повестьсьыс критикуйтны. Повестьыс вöлi, позьö шуны, мекöд öти классын велöдчысьяс йылысь. Но мый кöть он лыддьы - ставыс ясыд, ставыс гöгöрвоана.

Очерксьыс:

«Öтилаын дöзмасны дон мынтытöмысь, лоö вуджны мöдлаö. Кымынлаын ковмис овны карад велöдчигчöжыд! Öтчыд тай бать, заводскöй пес чурка кераланiнысь войгас, меным сетлiс жö öти руб. Ме тайöс ог норасьöм ради гиж. Сьöкыда вöлi батьлы шёдö деньгаыд... Сiдз нин карын вердiсны квайт тöв чöж. Карад картупельтö да кын йöвтö гортысь вайлiсны.

(«Пуктан кö ассьыд вына киястö...»)

Кыдзкö öтчыд гожся каникулъяс дырйи Позтыын ме сёрнитi сиктса учитель Афанасий Яковлевич Макаровкöд. Мыйлакö сiйö менсьым юалiс: гижа ог ме кывбуръяс коми кыв вылын. А ог кö гиж, то -  мыйла. Миян классын вöлiны нин асланым поэтъяс... Вот та бöрын и ме тшöтш думыштi кывбуръяс йывсьыд».

Та бöрын и сэсся лоöма Нёбдiнса Витторкöд тöдмасьöмыс.

Частöджык мöдi аддзывны Иван Васильевичöс, кор пыри Коми пединститутö велöдчыны. 1959 вося августсянь, буракö, «Коми колхозник» бара лоис «Югыд туйöн», и сiйö мыйкö дыра уджалic тайö газетас. Ме вöлi мыйкö нырышта кö бумага вылö, сылы и пырта. Коляс ордас видзöдлöм вылö.

Пырав лун-мöд мысти. Либö рытнас кö - гортö. Ме орчча керкаас ола. Телефон эм, звöнит.

Велöдыштас-туйдыштас, сэсся выльысь вöчан и, видзöдан да, весиг лыддьыны позьö рецензиятортö. 1963 воö бласлöвитiс медводдза висьт нуны «Войвыв кодзулö».

Коркö дыр мысти веськавлiм вой узьны Кöрткерöс райисполкомса öти жырйын: асфальт ни Сыктыв вомöн пос эз на вöв, и сиктыс Сыктыв- карсяньыд сэки ылынджык на кажитчис. Кор кыкöныд - висьтасьö вель окотапырысь:

НКВД-ад допросъяс дырйиыс менö вöлi, табуретсö вывлань кокöн бергöдасны да, öти кок вылас пукöдöны. Узьны оз сетны. Менö эз нöйтны — абусö висьтавны ог кут. А узьны суткиясöн эз сетны. Кырымав пö, мый тэ английскöй разведкакöд йитöда. Ме нюмъяла: да, Англиялы кöсйыси сетны дзоньнас Удорскöй район, мем ко Англияыс сетас ассьыс флотсö. Öлöдiсны: тэкöд танi оз шутитны. Öдйö гöгöрвои, мый татчöс войтырыскöд шмонитны оз позь.

Иван Васильевич вöлi шмонитö ас ногыс. Некутшöм нюм ни нинöм чужöмас, а шуас мыйкö — кутчысь кынöмад. Сöмын пыдö вöйöм ичöтик синъяссьыс вöлi кутшöмкö вильышлун, челядь сямаöс, казялан жö. Менам паметьын, да и бумага вылын, эм сылöн некымын теш-анекдот. Збыль вöвлöмторъяс. То öти, Иван Тороповлöн висьталöм серти:

Войся Петрозаводсктi бур ужын бöрын мунöны куимöн: Иван Изъ- юров, Иван Торопов да сылысь унджык гижöдсö роч вылö вуджöдысь Станислав Панкратов. Кык томджык ёртыс восьлалöны кытi подаяслы колö ветлöдлыны да ассьыныс сёрнитöны-варовитöны. А Иван Васильевич быттьö торйöдчöкодь, лашсьöдö туй шöртiыс. Вой кöть, а машинаыд карад пыр журъялö тай. Торопов тöждысьö олöма ёрт вöснаыд, видзöдалö сы бöрся да шуö:

Иван Васильевич, тротуар вылас кеж! Машина улас сюран но!

Мöдыс воча:

Нинöм, нинöм, зонъяс. Me литературнöй энциклопедияö веськалi нин.

- А пукалi ме Вöркутаад. Сэсся кор лэдзисны, кежавлi Адзваö, Савиныдкöд аддзысьлыны. (Та йылысь писатель бурджыка висьтавлiс очеркын, кодi, буракö, шусис «Виктор Савинлöн уличаöн» да петалiс «Войвыв кодзулын»). Сэсся фронт вылад босьтiсны...

Сэтысь менам нинöм торйöн висьтасьнысö. Радöвöйöн вöлi. Медся вой- вылас веськалi Норвегиялань. Воюйтi кыдзи ковмис. Газетъясö вöлi, кор да мый верма, гижа. Мыйсюрö и татчö на ыстывлi.

ОЧЕРКСЬЫС:

...«1927 вося тулысын, Великöй Октябрлы 10 во тыран воö, помалiм велöдчöм Сыктывкарса шöр школаын да петiм асшöр туй вылö.

1927 вося арын Позтыысь петiгöн ме öдвакö лысьтi думыштны, мый муна писательлысь туй писькöдны.

Коми книга лэдзанiнын... велöдчи лыддьыны корректура, котралi типографияö гранкаясла. Медводдза корректура лыдди Нёбдiнса Витторлöн «Инасьтöм лов» пьесалысь... Корректураястö лыддигöн ме сюся видзöдi, кыдзи гижöны коми гижысьяс. Позьö шуны — велöдчи. Сэсся тöдмасялi аскöдныс гижысьясыскöд.

(«Пуктан кö ассьыд вына киястö»...)

1929 во помланьын «Ордым» журналлысь нимсö шуöма вöлi вежны, сетiсны сылы 1930 воö выль ним— «Ударник». Журнал водзö лои сувтöдöма ыджыд мог... Та могысь жö журналсö вöлi шуöма лэдзны тöлысьнас кыкысь. Менö вуджöдiсны журнал редакцияас секретарь пыдди, лои редколлегияса членöн.

Шуа веськыда: удж вöлi сьöкыд. Журналын весиг эз вöв и мездöм редакторыс. Уджалысьыс вöлi öтнам ме...

Комынöд вояс заводитчигöн... ме Москваын жö вöлi, уджалi литературнöй редакторöн «Партиздатын», и кытчö менö Сим Вань эз новлöдлыв!

Меным уси ыджыд шуд 1932 вося арын пукавны Москваса Большой театрын А. М. Горькийлöн литературно-общественнöй уджлы 40 во тырöмлы сиöм торжественнöй рыт вылын, кывзыны А. М. Горькийлысь дженьыдик выступление...

И ещö öти ыджыд казьтылöм менам сiйö кадсьыс. Позьö шуны — вунöдлытöм казьтылöм — Николай Островскийöс аддзылöм.

Да, кымын аддзысьлöм, синнад судзсьытöм ыджыд удж... Кöть и мöд коми гижысь сiдзсö шулiс, но тшöтш и Иван Изъюровлы тайö кадыс, кызьöд-комынöд воясыс вöлöмаöсь «бордъя воясöн».

Олöм помланьыс, но кор асфальтыс куш, беддьöн Иван Васильевич вöлi ведь ылöдз на гортсяньыс тотшсьöдлö, аддзысьлывлiм да сёрниö пыравлiм.

Кыдзи делöясыд да здоровьеыд, Иван Васильевич?Делöясыд мый эськö, да вот гижны лоис дугдыны. Дзик ог уджав: паметь вошис, -  жугыльпырысь вочавидзас. А сэсся чöв усьлöм бöрын дзик веськодя, быттьö ковтöмтор йылысь содтас:—А здоровьеыд öд мый! Врачьяс шуöны, тэнад пö некытi нинöм торйöн оз вись, организмыд пöрысьмöма.Мен кажитчö, Иван Васильевич думсьыс дась вöлi, кыдз шуласны, смертьсö примитны. Повтöг, чöла-спокойнöя, нэмсö нюжöдны зiльтöг. Аслас радейтана уджтöгыс сылы, буракö, унатор лои веськодьöн. И тöдiс, мый быдторйыс кöть сы вывтi мунiс, лючки лои олöма да коми литературалы сы мында лои вöчöма, мыйта выныс да сямыс тырмис.</blockquote><blockquote>85 арöссö муртса эз тырт. Со тай — нелямынöд луныс да тайö ыджыд юбилейыс пöшти öтлаасисны.

Г. БЕЛЯЕВ</blockquote>