Просмотр кода страницы Коюшева Н. Пыдди пуктана велӧдысь

Нина Петровна Мишаринаӧс ыджыдвидзсаяс тӧдӧны, кыдз тӧлка да бур велӧдысьӧс, общественнӧй уджын водзмӧстчысьӧс, депутатӧс. Ыджыд пай сійӧ пуктіс и ас сикт да район сӧвмӧмӧ.

Ань аслас уджалан туйвизьӧн бӧрйис велӧдысьлысь удж, муніс мамыслӧн да сысянь ыджыд рӧдвужлӧн кок туйӧд. А ышӧдіс найӧс Агния Андреевна Даньщикова (Суханова), коді лоӧ Ниналы ыджыд мамыслӧн рӧднӧй чойӧн.

Кыдзи тӧдса, Агния Суханова ачыс вӧлі велӧдысьӧн. И кӧть Петровна сійӧс асьсӧ матысянь эз нин тӧдлы, но мамыслӧн висьталӧмысь унатор тӧдмаліс.

# Агни тьӧт йылысь мам ёна висьтавліс, - казьтылӧ нывбаба. - Быдӧнӧс - и рӧдвужсӧ, и став тӧдсасӧ сійӧ ёна ышӧдіс пӧ лоны велӧдысьӧн. Гашкӧ, та вӧсна и миян рӧдын велӧдысьыс уна. Со и ме тшӧтш бӧрйи тайӧ уджсикассӧ, менам пиӧй велӧдысь.

Нина Петровна позьӧ шуны школаас и быдмис. Ичӧт дырйиыс, кор мамыс велӧдіс гырысьясӧс рытъя школаын, нывка тшӧкыда пукавліс сылӧн урокъяс вылын. Сэк и велаліс гижны. А кор ачыс нин помаліс школа, муніс велӧдчыны Новгородса велӧдысьяслӧн институтӧ.

Ыджыдвидзса школаӧ Нина Петровна воӧ уджавны 1952 воын роч кыв велӧдысьӧн. Велӧдӧ и ачыс водзӧ велӧдчӧ уджысь орӧдчытӧг Сыктывкарса КГПИ-ын. Тайӧ школаын нывбаба зілис 40 во, на пиысь 30-сӧ - директорӧн. Та мында вонад быдторйыс вӧлі: и бурыс, и сьӧкыдыс. Но ӧтувъя котырын уджалігӧн да водзмӧстчӧмӧн шедӧдӧмъяс эмӧсь. Ӧд буретш Нина Петровна дырйи, 1982 воын, Ыджыдвиддзын воссис кирпичысь вӧчӧм выль школа.

# Ок и уна жӧ синва кисьті, - висьталӧ Петровна. - А кымын чина йӧзлӧн кабинет лои кытшовтӧма? Но бур йӧзыд тай эмӧсь жӧ, висьталісны, кытчӧ колӧ шыӧдчыны, медым миян сиктын заводитісны кыпӧдны школа.

И кӧть 27 во нин коли выль велӧдчанін восьтӧмсянь, но талун оз сӧмын Нина Петровна, но и мукӧд велӧдысь, ӧніӧдз бура помнитӧны, кутшӧм сьӧкыда муніс школа кыпӧдӧм удж.

# Ёна падмӧдісны лёк туйяс, - водзӧ казьтылӧ нывбаба. - Бетонысь сваяяссӧ баржаясӧн ковмис вайны. Но школа кыптіс ӧдйӧ.

Нина Петровна 16 во нин пенсия вылын. Но школакӧд эз и янсӧдчыв. Тшӧкыда пыравлӧ велӧданінӧ, юксьӧ удж-опытнас ӧнія велӧдысьяскӧд, велӧдчысьяскӧд. Найӧ сылы рӧдвуж кодьӧсь.

КР-са пыдди пуктана велӧдысь (1976 воын сетісны Н.П. Мишариналы тайӧ нимсӧ) пасйӧ, челядьӧс мывкыдсьӧдӧм - абу кокни удж. Но радлун пӧ вайӧ сійӧ, кор тэнад быдтасъяс лоӧны бур йӧзӧн. Районын да республикаын талун унаӧн тӧдӧны коми кывбуралысь Александра Мишаринаӧс, драматург Алексей Поповӧс, сьылысь Михаил Бурдинӧс, журналист Павел Симпелевӧс. Ставнысӧ найӧс ас кадӧ велӧдліс Нина Петровна. А кымын вӧвлӧм велӧдчысь на олӧны орччӧн, Ыджыдвиддзын.

# Велӧдчысьясӧс пыр велӧдім радейтны ас чужанін да сиктса удж, - висьталӧ вӧвлӧм велӧдысь. - Ӧні каитча. Ӧд унаӧн велӧдчисны трактористӧ, йитісны уджсӧ видз-му овмӧскӧд. А олӧмыс со кыдзи найӧс дзескӧдіс, унаӧн колины уджтӧг.



Нина Коюшева

Звезда. – 2009. – Рака (Март). – 3 лун