Просмотр кода страницы Митюшева, Н. Öньö Агни: 125 во тырöм кежлö

Агния Андреевна Суханова (Даньщикова) – Вомын вöлöсьтса крестянин ныв. Чужлöма 1884 вося январ 23 (важ ногöн 11) лунö. Велöдчис Вомнын, Подельнöйын да Сыктывдинкарын. Та бöрын 1900 восянь нач 20 во уджалöма велöдысьöн. Нель во кежлö веськавлiс Волся сиктö. 1905-öд вося революцияыд том аньтö танi и суис. Уна том йöзлысь синмыс сэки воссис, корсьöны вöлi веськыд туй вылö петны олöмас. Сöмын аслад велöдчöмöн, лыддьöмöн позьö вöлi тöдмавны пыдöджык олöмсö.1907-öд воын А.А.Суханова вуджис Пöддельнöй вöлöсьтö – Нöвик школаö (сiйö арнас самöй школаыс воссис), велöдiс сэнi 1915-öд воöдз. Сэсся вит во Кöрткерöсса школаясын.

Октябса революция быд ас кывъя йöзлы сетiс права ас кывйöн велöдчыны, кыпöдны культура. Кöрткерöсын олiгöн Öньö Агни комиöдöма рочöн гижысь Кл.Лукашевичлысь ворсанторъяс: верстьöлы – «Гажа лунъяс», челядьлы – «Са весалысь» да «Кöдзыд пöль». Сы бöрын сэсся Островскийлысь кык пьеса велöдысь чукöрöн лöсьöдiсны комиöн: «Бедность не порок», «Не так живи, как хочется». Тшöтш и «Лек энька» да «Суклясьысь» ворсанторъяс вöлi пуктöма народный дом сцена вылын. Суханов гозъя кындзи ворсысны Кöрткерöсса том йöз.

1920-öд воын гожöмнас ыстылiсны сiйöс УОНОсянь Устюгö политпросвет курс вылö, арнас корисны Сыктывдiн карö инструкторö библиотекаяс удж дорö. Кор УОНО бердса нацмен юкöднас пондöма веськöдлыны В.А.Молодцов, сiйö босьтiс А.А. Сухановаöс коми книгаяс лöсьöдан удж котыртны. Сiйö удж вылас сэсся и олiс кувтöдзыс – кулi 1925-öд воын сентяб 13-öд лунö Мöскуаын.

1925-öд вося йирым (октябр) 20-öд лунö Сыктывдiн карын вöлi нуöдöма Öньö Агниöс казьтылан рыт. Сёрнитicны рöдвужыс, войтырöс велöдöмын уджалысь котыр, гижысьяс и. Шуисны йöзöдны тайö шондi югöр кодь аньыслысь уджъяссö, сы йылысь казьтылöмъяс да фотосö, медым некор оз вушйы тöд вылысь. Иван Öльöксандрович Суханов верöсыс дона да муса морт йылысь казьтылiс:

«Школаын велöдöм уджтö нуöдiс зэв кужöмöн, уджалiс ёна сьöлöмсяньыс. Велавтöмджык челядькöд торйöн вöлi мырсьö. Шоч рытсö коллялiс челядьтöг. Код рытö лöсьöдчöны школаса кутшöм-сюрö праздник кежлö, либö ныв-челядькöд вурсьыны, вышывайтчыны велöдчöны. Эз эновтчыв А.А. и школа помалысьясысь. Бурджык велöдчысьястö унаöс мöдöдiс водзö велöдчыны. Бать-мамыд эз лэдзны – кымынысь ветлас на дiнö, дзик мырдöналöмöн мукöдсö гортсасьыд кыскас да мöдöдас гырысьджык школаясö. Сэсся А.А. пыр школаад коми кывйöджык вöлi сетчö, сы вöсна челядьыд кокниджыка сы дiнö сибöдчисны. Эз вунöд А.А. и ассьыс этша велöдчöмсö. Пыр вöлi шогсьö-элясьö ыджыд школаö веськавтöм вылö. Карас сэк гимназияыд эз на вöв, а сэн велöдчытöг оз позь вöлi веськавны и высшöй школаö. Кысь-мый позьö вöлi выльтор тöдмавны велöдöм йылысь, олöм кыпöдöм йылысь – сьöлöмсяньыс сэтшöм инад мунлiс.

1905 вося революцияыд выль нигаяс пыр да ыстöм революционеръяс пыр индiс А.А-лы деревняад уджалан туйсö. Школа удж кындзиыд ловины мукöд могъяс. Мед ёнасö сiйö сетчис нывбаба кост удж вылö да вина ювалöмкöд водзсасьöм удж вылö. Татшöм уджтö сэки ёна йöзöдöмöн оз позь вöлi вöчны – сар правительстволöн и сиктъясад вöлiны ёсь синма видзöдысьяс да ёсь пелья кывзысьяс. Старшинакöд вензьöмысь, код юрöн вöлi локтöма да, судö веськавлiс, мыждылiсны да сэсся кыдзкö бöръясö мездiсны».

Бöръя воясö Агния Андреевна медся ёна сетчис коми кыв сöвмöдан уджö. «Сэки уджавны лови ёна, – водзö казьтылö И.А. Суханов. – Дерт сiйö эз öтнас уджав. Йöз вöлi вель уна. Сэмын öд и уджыс вöлi тырмымöн. Коми кывнад муртса на заводитiсны лöсьöдны гижанторъястö. Нигаястö колö вöлi регыдöн лэдзны, уна пöлöс. Дась гижöмыд абу, ставсö сэнi жö лови войтырыслы лöсьöдлыны, кокниджык уджöн вель на эськö дыр нигаясыд эз артмы. Ёна уджалöмыд да омöля сёйöм-ювöмыд (самöй тшыг воясыд вöлiны) слабиник морттö венiсны. 1923-öд воын Агния Андреевналöн тöдчыны кутiс туберкулёз висьöм. Гожöмнас 1924-öд воын ветлiс Пöддельнöй санаторийö лечитчыны. Этша кокньöдöм бöрад уджсьыд бара на эз эновтчы. 1925-öд воын тöвнас бара висьöмыд öддзис. Сентяб 13-öд лунö узиг костiыс мудзöм сьöлöмыд сувтöма». (И.А.Суханов. Коми Республикаса Нация Архив. Ф.962, о.1, л.1-2).

Суханова Öньö Агнилöн став выныс пуктöма коми крестянин югдöдöм, кыпöдöм могысь. Верöс кывъяс дорö гижан удж йылысь пасйöдсö колö содтыштны.

Буквар тöдмалöм бöрын посни войтырлы лыддьысьны петöма «Шондi югöр» небöг 1921 воын – велöдысь чукöрöн (тшöтш и А. Сухановаöн) дасьтöм öтвывса удж. «Школаын лыддьысянтор» – мöд классын велöдчан небöг, лэдзöма 1926 воын. Небöгын 210 листбок, но джынсö лöсьöдöма А.А.Суханова., мод джынсö – В.Т.Чисталев да А.Н. Чеусова. «Выль олöмлань» да сы бöрын «Выль туйöд» велöдчан небöгъяс лэдзöма коймöд да нельöд-витöд классъяслы. А.А.Суханова та могысь комиöдöма роч гижысьяслысь уна висьт, мойд, кывбур. Кыдз сыйö ачыс пасйöма, 1921-öд вося арын лöсьöдöма 26 гижöд школаын лыддьöм вылö. На пöвстын «Сюзь-букуй», «Асъя кыа», «Шабдi», «Зэр войтъяс», «Туйдорся катшасин» да мукöд. Унджыксö йöзöдöма «Выль туйöд» лыддьысян небöгын.

«Асъя кыа» висьтын дзирдалысь шондi выльысь ловзьöдö олöм: сьылöны лэбачьяс, садьмöны дзоридзъяс, видзöдчöны ваö. А со томиник бобув полö шондi öзйöмысь: вывтi тай дженьыд сылöн нэмыс. Колипкай велöдö: «Некодлы, некутшöм турунлы, пемöслы либö лэбачлы оз позь жугыльтчыны! Быд лун колö коллявны мичаа да бурджыка!» Помыс висьтлöн татшöм: «Быдöнöс чим гöрд визь пöльыштiс аслас шоныд рунас: сё вося кыдз пуясöс, öти здук кежлö чужлысь гебйöс, сыйö гебсö сёйысь чикышöс, мича чöскыд дука дзоридзъясöс да бытшкасьысь мисьтöм йöнмöс. Шондiыс колö быдöнлы».

«Сюзь-букуй» висьтын петкöдлöма сюзьлысь вöрын войбыдса олöм: шырöс куталöм, кöч бöрся вöтлысьöм, посни лэбачöс кыйöм, кынöм пöткöдöм бöрын ун петöм. Сöмын он на тай дыр кежлö вугырт: пöттöдз узьöмтö торкöны кöк, малямушъяс, ур да тулан. А сэсся и шондi югöрыс кутас синтö ёрны. Со и лэбис сюзь медсук вöр пытшкö, кытысь сiйöс некод оз аддзы.

«Выль туйöд» небöгас, «Ловъя вылысь гуалöм йöз» юрним улын, А.А.Суханова педкöдчö Ф.М.Достоевскийöс бура комиöдысьöн, а «Ме немтор» нимöн сетö зэв тöдчана гижöд Г.Успенскийлöн.

1923-öд воын география велöдöм могысь Ö.А.Суханова да П.М.Попов-Жугыль гижöны «Му тöдмалöм» небöг.Уна во Öньö Агни йытчылiс велöдан челядькöд став олöмнас да мöвпнас. ай-мамныс тöжднас. Та вöсна и чöжас сылöн сямыс да кужöмыс ассяньыд нин гижöдъяс лöсьöдавны. «Югыдлань» да «“Чурка”-Максим» ворсанторъясын сюрöснаныс лоö сиктса школа восьтöм да та понда важ, нитшсялöм оласног быран выйöдз воöм. Бöрö кольö кад, кор велöдчыны мунан туйыс унджыкыслы вöлi тупкöма, кор гежöд морт вермис писькöдчыны тöдöмлунлань. Максим да сиктса ныв-зон йылысь гижигöн Öньö Агни кутöма тöд вылын став коми войтырöс.

Сылöн эм меддонаторлы сиöм мойд. Сiйö – лыйлöм пöтка йылысь: «Регыд нин коньöрлöн овсяс». Лэбач дорö локтö Орт да бурдöдö сiйöс, а водзöссö корö бордъяс. Но оз ло сы моз. Помасьö мойдыс лэбач кывъясöн: «Бордтöг да лэбавтöг бурджык меным кувны». Сiдзкö, мездлун, ас гажöн овны позянлуныс таладор югыдысь на донаджык овлö.

Öньö Агни быттьö ас йылысь тадзисö гижö. Сiйö олiгчöж коми йöз понда тöждысис. Олiгтыр коми кыв сöвмöдiс. Татöгыс и олöмыс аньыслы вöлi абу муса. Коми войтыр да коми кывным сылы лоины меддонаторйöн.

Автор статьи НАДЕЖДА МИТЮШЕВА

ОПУБЛИКОВАНО В ЯНВАРЕ 2008 В ГАЗЕТЕ «ЙÖЛÖГА».