Агния Суханова
Коми календарь. 1924 во
Ми, коми йöз, весиг огö пыдди пуктöй, огö удж туйö лыддьöй керка-карта гö- гöр уджтö, пуöм-пöжалöмтö, челядь дöзьöритöмтö. Коми анькöд ко сёрниö воан сы йылысь, тэныд сiйö шуас: «Кысь бара миянлы, крестяналы, гöль йöзлы, пыр пелька овны, чöскыд сёян лöсьöдны, челядьöс дöзьöритны, ми öд абу господа, ми огö эштöй». Оз ков сiдзи шуны. Пелькыдлуныд, чöскыд сёяныд, дзоньвидза челядьыд öткодя быдöнлы колöны, öткодя гöльлы кöть озырлы. Пелька олöмыд, чöскыд сёйöм помыд öд дзоньвидзалун, кузь нэм. Быд мортлöн ас сайын пелька олöмыд, чöскыд сёян лöсьöдны велöдчöмыд, челядьтö дöзьöритöмыд. Сöмын тöдысьяслысь, кужысьяслысь велöдчыны, юасьны колö пыр. Медея ёна колö гра- мотаö нывбабалы велöдчыны. Грамотнöй нывбабалöн быдтор вылö син восьса. Мукöд государствоясын: Бельгияын, Англияын, Францияын важöн нин эмöсь «горт гöгöр» лöсьöдан школаяс. Сэнi быд школаын торья урокьяс вылын велöдöны, кыдз колö бура кужны лöсьöдны гортгöгöрса олöм. Йöзыс öд сэнi сы пыдди ёнöсь жö да гырысьöсь жö, челядьыд сё пытшсьыд сöмын 15 кулö. Миян йöзыд омöликöсь, поснидикöсь, челядьыд сё пытшсьыд 85 кулö.
Öнi тайö воясö войнаяснад, тшыгъялöмъяснад йöзлöн дзик воши дзонь- видзалун, висьмавлiсны быдсяма пöлöс висьöмьясöн, сэтшöм бать-мамлöн, дерт, и челядьыс оз мöд пöлöсöсь лоны. Сы вöсна со миянлы öнi колö ёна мырсьыны ас гöгöрнымöс, горт гöгöрнымöс, сёйöмнымöс, олöмнымöс лöсьöдны, бурмöдны, гажмöдны. Шуи нин тай, мися, йöзлöн дзоньвидзалуныд ставыс пельклунын, бур сёянын, челядьöс бура дöзьöритöмын. Быд нывбабалы колö öнiсянь вермасьны дурклункöд, лёк сёянкöд, челядьöс лёка видзöмкöд. Бара жö шуа, тайö куимторйыскöд вермас вермасьны сöмын грамотнöй морт. Кытчö он видзöдлы, мыйö ог босьтчы, быдлаö колö грамота. Сiйö миян медыджыд шогным. Колö тiянлы лыддьысьны, велöдчыштны, нигаястö комиöн, тöдса кывйöн гижны. Лыддянныд кö, ставсö асьныд гöгöрвоанныд, оз ков йöз синмö видзöдчыны. Кутам комиöн нывбабалы гижны.
Медся ёна колö кужны, кыдзи да мыйысь чöскыда пуны, пöжавны. Колö кужны сёянсö пыр выльысь выльö вежлавны, мед он ум öти полос сёянысь. Колö кужны чöсмöдны мыйсюрö, сёян пытшкö пуктöмöн, содтöмöн. Мед пызан вылад ваян сёянтö да дульваыд чепöсйö.
Сёйöм-юöм
Морт оз вермы овны сёйтöг-ютöг. Мортлöн олiгöн пыр вошö вын, киссьö туша. Киссьöм, вошöм выныс мортлöн бöр содö сёйöм-юöмысь. Морт — ловъя машина. Сiйö ньöтчыд оз лöньлы дзикöдз, пыр сылы колö шонтантор машина моз. Машина ломтытöг сувтас уджалöмысь, морт сёян-юантöг кулö. Дзоньвидза морт пытшкын шоныд 37 градус. Морт пытшкöсö чукöрмö суткиöн 30,72 литр пузьöдöм валöн мында шоныд. Сiйö шоныдсö ми сэсся разöдам ас гöгöрö, воздухö лолалöмöн, пöсьö, асмогасьöмöн. Сёян мортлы буретш сы мыда и колö, мыйта сiйö сетö- разöдö ас пытшсьыс,
Кымын уна морт уджалö, сымын уна сёян сылы колö. Мед ми тöдам, кутшöм сёянöн морт вермö ёнлунсö, дзоньвидзалунсö видзны, колö тöдны войдöр, мыйысь армöма миян тушаным.
Морт пытшкын медуна ва. Шуам, 65,52 кг кö кыскö морт, сэтöн 49,14 кг ва нин. Весиг лыын ваыд эм. Ва кындзи уна эм белок, чипан колькса еджыдыс. Яй, шабдi (сухожилье), вем, артмöма белокысь. Сы бöрын сэсся гос эм. Мыйкö мында сов. Вот кутшöмторъяс мортлöн олiгас, уджалiгас пыр бырö. Ciйö ставсö мортлы бöр колö пытшкас сюйны сёянöн. Уна пöлöс сёян пытшкын эм став коланторйыс мортлы: ва, белок, гос, сов, кракмал. Кракмал медуна быдманторьясын: няньын, картупельын, шыдöсъясын, анькытшын, сiйö мортлы зэв жö колантор, шоныдсö шонтыны öддзöдö морт пытшкын. Быд сёянын эм быд пöлöс пöтöсыс мыйкö мындаöн, сöмын абу öтмындаöн: öти сёянын унджык гос, мукöдтор этша; мöдын белок уна, мукöдтор этша. Сы вöсна öти пöлöс сёянысь морт умö, висьöмö вермö усьны.
Яйын вывтi уна белок, вель уна гос, кракмал ньöти абу. Няньын вывтi уна кракмал, этша белок и пöшти ньöти абу гос. Сы вöсна и колö миянлы сёянтö сорлöдлыны, вежлöдлыны ульлунья, кослунъя сёянöн. Сiдз кö кугам сёйны, сэки миян пытшкö пырас став коланторйыс. Белок миян пытшкысь быд уджöн олiгöн бырö, гос сьöкыд уджьясöн, висигöн. Сов пырö лыясö, вирö и мукöд кизьöрторъясö; петö пытшкысь пöсьöн, синваöн, асмогöн. Вöлöмкö, мортлы колö медуна ва, сiйö медсьöкыд овлö горш косьмигöн. Морт сёйтöг куш юöмöн вермö овны 3-4 ве- жонöдз. Ютöг и сёйтöг öти вежонысь дыр некод оз вермы овны.
Бара жö, кöдзыд, шоныддыръясö абу öткодь сёйöмыд. Тöлын кöдзыдiнъясын туша мортлöн öдйö кöдзалö, сэки колö уна гос да кракмал мортлы, сöмын öд найö шоныдтö сетöны миянлы. Гожöмын шоныдiнъясын позьö овны мортлы гостöг, кракмалтöг куш быдманторъяс вылын, йöв вылын.
Оз ков сёянтö уна лöсьöдны, колö бурöс сöмын. Сёяныд мед зэв бур, этшаджык да бур. Лёк сёянысь, абу кö сы пытшкын гос, сов, сакар, морт вермас сiсьмыны, омöльтчыны.
Сэсся вывтi уна эм пуöм-пöжалöм сайын. Бура пуöм-пöжалöм сёянысь сöмын мортлы пöльза лоö. Шуам, со белок, гос, сов, кракмал, сакар медколанторъяс эськö мортлы да, босьтам кö ставсö да öтлаö гудралам, эськö некод вомö оз босьт сэтшöмторсö. Сiйö жö торъясысь морт кужö зэв чöскыд, пöтöс сёян пуны-пöжавны, шуласны тай, дукнас пö ли видзöдлöмнас пöтан. Сэтшöм сёянысь сöмын мортлы ыджыд бур лоö. Сы вöсна быд кöзяйкалы колö велöдчыны чöскыд, пöтöс сёян лöсьöдны.
Пуöм-пожалöм
Колö тöдны быд сёянторьяс пöтöссö, ковтöмторсö, сэсся найöс торйöдны, мед пöтöсыс сёянас коляс, ковтöмторйыс шыбитчас пуигас. Сэтшöм шыбитассьыс сöмын морт омöльтчас ёнмöм пыдди. Сiйöн быд пуктасысь сёян лöсьöдiгöн колö ёна пуны, жаритны. Сöмын ёна пуöм, жаритöм сёян бур, пöтöса, чöскыд лоö.
Чери-яй нöшта на ёна колö пуны-жаритны, мед öтилатi оз коль уль пытш- кöсыс. Чери-яй зэв пöтöса, сöмын ёна жаритöмöн. Уль яйясысь вермас вуджны уна пöлöс висьöм мортлы (скöтыд öд висьö жö); ковъяс, чахотка, порсь яйысь тритина. Ёна пуöм-жаритöмысь быд висьöм паськöдысьяс бырöны. Сэсся пöтöс кындзи на мед эськö и чöскыд сёяныд. Быдöн тöданныд: чöскыд сёянысь сьöлöм бурмö. Кужысь пуысь-пöжалысь нинöм абуысь лöсьöдас вывтi чöскыд сёян, кужтöм эмсьыс оз вöч чöскыдтö. Кужысьыд сёянад содтас перечсö, лаврöвöй кортö, луктö и мукöдтор, сёяныдлöн дзикöдз вежсяс кöрыс. Сэсся пуан-пöжасян интö колö зэв пелька, гажаа видзны. Дозмукыд, тасьтi-паньыд, гырничьясыд мед пыр сöстöмöсь, мыськалöма, дзимдзурк.
Сетам дженьдöдöмöн.
Босьтöма Национальнöй архивысь.
Коми му. – 2009. – 14 марта
