Коми мулöн енбиа пи
Буретш татшöм ним улын кольöм середаö Пöддельнöйса школаын мунiс мероприятие, кодöс лои сиöма Иона Тимофеевич Чисталёвлöн чужан лунсянь 120 во тырöмлы.
Озыр миян коми му енбиа йöзöн. Быдöн найö пуктiсны ыджыд пай республика сöвмöмö. Унаöн на пиысь нималöны оз сöмын республика да Россия пасьта, но и суйöр сайын. Сэтшöм нималанаöн вöлiны и Помöсдiнысь Чисталёвъяс. Кöть кодöс он босьт - быдöн кодзув. На пиысь öти - Иона Тимофеевич Чисталёв (Жан Морöс) - общественнöй удж нуöдысь, ас му туялысь, коми школа котыртысь, велöдысь, велöдчан небöг гижысь, коми кывбуралысь, вуджöдчысь, литература критик, коми шылад лöсьöдысь.
Чужлöма Жан Морöс 1893 воын Вöлöгда губернияса Помöсдiн сиктын. Семьяыс вöлöма зэв ыджыд, 8 ныв-пи быдмылöмаöсь: Анна, Иван, Мария, Надежда, Вениамин, Иона, Вера, Зоя. Иона семьяын вöлöма квайтöдöн. Ичöтсяньыс нин зонка торъялöма ас арлыда челядьысь енбиалуннас. Вöлöма зэв збой, но сэк жö и мелi детинкаöн.
Школа помалöм бöрын Иона недыр кад уджалöма ямщикöн. Но тöвся кузь туйяс вуджигöн, жыннянлöн шы улö мöвпалiгöн гöгöрвоöма, мый колö велöдчыны водзö. И сiйö мöдöдчö Усть-Сысольскö. Сэтчöс училище помалöм бöрын Иона велöдчö Архангельскса учительскöй семинарияын. Тöдöмысь, абу кокни вöлöма, но ёртъяс отсöгöн да ыджыд кöсйöмнас велöдчöма бура.
1914 воын Иона Тимофеевичöс босьтöмаöсь первой мирöвöй война вылö. Революция помасьöм бöрын сiйö бöр воöма чужан сиктас да пырöма уджавны Помöсдiнса земскöй начальнöй училищеö, öтшöтш нуöдöма общественнöй удж. 1918 вося йирым 18 лунö И.Т. Чисталёвöс бöрйöмаöсь Помöсдiнса медводдза партъячейкаö секретарöн. Иона Тимофеевич ёна тöждысьöма коми йöзлöн олöм вöсна, пуктöма ыджыд пай коми школа да литература сöвмöдöмö. 1919 воын Жан Морöслöн водзмöстчöмöн первой ступеня школаясын зводитöмаöсь велöдны зырянскöй кыв, а 1920 воын воссьöма типография, кöнi йöзöдлöмаöсь коми велöдчан небöг да художественöй литература. Тайö воясö жö Иона лöсьöдöма аслыс псевдоним Жан Морöс, рочöн кö «сердечный, с открытой душой».
Иона Тимофеевич олiс сöмын 30 во. Но и тайö дженьыд кадöн сiйö удитiс вöчны унатор: лöсьöдiс гырысьлы да челядьлы шыпаскуд, гижис кывбуръяс, вуджöдiс роч кыв вылысь комиö А. Пушкинлысь, М. Лермонтовлысь, Е. Баратынскийлысь да мукöд гижысьлысь кывбуръяс. Буретш Жан Морöс жö медводз вуджöдiс коми вылö ставмирлы тöдса «Интернационал». Дерт, тöдöмысь, олöмыс кö вöлi кузьджык уна на вермис вöчны тайö енбиа кодзувыс. Но том мортлысь олöм орöдiс сьöкыд висьöм. Бура дыр сiйö бурдöдчис Кавказын да Крымын, а олöмлöн бöръя воясö - Пöддельнöйса тубсанаторийын. Тайö сиктас и кусi «кодзувлöн» олöм. Но сыöн вöчöм удж коли йöз сьöлöмъясын.
Тöдчö, Пöддельнöйса войтыр пыдди пуктöны Жан Морöслысь творчество. Со и мероприятие вылö дасьытöсьöмаöсь сьöлöмсянь. Уна бур кыв тайö лунö юргис школаын енбиа морт йылысь. И челядь, и гырысь лыддисны сылысь кывбуръяс, казьтылiсны олан туйвизьсö. Волiсны и пожöма ягö, кöнi сулалö И.Т. Чисталёвлöн памятник. Сиктсаяс да воöм гöсьтъяс пуктiсны дзоридзьяс, юксисны Жан Морöс йылысь юöръясöн, здук сулыштiсны чöв-лöнь. А мероприятие помын шуисны, мый и водзö кутасны туявны И.Т. Чисталёвлысь олан да уджалан туйвизь, тадз жö öтвылысь чукöртчывны да казьтывны енбиа мортöс.
Нина Коюшева
Звезда. – 2013. – йирым (окт.) 4 лун.
