Михаил Николаевич Лебедев олöмысь.
(Автобиография.)
Чужи ме 1877 воын, октябрь 10-öд лунö. Менам аймам вöлiны рочöсь - Нювчим заводысь, бывшöй крепостнöй крестьяна. Налысь дедъяссö кутшöмкö помещик ворссьöма картiöн öти купечлы, а тайö купечыс стрöитöма сьöд вöр шöрын Нювчим заводсö да вайöма сэтчö картiöн воöм крестьянаöс.
Сэкся кадö Нювчим заводыс зэв омöля уджалiс, мукöд дырйи дзикöдз сувтлывлiс. Та вöсна уна заводса олысьяс разöдчисны öтарö-мöдарö кынöмпöт корсьны. Менам батьлöн ыджыд вокыс кыдзкö веськалiс Кöрткерöс сиктö дай овмöдчис сэтчö («душöн петiс», кыдзи важ йöз шулiсны).
Вокыслысь (менам батьлысь) «душсö» сiйö Кöрткерöсö жö вуджöдiс…
Менам чужан воö батьöс босьтöмаöсь салдатö, кöнi сiйö ветлöма во вит кымын. Батьлöн эз вöв керка ни карта, вöв нимöс, - эз вöв нинöм. Ичöт дырйиыс сылы кыдзкö удайтчöма-велöдчыштны карса приходскöй школаын да лоны шöркодя грамотнöй мортöн. Салдатö бостiгöн сiйö служитöма вöлöстнöй писарын Межадор сиктын, кöнi ме и чужлi. Сэкся писарь жалö-ваньеыд вöлi ичöт, муртса вöлi судзсьö кынöмпöт вылö. Кор батьöс нуöмаöсь салдатö, менам мамö кольöма дзоля кагаöн (мекöд) дзик грöштöг. Эз кö эськö вöв мамлöн нывдырся гортыс Нювчим заводын, кöть коз улын ов да тшыглы кув. Ми овмöдчим мамлöн бать ордö (менам дед ордö), кодi жаляддза босьтiс миянöс ас ордас. Менам мамö кужлiс кыны быдся-манöлöс прошви (став заводса нывбабаяс вöлiны прошви кыысьяс - кружевницаяс; тайö, тыдалö, кыссьö вöлi помещиклöн дворöвöйяссянь да крепостнöй крестьянасянь).
Тайö удж помысь сiйö перйылiс ичöтик нажетка - тöлысьнас шайтмöд - да сы вылö, аслас батьмам отсалöмöн, быдтiс менö вит арöсöдз, кытчöдз менам бать эз лок салдатысь.
Салдатысь воöм бöрын батьö кык во, буракö, служитiс заводын руда приёмщикöн. Жалöванье вöлi 8 шайт тöлысь. Ньöблiс пывсян кодь ичöтик керка, но сiйö регыдöн сотчис (оз тай прöста шуны: кытi вöсни, сэтi и орö!). Овлiм зэв гöлиника не куш ми, а став заводса йöзыс. Уджöдлiсны ёна, а мынтывлiсны этшасьыс-этша. Сэтшöм нин вöлi сэкся кадыс—уджалысь йöзлысь вир да пöсь пычкан кад.
Ме вöлi вит-квайт арöса на, кор меным, кыдзи муртса помнитчö, зэв окота лои лыддьысьны. Пыр вöлi видлала кутшöм-сюрö книгаяс да мöвпала: мый сэнi гижöма да кыдзи эськö гöгöрвоны книгаысь чукыль-мукыльяссö (букваяссö). Заводас сэки некутшöм школа на эз вöв. Заводса юралысь сiдзи и щулiс: «Уджалысь йöзлы грамотаыс нинöмла". Сöмын öткымын челядьöс велöдлiс лыддьысьны-гижны пöрысь фельдшер Варлам. Рабочöйяс пöшти ставныс вöлiны неграмотнöйöсь.
Сизимöд ар вылö петiгöн менö пуксьöдiсны азбука сайö. Первойсö ме вöлi зэв рад, муртса ог чеччав нимкодясьöмла.
Но регыд ме аддзи, кутшöм курыд вöлi грамоталöн вужйыс. Велöдысьнас лоис менам бать. Сылöн «методыс» вöлi солдатскöй сяма. Асылын, служба вылö мунтöдз, индас вöлi меным куим буква да висьталас налысь нимьяссö: «аз», «буки», «веди», „глаголь» да с. в. Рытын локтас гортö, босьтас азбука да кутас менсьым юасьны: „Тайö кутшöм буква? Тайö кутшöм?» Дзугся кö букваяснас, зэв чорыда юрö зутшкас.
Кор пондi лыддьысьны «по складам», батьлöн велöдан методысда дисциплинаыс ещö на чорзис. Уна и синва ме кисьтлi грамота перйигöн.- Батьö ачыс ошйысьлiс, мый прнходскöй школаын бур велöдысьяс сiйöс розгаöн нöйтiгтыр велöдлiсны. Сэтшöм жö ногöн сiйö зiльлiс и менö югдöдны.
Во мысти кымын ме кутi кужны лыддьысьны да гижны. Сэка воссисны ме водзын книгаясыс! Лыддя-лыддя да мöдысь на öтиторсö лыддя, аслым зэв долыд, мый грамотнöйöн лои.
Сы бöрын регыд батьöс пуктiсны волостнöй писарö Паджгаö. Сэтчöдз ме эг тöдлы коми кывсö. Паджгаас ме пондi котравны-ворсны коми челядькöд да öдйö велалi сёрнитны комиöн.
Танi оз позь кольны казьтышттöг Паджга сиктса пöрысь мортöс - Пороз Иванöс, кодi волостнöй правлениеын вöлi стöрöжöн. Тайö Пороз Иван зэв лöсьыда кужлiс висьтавлыны коми мойданкывъяс. Ме уна рыт ветлывлi сы ордö стöрöжкаас да кывзi сылысь мойдöмсö. Паджгаса Иван дядь медвойдöр петкöдлiс меным коми кывлысь мичлунсö да озырлунсö.
Паджгаын олiгöн батьö сетiс менö Устьсысольскöй городскöй учнлищеö велöдчыны. Сэки меным вöлi, буракö, ар кöкъямыс-öкмыс. Училищеын ме пукалi второй отделениеын öтик во. Экзамен бöрын менö переведитiсны коймöд отделенисö. Но тайöн и помасис менам «образованиеöй». Батьöс чöвтiсны писарсьыс, видзны менö карын лои нинöм вылö, стипендия йылысь сэки эз на и сёрнитлыны. Бать босьтiс менö училищеысь да шуис: «Ов гортын, писарö кö бара веськала, ме дiнын бурджыка на сюсьмöдчан грамота вылад». Сы бöрын ме школьнöй скамьясö эг нин аддзыв.
Менам челядьдырся олöмыс эз вöв гажа. Батьöс унаысь на пуктылiсны писарö, но унаысь и чöвтлiсны юöмла да начальствокöд зычитöмла. Кутшöм нин сэки «гаж», кор мукöд дырйи грöш ни кöпейка семья помö эз кольлы. Медбöръя чöвтöм бöрын ми вуджим овны Кöрткерöсö, кöнi овмöдчим бать вок ордö, кодлöн вöлi аслас керка да крестьянскöй овмöс. Кöрткерöсад ме кутi отсасьны вöлöстнöй писарлы, кодi меным мынтiс куим шайтöн тöлысь. Сэсся менам мам лун-лун кыис прошви купеч нывъяслы да сiйöн нажöвнтлiс тöлысьнас шайт куимöдз кымын жö. Та помысь и олiм семьяöн.
1894 воын ми став семьяöн и став кöлуйöн мöдöдчим Коммуö, Кама ю вылö, кöнi батьö кöсйис пырны Вижаиха заводö служба вылö (сэнi сiйбö служитлöма нин). Мунiм гожöм шöрын Эжва ю катчöс, сiйö жö туйöд, кытi коми уджалысьяс ветлiсны сэки уральскöй заводъясö пес керавны. Керчомья сайыи Эжва вывсьыс кежим ичöтик Кöтйöм юö, кодi рочöн шусьö Северная Кельтма. Кöтйöмöд кыссим Северо-Екатерининскöй каналöдз («Канаваöдз»), кодöс заводитiсны кодйыны Екатерина царит дырйи, а помалiсны Николай Первый дырйи. Каналсö прöйдитiм да петiм Дзуридз ю вылö, кодi визувтö Камалань нин. Дзуридз ю усьö Южнöй Кельтмаö, Южнöй Кельтма усьö Тимшор юö, а Тимшор ю усьö Камаö. Тадзи и воим ми Коммуö.
Чердыньын тыдовтчис, мый некутшöм служащöй Вижаиха заводö оз ков. Ми лоим дзик быттьöкö дi вылын кöчьяс - öтарö ни мöдарö. Карыс и йöзыс тöдтöмöсь, места некысь оз сюр, деньга абу, бöр мунöм вылö нянь оз тырмы. Лои вузавны сёйöм вылö мыйсюрö кöлуй пиысь. Коркö сэсся батьöлы удайтчис пырны иконостаснöй мастерекöйö Покча сиктö, кодi вöлi нёль верст сайын Чердыньсяньыс. Менö Покчаса писарь босьтiс аслыс отсасьысьö. Батьлы пуктiсны жалованье 16 шайт тöлысь, меным 15 шайт. Та вылö позьö нин вöлi вердны кынöмтö.
Покча сикт важдырся кадö вöвлi коми карöн, кодöс, Чердынькöд тшöтш, пöкöритлiс московскöй великöй князь Иван Третий. Сы йылысь ме чукöртыштi ичöтик материал, код кузя, кöркö бöрвылас нин, гижи историческöй повесть , «Последние дни Перми Великой».
Коммуысь локтiм бöр Кöрткерöсö 1900 воын и некытчö нин сэсся Коми муысь эгö ветлöй.
Менсьым кö юаласны: «Кодi тэнö медвойдöр ыштöдiс литературнöй удж вылас?» — ме сы вылö шуа: «Книгаяс ыштОдкны, сэсся некод!»
Збыльвылöсö сiдзи и вöлi. Быдми ме цардырся пемыд кадö, пемыд йöз пöвстын. Некод эз югдöд менсьым юрöс, некод эз петкöдлыв меным, мый лоас культураыс, культурнöй олöмыс. Ме сöмын аддзылi вöлöстнöй правлениеясын, кыдзи земскöй начальникъяс, станöвöй приставъяс да урядникъяс ыджыдавлiсны мужикъяс вылын да на вылö ошъяс моз равзiсны. Сэсся нинöм. Менам öтик ведöдысь и вöлi - книга.
Унджыксö ме лыдди беллетристика: романъяс, висьтъяс, очеркъяс. Кызвыныс вöлi бульварнöй литература, халтура, не сюрлiсны лыддьыны и ыджыд писательяс: Толстой, Тургенев, Достоевский. Литературалысь качествосö сэки ме, дерт, эг на гöгöрво, лыдди мый ки улö сюрö, нинöм эг бöрыньт. Тадз помся лыддьысигад меным кыдзкö аслым окота лои гижны, сочиняйтны, печатайтчыны журналъясын.
Сэсся ме бура тöдмалi книгаяс серти Ломоносовлысь олöмсö: кыдзи сiйö пемыд мужикысь воис ыджыд учёнöйö да писательö. Дерт, мöд Ломоносовöн ме эг кöсйы лоны, но гижнысö, мися, гашкö, и меным позяс заводитлыны.
Дас куим арöса детинаöн ме кутi пробуйтны ассьым «вынöс» литератураын - петi сэтшöм туй вылö, кытчö тойыштiсны менö книгаясыс.
Менам «пробаяс» дыр вöлiны некытчö шогмытöм, кабала марайтöмöн. Грамматика ни орфография ме эг тöд, эг весиг куж, кытчö колö сувтöдлыны запятаяяс да точкаяс, эг гöгöрво литературнöй слоглысь правилöяссö, гармоничностьсö. Кöсйи лоны писательöн, а вöлi омöля на грамотнöй мортöн.
Дыр мырсьöмöн да книгаяс вылын велöдчöмöн ме коркö кужыштны нин кутi запятаяяссö да точкаяссö коланаинъясö сувтöдлыны, гöгöрвоыштны пондi литературнöй слоглысь «мудростьсö». Смелмöдчи да ыстi «Родина» нима журналö ичöтик рассказ, во сэтысь меным вочавидзисны журналса «почтöвöй ящикын": «Не пойдёт». Мöдöс гижи да мöдöдi, но результатыс лои сэтшöм жö.
Коркö сэки жö, челядь мывкыд помсьыс, «нярйыштi» дзонь роман «Разбойничье гнездо», но тайö романсö некутшöм редакция эз босьт, дай рукописьыс сэсся кытчöкö гудыртчис.
Заводнилi гижны и поэмаяс, Пушкинлы да Лермонтовлы подражайтöмöн, но печатайтöмöдз найö эз волыны.
Медводдза гижöд, кодöс менсьым печатайтiсны, вöлi неыджыд висьт «Иван Голой» (войвывса вöралысь олöмысь). Тайö висьтсö лэдзисны «Досуг и Дело» журналын 1900 воын.
Ог куж висьтавны ассьым долыдлунöс, кор ме аддзи книгаын аслам киöн гижöмторсö. Со, мися, авторöдз вои! Öнi, мися, воссис меным туйыд! Колö, мися, зiльджыка босьтсьыны тайö уджö! (Эг нин эськö вöв челядь, а челядь ногöн на радысла мöвпалi)
Мыйкö дыра мысти ме казялi мый менам «Иван Голой» нима висьтыд зэв на жебиниктор, но сэки ме вывтi ёна нимкодяси сы кузя.
Татшöм «победа» бöрын ме зiля кутi гижны водзö. Вочасöн бырöдалi нелючкияс техника боксянь, верми нин ортсысяньыс бура шыльöдны-мольöдны гижöдъяссö, но темаяссö босьтлi кутшöмсюрööс - мый дум вылö усьö. Ёна увлекайтчывлi историяöн. Интересуйтчи войнаясöн. Тайö под вылын гижи историческöй повестьяс: «Сон великого хана», «Ордынский выходец», «Витязь Руальд» да уна посньыдик висьтъяс. Русско-японскöй войналысь эпохасö петкöдлi «Перед войной» нима повестьын да кымынкö рассказъясын. Гижлi сiдз шусяна «Смутное время» йылысь да отечественнöй война йылысь. Кутчысьлi и бытöвöй темаясö («Таня Осинина», «Нечаянный талант» да мукöд рассказъяс). Коми важ олöм йылысь гижи кык ыджыд повесть «Бур Ань» да «Последние дни Перми Великой». Печатайтчи, буракö, вит кымын журналын. Стихотворениеяс гижлi этша сы вöсна, мый сэкся редакцияяс эз лыддьыны поэзиясö колана материалöн. Гижи, дерт, ставсö рочöн. Комиöн гижöм йылысь сэки некод эз на мöвпыштлы. Сöмын Октябрьскöй революция бöрын ми кутiм тöдны, мый вöлi важ коми поэт Иван Алексеевич Куратов, кодi олiс и гижис коми стихотворениеяс менам чужтöдз на.
Öтчыд кыдзкö, русско-японскöй войнаöдз на, меным ыстылiсны Лондонысь революционнöй журнал «Листки свободного слова» - лысь куим номер. Адрессö, буракö, босьтöмаöсь редакцияясысь. Гижöма вöлi унатор сы йылысь, мый колö путкыльтны самодержавиесö да вуштыштны му вылысь «царь-вампирсö». Журналсö мöдöдлiсны тупкöса письмöяс пытшкын, но царскöй охранникъяс, вöлöм, видлалöмаöсь нин пошта вылас тайö пись-мояссö. Менö лэччöдiсны Устьсысольскö, жандармскöй управлениесö, кöнi допроситiсны да шуисны: «Если за вами ещё будет что-нибудь замечено, то вы будете сосланы туда, куда Макар телят не гонял!». Та бöрын ме олi гуся полицейскöй надзор улын, кодi ог тод кор помасис...
1905 воын, арнас, гымыштлiс медводдза революция. Сэки кутiсны петны уна революционнöй газета, кытчö ме мöдöдлi кымынкö стихотворение. Öтик стихотворение вöлi печатайтöма «Обновлённая Россия» газетаын. Тайö стихотворениелысь ме помнита сöмын медводдза нёль строчкасö:
«Долго мы жили, как узники в крепости,
Выхода не было нам.
Много мы видели всякой свирепости. –
Сладко жилось господам».
1905-öд вося революция петкöдлiс меным самодержавиелысь шогмытöмлунсö, но мый лоас збыль революционностьыс, ме сэки эг на гöгöрво. Ме чайтi, мый царыд кö сетас конституция Англияын моз, ставыс лоас шань. Артмас кö республика Францияын моз, сыысь бурыс оз нин тöр. Коми муын тайö революция ёнасö эз тöдчыв. Сöмын кывлан вöлi сьыланкыв:
«Царь испугался издал манифест:
Мертвым свободу, живых под арест.
Россия, Россия, жаль мне тебя,
Бедная, горькая участь твоя!»
1913 воын ме гижи кöкъямыс коми стихотворение: «Ыджыд чери да ичöт чери», «Гажаджык, вокъясöй, олöй», «Ытшкандыр» да мукöд. Заводитiгас ме думайтi мый менам öдвакö артмас лöсьыд лыддянтор, но гижи да аддзи, мый позьö и комиöн гижны, мый коми кывйыс абу гöль да мисьтöм, абу «собачий язык», кыдзи шулiсны öткымын роч чиновникъяс.
1914 воын пансис империалистическöй война. Ме тшöтш веськавлi мобилизация кузя царскöй армияö, но окопъясöдз эг волы, сöмын видлi кöрсö запаснöй полклысь, кöнi олöмыс вöлi каторга кодь.
Октябрса революция бöрын служитi «Комитет бедноты» -ын секретарöн, сэсся пыри нарсудö секретарöн жö, кöнi уджалi 1939 воöдз.
Унатор гижлi рочöн «Зырянская жизнь» да «Югыд туй» газе-таясö (рассказъяс: «Наши молитвенники», «Боголюбивый Никон», «Бедный Иван», «Обиженный Кузьма», «Перевозный владыка», «В нарсуд на разбирательство» да мукöд). Серпасавлi Коми муын вöлöмторъяссö, пазöдöм буржуй котырлысь колясъяссö, сиктса нелючкияссö. Произведеннеясöс кырымавлi уна псевдонимöн: «Сидор Безземельный», «Юсь», но медсясö Юсь псевдонимöн.
1918 воын «Коми комиссия» чукöстiс менö коми литература лöсьöдан уджö (сэтчöдз 1913 восяньыс коминас ме нинöм эг гижлы сы вöсна, мый печатайтнысö вöлi некöн). Ме тайÖ чукöстчöмöдз на босьтчи гижны комиöн. Кöрткерöсын сэки олiс учительница Агния Андреевна Суханова - коми школаяс вöсна тöждысьысь морт. Сiйö корöм кузя ме гижи кымынкö стихотворение - сьыланкыв школьникъяслы сьылöм вылö. Сэсся гижи да мöдöдi Коми комиссиялы мойданкыв «Зарни чукöр», стихотворениеяс: «Коми му», «Вогöгöрся олöм» да мукöд. Сы бöрын босьтчи гижны сцена вылын сьылöмöн ворсанторъяс - опереткаяс: 1919 воын гижи «Мича ныв», 1920 воын – «Тун», 1921 воын «Бур Ань». Качествонысö налысь ме, дерт, донъявны ог вермы, но тайö опереткаяс зэв ёна воисны сьöлöм вылö видзöдысьяслы, кодъяс некор на эз аддзывны ас рöднöй кыв вылын татшöм версанторъяссö.
1920—1921 воясö ме зiля уджалi школьной хрестоматия вылын.
1918 восянь ме шоча нин эновтлi коми литература уджсö, но вöлiны и сэтшöм костъяс, кор ме нинöм эг гиж.
«Ордым» журнал восьтöм бöрын кутi мöдöдавны сэтчö стихотворениеяс, но лыдöн кö артавны, менам продуктивностьыс вöлi ичöт. Верми, гашкö, и унджык сетны, но эг сет сы вöсна, мый пыр пукалi канцелярияын, кодi падмöдiс менсьым литературнöй уджöс.
1921 восянь, кор ме гижлi коймöд оперетка «Бур Ань», 1928 воöдз менам перö улысь эз петавлыны гырысьджыкторъяс. Кызвынсö гижлi посньыдик стихотворениеяс да сьыланкывъяс.
1928 воын ме гижи поэма «Кыдзи поп ворссис кык мöс» да мойданкывъяс: «Кöрт Айка», «Бур Ань», «Яг морт», «Юрка» да «Куим йöй». Тайö восянь кутi нин перестраивайтны ассьым лирикаöс, кутi «ёсьтыны» перööс, медым бöрö не кольччыны социализм стрöитан кадö пролетарскöй литератураын. Арнас ме заводитi гижны, а 1929 воын, гожöмнас, помалi оперетка «Настук».
1934 воын Коми Издательство лэдзис торъя книгаöн менсьым «Бöрйöм гижöдьяс», но книгаыс петiс латинизированнöй алфавит вылын, мый вöсна этша морт вермис сiйöс лыддьыны.
Октябрса роволюция мездiс рабствоысь став уджалысь йöзöс, кодi олiс сэкся Россияын. Октябрса революция сетiс уджалысь йöзлы вöльнöй, югыд олöм. Октябрса революция ловзьöдiс и коми национальнöй литература, код йылысь сэтчöдз некод эз куж и мöвпыштны. Öнi, великöй сталинскöй эпохаö, торъя нин долыд уджавны литератураын, петкöдлыны художественнöй гижöдъяс пыр сöветскöй вöльнöй йöзлысь шуда олöмсö, социализм стрöитöмсö, коммунизмлань мунöмсö. Ме шулi нин, мый Октябрса революцияöдз омöля разбирайтчи политикаын, кöть и радейтi свободасö. Октябрса революция восьтiс меным синмöс сы вылö, мый лоö збыль свободаыс, збыль революционностьыс.
1939 вося январь 31-öд лунö партия и правительство наградитiсны менö литературнöй уджысь «3нак почёта» орденöн. Ог куж висьтавны, кыдзи взволнуйтiс да обрадуйтiс менö тайö ыджыд наградаыс. Сöмын миян социалистическöй странаын тадзи высокöя донъялöны писательлысь трудсö. Ме лыддя тайö наградасö не сöмын менсьым скромнöй литературнöй уджöс отметитöмöн, но и став коми национальнöй сöветскöй литературалы внимание да доверие петкöдлöмöн. Мыйта судзсяс вын да кужöм, ме кута продолжайтны ассьым литературнöй уджöс, медым оправдайтны тайö ыджыд наградасö, кодöс сетiсны меным партия да правительство.
1939 во
(Источник: М. Н. Лебедев. Бöрйöм гижöдъяс. – Сыктывкар : Комигосиздат, 1940. – С. 17-25. – Пер. загл.: Избранное)
