ЗАРНИ МОСКВА
Кор Москва йылысь сьыланкыв сьылам,
Сталин ёрт йылысь сьылам сэк ми.
Эзысь борд вылын качӧдчы вылӧ,
Миян песня, кыдз збой соколин!
Видза ов, миян славнӧй столица,
Миян зарни Москва, миян мам!
Тэ могучӧй, тэ кыпыд, тэ мича,
Тэнад славаыд некор оз ям!
Кремльлӧн кодзувъяс ӧзйӧны биӧн,
Рӧднӧй му весьтті дзирдалігтыр.
Кремльлысь мичлунсӧ аддзам ми мыйӧн,
Кыпыд радлунӧн чепӧсйӧ вир.
Видза ов, миян славнӧй столица,
Миян зарни Москва, миян мам!
Тэ могучӧй, тэ кыпыд, тэ мича,
Тэнад славаыд некор оз ям!
Овліс, уджавліс татӧні Ленин,
Некор куслытӧм шонді кодь морт.
Тан сӧветскӧй народъяслӧн гений,
Миян вождь, миян друг Сталин ёрт.
Видза ов, миян славнӧй столица,
Миян зарни Москва, миян мамі
Тэ могучӧй, тэ кыпыд, тэ мича,
Тэнад славаыд некор оз ям!
Уна нэм нин тэ, донаӧй, олін,
И пыр быдман, пыр ёнман, пыр том,
Супостат водзын пикӧ эн волы,
Супостатлы пыр вӧчлін тэ пом.
Видза ов, миян славнӧй столица,
Миян зарни Москва, миян мам!
Тэ могучӧй, тэ кыпыд, тэ мича,
Тэнад славаыд некор оз ям!
«Войвыв кодзув» № 10 1949 год. |
Дзоля Коля батьлы шуис:
- Со нин бара воис ар...
Таво ӧтнам нин ме кужа
Лэчкӧн кыйны сьӧла-тар...
Батьыс сылы вочавидзис:
- Зэв бур делӧ, муса пи.
Вайлы ӧні жӧ ми рытнас
Дасьтам-путшкам уна си...
Выходнӧйӧ Коля мӧдіс
Кыйсянінӧ. Босьтіс чер...
Сиктсянь матын шувгис-увгис
Тӧвкӧд вензигтырйи вӧр.
Эз вӧв тшӧкыд тайӧ вӧрыс:
Кӧні пожӧм, кӧні коз.
Вижӧсь сулалісны кыдзьяс,
Арся тӧлысь тірзигмоз.
Коля тӧдмасьышт, кӧнджык
Вӧлі пӧтка оланін,
Кӧні бурджык кыйсян места.
Быдтор аддзис сылӧн син.
Сійӧ тӧлкӧн октіс лэчьяс,
Тарыс уна вӧлі тан.
Ёна зільӧмысла сылӧн
Быдсӧн ломзис чужӧмбан.
Вӧрас гажа сылы вӧлі,
Сійӧ зверъясысь эз пов,
Да и важӧнкодь нин ошкыс
Матігӧгӧрын эз ов.
Рытын рӧмдігӧн нин воис
Дзоля кыйсьысь гортӧ бӧр.
Мамыс юаліс бур пилысь:
- Эн-ӧ вошлы, сьӧлӧмшӧр?
- Эг жӧ вошлы,—Коля шуис.-
Ӧкмыс арӧс нин ӧд мем.
Да и вӧрсӧ бура тӧда —
Вӧвлі колян воӧ сэн.
Кык лун мысти школа бӧрын
Коля вӧрлань содтіс ӧд.
Прӧста эз ло мудзтӧдз ветлӧм –
Нёль тар шеді, кыкыс сьӧд.
Нимкодясигтырйи сійӧ
Гортӧ вайис шедӧмтор.
Чӧскыд шыд мам сылӧн пуис
Ӧти тарсьыс асъядор.
- Айда, Коля!— ошкис батьыс.
Тэ охотник лоан бур.
Коркӧ быдмыштан да сюся
Пондан кыйны руч да ур!
«Войвыв кодзув» № 10 1949 год стр. . 38 |
|
Тэ, сьыланкыв, кыпӧдчы вылӧ,
Мед тэнад оз лӧнявлы гор,
Мед пыр тэнсьыд юргӧмтӧ кылӧ Д
а сьылӧ тшӧтш уджалысь морт.
И карын, и сиктын, и вӧрын,
И пашняяс вылын быд лун
Ми уджнымӧс дружнӧя керам,
И сьылӧмным миян оз вун.
Эг шогсьылӧй ми, эгӧ полӧй,
Кор гымаліс грознӧй война.
Ов кыпыда, кыдзи век олін,
Великӧй Сӧветскӧй страна!
Тэ лолалан венлытӧм вынӧн,
Кыдз гыалан мореясвыв.
Оз лӧнь миян уджаланінын
Лов гажӧдан збой сьыланкыв.
Геройлысь ним уналы вайӧ
Отчизнаын доблестнӧй труд.
Ӧд быдӧнлӧн миян ас сайын
Награда и слава, и шуд.
Ми сьылам, и сьӧлӧмным сьылӧ,
И водзӧ ми восьлалам пыр.
Ас рӧднӧй Сӧветскӧй му вылын
Ми стрӧитам югыд, выль мир.
«Войвыв кодзув» № 9 1949 г. |
ОРДЙЫСЬӦМ
Страдна воигӧн колхозын
Кык бригада шуис сідз:
- Ордйысигтыр дас кык лунӧн
Ытшкам, куртам ми став видз!
Победительяслы сетны
Лӧсьӧдісны гӧрд флажок,
Медым тӧдіс, аддзис сиктыс,
Кыдзи пӧртсьӧ ыджыд мог.
Босьтчис пӧся кык бригада
Зіля уджавны лун-лун.
Быдӧн ытшкӧ, куртӧ, чӧвтӧ,
Гортӧ пемыдӧдз оз мун.
Ланьтлытӧг машина сяргӧ,
Ытшкӧ мичаник том ныв.
Шонді дзирдалӧ да пӧжӧ,
Гажӧн тырӧ видзьясвыв.
Тыдовтчис медводдза рытӧ,
Кодлӧн уджыс вӧлі бур:
Первой номера бригада
Куртіс, чӧвтіс унджык юр.
А мӧд лунӧ мӧд бригада
Аслас уджлысь содтіс ӧд,
Первой номерасӧ панйис:
- Ӧні миянӧс пӧ тӧд!
Уджнас веськӧдлісны сюся
Кык колхознӧй бригадир.
Киысь киӧ гӧрд флажокыс
Кутіс ветлӧдлыны пыр.
Талун — тані, аски — сэні.
Вежсьӧм вӧлі унаног.
Талун коді бӧрӧ кольліс,—
Аски босьтліс гӧрд флажок.
Страдна чӧжӧн кык бригада
Зіля ордйысисны сідз.
Налӧн буретш ӧти кадӧ
Пуктыссис медбӧръя видз.
Победитісны кыкнанныс,
Бӧрӧ кольччысьыс эз ло.
Вӧлі та кузя колхозын
Рытнас ыджыд торжество.
«Войвыв кодзув» № 8 1949 г |
