Перейти к разделу.

Машö
Висьт (юкöн)

1.

Гöрд шондi нюмъялiгтыр нин ветлiс енэжтi вылiтi да кöдзис ассьыс зарни югöръяссö му вылö. Сiйö сёйис мулысь лым эшкынсö, кодi дыр пöдтiс муöс аслас сьöкыдлуннас да кöдзыдлуннас.
Сэсся воалiсны лэбачьяс. Гажаа да мудзлытöг дзользисны найö, аслыныс позъяс вöчалiгтыр. Нимкодь лоис и пемöсъяслы, кодъяс кос турун вылысь воисны чöскыд веж турун вылö.
Лунвывсянь пöльтiс небыдик тöв. Мича веж платтьööн пасьтасис мувыв. Луд вылын сералiсны зарни дзоридзьяс. Вежöдiсны пуяс, садъяс вевттьысисны дзоридзьясöн. Гöгöр пакйис чöскыд дук.
Ю нöрыс вылын нюжöдчöма сикт.
Асыв.
— Марья, чеччы, мöсъясöс лысьтыны кад,— Машööс чуксалiс мамыс.
Машöлöн воссисны синъясыс. Трачкöдчис пачын би, ныргорöн узис батьыс. Машö чеччис да петiс кильчö вылас мыссьны. Шондiлöн югöрыс вартiс сiйö синъясö. Öшинь улын котралiсны курöгъяс да тшап петукъяс. Лöскын гажаа сьылiсны пышкайяс. Мыссигтыр Машö нимкодясис ывла выв мичлуннас да пыдö лолалiс чöскыд сынöдсö.
Лысьтысьöм бöрын Машö колльöдiс мöсъясöс луд вылö, а сы бöрын отсасис    мамыслы пач вом дорын.
Луныс вöлi вöскресенньö.  Сикт шойччис.
Öбöд. Пызан сайын пукалiсны: Машö, сылöн бать-мамыс, дас квайт арöса вок Иваныс да дзоля чойясыс.
—  Талун нö, батьö, уджавнысö огö мунöй?— сёйигöн юалiс Иван.
—  Талун праздник,— буркнитiс Öльöксан кыдъя нянь чегигтыр.— Шойччам талун.
Иван нимкодя мигнитiс Машöлы. Батьыскöд Иван дыр нин мыр бертiс да шойччöмыд лöсялö.
Öбöд бöрын Машö подруга Аннаыскöд мöдöдчис кырйö.
—  Кутшöма нин, Машö, Васьöыдкöд гуляйтанныд?— кырйö воигöн нин юалiс Анна.
—  Онi ставыс на бур,— нюмдыштöмöн вочавидзис Машö.— А Гришаыдкöд тэ?
—  Ветлам на жö,— вочавидзис Анна.— Мукöд дырйи ыдждавлас жö-а, медся нин сэки, кор код, быттьö ме мыйыськö мыжа...
—  Вот ещö сiйö кутшöм... Энлы, рытнас сiйöс ме пинялышта таысь.
Кыр йылын том йöз гажöдчисны нин. Тальянка ворсöм улö сатшкис-йöктiс Педöр Гриша, а кор аддзис Машöлысь да Анналысь локтöмсö, йöктöмысь дугдiс да мигнитiс эжа вылын куйлысь Степан Васьлы. Вась нюмдыштiс.
Кор Аннакöд Машö воис ворсанiнö, сы вылö сюся видзöдiсны зонъяс. Сiйö мича чужöмнас, лöсьыд походканас петкöдлiс налысь вежъяссö. Машö чужöм вылын ворсöдчис алöй вир. Нöшта на сiйöс мичмöдiсны кузь кöсаяс да енэж рöма    мича синъясыс. Машö вöлi пасьталöма ас вöчöм дöраысь гöрд сера сарапан, дженьыдик ковта, и кокас ас вöчöм сапожки.
Машöлöн гöрдöдыштлiс чужöмыс, кор сылöн вочаасисны синъясыс Васьö синъяскöд.
—  Вай жö, нывъяс, гозъя кöрöн ворсамöй,— шуис сьöдiник зон.
Анна аслыс пöв вылö босьтiс Васьööс, а Машö — Гришаöс. Дыр котралiсны-ворсiсны. Унаысь Машöлöн да Васьöлöн паныдасьлiсны синъясыс, кодъяс кыдзкö аслыс ногöн мелiа югъялiсны.
Тайö кадö ворсысьяс бокын сулалiс ёртыскöд Митрей купечлöн пиыс — Прокö, кодi пырöма дона сукно пытшкö. Кöть вöлi и пасьтасьöма мичаа, но эз вежавны сы вылö нывъяс. Сiйö вöлi тушанас кузь, векньыд пельпомъяса, мисьтöма югъялiсны дзоляник сьöд синъясыс, а чужöм вылас нюжöдчöма гöрбыля кузь ныр.
Прокö помала видзöдiс  Машö чужöм вылö, сiйö лöсьыд морöс вылö.
—  Семö, вот эськö эсыкöд ветлöдлыны,— шуис Прокö ёртыслы, Машö выло индiгмоз.— Ме важöн нин сiйöс кыйöда.
—  Да, позьö сыкöд майбыр ветлыны... Тэ öд верман сiйöс мырддьыны Степан Васьыдлысь. Сiйö гöль, а тэ озыр.
—  Верма, дерт,— ошйысис Прокö.    Сiйö мисьтöм чужöм кузя котöртiс нюм, синъясыс лöга видзöдiсны Степан Вась вылö.
Пуö гажöдчöмыс кырйын. Шудтöм олöмысь шогсö пальöдöны том йöз. Ылöдз-ылöдз юргöны нор сьылан-кывъяс стеклö кодь мольыд ю кузя.
Недыр кырйын олöм бöрын Машö да Анна, сёрнитiгтыр, ветлiсны сикт помöдз, а бор локтiгöн найö паныдасисны Прокöкöд да Семöкöд, кодъяс вомъясысь разалiс самöкур дук. Прокö öвтчис кузь кияснас.
—  Сувтлöй, роч аканьяс, сувтлöй,— тшöктiс дульзьöм вомнас Прокö.
—  Мыйлакö?— тшöтш артмис нывъяслöн.
—  Мыйла? Сiдзи... Оз али мый позь сёрнитыштны?
—  А мый нö миянкöд сёрнитан?— шуис Машö.— Висьтав инö.
Прокö аслыс сямöн видзöдiс  Машö вылö да мигайтiс. Мыйкö кöсйис шуны да, тыдалö, полыштiс.
—  Машö, вот мый... М-ме радейта тэнö, сотчö сьöлöмöй, весиг оз узьсьы.
Нывъяс вак-вакöн серöктiсны да пышйисны на дiнысь. Кöсйис жö эськö Прокö найöс кутны, но крукасис да тiльсмунi муö.
—  Сулавлы, ме вылö усьлан на, зэв тай эськö тшапитчан да,— шуис Прокö да бус сюръя кодь чеччис муысь.
Анна да Машö регыд паныдасисны мусукъясныскöд.
—  Лок мекöд   ветлыштам,    Гриш,— шуис Машö. Бöрвылын мунiсны Анна да Васьö, кодъяс пöраöн-пöраöн мыйыськö ёна сералiсны.
Недыр мунöм бöрын Гришалысь Машö юалiс:
—  Кутшöма нин ветланныд Аннаыдкöд?
—  Бура на.
—  А сiйö тай шуö, мый тэ пö ыдждалан сы вылын, вылö пö пуксьыштан. Мыйла нö?
—  Колöкö и корсюрö лолö, но ме ачым ог тöд, мыйла сiдзсö вочсьö. Код юрнад öд быдторйыс лолö.
—  Оз ков.
—  Мыйысь нö сiдзсö найö сералöны?— шуис Гри­ша, кор кылiс бöрвывсаяслысь серöктöм.
«Дерт, бара сералöны Митрей Прокööс»,— думай­тiс Машö.
Регыд найö вежсисны да öтияс мунiсны öтилаö, а мöдъяс — мöдлаö.
Сикт унмовсис. Эз нин кыв кырйылын гор. Юясысь да тыясысь кайис вöсньыдик ру. Кок улын неуна кажитчис лысва. Енэжыс дон.
Жытникбердса дженьыдик скамья вылö пуксисны Васьö да Машö, медым мелi кывъясöн öта-мöдлы пальöдны шогъяс, а аски петны удж вылö.
Васьöлöн мича чужöм вылас öзъялiс алöй вир. Шапка кöзыр улын тыдалiсны мичаа читкылясьöм юрсияс. Сiйо мича синъяс вылö мелiа видзöдiсны том нывлöн синъясыс.
—  Васьö, Митрей Прокöлы менам кажитчысьöма, ме вöсна сiйö кувны пондöма,— сералöмöн шуис Ма­шö.— Миянöс талун сiйö сувтöдлiс нин.
—  Тöда. Анна висьталiс нин. Сiйöс, гашкö, и сералiнныд да? Да. А радейтан сiйöс?
—  Ха-ха! Мыйла нö тайöс шуан? Сiйö урöд дiнö матыстчынысö зывöк, кöть эськö и озыр да. Меным оз ков озыр. Тэ и эм менсьым шогбö пальöдысь. Васюк, тэ кындзи некод оз ков, оз.
—  Акань менам,— долыда лолалiктыр шуис Ва­сьö, нöшта на топыда шымыртiс вына кияснас Машööс. Джуджыд морöсыс том нывлöн топалiс Васьö паськыд морöс бердö да вочаасисны налöн вомъясыс.

2.

Страдна. Енэж шöрын мичаа мнгайтчис июль тöлысся жар шондi. Ворсöдчис доналöм сынöд му вылын. Дзоляник ю векнялiс да ляпкалiс. Сиктын быд кильчö öдзöс пöдлалöма. Öшиньяс югъялiсны шондi улын. Корсюрö кывлывлас понъяслöн увтчöм да петукъяслöн горзöм. Ва дорын ворсiсны челядьяс.
Сикт шöрын сулалiс нёль вежöса ыджыд керка, кодлöн гöгöрыс вöлi уна ыджыд öшинь.
Дзиръя öшинь дорын семья юис чай. Пукалiсны: Митрей, сылöн гöтыр — Марпа, Прокö да сылöн чой — Нина.
Вежöс, кöнi юисны чай, вöлi гажа. Джодж югъялiс мича краскаöн. Пельöсын сулалiс вижöн мавтöм шкап. Стенын öшалiсны öбразъяс.
Кызöм Митрей ыджыд шыöн    ырскис чай да кадысь-кадö видзöдлiс пи вылас, кодi вöлi талун мыйкö аслыссяма.
Прокöлöн лои дум гöтрасьны, но некыдз оз лысьт юавны бать-мамлысь. Сiйö тулыс и гожöмбыд вöтлысис Öльöксан Марья бöрся, но нинöм эз артмы. Водзö сэсся сiйö  эз нин вермы терпитны да талун юалiс.
—  Батьö? Ме гöтрасьны кöсъя,— шуис Прокö да гöрдöдiс пельяс йылöдзыс.
—  Но вот? Мися жö талун тэ аслыссяма.
—  Мыйкö-й гöтрасьöм уси дум вылö?— серöктiс Марпа.
—  Ме сайын абу,— шуис бать.
—  А кодöс?— юалö мам.
Прокö эз дзик пыр вочавидз. Видзöдлiс Нина вы­лö да нюмдыштöмöн шуис:
—  Ольöксан Марьяöс.
—  Ольöксан Марьяöс?— шензис Марпа, выя чуньсö нюлiгтыр.— Йöймин али мый? Мый козин нö сылысь ваян? Мый?
—  Сöмын сiйöс, а сэсся некодöс,— юрсö копыртöмöн шуис Прокö.— Мед абу кö нинöм.
—  Сыысь озырджык öд сюрас на жö,— шыасис бать.
— Сы кындзи некодöс!— чеччигтыр шуис Прокö да петiс ывлаö.
—  Аслас вöля,— шуис    Митрей. Но менам    колö ветлыны видз вылö ытшкысьяс дiнö.
—  Ог тöд, мый лоас сыкöд вöчны,— шуис Марпа. Митрей ветлiс медалöм ытшкысьяс дiнö, а мыйöн шондi увтасмыны, бöр воис гортö.
—  Но кутшöма нин сэнi уджалöны?—Митрейлысь юалiс гöтырыс.
—  Дыша вöрöны, чöртъяс, нюжмасьöны. Лунтырöн куртöмаöсь сöмын сизим пиня зорöд. Но турун и мича, вежыд петö.
—  А мый нö дуреньыскöд   вöчны!— юалiс Марпа.
—  Ме ог тöд. Мый нö сыкöд вöчан? Мед ваяс.
—  Мед кö мед. Вот козинсьыс кыдзи-а? Налöн унатö сетныс абу; удждысьöны да кысь нин сетны.
—  Аскöдныс сёрнитлам.
—  А кор нö гöтрасян,— юалiс Марпа пилысь, кодi пырис на дiнö.
—  Кöть аски.
—  Талун середа. Вöскресенняö батьыдкöд ветлам Öльöксан ордö, найö кыдзи кутасны сёрнитны.
Шондi лэччис. Воалiсны страдуйтысьяс да сикт регыд унмовсис сьöкыд унмöн.

3.

Ыпъялана шондi пöжис ытшкысьясöс. Тöвв инмытöм видз вылын сэтшöм лöнь, мый юрси оз вöрзьыштлы. Машö туша кузя визувтiс пöсь. Сiйö кадысь кадö чышкис доналöм чужöм вывсьыс пöсьсö. Шондi водзын яра кодзлалiс Машöлöн косаыс, пелька ворсiс сiйöн, но косаыс öтчыд эз мун бурджыка: ставыс вутш да мыр.
— А, морö, видз!— шыасис Иван вокыс.— Сöмын и зöтшкö косаыд. Коркö бара волан он мольыд видз вылас? Ак, эськö Митрей купеч вндзьяс вылын ытшкыны!
Машолöн серамыс петiс Иван вылö, сэсся турунöн чышкис косасö да, сiйöс мыччигтыр, шуис:
—  На, лэчтав.
Иван босьтiс сылысь косасö да кутiс лэчтанöн тольскыны коса дор кузя.
—  Пила лоöма, а абу коса,— шуис Иван коса дор вылö видзöдiгтыр.— Уф, жарыс! Öнi эськö, Марья, гож сайын чай юны и лöсялö.
—  Он тай куж,— сербктiс Машö, но пыр жö ланьтiс да муö видзöдöмöн шуис:
—  Да, миянлы медлёк видзьяс вылас лоö уджавны, а мукöдъяс, кодъяс озырöсь, медбур видзьяс вы­лын гуляйтöны.

Машö босьтiс Иван ордысь косасö да бара пондiс кокасьны. Чоя-вока бöрын ытшкисны Öльöксан да Öдя. Уна ног дзугсьöмаöсь Öльöксанлöн юрсиясыс. Чурвидзис пелькыдик тош. Сiйö ытшкö ас вöчöм дöраысь еджыд дöрöма да гача...
—  Абу на пажун кад, Öдя?— юалiс Öльöксан.— Менам тай кынöм рекмис нин-а.
—  Кор пажнайтан, сэки и кад.
—  Но, инö лöсьöд сёянсö. Челядь, пажнайтöй! Пуксялiсны шома йöв туис дорö да кутiсны сёйны.
Иван мисьтöма видзöдю кыдъя нянь вылö. «Тiльскы пемыдысь пемыдö кыдъя нянь да шома йöв вылö»,— мöвпалiс сiйö. Иванлысь нянь вылö мисьтöма видзö-дöмсö, тыдалö, аддзис батьыс да шуис:
—  Со, пиö, кутшöм нянь вылын лоö мыркны, костö бертны. И мамыдкöд важöн унджык кадсö овлiм татшöм нянь вылын.
—  Тайö эськö,— шуис Öдя,— сеян на да вот татшöмыс регыд бырö, кач вылö лэдзас-а. Водзöса няньтбö он нин ёна сёй. Сэсся ог тöд нин Митрей купечыд няньтö водзöсалас оз, уна нин лои да?
—  А морыс тöдö,— шуис Öльöксан,— кодi сетö. Ставыс ен, кодлöн голяыс паськыд... Босьт тэ Митрей купечöс, сöмын дзиръя öшинь дорын тшай юö, а став бурджык видзсö да мусö арыштö. Начальствокöд нювсьö, кыдзи кань. Оз öбöдитчыны и сылöн сватъясыс, сылöн матыссаясыс. А тэ кисьтан-кисьтан пöсьтö, а век нинöм абу, дон из вылö ва кисьтöмкодь. Коркö бара лолö оз бурджык олöмыс?
—  Гашкö и ен сетас,— шуис Öдя,— нинöм он тöд.
—  Том войтырлы жö буди, а тэд да мем ог тöд нин. Сiдзи нин, тыдалö, лоö кувны.
Кыв шутöг панясисны чойя-вока, кодъяс вылö любуйтчöмöн видзöдiс мам. Öдя эз на вöв арлыда, но сьöкыд удж да пыр тöждысьöм пöрысьтiсны сiйöс кадтöг, коркöя вöвлöм мича чужöм вылын эз нин ворсöдчы вир. Кыдзи и Öльöксан, тöдчымöн гöрбыльтчис му да видз вöчигöн. Вот тайö сьöкыдторъяссö серпасалöмöн жальпырысь сiйö видзöдiс челядь вылö, кодъясöс чужтiс-быдтiс, войяс эз узьлы, а со öнi пукалiсны сы водзын ёнöсь, кодъяс чужöм вылын ворсöдчис том алöй вир, кодъяслы, кыдзи и сылы, сэтшöм жбö сьöкыд, и код тöдас, кутшöм олöм виччысьö найöс!?
—  Аски,— торкис чöвлунсö Öльöксан,— куртны лоö, а аскомысь вöскресення. Сэк кежö куртан огö нин вöчöй. Таш дыр на жö лоас кокасьнытö.
Öльöксан медводз чеччис вутш йылысь да еджыд гачнас веньтиктiс ытшкыны.

(Водзö лоö на)

(Вояс пыр, би пыр : Война вылын усьöм коми гижысьяслöн висьтъяс, пасйöдъяс, кывбуръяс. – Сыктывкар, 1985. – С. 227-235.)

 

Корткеросская Центральная библиотека им. М.Н. Лебедева. 2014 год.
Республика Коми, Корткеросский район, с. Корткерос, ул. Советская дом 187, lebedevlib@mail,ru
8(82136) 9-24-80. 9-98-16.