Перейти к разделу.
Менам кок ув му
казьтылöмъяс
Сиа Ыджыдвидз сиктлы
Мусюр вöлöк
Карсянь кайысь груз тыра машинаяс пырисны Мусюр вöлöкö. Шойнаты сикт шöрсяньыс кымын войвывланьö пырö Висер вожö туй. Медводдза грездöдз, Джиянöдз, кызь кымын верст. Код тöдас корсянь нин тайö туйыс артмылöма. Висер юыс тай эськö Эжваö жö петö, да мортлы ва туйысь öтдор ковмывлöма и му веркöс вывті туй. Парма-вöрöд нюръяс ордйöмöн чукльöдлö-мукльöдлö тайö нэмöвöйся туйыс. Джиянö вотöдз петкöдö Ростагьяö (тадзи нимтылöмаöсь Висер ю дорöдзыс петалан кытшсö).
Öні пö ми гортынöсь нин, юöртіс шоперыс да кыскис пуклöс сайсьыс гöрд вина доз. Унмовсьмöн кö он ю, а сöмын мудзтö веськöдыштны, кöлеяöдыс сöмын машинатö вöтлы. Со тай, кутшöм джуджыд кöлеса туйыс артмöма, оз кежовтöд ни шыбит канаваас. Машина кузолын ыркыдкодь. Август тöлысь абу нин юлься кодь шоныд лола. Оз нин дöзмöдчы öвад. Кöнсюрö туйбокса кыдзьяс вылын коръясыс вижöдöмаöсь нин. И сетöны тöдны, мый регыд нин бара шызясны-гызясны школаяс, и ме, том велöдысь, пыра нин сэтчö кöзяйкаöн. Полыштакодь, но сьöлöм вылын долыд. Гортын кута овны, мамö дорын. И меным кажитчö, мый тайö дыр-дыр кежлö да, гашкö, некор оз и помасьлы. Ньöти абу жаль, бöр босьті пединститутысь документъясöс да. Со, тайö коскöдз няйт Мусюр вöлöкыс сэтшöм муса да ас. И шоперъясыс асланым сиктысьöсь жö. Мед кö куим судтаöн сöткыштлöны выль гуранö дудöмысь. Бадь рос да лыс лап таляласны кöлеса улас да бара водзö. Пыр гортланьö, чужан сиктланьö.
Джиянö кайигöн рöмдыны нин кутіс. Ме век повлі тайö джуджыд чойсьыс. Сэті кайигöн, торйöн нин кузолын пукалысьяслы, эз вöв лöсьыд сьöлöм вылас. Вöвліны и чорыда доймылöмъяс. Туйын ветлігöн менö Енмыс видзис.
Меным сэки чайтсис, мый медбöръяысь вуджа Мусюр вöлöксö. Сэсся бара-й некор нин некытчö ог петав чужан позйысь. Сідзи вужъяся, мый менö некод и нинöм оз вермы сэтысь нетшыштны. Ме вöлі шуда. А веськыда кö шуны, том да йöй.
Джиян
Öні мойдöн кодь нин кажитчö татчö, джуджыд чой йылас, французъяс овмöдчылöмыс. Пленö шедöм Наполеон салдатъяс пиысь кодъяскö. Джияныс пö быттьö Жан нимысь да с.в. Мый вöлі сэки, пöшти кыксё во саяс, ме ог тöд. Миян дырйи тані олісны нин роч ова (Попов, Иванов, Павлов) комиöн сёрнитысь йöз. Оланін местасö бöрйöм серти кö донъявны, вылын юра, асьсö пыдди пуктысь войтыр. Висер вожö волöм бöрын Нёбдінса Виттор гижлöма Тист Иван йылысь «Луча» документальнöй висьт. Революцияыд абу жö ордйöдлöма, абу бокö кольлöма сэтчöс войтырсö. Со тай, Тист Иваныс лоöма коммунистöн и пиыслы пуктылöма Луча (Новолучинский) ним. Комиöн кö, Выль югöр.
Татысь жö петлöма и челядьлы кывбур тэчысь Юстина Аверкиевна Попова (Войт). Мунлöма сійö карö велöдчыны да кувтöдзыс олöма Сыктывкарын. Печать керкакöд орчча керкаын. Коркö кывсьöма сылы, Ыджыдвидзса ныв пö босьтчöма жö гижан уджö. Корліс гортас тöдмасьны. Ме волі сы ордö нылыс корöм серти. Вöлі сійö зэв нин пöрысь да омöля нин аддзис. Том дырйиыд öд чайтсьö, олöмыд помтöм и нинöм на водзвыв мöвпавны, гашкö, ковмас пö коркö морт йывсьыс бур кыв шуны. Нинöм ме эг юась аньыслысь, да и ачыс сійö ёнасö эз висьтась, а мöдарö на, юасис менам олöм йылысь. Вежаліс-ö сійö менам томлунлы, нимкодясис-ö чужанінсьыс выль петаслы, код тöдас?..
Джиян-пиян-кайпиян — тадзи ми нимтысьлім челядь дырйи. Велöдчисны тайö грездсаыс миянкöд öти школаын. А сёрниногыс налöн вöлі аслыспöлöс, мед кö сöмын куим верст и костаным. Эз миян моз нюжйöдлыны кывъяссö, дженьыда колскöдісны: со, пö, кö, вö (сов, пöв, кöв, вöв). А ми жö лывкйöдлім: со-о, пö-ö, кö-ö, вö-ö.
Коркö Джиянын ставыс вöлі, быд сиктын моз. Асланыс ясли-сад, начальнöй школа, кук да мöс карта, лавка, клуб. Но кор кутісны бырöдны посни грездъяс, тупкисны сэтысь ставсö, йöзыслы вöзйисны вуджны овны Ыджыдвиддзö. Но Джиян эз быр. Колисны сэтчö олысьяс. И öні на олöны.
Жансяньыс-ö асныралан руыс петöма, коми Öльöксан-ö вермöма, Енмыс тöдö.
Öбразъяс
И со кызь кыкöд арöс вылö нин петöм ныв шыбиті водзö велöдчöмöс да тöвзи Висер вожö, чужан, Ыджыдвидз сиктö. Мойвиис на меным, шуд уси: кольöма велöдысьтöг мöдöд класс. Александра Мелентьевналöн классыс, меным нин бура тöдса челядь. На дорын öд и вöлі практикаöй. А налöн велöдысьыс таво кутас велöдны Позтыкерöсса челядьöе. Юсьöм верöс дорсьыс пышйылöмыс менсьым олан визьöс вуж выйöныс бергöдіс. Олöмад ставыс йитчöма-кысьöма тöдса и тöдтöм войтыр олан визькöд. И öтилöн шогысь ли радлунысь вермас и тэнад олан туйыд вежсьыны.
Велöдчигöн ас керкаысь ёна кöдзавлöмыс эз на лолы. Öд быд каникулö и шойччан лунö, стрöка кö сюрас, век нин гортад кыссьылан.
Квайтымын арöс тыртысь мам вöлі ён на да винёв. Гортгöгöрса уджтö сійö ачыс бергöдліс: чойкöд чеччывлім дась пызан сайö. Мам вöлі шуда. Нывъясыс: бухгалтер да велöдысь — дінасöсь. Кык жыръя керкаын зэв бура тöрим. Ме öд, том ныв, верми петны верöс сайö да мунны гортысь.
Öтитор сöмын менö дöзмöдіс керкаын. Кыкнан жыръяс öшалісны öбразъяс. Весиг пачводз дор стенын. А ме öд том велöдысь, комсомолка. Мый шуасны челядь, пыраласны кö? Вот и эскöді мамööс чуланысь да пачводз стенысь босьтавны найöс. Öні на сійö öбразъясыс гöбöч джаджйын куйлöны. Сöмын кык ыджыд да öти ичöтик колисны Ен ув пельöсö. Öні мыйлакö чайтсьö, гортын олöмыс зэв этша лоис сöмын сы вöсна, мый эг тöр сэтчö öбразъяс понда.
Сьылім, йöктім, гажöдчим
Бур велöдысьöн кольöм челядь кужисны кывзысьны, кызвыныс велöдчисны бура. Кодлы сьöкыдджыка сетчыліс, эз дышöдчы. Велöдчöмыслысь коланлунсö гöгöрвоисны нин. Накöд меным вöлі кокньыд.
Медгажаиныс сиктын вöлі клуб. Öти кино эз кольлы видзöдтöмöн. Индийскöй кöть, сöветскöй кöть. Сэки телевизоръясыд эз на сёйны миянлысь прöст каднымöс. Том дырйиыд и йöкты да сьыв. И ми сьылім, йöктім, гажöдчим. Став прöст каднымöс концертасим. Öти концерт сöмын на коляс, мöд кежлö нин дасьтысям. Аслыным любö и долыд. Маті сикт-грездъясö ветлöдлам и. А Кöрткерöсын, юрсиктын, дзонь поэма ас район йылысь наизусть лыддьылі. Донъялысьяс пöвстас вöлі Прометей Ионович Чисталёв. Сы киысь жö ме и босьті дона козин. Тайö вöлі платтьö улын новлан шöвк дöрöм. Сійö дöрöм доныс менам гижöдöй эськö эз и сулав. Öні помнита аслам гижöдысь сöмын öти строчка: «Ми кужам уджавны и гажöдчыны кужам...» А мый сэсся сэтчö сöрлі, мöс лысьтысьöс-ö ошки, ыджыд урожай босьтысьöс-ö, Енмыс тöдö...
Сійö воясас мöд Ильич нин веськöдліс Сöветъяс странаöн. Сиктын чужисны Лёняяс. Ми кылім асьнымöс тырвыйö шуда йöзöн. Вöлім пöтöсь, чöжим на книжкаяс вылö сьöм водзö олöм вылö.
Москваын
Кык вося уджалан стаж тырöм бöрын ыджыд творческöй конкурс пыр писькöдчöм мысти веськалі сдайтны Литературнöй институтö пыран экзаменъяс. Сьöд вöр шöрысь петöм да гöраясысь лэччöм гижны босьтчысь том войтырöс босьтісны велöдчыны. Уджсьыд орöдчывтöг велöдчöмыд уналöн бöр ори. Дагестанысь аварка, рочнас бура сёрнитны эз и сяммыв, челядьöс велöдысь жö Сайгибат Айвазова гижліс на меным письмöяс Москвасянь, корис, мед эг шыбит институтсö.
Москваын медводдзаысь паныдаси велöдчысь жö коми ёртъяскöд. Нывъяслöн жырйö торкöдчисны, и ме восьті öдзöссö.
«Штепсель да Тарапунька!»— сöмын и артмис менам.
Ыджыд тушаа том мортыс гылыда серöктіс, а ичöтыс мудера читкыртіс синсö да зэв донъялана видзöдласöн гыжйыштіс тшöка бердсö. Николай Белыхкöд да Ёгор Рочевкöд сэсся сессияяс дырйи ветлывлім ВДНХ-ö, нуръясьлім сэтчöс кафеын. Öтчыд лунтыр Николай Фёдорович новлöдліс плюшысь вурöм ошкöс моздорас. Чорыд асфальт вывті дыр ветлöдлöмысь мудзöм Ёгор Васильевич низгис ёртыслы: менö по бурджык босьтлы моздорад, öтыджда тэнад чачакöд.
Ог пö тэ вылö веж. Наташалы ньöби, ичöт нылöйлы. А аслас синъясас шудыс, шоныдыс, радейтöмыс...
Кöмтöм кока
Кыдзи и сиктса кызвын войтырыс, ми видзим мöс. Совхоз паськöдіс машинаöн ытшкан-куртан видзьяссö, а Чуб юбердса ичöт видзторъяссö юкліс ас мöска войтырлы. Миянлы вичмисны жö видзторъясыд. Матіас, Поп виддзас, пуктысим мамöкöд. А ыліас кайлім чойкöд, мамö горт оліс. Чуб ю пöлöн сулалісны вöр керкаяс. Мукöдыс вöлі сы выйöдз нин пырöма муас, тöрлім сэтчö сöмын копыртчöмöн либö лажыньтчöмöн. Август тöлысьö, кор нин совхоз видзьясыс пуктыссьöма, шызьылісны Чуб юбердса ки пыдöс пасьта видзьяс. Зэртöм лунъясö уськöдчылісны сиктса войтыр асланыс скöтлы заптыны турун. Но лоліс и сідзи, мый ытшкан лунö дзирдаліс шонді, а мöд лунас гудыртчыліс енэжыс, буситіс, а то и швальöбöн зэрис. Кодсюрö весиг эновтлісны ытшкöм турунсö да бöр лэччывлісны гортаныс, торйöн нин мотора пыжа йöз. Ньöбліс жö сэсся Агни чой моторсö и зэв ён пу пыж вöчöдліс, но мамöлы зятьöс сідзи эгö и козьнавлöй.
Öтчыд узьмöдчим вöр керкаö öтнаным. Ывлаын зэрис, а сэні век жö вöлі кос. Тöрим, майбыр, паськыд наръяс вылö. Сись ни сартаса би эз вöв. Войяс пемыдöсь нин. Керка öдзöс вугйö сюйим бедь, гезйöн на лабич кокö кöрталім. Полам, сьöд вöр шöрын öд. Кольччим тай, луннас öд збойöсь вöлім.
Лунтыр уль турунсö чой бергöдліс, мöдар бокыс мед нин кöтасяс жö. Чигаркасö кусöдіс да регыд и унмовсис. А ме лунсö бипур дорын пуси да эг мудз. Керкаын пемыд, а син кöш пасьта. И друг войся чöв-лöняс ясыда кыла: «шлёп, шлёп». Кодкö кöмтöм кока джоджас шлапикасьö. Юрсиöй чышъян улын кутіс сувтны, сьöлöмöй коклябöрö лэччис. Бöр шы ни тöв, и бара: «шлёп, шлёп». Быттьö кодкö воськовтас да кывзысьö. Куйла кулöм нисьö ловъя, а чой нистö-узьö. Мый нö сылы, коммунистыдлы, оз öд эскы сійö ни Енлы, ни олысялы. Гортын войнас сизимысь чеччылö тшынасьны, а тані со табакыс дум вылас абу. Зурги бокас, мися, кылан? Узигад нö коді кылас. Садьмис да сэсся кöмтöм кок шытö кыліс.
Мортыдлы полöмыс чужигас, буракö, пырöма. Повзис жö и сійö, ме бердö жмитчис. Югдытöдзыс тадзи и куйлім. А «кöмтöм коканас» вöлöма ыджыд лягуша. Коркö тай слöймылöма пырны керкаас.
Олöмыс кутіс дзугсьыны
Медводда ыджыд кучкöмöн лоис миянлы, том велöдысьяслы, выль школьнöй реформа. Нёльöд класса челядь вуджисны уна велöдысь киясö. Позьö шуны, миянлысь классъяснымöс мырддисны. Оз öд тойыштны олöма велöдысьöс кытчöкö мöд сиктö декретö петöм том велöдысьсö вежны. Ме эськö водзынджык нин велöдлі Зулöбын. Кöкъямыс верст сайö ветлöдлі подöн быд лун. Позис сэні овны зэв шань пöль-пöч ордын, но томдырйиыд мöй овсяс вöр шöрын клубтöг. Веж мороз дырйи, пемыднас, водз асывнас петлі туйö, подöн дерт. И кöинъясысь эг пов. Öнія моз сэки найö эз ыджыдавны да.
И со, класстöг колъöм велöдысьяс: ме да Валентина Ивановна Макарова лоим «зимöгоръясöн». Нывъёртлы вичмис Типöсикт, а меным му помасяніныс — Одыб. Сэкся туйясöн сійöс позис тадз нимтыны. И во шöрнас бара коли уджтöг. Бöр воис асланыс велöдысьыс, кадысь водз орис декретыс да. Сылöн ыджыд неминуча и менам шоглун. Бöр ковмис локны чужан сиктö. И лои ме сэні мöд уджтöмалысьöн Лосев Коля бöрын. Сійöс олöмыс сідзи топöдіс, мый сьöлöм шöрас дзенöбтіс ружйöысь и мыніс ставсьыс.
Сэки и ме ёна куті каитчыны юртöма олöмысь, велöдчöмöс шыбитöмысь. И гижи письмö гижысь Котырö. Воча кывйыс вöлі ышöдана. Карö, университетö! Кок ув муöй, чужан сиктöй, метöг олас.
Войвыв кодзув. – 2003. - № 5. – С.26-30.
|
