И тайö тшыкöдчысьыс...
висьт
Ласей Öльöксанлысь кулöмсö пöшти некод эз и тöдлы сиктас. Нинöм шензянаыс: тулыс, гöра-кöдза. Мый Катыд сиктысь сизим дас кöкъямыс арöса старик лöня кулыштöма гортас, тöдiсны сöмын матігöгöр керкаясын олысьяс да Опонь Ладимер, сійöс видзысь-дöзьöритысь, Öльöксанлы бокöвöй морт.
Öльöксанлöн таладор югыдас некод нин эз кольлы: мамсö комын во сайын колльöдліс бöръя туяс, а батьыс нöшта на водзджык кувсьыліс. Öтнасöн бать-мам керкаас и оліс. Дзоньталіс-выльмöдыштіс кытісюрö: аслам нэм пö тырмас. Мортыслöн öд кага ни баля, гöтыр ни мöтыр.
Ичöтсяньыс нин сиктсаяс видзöдлывлісны зонка вылö кыдзкö видзчысьöмпырысь, быттьö полісны сыысь. И вöлі мыйысь. Ки-кока эськö, и тушаыс арлыд сертиыс, а вот чужöмыс пöрысь мортлöн кодь. Öльöксан верстяммис, но чужöмбаныс сідзи эз и шыляв. Нöшта на сьöд юрсиыс пемдöдіс да скöрöн вöчис видзöдлассö.
Нюмсö сылысь некод эз казявлы. А мыйысь и нюмъявнысö? Сиктса нывъяс полісны жö и öтдортчисны сыысь, мусукасьöм йылысь весиг сёрни эз вермы лоны. Син саяс тай морттö «тшыкöдчысьöн» и нимтылісны.
Öльöксанлöн вöлі сöмын öти ёрт — гудöк. Кор босьтліс «ёртсö» киас да ворсіс, синъясыс вазьылісны, а сьöлöм вылас вöлі курыд и шог. А сьöлöмыс Öльöксанлöн бурмыліс сöмын вöралігъясöн. Пармаыс, вöр-ваыс такöдіс сійöс: позьö пö овны му вылас, ки-кокыд эм дай дзоньвидза быдлаті.
Öльöксан гын сапöгъяс вöчавны велöдчис, сы дорö пыралысьяс лоины. Регыд и нимавны кутіс, весиг орчча сиктъясысь вурун нопйöн локылісны.
А томлуныс тöдлытöг исковтіс.
Медводдзаысь Ласей Öльöксанлöн сьöлöмыс вöрзис, кор аддзис орчча йöрысь роч Нинаöс. Том суседыс армиясьыс локтігöн гöтырпусö Роч муысь вайис... Сэки Öльöксанлы комын сайö нин вöлі. А кокньыдик гожся платтьöа аньыслы и кызьыс на эз тыр. Быттьö мича бобув сійö лэбаліс öшинь ув боръяс: дзоридзьяса платтьöсö вöнялöма вöсньыдик коскас, русов юрсиыс шонді водзас пöртмасьö гöрдоват рöмöн. Быттьö шонді югöръясыс кысьöмаöсь кöсаясас.
Öльöксанлöн унмыс воши. Нинöм эз кöдзöд том ань дорö муслунсö. Лавкаын сёян-юан босьтасигöн тшöкыда кывліс олöма аньяслысь сёрни-баснисö: вайöма по гöтыр вылö сэтшöм жебиник нылöс, кутлынысö пö весиг некыті, морöс ни бекъяс. Кос сартас да и ставыс. Тайö здукъясас Ласей пилöн чужöмыс нöшта на букыштчыліс. И кор чöвтлывліс бугжыль видзöдлассö больгысь ань вылö, мöдыс весиг йöжгыльтчыліс. А сэсся сэтшöмкодьясыс и лöсьöдлывлісны быдсяма небыличаяссö Öльöксан йылысь, быттьöкö сійö тшыкöдчысь. Кынöмыд пö видзöдлассьыс висьмылö.
Татшöм радейтчан висьöмсьыд том мужичöйясыд юсьылöны, а сійö — эз. Некод некор эз аддзыв Öльöксанöс гажа юрöн. Эз кодав-шатлав сикт кузя, йöзлы эз дозмöдчыв. Лöня оліс чужан керкаас. И мед кöть гындей уджыд буса-ёга, керка пытшкöсыс вöлі тырмымöн сöстöм. Пызан вылас — вышивайтöм ки чышкöдöн вевттьöм нянь куд да сов доз. Некöн эз туплясь мыськытöм тасьті-пань. Джоджыс век чышкöма. Шоныд. Татчö эськö роч Нинаöс пыртны!.. Ыджыдджык шудыс сэсся оз и ков. Но тайö вöлі збыльмытöмтор: суседъясыс кöлысясисны нин, и роч Нина лоис Öне Ване гöтырöн.
Кор кодöскö радейтан, окота кутшöмкö козин вöчны сылы. Со Ласей Öльöксан и босьтчис сійö удж бердас, мый медбура кужис: босьтчис гындыны том аньлы гын сапог гоз. Радейтысь сьöлöмнад вöчöмторйыд тай нöшта на мича да лöсьыд артмö. Дзик чача кодь гын сапöгъяс артмисны. Öні колö вöлі кыдзкö козьнавны тайöс верöс сайын нин олысь том аньлы, да мед эськö Öне Ваньыс эз жö вежöгты. Тайö майшасьöмсö торкис ачыс Нина...
Öти рытö öдзöсас кодкö торкöдчис. Йöзыд пыравлöны да, Öльöксан эз и шензьы, шуис «да». А порог вомöныс воськовтіс ... Нина Ивановна. Öльöксан казяліс: аньыс полыштöкодь. Вöзйис шойччыны-шонтысьны, а водзö мый вöчны, оз тöд,— шöйöвошис. Кöть дыр кад мöвпалан öтитор йылысь, а Öльöксанлöн бöръя кадсö сöмын гын сапог козьналöм и бергаліс юрас, но тайö ыджыд кöсйöмыс кö нем виччысьтöг збыльмö, дерт падман. Нина Ивановна буретш сы могысь и локтöма: вöчöдны аслыс гын сапöг. Роч сапöгнас пö кокыс кутöма кынмыны, висьталіс ... Ладнö ывлаас кынмö, да öд и важ школаас пö джоджъясыс вывті нин кöдзыдöсь.
Ласей Öльöксанлы лоис шоныд сьöлöм вылас: козиныс тай буретш и лöсяліс. Ме пö гынді нин тіянлы сапöгъястö, видлöй. «Быттьö меным и вöчöма, кыдзи нö кужинныд мерайттöгыс?»— шензис том ань да вöлисти тыр синъясöн видзöдліс Öльöксан вылö: татшöм мелі, радейтана видзöдлассö ань эз аддзыв весиг том верöсыслысь... И гöгöрвоис Нина Ивановна суседыслысь сьöлöм пессьöмсö, а ачыс гусьöник шензис: «И тайö повзьöдчысьыс, тайö тшыкöдчысьыс... Вермö радейтны! Сылöн сьöлöмын öзйö муслун!..»
...Тувсовъя шондіа лунö шойна яг вылын гуасисны. Этшаöн, этшаöн колльöдісны Ласей Öльöксанöс бöръя туйö. Да сійö эськö ньöти эз и дöзмы та вылö.
Сöмын тай роч Нинаыс гу дорас эз вöв...
Войвыв кодзув. – 2007. - № 6. – С.62-63.
