Пиёпан
Царскöй Армияад служитöмысь важöн вöлöм пышъялöны-дзебсясьöны жö.
Овлöма Ыджыдвиддзын Пиёпан. Призыв кадыд кутöма воны, да кайöма вöрö. Но вöр керкаад во гöгöр öд няньтöгыд он ов. Пöтка шыд дорад сов на колö дай. И волывлö вöлöм том мужикыд уна дас верст сайысь гусьöн гортас. Том гöтырсьыд на гажыд бырö и. Мöдыс небыд пöсь няньöн на чöсмöдлас и. А сэсся бара сукар нопйöн мунö ылі вöр керкаö.
Со сійö öтчыд лэччö ордымöд вöралан кадö. Ылісянь на том синнад казяліс — паныд локтö олöма дядьö, вöралысь Степан. Мый вöчны? Ордым бокысь аддзис ыджыд вужля, улас водöмöн тöран. Сэтчö и тöрöдчис.
А Степан бура уна верст нин бöрас колис, ёна мудзис. Пöрысь кокъясыс юкалöны нин. Аддзис вужлятö да и пуксис шойччыштны. Тэрмасьтöг кыскис каллянсö, табак кöшельсö, пока пестіс да тшынасис, бура уна кад коли.
Пиёпанлöн став ки-кокыс позяліс, став лысьöмыс кутіс доймыны. Кутшöм кывъясöн сöмын думсьыс эз пиняв Степанöс. Сюра лешакнас и пöрысь меринöн. И кор Степан нöшта кутіс содтыны табаксö каллянас, Пиёпанлöн «сöптыс потіс».
Ружтыштöмöн петіс вужля улысь да сувтіс Степан водзö: паськыд тошка, гынмöм лёзь юрсиа, сьöд чужöма. Вöрсаыд збыль вылас кö эм, öнія Пиёпан кодь стöч.
Степанлöн калляныс усис калькмунöм вомсьыс, ачыс гатшöн чергысис вужля вылысь. «Вöрсалы» жö ковмис садяс вайöдны повтöм кыйсьысьöс. Дерт, сэсся тöдіс жö Пиёпантö, ас сиктса морттö.
Армияö Пиёпанöс сідзи абу и нулöмаöсь. Некод сылысь дзебсясьöмсö эз вузав да и ёнасö, буракö, эз и корсьны-вöтлысьны коми вöралысь морт бöрсяыд.
Вöт
Рытнас воліс нывъёртöй. Бура дыр варовитім. Асланым дойясöн юксим. А менам дойыс öд ыджыд. Пенсия ичöт, патера дон ыджыд да нöшта на и водзö уль лым тупыль моз содö.
Патераыд пö тэнад асэмбуралöма. Вузав. Кай чужан сиктад, восьт лавка. Купчикаöн лоан,— велöдö аньыд.— Пыр кутан озырмыны и озырмыны. Сылöн мунöм бöрын сэсся регыд и унмовси дай вöтасьны куті: «...Дзик Висер ю бокас, кыр йылас, сулалö пелькиник лавка. Öдзöс весьтас мича шыпасъясöн гижöма: «Петыр Саньöлöн «Зарни ёль» асшöр лавка». Улынджык кывбура корöм:
«Муса войтыр, локтöй, пырöй,
Мый кöть колö, тані пыр эм».
Лавка пытшкас югыд, сöстöм. Джаджъяс тырöмаöсь вый сулеяясöн, тшай пачкаясöн, кофе банкаясöн. Кампет и печенньö, макарон и шыдöс. Ыджыд кöзöд тыр пельмень и калбас, котлетъяс. А курыд юанторъяс йылысь и сёрниыс нин абу. Кыдзи нö натöгыс? Да, ставыс эм: сов и сакар, фрукты и сок, куритчан и истöг.
Медводз, дерт, лавка воссигас, воины пöкмелитчанторла. Со пырис сусед Лёня. Оз ков висьталöм, чужöм сертиыс тöдчö: мортыс чорыда висьö. Тёть Сань, вайлы пö уджйöзöн öти доз. Пестö поткöдлыны вола да весиг пажнайтны ог пырав. Вежаньыд по тшöктіс сетны. Быть öд сет — вежаньыс сылöн менам чойöй, бухгалтер-компаньонöй. Вомас сюйыштöм вылö кильки банка на мыччи. Сьöд тетрадьö эг и пасйы уджйöзсö, пес поткöдлыны кöсйысис да. А менам öд и дзöля пач пескыд весиг оз пот, вынтöм нывбабаыдлöн.
А сьöд тетрадьыс менам кыз. Сиктсöветын та мындаыс абу учёт вылас. Ставыс уджйöзöн босьтöны. И быдöнлы сета. Колана йöз: пес вайысь, потшöс дзоньталысь, кильчö лöсьöдысь. Лёка эськö, буракö, лöсьöдöны да, век тай пöра содйöдыс лэччигöн.
Недыр лавесникалöм мысти и нинöм нин эз коль. Выль тöвар вайны сьöм эз чукöрмы. Он öд уджйöз гижалöм сьöд тетрадь вылад ньöбась. Со и биысь на мынтысьны корöны. Вот перйысь полиция доходысь прöчент корö...
Друг, видзöда да, джаджйö öти «Зарни ёль» сулея кольöма да исыштмöн калбастор куйлö вески бокын. Шогöйла восьті дозсö, юыпті, юрö оз кай ни кокö оз лэччы, бара ырсниті. Помöдз юи, но ньöти эг гажмы».
Сэсся кысянькö енэжсяньыс гимн (ыджыд кып) кутіс кывны. Радио тутсö вöлöм. Квайт час асыв пö Мöскваын. Дзикöдз садьми да шуа: миян, мися, Коми муын квайт час жö. Бур, мый садьмöдін. Эськö узигас шогöйла и кувны верми.
Войвыв кодзув. – 2003. - № 10. – С.12-14.
