Видза колян, чужанін!
Пöкрöв лунлы паныда войö усьöма лым. Но югдігас нин сійö пондіс сывны, ывлаыс шондöдіс да. Бöр сьöдöдісны кушмöм град вывъяс. Вижöдіс боръясын öтава турун. Пывсяндорса льöм да пелысь пуяс сулалісны пасьтöмöсь, быттьö виж сарапанъяссö талялісны кок уланыс. Пуксис волöн медся гажтöм кадыс — сёр ар, кöть дзикöдз кынмавтöдз да тöвся лым усьтöдз вöлі ылын на.
Сиктын ломтысисны пачьяс, но эз быд керкаысь тай пет тшыныс. Мортöн эновтöм шоныд позъяс кöдзалісны. Кыдзи карбердса дачаяс кынмывлöны тöв кежлö, сідзи жö и сиктъясын кольöны олан рутöг тыртöм керкаяс. И воысь воö налöн лыдыс содö и содö. Бур на, эм кö гожöм кежас кодкö волысь: бокын олысь челядь либö чой-вок, кодъяс чужлісны тайö жö керкаас, кодъяслы абу на дзик ковтöм чужаніныс.
Бур на, кыскö кö сэтчö, кöні кöмтöг котравлін изъя берег вывті. Верстяммыштін, да кытшовтлін став матігöгöрса яг-нюръяссö. Уна вотöс-тшак лоис öктöма. Уна турун нöб кыскöма мышку вылад. Кочöг бытшкымöн ытшкöма вутшкöсь видзьяс. Куртöма и чöвтöма зорöдö ма кöра кос турун. Гöрлöма и кöдзлöма. Идралöма град выв пуктас.
Быд сиктса удж Насталы тöдса. Кöть эськö комын во нин лыддьыссьö карса олысьöн, а Ягвыв сикткöд йитöдыс эз на и орлы. Мамыс ловъя дырйи артмыліс на тöлысьнас кыкысь волыны. Сюрас кутшöмкö выль бурдöдчан-зырасянтор, и Наста бара нин туйын.
Таво медводдзаысь Наста гожйис дзик öтнасöн (не кö лыддьыны пöрысь Васька каньöс). Гожöмыс вöлі жар. Висер юыс подöн кевмöн косьмис, важъя дорысь ёна нин турунзис, и та вöсна нöшта на векньыдджыкöн кажитчис. Кывтыдпом весьтса діыс сиктладорсяньыс пöшти öтлаасьöма берегыскöд. Кок лапаясыд öдва и вошлöны ваас ді вылас вуджигöн. А челядь дырйиыс Насталы юр вылöдзыс ковмыліс лэптыны бöждоръяссö либö дзикöдз пöрччывны платтьöсö. Сэки ді вылас, еджговвиж лыа вылас, эз быдмывлы ни öти бадь куст. Кок пыдöсъясыд майбыр, эз доймавны. И мöдлапöлас дікостса ва пыдöсыс сэтшöм жö еджговвиж лыаа вöлі. Но сэті юыс кывтіс зэв öдйö дай джумъя вöлі, некымынысь воськовтан и ваыс юр йылöдзыд нин. Сöмын зонпосни да повтöмджык нывкаяс вартчывлісны кок судзтöминöдзыс.
А öні со ді вылас быдса рас быдмöма, еджыдвиж лыаыс оз нин пöшти и тыдав. Но век на тай сэні кылöны челядь гöлöсъяс.
Лыа ді кö раскö нин пöрны удитіс, дыр нин и овсьöма вöльнöй светас Насталöн. Со, кусіс нин и мамсö видзысь чойыс, куим во и оліс мам бöрас. Позис на во дастö овны, а мамыс дыра кö, и кызьöс на.
Кузь нэма вöлі Сава Марья. Кызьöд нэмсö заводитчöмсяньыс помöдзыс оліс, да чужан сиктсьыс эз и петав, не кö лыддьыны Павелыскöд Кардорöдз пур кылöдöмсö. Но мый но сійö аддзыліс ылі муяссьыс? Сöмын ассьыс муса Павелсö. Орччöнöсь да шудысла нинöм эз и казяв. А сэсся, шогсö вайис ыджыд война.
* * *
Ныла-пиаöн ки вылас Марья колис энькаыскöд муöдз пырöм öшиньяса, нитшсялöм вевта омöлик керкаö.
Павел верöсыс вöлі шöркодьöн куим пиян пиысь. Ыджыдджык вокыс войнаöдзыс удитіс гöтрасьны да торйöн лэптыліс керка. А Павел эз удит, медічöт вокыскöд, Öльöксанкöд, найöс босьтісны война вылö. Сідзи и семья лöсьöдлытöг сгинитіс ичöт вокыс. Гу ни горт. Карелияса зыбуч нюрыс ньылыштлöма Öльöксанöс сьöкыд пулемётыскöд тшöтш. Павелöс тай Енмыс видзöма. Эз кö ловйöн коль, и Наста эз вöв... Медыджыд вокыс, Степан, война вылас сюрлöма воöдчыны Киевöдз. Генералöс пö тай новлöдлывлі-а. Эз и пыдди пуктывны сиктса войтырыд сылысь сöрöмсö. Ачыс на шмонь туйö сэсся колис олöм помöдзыс.
Война бöрас куим челядя нин, Сава Марья видзис на мöс. Анна да Ёгор велöдчисны школаын. Наста гöбöчвывса потанын горзіс-бöрдіс. Павел Мартестанын пöжасис вöр лэдзысьяслы. Регыд и ыджыд нылыслы вичмис вöр лэдзан уджыд. Дас нёль-дас квайт арöсаяс кайисны Сирö, Чуб ю йылö. Ичöтик тушаа Анналы аслыс кодь жö и вöв вичмис. Пробка нима на дай. Рытъяснас шойöдз мудзöм том йöз, челядь руа на ныв-зон, видзöдлісны на баракö вайöм кино, а сэсся сы ни садь узьлісны мыш-на-мыш водöмöн. Эз мöдейтны, коді и мышканыс водліс, ныв али зон. Унмовсьлісны здукöн. И век жö унпöтныс эз шедлы.
Öтчыд шоныд кадö Марья нывъёртыс кайöма пожöм кыз вож вылас и гезйöн коскöдыс кöртасьöма пуас. Сідзи и узьö сэні, а бригадирыс чеччалö кок пöв вылас да ёрччö. Он öд пилит пусö да ви нывкасö.
Аннаöс, кöть и начальнöй школа сöмын помавліс, корисны колхозсянь велöдчыны тшöтоводö. Бура лыддьысьö и артасьö, вежöра и сюсь, зептас кывйысла оз пыр ни — артмас пö сыысь тöлкыс. Кос тшак да кос нянь тыра пу чемоданöн регыд сэсся и мöдöдісны Улыс Човса сельхозшколаö. Öти ныв Марьялöн лоис сэсся служащöйöн. Пиыслы Енмыс сетлöма му вылас овнысö сöмын дас куим во. И мамыслöн медся уна муслуныс сэсся, дерт, вичмис Насталы. Невеста нылöдз тай öти крöвать вылын узьлісны-а. И мöд нывсö Марья велöдіс служащöйöдз. Сöмын тай сиктад гез вöньтö он на веж шöвк вылö. Мед кö школаын уджалан, картаад баксысь-руксысьяс пыр эмöсь. Важ керкаас на олігас öтчыд Наста мам кисьыс ыджыд пу помöй ведра аддзис да курыда думыштчыліс, мый и сылы тайö, быдмас да, вичмас. Но таысь сійö мыніс. Анна чойыс вежис мамсö. Пачводз дортöг да идрасян уджтöг на Насталы тырмывліс сиктса мырсьöм-пессьöмыд. Но сійö уджыд эз ёна и сьöктöдлыв том вир-яя, эбöса морттö. Му вылын кöть видз вылын, пес вöчигöн кöть вотчигöн, эз кö панйыв мукöдъяссö, и эз кольччыв медбöръяöн. Эз няргыв потöм гадьяс пöлялігöн.
Ылі видзьяс вылын войковъясöн пуктысигöн личавліс Насталöн лолыс, сьöлöмыс бурмыліс. Тані, челядь синъяссянь ылын, позис видзчысьтöгджык, вöльнöя овны. Кöть пасьтöгыд ёляс бузöдчы. Корсюрö и сöткыштны на ковмыліс, косаыд кö вутшкö сатшас. Велöдысь мортыд öд абу нин Павел Наста, а Анастасия Павловна. Первойсö зэв тешкодь вöлі кор сійöс верстьöджык йöз тадзи ыдждöдлісны. На син водзын öд быдмыліс чöрс кодь вöсни да вильыш Наста. Зырымбедь да и сöмын. Настаöс кольöдöны вöлі карö, институтын водзö велöдчыны журналистö. Но уджалан места лоис школаын, да чилзьöдіс-локтіс гортас, мамыс борд улö. Йöй кöсйöмыс збыльмис...
Öти радлун и вöлі сиктын — клуб. Культура керкаöн нин сэки шусис. Выльлунысь öтдор, быд рыт петкöдлісны кино, сэсся и асьныс том йöз тшöкыда концертасисны. Не кö тайö да библиотека, прöст кадтö лоис некытчö воштыны. Книгаяснас эськö библиотекаыс эз вöв ёна озыр, но уна воис газет-журнал. Роман-газетаыд ветлöдліс киысь киö. Гортад, аски кежлö челядьöс велöдны лöсьöдчöмысь öтдор, виччысьліс и ичöтик радлун: помавтöм на книга. Окота öд тöдны, мый лоас водзö. Öні тайö лöнь шойччöмсö вежисны бразилияса сериалъяс. Телевизоръяс быд керкаын. Со тай, быттьö гу выв крестъяс керкавывса антеннаясыс. Клубад сöмын гажа юрöн косясьны том йöз волöны. Кинотö öні и паччöр вывсяньыд позьö видзöдны, мир пасьта став лоöмторъяссö тöдан. Анна чойыслöн дзик выль телевизор со колис. И антеннаыс керка вевт вылас сулалö.
* * *
Эм-ö му вылас креста йöрысь öтдор гажтöмджык места... Яг-выв сиктлöн шойнаыс эськö и зэв мича гажа ягын, но сы дорті мунігöн челядь дырйиыс на Насталы вöлі шуштöм.
Öти гожся асылö мамыс йöзысь водзджык лысьтіс мöссö да лэдзис дзиръя саяс, мед пö виччысьыштас мукöдъяссö. Но Сюрук дыр эз думайт, бöжсö вылö лэптіс да и шутёвтіс креста йöрланьыд, код сайын и вöлі йирсьöдчаніныс. Унзіль Настаöс мамыс кыпöдіс шоныд вольпасьсьыс и ыстіс Сюрук бöрсяыс. Школа помалысьыд невеста ныв нин эськö да, но зэв на челядь руа.
Кöмтöгыс и котöртіс мöс бöрсяыд. Чики-мики кодь Сюрукысь быдтор позис виччысьны. Мунас да корсь сэсся, кыдзи кольöм гожöм — нюрö муртса абу вöйöма.
Колльöдіс Наста тайтööс йирсьöдчан йöрö да бöр локтö гортас. Ывлаыс шондіа, весиг креста йöрыс кыпыдöн кажитчö. Но кор шойна яг колис мышкас, нывка бöрсьыс кыліс тэрыба шуалöм: «Эн коль, эн коль, эн ко-о-ль!» Юрсиыс зэвтчис и весиг вöсньыдик шыр бöж кöсаясыс быттьö вывлань качисны. Пöсьö и кöдзыдö шыбитліс сійöс. Наста нетшыштчис да тöвзис сиктланьö.
Кутшöм нин сэні «эн коль!», кор тэ бöрся крестайöрса вöтчö. Лысьтан öмöй видзöдлыны бöрвылад.
Сёрöнджык мöсъяссö колльысьяс аддзылöмаöсь Öльöксан Ёгорлысь чипана-петукасö. Потшöс вылас пö «ко-ко-ко-оо!..» любитчöны. Аддзöмаöсь мусукасянін!
* * *
Гожöмбыд Наста оліс чужан сиктас. Шонтіс, ловзьöдліс чужан керкасö. Кайліс шойна яг вылö. Тані öд ставныслöн гуясыс: мамыслöн и чойыслöн, пöчыслöн и ыджыд мамыслöн, уна мукöд рöдвужлöн. Шог лои Насталы сьöлöм вылас сыысь, мый унаöн нин тшöтшъяясыс аддзисны аслыныс татысь местанысö, сыысь, мый томъясыс нин тані куйлöны. Кодöскö косясигöн виöмаöсь, кодкö ас вылас кисö лэптöма, кодкö лёк сораса винанад сотчöма. И том аньяс куйлöны кыз му улын. А öти памятник вылын вушйытöм краскаöн гижöма: «Мама, тебя мне так не хватает». Тайö Насталöн воча чойыс вина понда жö колис нывсö сирöтаöн. А сиктын том йöзыс пыр öддзöны юнысö. И юöны «Троя». Со и содöны выль гуяс.
Наста вермис жö воны татчö кадысь водз. Ышмыштліс жö том дырйиыс, торйöн нин мамыс да чойыс дорö волігъясöн. Со пö карсаыд локтö, бара нин пидзöсъясыс водзынöсь, долыда шенасьö кияснас. Туяс петігöн кöть эськö нин мед эз ю,— ропкывліс ыджыдджык чойыс. Но бур на, Наста эз вöв лёк руа ни пиня-гыжъя. Эня-ныла сійöс видöны, а мöдыс сöмын чöла вашъялö. Васька каньнысö шыльыд юрöдыс мольöдö. Узяс да мöд лун асывнас шöвктуг кодь шань. Горт гöгöрыс ставсö вöчны уськöдчö: джоджтö чышкас-мыськас, пес-ватö пыртлас, тöвъяснас öшинь ув туйястö зыртас. Тулыс, гожöм и ар град вылын копрасьö.
Торйöн нин уна Насталы сюрліс пескöн ноксьöмыс. Сиктад позьö не видзны мöс да порсь, сытöг олан. Позьö и этшаджык град выв пуктас вöдитны, дыш кö. Но пескыд ко абу, эштас олöмыд.
Кын пес чуркатö кисьтасны трактор телегаысь ыджыд чукöр. «Менам ньöбöма,— шуас чойыс,— сэсся тэнад удж, карса». И быть мырсьы. Карын кöть олан, а мамыдлы отсöгыс колö. А ручка-перо кутан киыд слаб. Кузь чуркаясыс нöшкöн вачкывтöг оз на и потны. Лым сылас да сэсся тэчны колö. Пес вевт улöдз куш му вывті ваннаöн кыскавны. Тайö кокньыдик лемень ваннасö коркö первойысь видлöма катыдпомысь öти ань дадь пыдди. Сэки сы вылын сералöмаöсь. А дадь вöчысьясыд тай сэсся бырисны сиктсьыд, да öні быд йöрын, видзöдан да, сійöн и вöдитчöны: коді куйöд град вылас кыскö, коді пес. А кодкö и öтруб ли пызь мешöк сельпосянь гортас вайö. Дадь пыддиыд зэв туяна. Павел Анналöн сійö быдса куим. Öти — куйöдлы, мöд — песлы, а коймöд сараяс дзик выль югьялö. Со и кыскалö Наста водз тулыснас то пес, то куйöд. Öти местаö кö эськö вöлі тэчöма ломтытöдзыс, бур на да. Но Анна чойыс индывліс первой тэчны пывсян бокö, восьсаинö, мед косьмас. Сэсся вöлись пес вевт улö пыртлöны. И во гöгöр чöж тайö уджыс вöлі: тöв кöть гожöм, тулыс кöть ар.
* * *
Наста, гашкö, нэмсö эськö уджаліс сиктса школаас, но муніс юркарö водзö велöдчыны да сэсся бöрсö эз и лок. Но отпускаліс пыр гортас. Карын бур оланіныс сылы эз вичмы. А гортад век нин бурджык, кöть недыр кежлö мынлан йöз семьяяслысь няйтсö зыртны. Сійöн и чужан сиктсьыс кöдзалöмыс эз ло. Со öні, гожöмбыд чужан керкаас олöм бöрын, синва петтöдзыс жаль вöлі мунны, тöвбыд кежлö сійöс кöдзöдны. Мöд во тулысöдз сэсся оз артмы волöмыс. Енмыс кö видзас керкасö да ачыс кö лоö дзоньвидза, быть воас. Видза колян, чужанін!
Войвыв кодзув. – 2004. - № 12. – С.41-45.
