1.
Тыр тöлысь
рытыввылö лэччö,
а асыввывлань
шонді чеччö.
И енъюгыдас
тöлысь чусмö.
И асъя шондіыс
нин мусмö.
Кöть эськö
шондіыслысь югыд
лöнь тöлысь
юкö миян мукöд.
И весиг войнас
тöдны сетö:
мый шонді эм на,
бара петас.
И бара шонтас,
сійö вына.
На парма весьтын
тöвся сынöд.
Пашляк на шковгö
керка стенö.
Кузь воя каднад
кöдзыд венö.
А пачын
трачкöдчö нин конда.
Печенча
пöжассьыны пондö.
И сэтшöм чöскыд
тайö кöрыс.
И югыд, шоныд
сьöлöм шöрын.
2.
Да, карын моза
дітшвидзны оз позь тан.
Чой петö вала,
ва пельсаным куш.
Но первой пу зыр,
россö киас босьтас.
Со, труба дорын
ыджыд тола чуш.
И кильчö вывсянь
содка помöдз чышкö.
И пес вевт улöдз
зырйöн вöчö туй.
И мудзö кос,
и пöсялöма мышкыс,
кöть эськö эз на
мусюр вöлöк уй.
А туйыд öні, майбыр,
Висер вожö
асфальта, Эжва вомöн
зумыд пос.
И öдйö воан сиктад
тöв и гожöм.
Во гöгöр чöж нин
мусюр миян кос.
Но öні туйыд
лоис сэтшöм дона,
и олöм донсялö на
лунысь—лун.
И гежöда нин
гортö вола вонас.
А сьöмтöг, кор окота,
он на мун.
И, гашкö, сэсся
пуктысьтöдз ог волы.
Мен карас овны
мускöс оз на зырт.
Но чужан сиктöй
кыпöдлö на лолöс.
И муслун турöбьяснад
оз на тырт. |
3.
Февральыд дыр на
лымсö гартлас.
И оз на помась
весиг мартнас.
Апреляс луныс
ёна содас.
Но чарöм вылö
öшъяс пода.
И шоръяс письттöдз
кöть нин матын.
И майыс лымъя
овлö татöн.
Но ставыс муса
чужан мулöн.
И сьöлöм
ытва моз на тулö.
4.
Бара дзоридзалö льöм.
Тыкöд öтлаасьöма юыс.
Ышлолалö гöрöм муыс.
Кокын кузь гöленя кöм.
Сё во сайын тадз жö стöч:
Борйын шойччис мудзöм вöлыс.
Кокан—зырйöн мырсис чöла
Öшинь улын менам пöч.
Сійö кöдзліс на и нянь.
Дöва олöм пыкис томöн.
Йöв на вичмис челядь вомö.
Куим пиöс быдтіс ань.
5.
Мый и вежсис
сё вонад на тані,
Сиктса уджлöн
важкодь чужöмбаныс.
Куран, вила,
зорöд пинь да пыкöд.
Дзоньвидза кö мортыс,
ен на сынöд.
Зіль семьялöн
яя—выя воыс.
Пуктасьясыс
гöбöчöдзыс воö.
И оз петны найö
йöзö корны.
Ас кианыс олöмыс,
оз ёрны.
Выль кулакьяс,
гашкö, шуас кодкö.
Мырсьöмысь оз пов,
оз öтдорт водка.
Палялас да
бара соссö пуджас,
нöшта ёнджыка на
сетчас уджас.
Кодлöн юрыс
пельпом вылас эм на,
му дорысь оз лэдзчысь
сійö нэмнас.
Лэптас керка,
быдтас челядь йылöм.
Оз ло прöста
волöма му вылö.
Карыд öні
озыръяслы сöмын.
Оланіныд вичмö
ыджыд сьöмöн.
Пöль-пöчьяслöн
вужйыс мед оз ор на.
Чужан позйын колö
олöм дорны. |
