Эн ылöдлы – оз ло, мый вöлi,
Важ шудыд некор бöр оз во.
Код öтчыд ылавлöма вöлi,
Оз мöдысь ылав - гöгöрво!
Оз инась некод дорö сьöлöм,
Тэ важ моз муса он нин ло;
Сiдз паляв мысьтöм вöтöн вöлöм
Оз збыльö пöр, вемöс ло.
Тэ менсьым шогöс эн нин вöрöд.
Мый вöлi – вунöд, эн шу кыв.
Эн коньöр сьöлöмöс тэ бöрдöд, -
Ме вемöс вылысь узя, ныв!
Ме узя, - долыд меным тадзи,
Эн казьтыв водза олöмтö:
Бöр мусатор ме ог нин аддзы,
Вай вунöд, пöдты колöмтö!..
1918 год
Коми му. – 1993. – 11 сентября |
Джуджыд слуда узьö
Гöгöр шы ни ру:
Пемыд увтас кузя
Чиркйö кöдзыд ру.
Абу туйöд буса,
Вöр пу кор оз вöр…
Шойччöг лоас муса, -
Виччысь сьöлöмшöр!
* * *
Кор менам сьöлöмöй нöйтчыны дугдас,
Кодыр ме ловъяысь ловтöмö пöра
Сэк кежлö тiянлы, сё муса другъяс .
Дась югыд вежöрöн со мый ме кора;
Дзöляник ю бердын зымвидзö слуда,
Пöлöныс вöр быдмö – читкыли пожöм
Юр йылас кöдзаяс – рудзöг да, ид да.
Гажöдчö том йöз сэв тулыс и гожöм.
Татчö ми, челядьяс волывлам вöлi
Чукöрби: оз сёам, шыбласям изйöн,
Ньыв пу йыв гöрддзалам, вуж перъям пьöвлы,
Мыйыськö повзям кö – гортö пыр пызъям!..
Вöт моз тай кольöма кад сiйö ылö,
Дас квайт ар вудж мысти вой кор оз узьсьы,
Сьöлöм кор чуксасьöм кутшöмкö кылö, -
Кыасянь кыаöдз гаж сэнi судэсьö.
Коми му. – 1993. – 11 сентября |
