ВОКЪЯС

Ме веськалi Балканъясö,
Кор вокöс мездiс вок.
Сусед суседкöд панъясьö:
— Бур вок, ме ордö лок!

Яр шондiсö  быть проститi,
Сэн быдöн сы кодь пöсь.
Ме мозыс эз на гöститлы
Ни öти ыджыд гöсть.

Пöсь дружба изйö йиджöма,
Он, вöрöг, сiйöс ви!
Быд крежö кодкö гижöма
Кык кыв: «Добре дошли!»

Ме гаравлi коть сёысь нин
Оз нитшсяв сэкся бур,
Кор асьныс татчö воисны,
Эз янды-й менам юр.

Веж сывсö налы паськöдiс
Лöз Мозын дорса яг,
А другным вайис аскöдыс
Болгарскöй мулысь флаг.

Болгарин-вок, ой, уджалысь!
И Коми абу няр.
Ми костын кузь пос нюжалiс:
София — Сыктывкар.

Мед лёк морт увтчас-кулитчас,
Оз имит тайö мем,
Кор Дружба нима улича
Быд карын öнi эм.
(Сьыланкыв.)

ЫДЖЫД СУБÖТА

Важ пöч моз некод нин оз вöтав
Субöта рытсянь ыджыд лун.
Ми чужтiм ыджыд гöрд субöта,
И тайö луныс — зэр кöть слöта -  
Оз чусмöд уджлысь кыпыдлун.
Бур, ыджыд босьтчöм нимыс сылöн,
Тадз шуис Ленин — миян вождь.
Кор петам гöрд субботник вылö,
Удж шыын вождьлöн гöлöс кылö,
А нюмсö казьтö тувсов гож.
Бöр быттьö воöма том кадас,
Со весиг пöрысьлун оз ляб.
Субботник миян кыпыд лада,
Став чужан муным зiль бригада,
А миян партия — прораб.