Купайтчöм
(Висьт)
Вöлi мича гожся асыв. Бать-мам гырысьджык челядьыскöд лöсьöдчисны видз вылö. Ичöтъясöс, Настукöс да Ираöс, пöчныскöд овны кольöны.
- Пöчыдлысь, оз тусьяс, кывзöй, вадорö эн лэччöй, лэччанныд кö, энö купайтчöй, купайтчанныд кö, энö вöйöй, а вöянныд кö - гортö энö лысьтö локны! - велöдö пöч.
- Вот и бара öтнаным колим лунтыр кежлö, но уджным уна - гажтöм оз босьт. Тэ, Ирук, киськав öшинь увсьыд дзоридзьяссö.
- А ме, пöчук, - шуö Настук, - корöсь кöтöда да джодж чышка.
- Чышкы, чышкы мичаа пос помöдз да эн вунöд Бусколы гырничöн ва петкöдны. А сэсся ворсöй öшинь улын, а ме сэк костi кысьышта.
Помалiсны Настук да Ира уджъяс да петiсны öшинь улö ворсны. Регыд на дiнö чукöртчисны сиктса мукöд челядь.
- А вай купайтчамöй! - асывсянь дэльöдысь думсö восьтiс Настук.
- Лэччылам, лэччылам! - шызис Лазар, Настуккöд тшöтшъя детинка, сылы тöрыт на тырис квайт арöс.
Настук ыджыд чойыскöд унаысь нин лэччывлiс; вадорö да лючки тöдiс туйсö. Челядь мöдöдчисны.
- Кытчö тi? - кылö горöдöм. Тайö котöрöн локтö Тима.
- Лок, лок, вадорö лэччам, - горзiсны сылы.
- Öнi лоим сизимöн, - шуö Настук. - Кутчысьöй чунь крукöн, ме медводзын, вадорö лэччам сёнöд, энö увгöй.
Ю дорсянь коркö-коркö пöльыштлö кокньыдик тöв да мелiа малыштавлö челядьлысь бан бокъяссö, ворсышталö налöн юрсиöн.
- Вай пöрччысьöй! - кöзяйка моз тшöктiс Настук, кор воисны вадорö.
- Дöрöм-гачьястö ёкмылялöй да пуктöй костöн-костöн, мед оз сорасьны.
Челядь пöрччысисны и кöлуйнысö пукталiсны, кыдзи шуис Настук.
- Но, локтöй, келам ваас да ставным ва пиас пуксялам.
Челядь келiсны да раминика пуксялiсны, но регыд шызис, кодi кыдзи сяммис, сiдзи и бузöдчис.
- Видзöдлöй, ме уяла!
- Ме гыбала чери моз!
Купайтчисны лöзöдтöдз, а петны ваысь абу окота. Настуклы тöд вылö усины бабыслöн кывъясыс: «Вöян кö, гортö ог лэдз».
Настук лыддис ёртъяссö и лои квайт. А купайтчыны лэччисны сизимöн... Öти морт абу... Настуклöн сьöлöмыс коклябöрöдзыс лэччылiс: «Ой... Öти морт абу... Кодкö вöйöма!» Лыддис мöдысь юраныс инмöдчылöмöн:
- Квайт! Челядь чуймисны тшöтш.
- Вай петам ставным берегö! - тшöктö повзьöм Настук.
- Босьтöй моздораныд ассьыныд дöрöм-гач ёкмыльястö да сiдзи и сулалöй. Ме бара тiянöс лыддя.
Петiсны берегö, босьталiсны быдöн дöрöм-гачнысö. Лыа вылын колис сöмын öти ёкмыль, Настуклöн.
- Менам тай ачымöс вунöдсьöма лыддьыны! Челядь бöр гажмисны, но эз нин кутны купайтчыны, кайисны гортаныс.
(Пунегова, Л. А. Посни войтырлы коми литература йылысь. – Сыктывкар, 1993. – С. 46-48. – Пер. загл.: О коми литературе для детей)
