Шор
Лун кöть вой, пыр öтитор
Дзольгö сёртас бердын шор.
Вывті мусса сійö мем,
Сяльган шыас мичлун эм.
Шувгысь пожöм ланьтö кор,
Öтнас кольö эзысь гор.
Узьö нитшка шор дор кыр.
Тані шойччывла ме пыр.
Тулыс тані!
Кутшöм ыб выв лоис кын.
Ньöжйö усьö небыд лым.
Тöвлы нимкодь: мича тулыс
Кöдзыд вöсна бöр пö куліс.
Тулыс таті! Эн мун ылö,
Керка бердын ноксьö, кылö:
Войтва кисьтö радлігтыр,
Тувсов эбöс оз нин быр!
Кöрпи
Ворсö тувсов кыа-би.
Чужи корлöн ичöт пи,
Ойбырасьö садьмысь вöр.
Нюлö писö шуда кöр!
Öдйö быдмы, дзоля лов,
Эн ло рамöн, и эн пов!
Кок мед сöвмас - котрав пыр!
Веськодь лоас джуджыд кыр.
Мамыд кодь жö тэрыб ло,
Ов да ветлы уна во.
Асыв
Яг вылын долыда овсьö,
Нимкодь мен видзöдны тан:
Миян лöнь вöр весьтын ломзьö
Асъя нэр кыалöн бан.
Ю дорö жбыркнитö сьöла
Öктыны посньыдик из.
Нюр сайын шыасьö йöла.
Кондаын камöдчö сизь.
Уткапиян
Ыпнитіс садйын
Лысва мольяс биöн.
Дзивъялöны вадйын
Посни уткапиян.
Велöдчöны сунны,
Тёльскöдчöны, кылö,
Öддзöдчöны мунны
Лайкыд гыяс вылöдз.
Шонді вывлань кайö,
Ышмöм тöвру öвтö.
Саймовтчöны найö
Луннас эжöр пöвстö.
Пöрысь вурд
Ёль кöн сялькöдчö, кылö,
Зверлы овны сэн бур,
Гусьöн олö да вылö
Дзормöм пася сьöд вурд.
Кыз да дженьыдик кока,
Уска нырыс зэв ёсь.
Ветлö пöрысьла лёка,
Оз пан ёртыскöд кось.
Пельыс сюсь на, оз ылöд:
Кылö понъяслысь шы...
Сунас, быттьöкö сылö, -
Кольö лайкыдик гы.
Ёль со сялькöдчö, кылö,
Зверлы овны сэн бур,
Гусьöн олö да вылö
Дзормöм пася сьöд вурд. |
Вöр видзысь
Гажса яглысь паськыд от
Лун-лун видзö самолёт:
Оз-ö кöнкö билöн вын
Енэжланьö лэпты тшын.
Самолёт оз вуграв, оз...
Со нин аддзис лэбигмоз,
Кыдзи биыс сёйö вöр,
Сёйö паськыд парма шöр.
Сэсся самолётса морт
Сиктö лэдзис юöртор.
Войтыр чукöрмисны пыр:
Кодлöн - чер, а кодлöн - зыр.
Уна пöрöма нин пу,
Уна кодйома и гу.
Биысь спаситісны вöр,
Гортö локталісны бöр.
Сöмын яглысь паськыд от
Век на видзö самолёт:
Оз-о бара билöн вын
Лэпты конкö сук сьöд тшын.
Велосипед
Öдöбöн гöнитö пегана вöв.
Пельясын шутьлялö кокньыдик тöв.
Раминик чибöлы конюк, дзор дед
Ним коркö сетлöма — «Велосипед».
Шонді кö саялас, абу, дерт, бур.
Тэрмася-ваяла юр бöрся юр.
«Велосипед» менам - тэрыб да ён,
Ньöв моз дзик лэбалö - нöрыс кöть сён.
Гожомбыд сійö эз аддзывлы лич,
Кытчöдз эг эштöдöй медборъя видз.
Арнас мен вайисны велосипед,
Тайö пö бур уджсьыд премия тэд.
Бара нин пельясын шутьлялö тöв —
Сикт кузя гöнитö «кокъястöм вöв».
Вердны ни юктавны, майбыр, оз ков,
Да öд и öвадысь ньöти оз пов!
Май
Шонді лымсö
Кушöдз зыртіс,
Мича тулыс
Сиктö пыртіс.
Ытва босьтö
Кыркöтшин
Дзоридз восьтö
Мелі син.
Локтіс кымöр
Первой гымöн,
Кöдзыд лым чир
Эз нин вай.
Чолöм, тулыс,
Гажа тулыс,
Видза олан,
Май!
Ар
Ыбкай ланьтö сёртас улын,
Джыдж бöр кольö позсö.
Сьöкыд кутны пелысь пулы
Банйöм коръя розсö.
Енэж кисьтö рöмыд югöр,
Югöрыс век чинö.
Дыша лэбзьö дзодзöг чукöр,
Кöть и шоныдінö. |
