Пöжар
Висьт
1.
Горниысь кыскöм уклад моз рытыв-вой вöр йылын кельдаліс рытъя кыалöн тас. Асыввыв вöр йывсяньыс чарлаöн мыччысис выль тöлысь, надзöникöн кыпöдчис небеса шöрлань. Мыччысисны кодзувъяс. Первойсö найö муртса тыдыштісны, а сэсся кутісны югъявны, дзирдавны.
Кодзувъяс моз жö сиктса керкаясын кутісны чужавны бияс. Уджъяс вылысь гортас воалісны йöз. Пырисны гортъясö и ывлаын котралысь челядь.
Лунтыр öтилаын-мöдлаын ветлöм бöрын, гортас воис колхозса юралысь Семö Васька. Сійö ужнайтыштіс да выльысь муніс колхоз правлениеö.
Кузь рытывбыд местасьыс вöрзьывтöг пукаліс Васька пызан сайын, юрсö лэптывтöг зунясис, шпорöдчис бумагаясöн. Корсюрö зяткöптывліс щöті мольясöн, а сэсся бара копыртчас да вельдыр юрсö оз кыпöдлы.
Гашкö эськö и югдытöдз пукаліс Васька, шпорöдчис бумагаясöн, зяткöдчис щöті мольясöн, но друг кодкö гольöбтіс кильчö öдзöсас. Сійö лэптіс юрсö.
— Коді сэні грымгö? – юаліс сійö.
— Пöжар, Василей Семенович! Пöжар!— кыліс горзöм шы ывлаысь.
— Кöні?— выльысь юаліс Васька, но вочавидзысь сылы эз нин ло, пыр жö, буракö, муніс.
Васька зэв öдйö петіс, кылö гольснитіс кильчö иган да зымöдіс-лэччис поскöд. Стöрöжика Наталья шöйöвошöмöн колис керкаö.
2.
Сикт шöрын баскö морт моз гоньвидзис выль перерубнöй керка. Белилаöн мавтöм öшинь куричьяс да тасъяс нöшта ёна мичмöдісны, баситісны сійöс. Найö быттьöкö сералісны туй кузя быд ветлысьöс. Öшинь пыр тыдалісны сыръя дора тюль занавескаяс.
Тайö баскö керкаас олісны Елесь Опонь гозъя. Вель уна морт уджаліс Елесь Опоньлы керкасö вöчигöн. Елесь Опонь вöлі сетас дядьöыдлы öти пуд нянь ли мый ли да сы вылö керка дорын уджаласны лун нёль-витöс. Не сöмын керка стрöитан удж вылын уджöдіс Елесь Опонь йöзöс. Уджöдіс и мукöд уджъяс вылын. Видзис слугаа-казака, кык мортöс. Ачыс сійö кöзяйство дорас кисö эз пуктыв, сöмын индаліс да оліс, уджалісны кодъяскö.
Елесь Опонь керкалы паныдöн дöввидзис чарла кодь ёсь нырбöжъяса тöлысь да югöръяссö шыблаліс веськыда сійö öшиньясö. Югöръяслы кöть вель окота вöлі пырны öшиньяс пыр сійö керкаö, еджыд вышивкаа сера тюль занавескаясыс эз лэдзны.
Еджыд бумага кодь краситöм пöтöлöксянь лэччысь югыд сутуга йылын блонвидзис ыджыд молния лампа да бура югдöдіс пелькöдöм керка пытшкöссö. Виж краскаöн краситöм джоджыс виж стеклö моз югъяліс би югöр водзын. Пызан вылын дзирдаліс выль клеёнка пызан дöра.
Елесь Опоньлöн гöтырыс, Малань, ланьтлыны эз эштыв, ноксьö дугдывтöг. Öд виччысьö мужиксö удж вылысь. Мужикыс уджалö колхозын. Лунтыр на талун эз волы, вартісны, буракö, гумла дорын. Маланьлöн самöвар пин пуркйö пызан вылын, пузьöма, руыс пöтöлöкöдз кайö. Нянь блюдъяс, сакарничаяс ставыс пызан вылын, а Опонь век оз во. Вель унаысь сійö шöйгöдчыліс да кывзыштіс, оз-ö на кыв локтöмыс, пуксис пызан помö. Вештыштліс öшиньсьыс занавескасö да видзöдліс небеса шöрын чарлаöн гоньвидзысь тöлысь вылö.
— Мый бара кöні керö, оз лок-а? Этадыра öд оз жö уджавны.
Малань ропкиг коста гольöбтіс кильчö иган. Сійö мудзöм пырысь чеччис пызан помысь да öдзöссö калькнитöмöн чукöстіс:
— Опонь, тэ?!
— Ме, Малання, ме! Вай восьты öдйöджык!
Кильчö игансö восьтігмоз локтысь вылö видзöдлытöг ропкигтырйи бöр пырис. Сувтіс öдзöс паныдыс пызан дорö да виччысьö Опоньлысь пырöм.
Елесь Опонь эз öтнасöн лок. Сыкöд тшöтш локтісны Исус Педöр, Бутик Назар да Епрем Иван — колхоз гумладорса стöрöж. Опонь кильчö игналіг коста найö пырисны керкаö, гажаöсь. Малань видьштіс пырысьясöс:
— Люзьялöны, важöн пöльтöмаöсь! Кöн нö миян пьянникыс?
— Эн мургы, Малання, сійö игнасян коли,— шуис Бутик Назар да пыркнитіс юрсö.
Пырис Опонь.
Малань кöть букышöн видзöдіс, торъя нин Епрем Иван вылö, кодлöн тюниясыс вöліны рыныш тупйöд кодьöсь да сё дöмаса, воысьяс сы вылö эз видзöдны, Епрем Иван лёк тюнинас рашыктіс пызан дорöдз.
Сылы юлывлытöм помсьыд сюрöма чипнитыштныд дай инас оз öшйы, дзирнясьö места вылас.
Елесь Опоньлöн керкаыс горсяліс, сійö ачыс медводз пуксис пызан дорö да кутіс тшöктыны гöстьясöс.
— Вай жö, дона гöстьяс, личöдчалöй, матыстчöй пызан дорас. Иван Епремович, вай, вай пöрччысь, закуситыштам. Мый нö виччысяд, Педöр Исусовнч, Назар Степанович?.. Но эн манитöй, менам кынöм сюмалö. Малання, вайлы «Микöла синвасö»!
Епрем Иван пукаліс пызан пом вылö юрсö öшöдöмöн да ассьыс гöрдов тошсö малалігмоз мыйкö думайтіс. Сылöн дум вылас гудрасисны колхозлöн сёрöмъясыс, телегаясыс да машинаясыс, кодъясöс сійö эновтіс войбыд кежлö öтнаныссö. А кыдз нö бара жö оз эновт? Öд сійöс корны наросьнö воліс морт, Бутик Назарлöн пиыс. Быть öд лок корöм гöстьыдлы. Кор сійö кыліс Опоньлысь вина корöмтö, кöть Опонь эз веськыда нимты сійöс, а ыдждöдліс «Микола синваöн», гöгöрвоис на Иван, юрсö лэптіс да гöгöр видзöдліс.
Назар да Педöр мыйкö пыр на сёрнитісны. Оз путьмыны весиг пызан дорö матыстчыны.
— Мый нö, другъяс, ыдждаланныд! Вай, вай пуксьöй! Иван Епремович, вай шыбыт паськöмтö да пуксьы прамöя! Будь настöящöй гöстьöн,— рочьштіс Опонь.
— Пуксьыны, дерт, лоö,— кизьяссö разялігмоз шуö Иван.— Мый нин нö локтöма да ыдждавныс, мортсö грекöвöйтны.
— Кöнешнö, кöнешнö,— нюмйыштігмоз содтыштіс Елесь Опонь.
Пуксисны и пызан сайö Назар да Педöр. Пызан сайын кыптіс гажа сёрни, стöканъясöн да вина румкаясöн гольгöм. Опоньлöн öд эз этша вöв румкаясыд, быдöнлы кöть ваяс морт кыкöн, тырмас. Быдсяма сортыс эм. Со тай аслыс вайöма чуньлыс кодь румка, а мукöдыслöн гыр кодьöсь. Медся ыджыд румкасö пуктöма Епрем Иван ныр улö.
Иван ёна кодь нин гажмис, дöзмöма войся уджалöмсьыд, гумладорын кынмöмысь да ёнакодь мургö, а мукöдыс сійöс жалитöны да нöшта на öддзö. Быдсяма сёрнисö сёрнитісны Опонь пызан сайын. Унаысь и ыджыд зыкöдз волісны.
Ёна и ошкисны гöстьяс Елесь Опоньöс. Бура овлöма да, зэв бур вöвлöма йöзыслы да. Збыль öд, Опонь вöлі кужö йöз дінö сибöдчыны. Эз этша вöв сылöн сюсьлуныс. Сытöг öд колхозад эз веськав. Прöста öд эз кый Назарöс да Педöрöс, тшöтш и ылöдліс со талун Епрем Иванöс, эновтіс весиг ассьыс постсö.
— Некор ми тэнö, Опонасей Елесеевич, кулакавны ог сетöй,— шуалісны найö.— Тэ абу кулак пу. Медся бур мортсö, медбур уджалысь крестьянинöс кулакавны? Некор сійö оз ло.
— Абу, абу кулак пу Опонасей Елисеевич,— муртса артмалö кывйыс, шуалö Иван.— Абу кулаклöн кодь кынöмыс паськыд.
— М-м-м,— нюммуніс Опонь.— Оз тай öд ков ыджыд кынöм.
Иванöс винаыд кутіс вермыны. Оз вермы крепитчыныс, сідзи и юрыс öшйö. Пызан вылö öшöдчис да юрыс кöлеса моз бергöдчыны кутіс. Керкаыс и йöзыс и быдöн кутісны катласьны, бергöдчыны. Кылö на эськö мукöдыслысь сёрнинысö да нинöм пöсöбитны оз вермы. Сöмын пиньсö мурчйöдлö. Тöдö сійö, кутшöм «бур уджалысь крестьянин» вöлі Елесь Опонь. Тöдö сійö ассьыс Опоньлы уна лун прöста вылö моз уджалöмсö, но нинöм шуны оз лысьт. Кöть окота шыасьны да пинясьны другъясыскöд, кывйыс оз пет пинь сайсьыс. Оз позь. Öд сійö пукалö сэні жö Елесь Опонь пызан сайын бур гость пыдди.
Дзикöдз кутіс путкыльтчыны юрыс. Вот, вот ставыс бöр петас вомöдыс. Кöсйö чеччыны пызан сайысь, но оз лысьт, бöрладорыс оз чукты мича краскаа лабич бердысь.
Кысь нö вермас чеччыны, öд сійö жö медся уна юис винасö. Коркö эськö томдырйиыс Иван прямой ён вöвлі да, но сійö ылö нин кольöма. Винатö вöлі парта кыктö юас да сöмын гöрдöдас, чужöмъясыс потны кöсйö, а öні кысь нин, чужöмъясыс кöрсьöма нин.
Иван кöть ён вöвлі, кыз ёнлуныс мунліс сылöн йöз удж дорö, Опонь коддемыслы уджалігöн. Эз вермыв сійö асшöрыс овмöдчыны. Пондылас эськö да кыткö-мыйкö пыр и торксяс вöлі. Колхозö пыртöдз сылöн некутшöм олöм эз артмыв. Öні со колхозын нёльöд во нин. Сьöкыд уджъяс вылын уджавны оз вермы да индісны сійöс кокни удж вылö — видзны колхозной нань, сöмын войын. Сылы войся уджыд оз вöлі кажитчы. Сійö кöть гортас вой-вой оз узьлы, а дöзмö гумладорын öткöн олöмысь. Сійöн со талун эновтіс гумладорсö да муніс мича кывйöн корысьяс дінö вина юны. Лабичын дыр дзирнясьöм бöрын чеччис да довъялігтырйи муніс лёк паськöм дорас.Öдва вермис пасьтасьныс.
— Колльöдыштам, колöкö, Иван Епремöвич?— гарыштіс Опонь вый борд кодь небыд кывъясöн, но Иван öвтыштіс кинас.
— Оз жö öд ков колльöдöм,— нюммунöмöн ошйысьыштіс сійö.— Иван Епремöвичыд öд важ вина туз на. Он на бурöн уськöд.
— О-о! Иван Епремовичыд, сійö, братö, молодеч на, збоймöдчис.
— Но ме муні! Аттьö зэв ыджыда, Опонасей Елисеевич! Дöзмöдчи да лёкöн эн казьтыв!..
— Ачыд эн дивит, Иван Епремович, мый удайтчис да, мый эз да,— воча шуис Опонь.
— Кутшöм дивитöм! Аттьö зэв ыджыда, гöститі зэв ёна. Сэсся гумладорö муна!
— Мун, мун видз!— Иванлы öдзöсöд петігмоз горöдіс Педöр.
— Водзö пыравлы!— горöдіс Опонь да ыстіс Маланьöс игнавны.
Мукöдъяс эз на мунны. Выльысь пуксисны пызан сайö. Малань ывласьыс пырöм бöрын нöшта на вайис литр джын вина. Опонь кисьталіс румкаясö, тшöтш Маланьлы да ачыс медводз босьтіс.
— Но, другъяс, вайö нöшта по-румки чипнитамö за здравие. Малання, лок тшöтш за кампанньö юышт.
— Тінин юöй,— вомгорулас шуыштіс Малань. Педöрлы да Назарлы уна тшöктöм эз нин ков.
Найö вина вылас юрнысö вузавны гöтöвöсь. Öдйö босьтісны да кымыньöдісны румкаяссö. Педöр нöшта зят-зяткерис пиньнас румка дорышöн.
3.
Епрем Иван усиг-чеччигтырйи муніс гумла дорö. Став лымсö туй бокъяссьыс жугöдіс. Вель уна ёрччан кыв сійö лэдзис туй костас. Километра эз вöв гумла-дорöдз да öдва и воис. Гумла дорын первой бура дыр шöйвидзис, шойччис. Сэсся гöрдов тошсö малалігтырйи кытшовтіс сёрöмъяс гöгöр, видзöдалö. Сёрöмъясыс быттьöкö небесаыскöд помсяасьöмаöсь, быдмöмаöсь сійö ветлігкості. Сёрöмъяс вылö шензис, шензис да муніс вартан машина дорö. Тракнитіс машинаöс.
— Мый нö он шаргы, жуйвидзан? Он кöсйы?— Нöшта на чорыда тракнитіс машина кытшöс, а сійö кивыль эз кер, эз и думышт вöрзьыны. Но Иван бурöн эз иновтчы. Талун öд сылöн выныс уна дай пöрысь лы-сьöмыс оз сэтшöма вись. Муніс да машиналысь барабансö кутіс кинас шаркöдны. Вир петмöн чуньсö дойдіс.
Нинöм эз артмы да бöр муніс машина дінысь, тегаяс дорö локтіс. Пестіс ассьыс ыджыд каллянсö да пуксис тега бердö.
— Ставыс на дзонь. Ставыс тыр и бур...— броткöбтіс сійö вомсьыс тшынсö пуркнитігтырйи.
Регыд Епрем Иванöс вина жарыд кутіс личкыны, сідзи и шыгыртö, кутчысьны оз вермы. Пукаліс, пукаліс дай нёровтчис идзас вылö, унмовсис.
4.
Ывлаыс дзикöдз лöнис. Тöлысь кымöр улö пырöмöн лэччис вöр йыв сайö. Лоис сап пемыд.
Елесь Опонь кильчööд петісны кык код мужик. Жар керкасянь ыркыд ывла ловзьöдыштіс найöс. Мöдöдчисны туй кузя, но эз гортланьыс, а веськöдчисны колхоз гумла дорлань. Мунісны чöла...
Иван шкоргис-узис да корсюрö ымöстлывліс...
Недыр мысти гумла весьтын пуркнитісны еджыд тшынъяс, вочасöн сьöдöдісны. Кутісны югнитлыны би кывъяс. Назар да Педöр котралісны сёрöмъяс, тегаяс гöгöр да октасö моз чутйöдлісны изтöга биöн. Чуткигмозыс яра ыткöптас би.
5.
Ольöш Иван Пеклалöн воис чеччан кад. Сійö кышкис-кышкис вольпась вылас, топöдчис эшкын улö да дöзмис, оз узьсьы. Кык во нин öд сійö уджалö скöтничаын, велалöма нин водзтö чеччыны, садьмас куим час гöгöрын да оз нин унмовсьыв. Чеччис вольпась вывсьыс да видзöдліс öшиньöдыс, пемыд абу нин ывлаыс. Муртса на вештыштіс занавескасö, син вылас уси би югöр. Пекла шемöсмöныс повзис, кынмис öшинь дорö. Бура дыр тіраліс сэні, а сэсся зэв öдйö пасьталіс идрасян пасьсö, петіс, игналіс керкасö да котöртіс Пиля Митрейлань.
— Пöжар, Митрей дядь, пöжар,— грымгö да лёкысь горзö кильчö вылас.
Митрей кыліс горзöмсö да оз путьмы кöмасьныс ни пасьтасьныс. Пекла быд керка дорö грымгис котöрöн ветлігмоз. Бöръя вылас Кузьма кильчö вылысь сылы сюрис карнан, кватитіс сійöс да кутіс грымгыны карнанöн öшинь куричьясö. Колхозса юралысь Опонь Васька дорö сійö жö воліс.
Митрей сэк кості лашиктіс, котöртіс пöрысь кокъяснас, кайис кöлöкöльничаö, лёкысь кутіс звöнитны. Сикт шызис.
6.
Опонь Васькаöс шогöдіс. Гортас воис дзик кольмöм кодь. Паськöмсö выйöдз эз пöрччы. Пуксис пызан дорас да бура дыр гырддзайыв лэччысьöмöн пукаліс, мöвпаліс, сэсся бöр чеччис да довъялігтырйи муніс колхоз правлениеö. Колхоз правлениеын тырыс йöз. Быдöн сёрнитöны тавойся пöжар йылысь. Öти — öти ног шуö, мöд — мöд ног. Быдöн аслыс ногöн мöвпалісны. Елесь Опонь сэні жö гартчис да майшасис йöзыскöд тшöтш. Васька аддзис сійöс да сьöлöмас пуртöн моз бытшкисны. Аслыс мöвпыштіс: «Тіян кодьыслöн öд и лои тайö уджыс». Сöмын нинöм эз шу некодлы. Шöйтіс сэні да муніс сиктсöветö.
Шöйöвошöмöн пукалісны йöзыс и сиктсöветын. Некодлöн уджыс киас оз пыр. Чукöртчöмаöсь öти пызан гöгöрö да колхоз правлениеын моз жö рассуждайтöны пöжар лоöм йылысь. Кодсюрöыс видöны Епрем Иванöс, асьсö шуöны колхозлысь нянь сёрöмъяссö сотöмöн. Иванöс пöжар вылысь воöм бöрын корсисны. Сійö вöлі повзьöмысла дзебсьöма сараяс турун пиö, да арестуйтісны. Иван öні сэні жö сиктсöветын иган сайын ружтö, войся пöкмöллясö веськöдö.
Сиктсöветса юралысь Габов да парторг Мишин гижöмаöсь районö телеграмма да молнияöн ыстöмаöсь. Срочнöя корöмаöсь районысь следственнöй комиссия.
Кык лун мысти Елесь Опоньöс, Назарöс да Педöрöс лэччöдісны карö.
Вояс пыр, би пыр: Война вылын усьöм коми гижысьяслöн висьтъяс, пасйöдъяс, кывбуръяс. – Сыктывкар, 1985. – С.206-214.
