Перейти к разделу.

 

 

Чужи-быдми сьöд вöр шöрын

Чужи-быдми сьöд вöр шöрын,
Деревняысь петі,
Новлі чорыд сера дöрöм,
Визя гач да кöті.
Муртса сувті ас кок йылö,
Удж пыр меным вичмис;
Зыбка дорын «öввö» сьывны,
Ичöт кага видзны.
Кага бöрдö, ачыд бöрдан,
Гораджыка горзан.
Пöжöм йöлöн сюрысь вердан,
Косджык рузум корсян.
Бöрдысь кага дыр оз бурась,
Абу сылöн ланьтöм;
Керка öдзöс швачкан бура,-
Пышъян ворсны няйтöн.
Ыджыд мамыд корсяс тэнö,
Юалас: «Кöн вокыд?»
Вöсньыд ньöрйöн шлачкас сэні,-
Луддзас кыкнан бокыд.
Рытын мамö уджысь воас,
Ваяс льöм да öмидз...
Сэтшöм вöлі челядь вояс,
Казьтывла на öнöдз.

 Тöвся рыт
Пеша дорын мамö печкö,
Батьö тюни гындö;
Ичöт вокöй чачöн ворсö,
Чойöй сыкöд зыньгö.
«Тайö менам, абу тэнад», -
Шуö сійö воклы.
«Видзöд, мамö, чача-с мырддьö»,-
Вок норасьö мамлы.
Пызан дорын, пемыдінын,
Роч книга ме лыддя,
Зэв дöсадно гöгöрвотöг:
Ог тöд, мый и лыддя.
Сэні ещö сартас кусö,
Выльысь колö пешны.
Чоя-вока пинясьöны,-
Дзикöдз олöм эштіс.
Ыджыд мамö кага видзö,
Потан дорын сьылö:
«Öв-вö, öв-вö, баю-бай, бай,
Узь жö, ичöт нылöй!»
(Кутшöм узьöм татшöм зыкын
Пеля ловъя мортлы?)
«Чирышт, Анна, мед оз увгы,
Пöра налы водны».
Сартас тшынöн керка лöзöдз
Быд рыт миян тырö.
Водан узьны - синтö сёйö,
Унмыд ставыс бырö.
Вольпась вылын, эшкын улын,
Дыр ас костын дурам.
Ланьтам вöлись, кор ми батьлы
Тасма улö сюрам.
Гöбöч вылын ыджыд мамö
Мукöд рытын мойдö.
Шы ни тöв ми сэки кывзам
(Кöть кодсюрö ойгö):
«Дуда, дуда, кытчö ветлін?»
«Коса дорны ветлі».
Либö,- «Бобö, кытчö ветлін?»
«Чожö гуö ветлі...»
Гажа сад
Öдйöджык садйö ми мунам,
Чукöрöн овны зэв бур!
Бать-мамлы челядь ми шуам:
«Гажаджык олöм оз сюр!»
Быдмыны гажтöм зэв гортад:
Сьылöм ни ворсöм оз мун.
Öні ми садйын пыр ворсам,
Ок, кутшöм гажа быд лун!
Гортысь ми садйö пыр пышъям,
Миянлы гортын пыр шог.
Садйын ми пуксьывтöг ышмам -
Велöдчам ворсны быд ног.
Ставным ми - уджалысь пиян,-
Миянöс йöртны оз позь;
Быдтор ми вöчам ас киöн
Кокньыда, гажöдчигмоз.
Быдтортö вöчалам сёйысь,
Рисуйтчам, мойдасям ми:
Сьылам да гажöдчам войöдз,
Ворсігöн оз мудзлы ки.
Кабала кудъяс ми кыам,
Вундалам быдсяма бас,
Мачасям, котралам, гыам,
Гажöдчам ми уна час.
Вунлöны садйын бать-мамъяс,
Нинöмысь гажным оз быр.
Мыськалам тасьтіяс, паньяс
Асьным ми, челядьяс, пыр.
Пуксям ми, челядьяс, сёйны,
Тырмас сэк быдöнлы удж.
Пач дорысь сёянтор вайны
Кокъясным миян оз мудз.
Майбырöй, гажа жö олöм!
Майбырой, гажа жö кад!
Некор оз вун садйö волöм,
Некор оз вун гажа сад!		 Вöв кутöм
Öтчыд арся лунö
Батьö локтіс вöрысь,
Öдйö ыстіс менö
Вöлöс кутны йöрысь:
Мун, мун, мун!
Нинöм ме эг лысьтлы
Батьлы воча шуны.
Торгана дом босьті,
Котöрöй пыр муні:
Тор-тор-тор!
Танк дом повод.
Кук йöр дорö вои,
Кашка, лолöй тыри.
Чибö бура йирсьö,
Кора полігтырйи:
Сьтпро, сьтпро!...
Коркö чибö шеді,-
Сьöкыд кутны вöвтö,
Некыдзи оз сетчы,
Домала да лöвта:
Тпру-тпру-тпру!
Кор ме вылас сöлі,
Чибо менам дудіс.
Сэк тай этша кули,-
Синъяс вöвлöн югдіс:
Но-но-но!
Чибö менам йöймис,
Тöв ныр моз дзик нуö,
Кутчысьны ог слöймы –
Шняпкыси ме муö:
Ой-ой-ой!
Ой-ой-ой!
Кор ме чеччи, аддза:
Чибö кырссьö гортлань.
Сы бöрся ме ачым
Котöрта да горза:
Тпру, тпру, тпру!
Шондібанöй
Важысянь ми кылам
Коми сьыланкывъяс.
Медся ёна сьывлам
Тадзи, зонъяс, нывъяс:
«Шондібанöй...»
Ставным на ми тöдам
Ичöтдырся олöм.
Муртса сувтны мöдам, -
Кылö  тіян тольгöм:
«Сёньдибанöй, олöмöй...»
(Дзöбыльтöмöн.)
Уджö  мунігкості
Томиник зон нора
Мукöддырйи босьтчö
Сьывны бура, гора:
«Шондібанöй, олöмöй...»
(Шутьлялö.)
Гажа рытын нязгö
Зонлöн паськыд гудöк.
Лöсьыда дзик ставсö
Шуалö, он вунöд:
«Шондібанöй...»
(Вом гудöкасьö.)
Кывтам видзьяс вылö,
Пыжным öдйö шургö.
Батьö пуклöс вылын,
Кылö, аслыс мургö:
«Шондібанöй...»
(Вомгорулас мургö.)
Шоныд паччöр вылын
Пöрысь пöчö дзöрö.
Мыйкö, кылö, сьылö,
Муртса вомыс вöрö:
«Шондібанöй...»
(Вомгорулас.)
Мыйта шогыс кылö
Тайö сьыланкывъяс!
Сы кузя ме сьыла,-
Кывзöй, зонъяс, нывъяс!
«Сё майбырöй, олöмöй...»
(Ачыс сьылö.)		 Коми море
Эг ме аддзыв некор море,
Эг тöд сылысь сьылан гор.
Зэв пö паськыд синей море,
Абу некöн пом ни дор.
Эг ме аддзыв некор море,
Зэв пö паськыд - пом ни дор.
Меным тöдса коми море –
Помтöм-дортöм паськыд вöр.
Кыпыд гажöн уджö корö,
Сійö - олан гажлöн шöр.
Кыпыд горöн уджö корö
Помтöм-дортöм паськыд вöр.
Зэв пö гажа гыа море,
Зэв пö мича, кодыр лöнь,
Век пö гажа сылöн морöс,
Оз и ланьтлы некор скöнь.
Век пö гажа ворсö море,
Оз и ланьтлы некор скöнь.
Али гажтöм коми море?
Али мисьтöм сылöн сер?
Сэні юргö олöм дорöм,
Сьылö пила, ворсö чер.
Гажа миян коми море,
Сьылö пила, ворсö чер.
Зэв пö джуджыд ыджыд море,
Зэв пö сылöн ыджыд вын:
Кор пö шлывгö из креж дорö,
Сэк пö гöгöр мургö гым.
Зэв пö джуджыд синей море,
Зэв пö сылöн ыджыд вын.
Али вынтöм коми море?
Али лажмыд сылöн шöр?
Мед эз личав выль мир дорöм -
Страна корö тырмöдз вöр.
Гора ызгы, зарни море!
Коми мырсьысь, зіля вöр!
(Коми челядьлы антология : Коймöд небöг. – Сыктывкар, 2010. – С. 279-287)

 

 
 
Корткеросская Центральная библиотека им. М.Н. Лебедева. 2014 год.
Республика Коми, Корткеросский район, с. Корткерос, ул. Советская дом 187, lebedevlib@mail,ru
8(82136) 9-24-80. 9-98-16.