Пленын
(Пöрысь колхозниклöн висьт)
Тайö лоис войвыв пармаысь белöй бандаöс вöтлігöн. Ме вöлі сэки партизан.
...Морт квайтымын кулак-бандитысь котыртчöм белöй отряд вöлі мунö действуйтан фронт линия вылö. Рöштволы паныда рытö тайö отрядыс сувтіс Ыб помö, ичöтик грездö, да разöдчис керкаясö. Доддям пукалысь кык пулемётчик тшöктісны меным сувтны пöшти медводдза керка дорас и, вöлöс лэдзалöмöн, пулемёт да мукöдтор посводзöдз пыртлöмöн, бандитъяс спокойнöя узьмöдчисны татчö. Тасянь тыш мунанінöдз вöлі ылын на да белöйясöс эз повзьöдлы некутшöм лёктор лоöм. Найö мöдісны пыр жö веселитны горшнысö винаöн. Тшöтш и пулемётчикъяс босьтчисны вöчны сійöс, а ме коли керкаö öтнам да воді.
Сэки ме вöлі пленын. Сюри позьö шуны, некутшöм тыштöг. Недель кык сайын миян, краснöйяслöн, морт комына отряд лызьяс вылын веськыда визир кузя кöсйис петны белöйяслы мышкас. Ме муні шаг сёöн мукöдъяссьыс водзынджык, вöралан кöлуя, быттьö проводник. Менам мог вöлі — нуöдны разведка, мед отрядлы тöдлытöг не шедны лэчкö-засадаö либö мöдлаö: казяла-кö сэтшöмъяссö, киясöс лэптöмöн медым юöрта налы.
Вот муна сідзи: гöгöр видзöда, приметитала. Кор визир вылысь сöмын на петі туй ордым вылö, друг казялі лым пиö дзебсьöм йöзöс, белöйясöс. Найö водзвыв нин тöдлöмаöсь миянлысь локтöмсö да виччысьöны вöлöм. Ме сеті знак, мый водзын абу ладнö, да воді юж туй вылö. Белöйяс ме юр вывті мöдісны койны пуляöн. Миян йöзлы лои бöрыньтчыны. Менö белöйяс босьтісны пленö, вайöдісны штабас да допроситісны. Прамöякодь зульöдісны, юасисны краснöйяс йылысь, но ме нинöм эг висьтав. Налы быть лои эскыны менам висьталöмлы, мый ме краснöйясöн мырдöн нуöдöм проводник. Но бöр эз жö лэдзны менö, мöдöдісны тылö ямщикöн, мем сэксö пышйыны вöлі некыдз. Ветліг чöж еджыдъяс тылын ме нуи разведка, тöдмалі унатор, и фронт бердö бöр матысмöм мысти пыр жö кöсйи пышйыны асланымла дорö.
Узянінысь ме садьми лыйсьöм шыысь,— сійö кыліс водзланьын, кöнкö сикт мöдар помын. Керкаын пулемётчикъяс эз на вöвны да ме мöвпышті регыдджык пышйыны. Муртса на тэрмасьöмöн пасьтышті, мый веськаліс, воис старшöй пулемётчикныс — Быков. Сійö вöлі öтнас, код, вомсьыс петö самöкур дук.
— Мый дыша леган, скöтина! Кылан краснöйяс!..— горöдіс сійö меным да клеснитіс бан бокö.
Ме скöрми таысь да мый вынысь тойышті сійöс. Сійö тутіс бура ылö да гатшöн джоджö чергысис. Пыр жö кватитчис бокас, перйис тасма костысь нагансö и, кор ме петі посводзö да вешнякöн игналі керка öдзöссö, кыліс лыйöм.
Посводзын ме казялі, мый сэні ни ывлаын дзик некод абу, а пулемёт, кыдзи пыртлім сідз на и сулалö. Белöйяслöн сійö öтик и вöлі. Ме пышйöмысь дугöдчи, мöвпышті мöдтор. Кильчö öдзöссö игналі, мед некод оз пыр, да пулемётсö пырті мöд керкаас — овтöмлаас — сылаас, кодарсянь кыліс лыйсьöмыс. Гыöра öшинь пырыс вöлі нинöм оз тыдав, и сöмын кор ме сійöс раманас и быдöн лабичсянь öти чужйöмöн торйöді куричсьыс, казялі улич вылас морт вуджöръяс. Тайö вöліны белöйяс. Лыйсиг тыр найö надзöникöн бöрыньтчисны меланьö.
Ме лöсьöді пулемётсö восьса öшиняс да мöді стрöчитны бöрыньтчысьяс кузя. Найö первойсö, буракö, эз гöгöрвоны, чайтісны, мый налы отсöг вылö тайö лыйсьöмыс, да важ моз век локтісны, но регыд казялісны да мöдісны шыбласьны боквыв, кытчö веськалö.
Первойя лента помалöм бöрын на ме аддзи лым вылын вöрзьöдчытöг куйлысь уна мыгöръяс усьысьяслысь. Мöді лöсьöдны мöд лента; кыла öшинь улын южöдчöм. Сэки мöвпышті жö эськö, мися, пулемётчик, коді коли мöд керкаö, вермас öшиньöдыс петны да мыйкö лёк вöчны. Но вöлі сёр нин. Сійö удитöма нин петнысö. Бокса öшиньöд сійö шыбитіс меным бомба. Здук мысти лои взрыв — брунöбтіс, косьыштіс, и... ме вошті садьöс...
Палялі шоныд керкаын нин. Куйла гöбöч вылын буретш сійö керкаас, кытчö сувтлім белöйяскöд. Кыла: доймö пельпомöй и юрöй - найöс кöртавлöмаöсь бинтöн. Видзöда — керкаын ставыс тöдса йöз. Сэн жö и Карпов. Сійö ме кодь жö вöлі ыджыд сьöд шапкаа. Пыр тшöтш ветлывлім разведкаясö. Кор сійö казяліс менсьым вöрзьöдчöмöс, локтіс ме дінö да паніс сёрни. Сэки вöлисти ме бура тöдмалі, кыдзи сэтшöм регыдсö найö вермисны воны. Вöлöмкö, тані налöн дас вит морт и эм. Найö гусьöн, штабсянь особöй поручение кузя, вöрöд лызь вылын локтöмаöсь белöйяслы тыланыс да пöпуттьö вöчöмаöсь налёт белöйяс вылö, медым дзикöдз бырöдны найöс.
Бöрынджык ме дженьыдика висьталі, мый мекöд вöлі, и найö ставныс ошкисны менö белöйясöс бырöдöмын пулемётöн ыджыд отсöг сетöмысь. Вöлöмкö, найö висьталöм серти, менам джын йöзсö водтöдсьöма белöйяс отрядысь.
Награда
Висьт
1.
Ёгор Öльöксан завтракайтіс пöжöм йöлöн, пасьталіс ыж ку пась, юр вылас пуктіс сьöд баля ку шапка да мöдіс исполкомö. Петіс ывлаö, читкыртіс синсö еджыд лым ёрöмысь.
Öльöксан вöлі шöр арлыда морт. Сійö ветліс царскöй война вылö, сюрлі пленö да воис сэсь во сайын, вермöма кыдзкö пышйыны. Воöм бöрас сійö гöльджык йöзкöд да мукöд важ салдатъяскöд котыртісны коммунист ячейка, а öні вöлі исполкомын юралысьöн да сиктö колис пöшти öтнасöн. Ёртъясыс ставыс мунісны гöрдъяслы отсöг вылö, еджыдъяслы паныд, кодъяс вöліны неылынöсь, а сійöс колисны да тшöктісны пышйыны сöмын медбöръя здукас.
Исполком дінö воигöн друг кучкисны жыннянö да сы бöрся кутісны юргыны ватагаöн. Кымöрöн кыпöдчисны кöлöкöльнича весьтысь чавкан чукöр, кутісны тявксыны да бергавны.
Öльöксанöс быттьö юрсяньыс кок улöдзыс кöдзыд ваöн кисьтісны, кынмыліс места вылас, мöвпыштіс: «еджыдъяс!» да пуляöн ньöвйыштіс исполкомö.
— Öльöксан... дзебсьы!— уськöдчис сылы паныд исполкомса стöрöж.
Жыннян важ мозыс чорыда юргис, пуртöн моз кырлöдліс Öльöксанлысь сьöлöмсö. Уськöдчис пывсянъяслань да сэт мед йöзыс оз аддзыны, дзебсясигтыръя муніс гортас. Первой кайліс сараяс, босьтіс сэсь дась лöсьöдöм ноп да чер. Лэччис посводзö, пуктіс нопсö да пырис керкаö.
— Но, ме муна, эг шогсьöй,— шуис Öльöксан висьысь мамыслы да бабаыслы.
— Öльöксан, кытчö мунан? Дзебсьы кытчöкö татчö, эн мун,— бöрддзис гöтырыс.
— Эн пов, еджыдъястö вöтлам да бöр гортö воа. Но, бура олöй! Еджыдъяс кö тась кутасны корсьны, висьтав, мый вöрö петі,— велöдіс Öльöксан гöтырсö, сэсся тэрмасьöмöн петіс керкаысь да куйöд петкöдан туй кузя мöдіс карта сайлань.
2.
Вöлі водз на. Вичко стöрöж дзоргис кытчöкö мир туй кузя мöдлапöвлань. Кор нин рöмыдыс дзикöдз сöдзис да асыв лунвылын мыччис нырсö тöвся гöрд шонді, мöдлапöв кыр йывсянь Нюдз чойöд гöгыльяс моз тюрисны йи вылö верзьöма вöлаяс. Звöнарлы оз ков вöлі висьтавны. Ачыс вöлі зэв бура тöдö, кутшöм гöстьяс локтöны. Кор аддзис тайöс, став жыннянöн лэптіс оръявлытöм звöн шы. Сутш мында кад мысти люзьгыны кутісны йöз. Вичко дорсянь нянь-солöн да зібйыв спасъясöн мöдісны исполком дорлань.
Тöлö Степан, сиктса кулак, котöрöн локтіс исполком дінö да лэптіс дась лöсьöдöм еджыд плаг. Локтіс бöр да баба ордсьыс мича ки чышкöд вылын босьтіс поднос, кытчö вöлі пукталöма чöскыда пöжалöм нянь да закускаяс. Сыкöд орччöн сулаліс сылöн вокыс.
Йöла Иван, сиктса купеч, эзысь поднос вылын кутіс сэтшöм жö чöскыд сёянъяс да нöшта парта вина. Сэн жö медводдза радын сулалісны поп да дяк. Поп öвтіс кадилöнас, ливкйöдліс вöсни гöлöснас. Бöр вылын нöшта на сулалісны морт ветымын кымын, ставыс судзсяна йöз,— локтöмаöсь бабаяснаныс, челядьяснаныс. Ставныс видзöдісны водзлань, кыті вöлі колö локны еджыдъяслы.
Вöлöсть помöд пырисны вöлаяс. Ньöвйöн лэбисны исполком дінö. Офицерыс чеччыштіс вöв вывсьыс, бур сёян-юан вылö видзöдлытöг, индіс нагайкаöн Йöла Иван вылö:
— Кöнöсь тіян коммунистъясыд?
— Мунісны гöрдъяслы отсöг вылö, ваше благородие... Коли сöмын исполкомын юралысь, полігтыр вочавидзис Йöла Иван.
— Кöні сійö?
— Гортас, ваше благородие,— збойджыка нин шуис Йöла Иван.
— Ноко, салдатъяс,— вöв вылын пукалысь салдатъяслань бергöдчöмöн шуис офицер,— став йöзсö öтитöг вöлöстьысь вайöдö татчö.
3.
Öльöксан мунöм бöрын Варук пуксис лабичö да мыйкö шога мöвпаліс. Омöлик, косіник чужöм кузяыс сылöн шочиника войталіс синва. Синвасö чышкыштіс да пондіс пасьтасьны. Пасьталіс эжтöм еджыд пась, шалляліс ичöтик шаль, кепысяліс вит ема кепысь да кöсйис петны мöс юктавны. Друг öшиньöд аддзис: локтöны верзьöма вöлаяс. Колисны вöвъяссö поспомö, сэтчö тшöтш кольччисны кык салдат да куим салдаткöд керкаö пырис Йöла Иван. Варук бöр пуктіс кепысьсö джаджйö да пуксис лабичö.
— Кытчö ветлін? Кöні мужикыд? Дзебин?— горзыны кутіс Варук вылö öти салдат.
— Кöзяиныс асывсяньыс вöрö петлі..— тіралан гöлöсöн шуис Варук.
— Ылöдлан!— нагайкасö лэптöмöн бара горöдіс сійö.— Ставсö шобöй.
— Висьтав, Варук, бурджык лоö. Оз кö сюр Öльöксаныд!—Бур оз ло, каитчыны кутан,— наяна кайтіс Йöла Иван.
— Тьпу, тэныд кырнышлы,— кракöтинаöн Йöла Иванлы сьöлыштіс Варук.
Пöлатьысь кыскисны висьысь мамсö Öльöксанлысь.
— Мый тэ, мый тэ!— чужöмсö чышкьштіс Йöла Иван. Со мый вöчис коммунист гöтырыд!—да кутіс петкöдлыны дулльöн öшйöм рожасö салдатлы.
Варукöс босьтісны салдатъяс, нуисны исполкомлань.
Кор Варукöс вайисны исполком дінö, сэні тырыс нин вöлі йöз. Ставсö вайöмаöсь, код толькö сиктас эм ловъя мортыс. Гöгöрыс йöзсö кытшалöмаöсь вӧла салдатъяс.
Кор дугдісны йöзсö ваявны, исполкомысь петіс офицер.
— Ноко, висьталöй, код тіян коммунистъяс дор?—юаліс сійö.
— Некод абу, некод, господин офицер!— шыасис öти дядьö йöз пытшсянь.
— Тэнсьыд оз юавны!— прысьнитіс дядьöлы пель бокас.
— Висьталöй либö, кöні тіян председательныд. Код висьталас либö вайöдас кык лунöн, сылы сетам ыджыд награда,— раммыштöмöн наяна шуис офицер.
Нюммунöмнас быттьö йöзсö эскöдіс награда вылö.
— Али он кöсйö висьтавны?— бара горöдіс офицер, сэсся наганнас индіс Йöла Иванлы.
— Ноко, висьтавлы, кодъяс тані мунöны коммунистъяс дор да налысь рöдвужсö.
Йöла Иван дрöгнитіс, лажыньтчьліс сы вылö наганнад чургöдöмсьыс, сэсся тэрыба вöрзис места вывсьыс да кутіс индавны. Йöзсö юкисны кык чукöрö. Став гöльджык йöзыс сюри коммунистъяс дор мунысь чукöрö. На пиысь унаöс сэн жö пöрччöдісны да куш яй вылас кутісны нöйтны нагайкаöн да шомполъясöн. Исполком дінын шыаліс горзöм, бöрдöм да ойзöм. Варукöс пöрччöдісны куш дöрöм мыг кежсьыс да комынысь кучкисны нагайкаöн. Мышсьыс тюрöбöн лэччис вир. Став кучикыс потласис, сэсся тадзи и эновтісны. Сöмын рытланьыс батьыс кыскис гортас шой кодьöс.
4.
Суткиысь нин дырджык Öльöксан оліс рынышын. Рыныш джодж плакаысь лунтыр лöсаліс лямпа, а рытнас пемдöм бöрын кöсйис мунны ёртъясыс дінö веськыда вöрöд.
Эштöдіс лямпасö да пуксис куритчыны.
Друг кыліс сёрни шы... Кодкö кылö кодлыкö шуис:
— Кытчö нин мöдін, Иван?
Öльöксан вирскöбтіс места вывсьыс, шыбитчис тшын петан розь дорö да аддзис Йöла кык вокöс. Кыкнанныс сулалісны лызь вылын.
— Сідз,— шуö Иван,— гумла дорöдз. Аски шöтчыны кöсъям, кöть вартыштны öстатки няньсö.
«Тайö öд и эм Йöла Иваныслöн рыпышыс... Мый кута керны?—Чуймöмöн думайтіс Öльöксан.
— Абу öмöй нин няньныд?— юаліс бара Степан.
— Эм на эськö гöбöч гуын, да лэптынысö ог кöсйы. Салдатъяслы сур да вина вылö мукöдсö видзам. Баба прамöя тайö нёль лунсö эз на водлы, кымын пöлöс нянь лоис пöжавны!— висьталіс Иван.
— Ме дас вит мешöк лэпті жö. Вартыштны лоö и менам ичöтика. Буракö, кольыштöма на гумла дорö кольтаясыс,— вочавидзис сылы Степан.
— Ставсö тай рöзöритіс Ёгор Öльöксаныд. Сеталіс дась няньтö дышъясыдлы. Колö эськö кыдзкö сійöс корсьны. Тöрыт со офицерыд став йöз водзын шуис: сетам пö ыджыд награда, коді корсяс,— гöгöр видзöдöмöн шуис Иван да Öльöксанлы кажитчис, быттьö синнас индіс сылысь дзебсянінсö.
— Кысь бара корсян,— дöзмöмöн шуис Степан.— Ме тай талун сы могысь и ветлі капканъяс кыйигмоз, ставсö видлалі, весиг Öльöксаныслысь баняас каян туйсö, да некысь нинöм эг казяв. Сер ни туй.
— Гашкö, и збыльысь гöрдъяс дінö муніс. Тöрыт тай со бабаыс висьталіс вöрö петöмöн,— мунігмозыс нин содтіс Иван.
Öльöксан дзебсис рыныш пельöсö да револьверöн вешйис öдзöс воссян местаö.
Иван локтіс гумла дорлань, видзöдліс рынышлань, муніс сёрöм сайö да сэтчö воши.
Öльöксан бура дыр виччысис, сэсся дöзмис да видзöдліс тшын петан розьöд ывлаö.
Аддзис: неылын локтöны куим салдат, а налы рынышлань чуньнас индалö Йöла Иван.
Ольöксан револьверсö чургöдіс налань да лыйис Йöла Иванлы. Йöла Иван лёкысь горöдіс, кутчысис сояс, уськöдчис лым вылö. Салдатъяс водісны жö потшöс бердö да кутісны лыйлыны рынышö.
Öльöксан коймöд пулянас жö уськöдіс öти салдатöс, нöшта уськöдіс мöдöс, а коймöдыс пондіс пышйыны раскö. Öльöксанлöн патроныс быри, эз нин вермы лыйны да револьверсö сюйис зептас, а ачыс уськöдчис öдзöсö. Йöла Иван куйліс лым вылын.
— Награда вылö ыштін?— Сы дорö сувтліс Öльöксан.— Кöсйин честь перйыны? Мый менам гöтырыскöд вöчисны?
— Н-нöй-тісны,— пинь пырыс лэдзис Йöла Иван да, веськыд кисö кутöмöн, кыпöдчис, а сэсся видзöдліс былялöм, повзьöм синъяснас Öльöксан вылö, кутіс корны:— Эн ви... лэдз... прöстит менö...
— Ок, тэ, пеж...— кисö лэптіс Öльöксан кучкыны Йöла Иванöс.— Вот награда сета! Но... нинöм тэö пежавны киöс, ми наградаяс вылад ог ыштö дай пельöс сайсяньыд огö курччасьöй. Он дыр ті наградаястö корсялö, регыд ми асьным сійöс сетам!
И Öльöксан гырыся восьлалöмöн муніс нюрлань, эз весиг бергöдчыв Йöла Иванлань, коді кисö кутöмöн довгис сиктö.
Гуся уджъяс
Висьт
Вась Ёгор мыччысис чумалияс сайысь да друг сувтіс: шеп чукöр дорын зуньгыраснс морт. Дрöгнитöмысла сылöн весиг усисны морöс бердас ыджыд сывтырйöн топöдöм зарни шепъясыс. Кöсйис шыбитчыны бöрö, но кор тöдіс Микул Мишööс — мöд звеноса пионерöс — бöр босьтіс шеп чукöрсö да шпыньялігтыр шыбитіс аслас звено чукöрö.
Миш казяліс жö Ёгорöс да уси шемöс.
— Ёгор... тэ мый?— юаліс сылысь Миш.
— Ме шепъяс вайи...— ныр пырыс лэдзис Ёгор.
— Ёгор!— мöдысь шуис Миш.— Позьö öмöй йöзлысь шепъяс босьтавны аслад чукöрö?
— Позьö,— веськодя шуис Ёгор.
Мишö лэдзліс сннъяссö увлань, сэсся видзöдліс шеп öктысь челядь вылö. Найö вöліны ылынöсь, быттьö турияс кокасисны паськыд му шöрын. Сійö аддзö — керны нинöм: Ёгор вöлі вынаджык. Изйöн öшйис сьöлöм, кор гöгöрвоис, мыйла Ёгор звенолöн шеп чукöрыс быдлун мойдын моз содö, мыйла Ёгорлöн звено пыр быд звеноöс венö.
— Ёгор, висьтала пыр жö... Висьтала.
— Висьтав!— серöктіс Ёгор.— Али он тöд, мыйла эн коль мöд во кежлö витöд классад?..
— Ёгор!..
— Вунöдін?— кулаксö чабыртіс Ёгор.— Ачыд меным öнöдз уджа. А-а?
Миш вöрзьöдліс парсö, мыйкö кöсйис шуны да нинöм эз артмы. Сöмын бöрынджык нин шöпкöдöмöн лэдзис кымынкö кыв:
— Да... да сэк... Сэк ме эг чайт тэнö сэтшöмöн пыр лоиг. Сэк ме... Менам вöлі сійö мыж. А öні.. Öні ме ог кöсйы тэкöд уджавны... Ог кöсйы водзö тэнö видзöдны!— öвтыштіс кинас Мишö да котöртіс челядь дорö.
Час джын мысти ыб пасьта паськалі рожок шы. Челядь уськöдчисны асланыс чукöръяс дорö. Быдöнлы окота вöлі тöдны, кодлöн медуна, коді кодöс венас. Пыр жö найö син водзын тыдовтчис быдöнöс венысь чукöр. Медуна вöлі Вась Ёгор звенолöн.
* * *
Пионер клуб тыр челядьöн. Урожай вöсна тышкасьöм йылысь сэні накöд бура дыр нин сёрнитіс колхозса юралысь Иван Игнатьевич, а сэсся недыр мысти помаліс татшöм кывъясöн:
— Ті, том колхозникъяс, уна бур сетінныд асланыд зільлуннаныд урожай вошöмкöд тышкасьöмын. И ми ог вунöдöй таысь тіянöс. Со талун вöчим гажа рыт чöскыд сёян-юанöн. Таысь кындзн мöд звеноса пионеръясöс ударнöя шеп öктöмысь колхоз правление шуис премируйтны трусикъясöн да галстукъясöн. А вожатöйсö, Ёгор Лыткинöс, звеноын удж бура организуйтöмысь пионерскöй костюмöн.
Иван Игнатьевичлысь бöръя кывъяссö пионеръяс вевттисны киясöн швачкöдöмöн. Регыд бöр ланьтісны да кутісны виччысьны выль кывъяс.
— Айда, Лыткин, босьт ассьыд заслужитöмтö!— шуис Иван Игнатьевич да босьтіс пызан вылысь ёкмыль.
Вась Ёгор гöрдöдіс, кор аддзис сы вылö видзöдысь уна синъяс. Чеччис скамья вылысь да матыстчис пызан дорö.
Габов мыччис сылы наградасö да окыштіс кыдзи ассьыс пиöс. Зал поті кекöначöмысь, джоджыс тірзис кокöн зымöдöмысь.
Друг пызан дорö чеччыштіс Микул Мишö. Лэптіс веськыд кисö да висьталіс дрöжжитöмöн:
— Сулавлöй!.. Сувтлö сутш кежлö!—горöдіс Мишö.
Ставыс друг ори, пуксис вöвлытöм лöнь. Мишö кымыныськö кызöктыштіс, быттьö морöс пытшсьыс перйис висьталан кывъяссö, а сэсся гораа чöвталіс кыв борся кывъяс.
Висьталіс ставсö му вылын аддзылöм тор йылысь.
Ёгор мыр моз сулаліс пызан дорын да видзöдіс джоджö. Сырмис, быттьö кöин водзын бальö. Сылы вöлі яндзим сы вылö видзöдысь биöн öзъян челядь синъясысь. Гусьöн скöраліс Мишö вылö, сöмын вöчны нинöм эз вермы, сідзи и став скöрсö лои кольны аслас сьöлöмö.
Но Мишлы тöдчымöн кокняліс, кор эрдöдіс тайöс. Сійö нöшта збойджыка мöдіс висьтавны водзö:
— Гашкö, чайтан, пола ёрдöдны и водзö?— юаліс Ёгорлань бергöдчылöмöн Миш.— Ог пов ме тэысь öні!
— Тайö вöлі тöвнас,— водзö висьталіс Мишö,— гортын олöмыс вöлі зэв омöль: бать абу, мам висьмис, колö вöлі сылы отсöг. Мам пыдди лоис вöчны гортса уджъяс. Эг эштыв вöчны урокъяс. Та вöсна ме зэв омöля мöді велавны. Меным отсöг вылö прикрепитісны Ёгорöс. А сійö меным шуö: ме мöда тэныд урокъястö вöчны, а тэ сы пыдди меным куим шайт сетан... Меным вöлі быть... Сы вöсна и верми вуджны мöд классö.
— И öнöдз чöв олін?— пукалысьяс пиысь кыліс ныв гöлöс.
— Да...— надзöник вочавидзис Мишö, кияссö мышкас пуктöмöн личкысис стен бердö, синъяссö лэдзис увлань.
Иван Игнатьевич пыр на лöня сулаліс Ёгора-Мишöа костын. Кор Мишö помаліс, сійö бергöдчис Ёгорлань да видзöдліс сы вылö, босьтіс сы ордысь премиясö да мыччис Мишöлы. Лöня пукалысь челядь пытшсянь лэбисны гора кывъяс:
— Веськыда вöчнн, Иван Игнатьевич!.. Пукалысьяс ставöн нюмъялісны.
1935
Сюзь
(Челядьлы)
1.
Вöралысьяс висьталöны, мый сюзьыд пö шоча овлö йöз оланінъясын. Сы вöсна и он унаысь аддзыв да кывлы сійöс. Но öти пöраö сійö кыдзкö овмöдчис миян сикт дорö. Сиктса йöз пондісны тшöкыда сёрнитны сюзь йылысь. Кодсюрöяс висьтавлісны, мый сійö пö увтчö пон моз, либö нерö кодöскö, а мукöддырйи пö сэтшöм мисьтöм шы лэдзас, мый весьöпöрны позьö.
Торъя нин тшöкыда казьтывлім сюзьöс ми, челядь. Öтчыд школаын Сеня Вавилов шуис:
— Ёна жö тöрыт менö да батьööс сюзьыд повзьöдіс!
— Кыдзи нö?— юалім ми.
— Мунам вöлі ми, батькöд, пемдöм бöрын мельничаö. Нинöм огö думайтöй... Друг тай вöрас кыдзи заводитіс горзыны: бу-уй, бу-уй, бу-уй! А сэсся вак-вакöн серöктіс.
— Сюзьыд öмöй нö серавлö жö? - юаліс кодкö миян пöвстысь.
— Дерт, серавлö. Батьö шуö: сюзьыд пö быд ног шыавны кужö: пом моз тявзö, кага моз авзö...
— Гашкö, морт вöлі вöрас да нарошнö повзьöдчис?
— Кутшöм морт!—дöзмис Сеия.—Кысь нö сэні мортыс? Кывлім öд, кыдз сэсся сійö лэбзис миян юр весьтті.
А мöдысь со мый вöлі. Локті ме рытгорув Петров Мишаясö, но сійö эз вöв гортын, мунöма пув вотны да бöрсö абу на воöма. Ме кöсйи нин мунны бöр, но Миша буретш воис. Сійö повзьöма, синъясыс гöгрöсöсь, кывйыс оз артмы.
— Мый нö лои?— юаліс сылысь батьыс.
— Повзим...
— Мыйысь?
— Код нö повзьöдіс?
— Кыдзи?
— Ме да Öндрей локтам нин вöлі гортö вотчанінысь,— вочавидзис Миша.— Воим Тод шор дорö. Кылам: шор бокас, вöрас пон увтчö... шочиника увтчö. Ми чайтім Öндрейлöн Лыскоыс урöс аддзис. Матыстчим. Дінас нин мöдім воны, а сэні кодкö заводитіс серавны да серавны... Дзик морт моз сералö... Миян юрсиясным сувтісны. Уськöдчим пышйыны... Пышйиганым ме конъяси да став пувйöс кисьті,— Миша петкöдліс тыртöм дозсö, сэні пыдöсас шарöдчисны кымынкö пув.
Мишалöн батьыс вашмуні да шуис:
— Сюзь тай, пиукъяс, повзьöдöма тіянöс!
2.
Но водзö лоис виччысьтöмтор.
Öтчыд шойччаи лунö водз асылын ми Гршакöд босьтім тшак дозъяс да кайим вöрö. Чукöстім тшöтш Белякöс. Тайö вöлі миян ар кыка еджыд пон.
— Вöрад поннад гажаджык,— шуис Гриша.
Воим вöрö. Сэні тöдчис нин арлöн лолалöмыс.
Пуяс вылын коръясыс вижöдöмаöсь, косьмöны, гылалöны му вылö, таляссьöны кок улын. Сöмын да пипу эз на воштыны ассьыныс арся би кодь рöмсö, найö мичмöдöны росмöм вöрсö.
Вöрö пыригöн Белько миян дінысь кытчöкö торйöдчис. Ми вуджим яг да кежим давйö. Тшакыс вöлі уна. Ми вотчим Гришакöд да котралім мöда-мöд вежмöмысь, быд тшак сюригöн нимкодя чиктыліг:
— Со бара! Со бара!
Тадзи миян дозъясным регыд и тырис. Гортö мöдöдчытöдз ми керöс пöкатö пуксим шойччыштны. Перйим зептысь нянь да пондім öбöдайтны. Вöлöга пыдди öктім пувъяс.
А Белько öбöдайтны эз лок. Тыдалö, мыйкö сюрис нин сылы нуръясьыштны либö воштіс миянöс. Ме чукöсті:
— Белько-о!
Друг сэки зэв матын, кылö, увтчыштіс сійö, сэсся лявкöдны мöдіс.
— Внччысь,— шуи ме.— Бслькоыд кöч бöрся вöтчö.
Муртса на удиті шуны, кыдз улысянь, нёдзсянь дзик миян дінöдз вирскöбтіс кöч. Вöлі сійö пöшти инн еджыд. Сы бöрся Белько. Сöмын и мыччысьлісны, сэсся саялісны матыса лыс лапъяс сайö.
Муртса тайö серпасыс воши синводзысь, и ми кылім, кыдзи Белько зэв лёкысь горöдіс, сэсся ойзыны кутіс и пыр ылысмис.
Ми усим шемöсö. Гришакöд сöмын мöда-мöд вылö видзöдлім. Юрын кыкнаннымлöн чужис öти мöвп: ош йылысь. Ми повзим ошкысь да öдйöнджык гортö котöртім.
3.
Кашкигтыр ми Гришакöд воим сиктö да пырим миянö. Гортын некод эз вöв. Ми шензигтыр тöлкуйтны мöдім вöрын лоöмтор йылысь, но сэки миянлысь сёрнинымöс торкис посводзын нораа никсöм. Восьтім - Белько. Ставыс вир, а вылас мыйкö вирöсь жö чурвидзö.
— Ув кö пырöма-а?—чайті ме.
— Кутшöм ув,-— шуис Гриша.— Видзöдлы сюсьджыка. Абу ув, а кок... пöтка кок. Сатшкысьöма яяс да сэтчö и кольöма.
Ме матысяньджык видзöдлі: збыль пöтка кок. Кыкнаннымлы зэв ыджыд дивö лои. Сулалам пои дінын да шензям.
Сы шöрö буретш локтіс бать. Сійö гораа серöктіс да перйис пöтка коксö Белько яйысь.
— Сюзьлöн кокыс,— висьталіс сійö миянлы.
Ми синъяс веськыда восьтöмöн видзöдім гöна да кузь гыжъя кокыс вылö.
— А код нö сійöс Белькоыслы сьыліас пысаліс?— юалім ми.
— Сюзьыс ачыс сатшкис,— вочавидзис бать.— Со, аддзан, Белькоыд еджыд гöна, сюзьыд, буракö, кöчöн сійöс чайтіс.
— А кокыс мыйла кольöма сьыліас?
— Мыйла кольöма? Тайö ме чайта со кыдзи артмис. Сюзьыд став вынсьыс сатшкис пон яйö ассьыс гыжъяссö да вермис, буракö, бöрсö перйыны сöмын öти коксö. Тайö кокнас сійö кутчысис мый бердö кö, а мöд кокыс некыдз эз мын. Белькоыд чепöсйис водзö да орöдіс мöд коксö, кодöс, со и вайис гортö.
— Кöчьяссö öмöй сюзьыд сёйö жö?— юаліс Гриша.
— Миян местаын сійö вылын ёнджыкасö и олö. Сёйö и лэбачьясöс и шыръясöс. Синмыс öд сылöн зэв ыджыд да каньысь на югыд: ставсö аддзö, кöть кутшöм пемыдын. Сы вöсна кыйсьö сійö пырджык войын. Ог тöд, мыйла сійö талун югыдöн петöма кыйсьöм вылö. Луныс кымöра да сы вöсна, ме чайта. А шондіа лунъясö сюзьтö он аддзывлы; сэки дзебасын кöні кö, вöр чащаын, вугралö, лунтыр, а рытнас сэсь петö да шыавны мöдас зэв мисьтöма. Повзьöдчö. Тадз сійö кыйсьынысö заводитö.
4.
Сійö жö тöвнас батьö кöчьяслы капканъяс пукталіс. Менö тшöтш босьтіс да велöдіс, кыдзи капкапъясöн вöдитчыны. А каникул дырйи ме ветлывлі видлыны капканъяссö да унаысь нимкодьпырысь вайлі гортö шедöм кöчьясöс, бöр кокöдыс пельпом вомöн öшöдöмöн.
Öтчыд ме муні капканъяс дорö. Видзöда: öти капкан резьдöма, а капканас сöмын кöч кок. Тайö коксö ме вайи гортö да петкöдлі батьöлы.
— Сюзьлöн уджыс,— шуис меным бать.
Аскинас сійö ачыс муніс капканъяс кыйны. Петіс ёна водз да сьöрсьыс ружье тшöтш босьтіс.
Рытладорыс сійö бöр гортö воис да вайис кутшöмкö руд гöна ыджыд ёкмыль. Кор сійöс шыбитіс джоджö, ме аддзи, мый тайö вöлі зэв мисьтöм пöтка, кольчча кодь тупкысьтöм синъяса да чукля ныра. Голяыс эз и тöдчы, юрыс вöлі, быттьö, помся тушаыскöд.
— Со тіянлы сюзь.— Сійöс чöвтігмоз шуис бать.
Белько сэк вöлі куйлö джоджын да заводитіс шенасьны бöжнас бать пыригöн, но кор аддзис сюзьсö, повзьöм синмöн видзöдліс сы вылö, лэптіс тшöтьсö, эрöстіс да уськöдчис ывлаö.
— Белько! Белько!— чуксалі ме, но Белько ме вылö эз и видзöдлы, а тöвзис кытчöкö ывла кузя.
— Он босьт сійöс öні,— сераліс бать.— Тöдö небось коді сійöс страститлöма. Тайö сюзьыс öд и кабыртлöма сійöс.
— Кыдзи тайö?
— Со видзöдлы: сійö öд кок пöла,— индіс бать сюзь вылö, кодлöн збыль эз вöв öти кокыс.
Та бöрын Белько недельысь дырджык эз весиг пыравлы керкаö. А сюзьöс ми батькöд кулим да вöчим чучела, кодöс ме аскинас жö нуи школаö. Сэні буретш котыртчис миян юнöй натуралистъяслöн кружок, да пöткаыслöн чучелаыс вöлі зэв коланаторйöн.
1941
Вояс пыр, би пыр: Война вылын усьöм коми гижысьяслöн висьтъяс, пасйöдъяс, кывбуръяс. – Сыктывкар, 1985. – С.269-285.
