Вундан кад
Зарниöн лöсталö му вылын нянь,
Шепъясöн ворсöдчö небыдик тöлыс.
Бобув кодь мичаник, сьöд синма ань
Урожай видлыны му дорö воліс.
Нимкодьöн тырöма том нывлöн юр.
Сьöлöмыс ыпъялö öзъян яр биöн.
Урожай колхозлöн вöвлытöм бур,
Том нывка, бригадир, шедöдіс сійöс.
Чужöмыс банйöма, кыдзи гöрд пув,
Вöччöма ныв, быттьö дзирдалан шонді.
Шензьыны му помö сійö öз сувт,
Шепъяссö ки костас чирйыны пондіс.
Кышкöмсö няньыслысь эз öмöй кыв
Оз тусь кодь вом дора томиник нылыс?
Мыйла нö меліа сыкöд эз сьыв,
Орöсас том вирыс дугдывтöг тіпкö.
Сувтöмöн сьывны сэн сійö эз кут.
Урожай воöма, идравны корö.
Тайö öд том нывлöн зэв ыджыд шуд,
Шуд йылысь сьыласны вундігöн гора.
Трактор шы сяргыны кутас кор тан,
Машина ватйыны пондас сю-идсö.
Сьылас сэк лöсьыда томиник ань,
Сьылас, мед тöдчöдны ассьыс выль шудсö.
Зарниöн лöсталö му вылын нянь,
Шепъясöн ворсöдчö, гыасьö тöлöн.
Колхозлöн урожай воöма шань,
Идравны воисны тракторöн, вöлöн.
1938 |
