Перейти к разделу.
Югыд аньлӧн уджыс колана и ӧнія нэмын
Енбиа гижысь, велӧдысь, йӧзкостса тӧдчана уджалысь Агния Андреевна Сухановалӧн 125 вокӧд йитӧдын Коми Республикаса национальнӧй политика министерство, «Кӧрткерӧс» МР-са администрацияысь культура да том войтыркӧд удж нуӧдан юкӧн, Кӧрткерӧсса ЦБС урасьӧм (февраль) 19 лунӧ юрсиктса шӧр библиотекаын нуӧдісны республикаса, научно-практическӧй конференция (Сухановскӧй П- ӧд лыддьысьӧмъяс). Вужъясис нин олӧмӧ татшӧм мероприятиесӧ котыртлыны буретш чужан кывлӧн войтыркостса Лун водзын.
Республика тшупӧдын Сухановскӧй лыддьысьӧмъяс мунісны мӧдӧдысь. Таын ыджыд пайыс да водзмӧстчӧмыс КР-са национальнӧй политика министерстволӧн. Конференция уджӧ пырӧдчисны республикаса культура Министерство, Коми наука шӧрин петкӧдлысьяс, вылыс тшупӧда велӧданінъясын велӧдысьяс, гижысьяс, Агния Сухановалӧн чужанінын (Вомынын) олысь войтыр, рӧдвуж, сылысь творчество, чужан му, история туялысьяс, районса школаясын коми кыв да литература велӧдысьяс. Удж пансьытӧдз, КР-са национальнӧй политика министерствоысь министрӧс вежысь Галина Габушева сетіс Аттьӧалана гижӧдъяс А.А. Сухановалысь литературнӧй да творческӧй наследие видзӧм-сӧвмӧдӧмӧ ыджыд пай пуктӧмысь Кӧрткерӧсса ЦБС-ӧн веськӧдлысь Светлана Челпановалы да коми культура да история туялысь Надежда Митюшевалы.
Ӧнія кадӧ эм коланлун туявны Агния Сухановалысь олӧмсӧ, уджсӧ, творческӧй наследиесӧ. Сідзжӧ сулалӧ ыджыд мог коми кыв видзöмын-сöвмöдöмын, сійӧс велӧдӧм бурмӧдӧмын да челядьлы коми литература сӧв- мӧдӧм-паськӧдӧмын.
Конференция дырйи сёрниыс муніс А.А. Сухановалӧн творческӧй наследие, коми кыв велӧдӧмын выльпыртӧм да челядьлы лыддьысян национальнӧй литература сӧвмӧдӧм йылысь. Лои тӧдчӧдӧма, бӧръя воясӧ пӧ зілям коми кыв сӧвмӧдан нырвизьын: велӧдан уджтасъясӧ пыртӧма коми кыв да литература велӧдӧм, 2009 во йӧзӧдӧма Коми кывлӧн воӧн да с.в.
Республикаса научно-практическӧй П ӧд конференция помын чукӧртчӧма примитісны вӧзйӧмъяслы (рекомендация) бала. На пиын: водзӧ туявны Агния Сухановалысь олӧмсӧ да уджсӧ; КР-са национальнӧй политика министерстволы, райадминистрацияысь культура да том войтыркӧд удж нуӧдан юкӧнлы, Кӧрткерӧсса ЦБС-лы йӧзӧдны конференциявывса (Сухановскӧй ІІ-ӧд лыддьысьӧм) материалъяс; вӧзйыны Коми республикаса правительстволы вермӧм сертиыс вичмӧдны содтӧд сьӧм челядьлы коми литература да Агния Андреевна Сухановалысь гижӧдъяс лэдзӧм могысь, торъя уджтасъяс тшӧт весьтӧ разӧдны школаясӧ да библиотекаясӧ небӧгъяс; вӧзйыны Коми наука шӧринлы дасьтыны Агния Сухановалӧн бӧрйӧм гижӧдъясысь ӧктӧд (сборник).
Пасъям, тайӧ лунӧ конференцияӧ пырӧдчысьяс ветлісны юрсиктын А.А. Сухановалысь ним новлысь улича вылӧ, кӧні керкаяс пиысь ӧтиын ӧшалӧ казьтылан пӧв. Тані нуӧдісны Агния Андреевналӧн югыд юрвежлы сиӧм митинг да дзоридзьяс пуктӧм.
Оксана Гудырева
Звезда. – 2009. – Рака (Март) 3 лун
