Перейти на страницу.

Эн дзебöй енмöн сетöмтортö

    Me думайта, мый унджык мортыс олöмас кöть öтчыд, да лолiс кывбур гижысьöн. Дерт, эз быдöнлöн татшöм “дурöмыс” коль нэм кежлас. А талун ми тöдмöдам тiянöс, дона лыддьысьысьяс, сэтшöм морткöд, кодлöн “рифмаяс тэчöм" лои аслыспöлöс сынöдöн, а колöкö, и аслыспöлöс олöмöн. Анжелика Елфимовалöн кывбуръясыс тшöкыда петавлöны “Звезда” газетлöн лист бокъясын. Окота лои аддзысьлыны том гижыськöд. Со кутшöм сёрни миян артмис Анжеликакöд.
Эм сэтшöм сьыланкыв: “... каж­дый пишет в девятнадцать лет...’’. Тайöс позьö и тэ йылысь шуны?
Чайта, позьö. Сöмын дас öкмыс арöсöн, кор ме помалi искусствояслысь училище, меным аслам кывбуръясöй вöлi воыштöны нин сьöлöм вылö.
- А сыöдз?
- Гижлi и сэки ок уна да кузьысь-кузь кывбуръяс. Но аслым эз кажитчывны. Сэсся надзöникöн тай кыдзкö кутiс жö прамöйторйыд артмыны. Кор училищеын кывсис менам “кыв тэчан висьöмöй”, велöдысьяс вöлi тшöктöны специальнöй книгаяс лыддьыны, велöдчыны йöз гижанногысь, но ме некодöс сэк эг кывзы. А йöз кывбуртö, небыда кö шуны, эг весиг радейтлы. Миян велöдчысьяс костын ветлöдлiс зэв бур шусьöг: “Оз ков некор мырсьыны - ставыс ачыс воас.” Со тай воис, позьö кö тадзи шуны.
- Но тэнад бать-мам коми, ачыд сёрнитан комиöн, а кывбуръясыд мыйлакö рочöсь. Кыдзи тайöс гöгöрвоны?
- Код тöдас. Школаын велöдчигöн роч литература медся ёна радейтлi Сэсся, кор лэччи Сыктывкарö, кытшалicны дзик роч йöз. И велöдысьöй, Наталья Георгиевна Ростова, кодлы медводдзаысь петкöдлi ассьым кывбуръясöс да кодлы öнi на нула найöс сылöн “ыджыд суд” вылö, коминад эз гöгöрволы. Дырöннад и “йöз” кывйыд сьöлöмö сы выйöдз йиджис, мый ог куж нин сыкöд торйöдчыны.
- А комиöн некор эн видлы гижны?
- Гижнытö позьö и комиöн. Да пола, мый татшöм кывбур оз ло дзик сьöлöмсянь, оз ло “менамöн”. Рифмаясыд, чайта, сюраласны, а колана кывйыд - оз. Ог тöд, гöгöрвоана эз ло менам та­тшöм висьталöмöй.
- Гöгöрвоана. Но вай водзö вылö нинöм йылысь огö мöвпыштлöй. Олöмыс зэв на кузь, гашкö, тэнад сьöлöмын и коми кывбур аддзас мес­та. Юксьышт, бурджык, кыдзи эськö чужöны кывбуръясыд?
- (Нюммунö). Ачым кö тöдi... Мукöддырйи воасны кывъясыд - и кывбур дась. А коркö сэтшöм кад пуксяс, мый инад он öшйы, ветлöдлан, майшасян, лун-войлы абу рад. Скöрман да листтö ручкаыдкöд шыбитан. Овлö, мый не­кор он и помавлы заводитöмсö, а овлö, дыр кад мысти и сюрö колана кывйыд, да ставыс артмас. Олöмад кывбур “чужöмыд” öтпырйö сьöкыд и кокньыд, мича и мисьтöм, долыд и шог. А висьталiгад со дзик мöд ног тыдовтчö.
- Кывбур радейтысьяс, кöнкö, казялiсны, мый тэнад гижöдъясыд зэв дженьыдöсь, муртса кöкъямыс стро­ка лоö, сöмын öткаяс неуна кузьджыкöсь. Кывъясыд оз тырмыны найöс нюжмöдыштны?
- Висьталi нин, мый водзын гижлi зэв кузьясöс. А сэсся, велалыштi да, зiля мöвпöс сюйны лöсьöдöм рамка пытшкö. Чайта, мый этша кывйöн позьöджык петкöдлыны сямлунтö. Та вöсна, колöкö, и дугдi гижны висьтъяс да мойдъяс. Мыйла тыртны кык лист сыöн, мый позьö торöдны öтиö.
- Миян газетын тэнад лои медводдза йöзöдöм?
- Коркö, во сизим сайын нин, кымынкö кывбур петавлiс “Красное зна­мя” газетын. А сэтчö да “Звездаö” кындзи, ме дышла некытчö на эг и ыстыв сэсся.
- И кутшöм славалон кöрыс?
- Кöрсö ог тöд, а мый тайö лои зэв ыджыд кокньöдöн - збыль. Личалiс лолöй, сы вöсна мый ставöн кутiсны тöдны менам гижöм йылысь, да эг кут повны йöзасьöмысь. Таöдз ёнасö некод эз тöд, зэв нин кымынкö пöдруга да мамöй вокъяскöд. А йöзöдöм бöрын быттьö ставыс лои “официальнöй”, позянаöн.
- А кутшöмкö ыджыд гижысьöс тöдмöдлiн аслад кывбуръяснад?
- Важöн нин тöдмасьлi Александр Альшутовкöд, но таысь паметьö коли сöмын рифма йылысь сёрни: сылы эз ёна кажитчыны менам рифмаясöй. Но, веськыда кö шуны, и меным сылöн рифмаяс сэк оз жö вöлi сьöлöм вылö воны. Александр Яковлевич косйысьлiс босьтны менö лöсьöдöм студияö. Но... регыдöн ме мунi Сыктывкарысь и öнi на ог тöд, лöсьöдiс эз студиясö али ста­выс коли сöмын мöвпъясын. Мукöддырйиыс эськö ёна окота кытчöкö петавлыны аслам “вабергачысь”, да полöмöй ли, дышöй ли оз лэдзны.
- А аслад кывбуръясыд тэныд кажитчöны?
- Кодi кыдзи. Кодöскö öнi окота лöсьöдыштны, кодöскö - косявлыны, а кодкö шогын и гажын усьö дум вылö.
- Мый йылысь али код йылысь медуна гижöдыд?
- Чайта да, ставыс öтитор - радейтчöм йылысь. Мöвпыштны кö, олöмыс сы гöгöр и бергалö. Кöть мый йылысь ог босьтчы гижны, видзöда да, бара на öтилаö восьöма. Вöр-ва вежсьö, мортыд вежсьö, но ловыд да сьöлöмыд пыр том.
- Анжелика, тэ гижан дас воысь нин унджык, тайö каднас чукöрмис эз этша кывбур. Позьö шуны, мый кутшöмкö шедöдöмъяс тэнад эмöсь нин. Мый тайö тшупöдсяньыс верман висьтавны налы, кодъяс сöмын на сувтöны кывбур тэчысьлöн туйö.
- Дыр да уна гижöмыд нинöм йы­лысь на оз висьтав. Казьтылi тай, мый кор ачым заводитлi гижны, некодöс эг кывзыв. А мукöдыслы сöмын верма вöзйыны лыддьысьны. Бур книгаяс лёкö некодöс на эз велöдлыны, а босьт­ны сэтысь позьö ок унатор.
- Аттьö сёрнисьыд.
- А лыддьысьысьяс дорö кöсъя шыöдчыны: кывбур гижысьяс, висьт гижысьяс, сьыланкыв гижысьяс! Юксьöй миянкöд асланыд мöвпъясöн, уджъясöн, олöмöн. Эн полöй öтдортöмысь либö сералöмысь. Ми быд гижöд лыддям, а сэсся, кöсъянныд кö, йöзöдам газетын. Эн дзебöй некодысь Енмöн сетöмтортö!

Корткеросская Центральная библиотека им. М.Н. Лебедева. 2014 год.
Республика Коми, Корткеросский район, с. Корткерос, ул. Советская дом 187, lebedevlib@mail,ru
8(82136) 9-24-80. 9-98-16.