Перейти к разделу.
Чужан мулы, коми йöзлы сетöм талант
М. Н. Лебедев чужан лунсянь – 100 во
Михаил Николаевич Лебедев. Тайö нимыс унатор висьталö быдöнлы, кодi збыльысь радейтö ассьыс чужан му, коми гижöд, торйöн нин сылы, кодi велöдчис ичöт школаын 20-öд— 30-öд воясö, кодi сiйö жö воясас шедöдiс грамота ликбез кружокын. Ачыс коми школаыс, дай ликбез кружокыс тшöтш, чужисны да сöвмисны медводдза мича коми художествоа гижöдъяскöд öтлаын. Буретш школасö коми кыв вылö вуджöдöм корис коми гижöдъяс. Найö колöны вöлi медводдза коми букварьяс (найöс сэки шулiсны «Лыддьысьны да гижиы велöдчан», «Шыпас йöртöд») да велöдчысьяслы лыддьысян книгаяс лöсьöдöм могысь.
И сэтшöм гижöдъяссö сетiсны коми гижысьяс. Этшаöн найö вöлiны, лыда морт, вит-ö-квайтöн. И на лыдын М. Н. Лебедев, кодi комиöн гижны заводитiс революцияöдз на. Me и öнi на дась лыддьыны наизусть «Гажа тулыс воис», «Коми му кузя ме муна», «Велöдчöй, челядь, югдöдöй юр», дась сььвны «Гажаджык, коми йöз, олöй», «Кутшöм шоныд да лöнь эзысь тöлыся вой». Унаöн и öнi дасьöсь ворсны опереттаясын дай ворсöны-петкöдлöны Настукöс, Якö Гришöс, Мича нылöс да сылысь жöниксö...
Оз öмöй и талунъя том мортлысь вöрзьöд сьöлöмсö со тайö кыв- бурыс:
Кодi челядь вöсна шогсьö,
Челядь гöгöр зiля ноксьö,
Видзö найöс вой и лун,
Ылö на дiнысь оз мун?
Налöн муса мамыс!
Кодi на вöсна и олö,
Найöс кывйöн дойдны полö,
Сетö чöскыд сёянтор,
Ачыс водзöссö оз кор?
Налöн дона мамыс!
Челядь быдмöны кö бура,
Оз кö лоны пемыд юра,
Кодi сэки медся рад,
Оз и аддзыв гажтöм кад?
Налöн зарни мамыс!
Оз кö челядь шаня овны,
Лёксö вöчны оз кö повны,
Кодi жугыльтчöма сэк,
Быттьö арся лунö кöк?
Налöн коньöр мамыс!
И ещö. Кодöс колясны веськодьöн млча, сöстöм кывйöн гижöм мойдъяс, кодъяс велöдöны том мортöс овны, радейтны став бурсö да шаньсö, зывöктыны лёксö да мисьтöмсö, велöдöны медся вылö пуктыны морт олöм, сылысь югыдö, вöляö зiльöмсö. Буретш татшöмöсь мойдъяс «Бур Ань», «Кöрт Айка», «Зарни чукöр», «Юрка» да мукöдъяс. Содтöй ещö дас сайö поэма, кодъяс восьтöны коми йöзлысь тöрытъя и талунъя олöмсö, вöчöны аслыссикас приговор олöмас лёкыслы и бурыслы.
Татшöм творчествоыс Михаил Николаевич Лебедевлöн. Содтам: революция бöрса творчествоыс. Тавося октябрь 10 лунö тырис 100 восы чужан лунсянь. М. Н. Лебедев йылысь абу уна, но гижöма, висьталöма сылöн олан туй йылысь, кутшöмакö восьтöма творчествосбö. Со и тавося квайтöд номера «Войвыв кодзув» журлалын казьтылö Михаил Николаевич йылысь Изъюр Иван. (Me нарошнö тадзи гижа, М. Лебедев пыр тадзи шулiс ассьыс земляксö — И. В. Изъюровöс).
И. Изъюров ассьыс казьтыламъяссö помалö М. Н. Лебедевкöд медбöръя аддзысьлöм йылысь висьталöмöн. Ми И. Изъюровкöд вöлiм пöрысь писатель ордыш öтлаын. Лои тайö 1947 вося февральын, буретш денежнöй реформа нуöдан лунлы паныда рытын. Деньга миян вöлi, но магазинъясын нинöм нин оз сетны гöрд комьш шайта вылад. Эз вердны и столöвöйын. Вот ми и пырим Михаил Николаевич ордö, сёр рытöдз пукалiм, а, гашкö, и узим сы ордын.
Унатор йылысь сёрнитiм сэки. Михаил Николаевич петкöдлiс: важ книгаяосö, роч журналъяс.кöнi вöлi печатайтöма сылысь революцияöдзса гижöдъяссö. Збыль гижö Иван Васильевич, мый Лебедев ичöтсяньыс вöлi ёна мыкталö да та вöсна эз радейт ёна бергаввы йöз пöвстын. Но сьöлмсянь, ньöжйник сёрни нуöдiгöн мыкталбмыс эз тбдчы. Но сёрниыс менам абу та йылысь. Сёрниыс М. Н. Лебедевлöн коми культураын места йылысь, писатель творчестволöн тöдчавлун йылысь. Дерт, и та йылысь гижöма жö нин коми литературоведениеöн да критикаöн. Но гижöмыс тайö зэв разнöй сикас да унджыкысьсö гижысьясыс мыйлакö дзик оз артавны ciйöc, мый висьтавлiс аслас творчество йылысь ачыс писательыс.
А артавны тайöс колö. И со мый вöсна. Me гарыштi нин И. Изъюровлöн казьтылöмъяс йылысь. Сэнi сiйö гижö, мый М. Н. Лебедевлысь революцияöдзса гижöдъяссö «öткымынъяс лыддисны миян кадлы ковтöмöн, весиг вреднöйöн». И водзö: «М. Н. Лебедевöс унаöн лыддисны мойдъяс да легендаяс гижысьöн, «пöрысь тунъяс» да «мича нывъяс» йылысь гижысьöн, кöть эськö сэки нин М. Н. Лебедев шыöдчывлiс ас гöгöрыс пуан олöмын уна гырысь событиеяс вылö...» Танi вайöдöм куим индöдсö колö торйöдны. Найöс оз позь видлавны öтгудыр.
М. Н. Лебедевлöн революцияöдзса гижöдъяс йылысь, налöн миян кадлы тöдчанлун йылысь сёрнитiгöн быть лоö заводитны гижысьыслöн олан туй йылысь висьталöмсянь. А олан туйыс сылöн вöлi сьöкыдсьыс-сьöкыд. Со кыдзи гижб та йылысь ачыс писательыс: «Менам аймам вöлiны рочöсь — Нювчим заводысь, вöвлöм крепостнöй крестьяна. Налысь дедъяссö кутшöмкö помещик ворссьöма картiöн öти купечлы, а тайö купечыс стрöитöма сьöд вöр шöрын Нювчим заводсö да вайöма сэтчö картiöн воöм крестьянасö». «Батьлöн эз вöв керка ни карта, вöв ни мöс, эз вöв нинöм». «Менам чужан воö батьöс босьтöмаöсь салдатö, кöнi сiйö ветлöма во вит кымын». Ичöт писö быдтöма мамыс прошви кыöм помысь. Лыддьысьны да гижны М. Н. Лебедевöс велöдöма батьыс, «методыс вöлöма салдатскöй сяма»— синмысь би кинь петавмöн юрö зутшйöдлöмöн. Батьыс сетлöма жö эськö Сыктывкарса городскöй училищеö, но велöдчыны удайтчöма сöмын öти во. Тайö образованиенас М. Н. Лебедев заводитöма уджавны писарлы отсасьысьöн. Нажöвитлiс ciйö куим шайтöн тöлысь. Тайö нажöткаыс вöлi зэв колана, öд батьсö «унаысь на пуктылiсны писарö, но унаысь и чöвтлiсны юöмла да начальствокöд зычитöмла».
Тайö жö образованиенас М. Лебедев заводитö гижны. А ышöдiсны сiйöс та вылö юнигаяс. Сiйö висьталö: «Менсьым кö юаласны: «Кодi тэнö медвойдöр ышöдiс литературнöй удж вылас?» — ме шуа: «Книгаяс ышöдiсны, сэсся некод!» Збыль вылассö сiдзи и вöлi. Быдми ме цардырся пемыд кадö, пемыд йöз пöвстын. Некод эз югдöд менсьым юрöс, некод эз петкöдлы меным, мый лоö культураыс, культурнöй олöмыс».
Но сиктад сэки кызвыннас волiс бульварнöй литература. Волiсны книгаяс Гуак да Еруслан Лазаревич йылысь, шуштöм войяс да лёк гундыръяс йылысь. Буретш сiйö кадас ыджыд роч народнöй поэт Н. А. Некрасов мöвпалiс да виччысис, кор мужик оз Блюхерöс да сямгöм милор дöс, а Белинскийöс да Гагольöс базар вылысь ваяс.
Тайö подув вылас и заводитiс 13 арöса детинка видлавны ассьыс вынсö литератураын. Кöсйис «лоты писательöн, а вöлi омöля грамотнöй мортöн». Дыр мырсьöм да книгаяс серти велöдчöм бöрын пö, «кужыштны нин кутi запятаяяссö да точкаяссö коланiнъясö сувтöдлыны» да смелмöдчи пö да «ыстi «Родина» ним а журналö ичöтик висьт». Журналсяньыс унаысь вочавидзлiсны дженьыдика: «Не пойдёт».
И век жö 1898 воын тайö журналыс торъя книгаöн печатайтiс М. Н. Лебедевлысь медводдза роман «За богом молитва, за царем служба не пропадут». Мöд воас Нижньöй Новгородса (öнi Горький) «Волгарь» нима газетын петiс повесть «Отец Телентий».
Тайö кык гижöд йывсьыс М. Н. Лебедев мыйлакö некöн оз гарав. Сiйö лыддьö, мый печатайтчыны заводитiс 1900 воын, кор «Досуг и Дело» журнал йöзöдiс сылысь «Иван Голой» висьт. Сэсся тайö журналас М. Лебедев печатайтчис 1914 воöдз. Сэнi вöлi йöзöдöма М. Лебедевлысь 16 висьт, кык кывбур, коми йöз олöмысь босьтöм нёль предание да 10 повесть. Таысь кындзи, «Русский паломник» журнал лэдзис торъя книгаöн кык повесть. Ещö кык повесть да кык висьт вöлi печатайтöма «Свет» издательствоын. М. Лебедевлöн гижöдъясыс петалiсны революцияöдз «Природа и люди» да «Ратоборец» журналъясын.
Öдвакö колö вензьыны «За богом молитва, за царем служба не пропадут» нима романлöн тöдчанлун йылысь. Та йылысь весиг эз гаравлы ачыс авторыс. Эз вылö донъяв сiйö и сэтшöм гижöдъяс, кыдзи «Собеседник императора», «В когтях китайского дракона.», «Ордынский выходец», «Витязь Руальд», «Грозный хан», «В тумане смуты», «Сон великого хана», «Суд царицы»... Тайö гижöдъяс йывсьыс сёрнитiгöн М. Лебедев эз весьшöрö пасйыв, мый «темаяссö босьтлi кутшöмсюрööс — мый дум вылö усьö».
Но ачыс олöмыс вочасöн восьтiс писательлысь синсö, тшöктiс гö- гöрвоны сэкся обществолысь ёсь социальнöй противоречиеяссö. Тайö нин тöдчö «Таня Осинина» повестьын, кодöс вöлi печатайтöма 1909 воын. Та боксянь водзö воськов вöчис писатель «Зырянин Фома» висьтын да «В волостном омуте» повестьын.
Тайö произведениеяс йывсьыс тырмымöн гижöма, найöс тырбура данъялöма, бöръя кыксö весиг вöлi аслас кадö печатайтöма «Войвыв кодзув» журналын. Колö чайтны, Коми издательство аддзас позянлун лэдзны индöм гижöдъяссö, а, гашкö, и ещö öтжымынъясöс торъя книгаöн. Кад нин тöдмöдны öнiя лыддьысьысьясöс М. Н. Лебедевлöн медбур роч гижöдъясöн. Сылысь творчествосö пöчитайтысьяс да радейтысьяс сöмын аттьöаласны таысь. Аттьö кыв висьталасны и республикаын роч лыддьысьысьяс. А найö абу этшаöн.
Öнi мойдъяс да легендаяс, «пбрысь тунъяс» да «мича нывъяс» йылысь. М. Н. Лебедев гижис дас мойд да легенда. На лыдысь öтияс («Кöрт Айка», «Бур Ань», «Яг морт», «Юрка») коми йöзлöн важ олöм- вылöм йылысь. Эм и роч серти лöсьöдöмъяс. Шуам, «Зарни чери» гижöма А. С. Пушкинлöн «Чери кыйысь да чери йылысь мойдкыв» серти.
Ассьым статьяöс заводитiгöн на ме пасйи мойдкывъяслысь тöд- чанлунсö. Быд народлöн, медся ичöтъяслöн и медся ыджыдъяслöн, эмöсь мойдкывъяс, легендаяс, преданиеяс. Найö пырöны быд народ культуралöн зарни фондö. Сьöкыд аддзыны паськыд му вылысь сэ- тшöм мортöс, кодi эськö эз тöд кöть öти мойдкыв либö легенда, предание.
1929 воын М. Н. Лебедевлöн петiс неыажыд книга — «Нььвпулöн шувгöм». Книгаас вит мойд. На дiнö водзкывъяс автсрыс гижлiс: «Быд морт тöдö, мый лоö мойданкыв. Мойданкыв— сiйö мичаа вись- талöмторъяс важся олöм йылысь, багатыръяс йылысь, тунъяс йылысь, сёрнитысь пемöсъяс йылысь да сiдз водзö. Эм мойданкывъяс гажаöсь, кыпыдöсь, мортлы збойлун сетысьöсь. Кывзан кö сэтшöм мойданкывтö, сьöлöмыд тэнад кутас ворсны, лолыд енэжöдз качлас. Эм мойданкывъяс жугыльöсь, шогаöсь, жаль петкöдлысьöсь. Татшöм мойданкыв кывзiгöн синваыд петавлас, скöрмывлан и быдтор лёк вöчысьяс вылад, сiдз эськö и лямöдан найöс аслад кок улын».
Taнi ставсö висьталöма кыдзи колö. Аслас М. Н. Лебедевлöн эмöсь мойдкывъяс, кодъяс ловтö «енэжöдз качöдлöны» и «синватö петкöдлöны»... Сзтшöм мойдкывъястöгыс гажтöм эськö вöлi миян пöльяслы, миянлы аслыным, гажтöм лоö и миян челядьлöн челядьлы...
Татысь нин тыдалö М. Н. Лебедев творчестволöн тöдчанлуныс, миян культураын сылöн местаыс. А ми эг на висьталöй сы йылысь, мый М. Н. Лебедев унатор вöчис сы могысь, медым тöдмöдны коми мойдъясöн, легендаясöн да преданиеясöн роч лыддьысьысьясöс. Михаил Николаевич Лебедев творчествоын эм ещö öти юкöн, кодöспöшти абу тöдмалöма да донъялöма. Сёрниыс мунö со мый йылысь. 1918 вося июнь 10 лунö Сыктывкарын заводитiс петны Коми муын медводдза газет роч кыв вылын — «Зырянская жизнь». Газетлöн коймöд номерас нин печатайтöма статья «Унджык солидарность!» М. Войтыровлысь. Тайö М. Лебедевлöн псевдоним. Сiйö кадас Лебедев кырымасьлiс Максим Эжвинцевöн, Юсьöн... Аслас медводдза статьяын М. Лебедев сёрнисö нуöдö орчча грездъясса олысьяслöн видзьяс вöсна лöгалöм йылысь. Кык лун мысти М. Войтыровлöн выль статья— «Коми интеллигенция да народ». Танi сiйö сёрнитö на йылысь, кодъяс эз гöгöрвоны революция да мöдöдчисны народлы паныд. Авторыс чуксалö мунны народкöд öтлаын, стрöитны выль олöм. Июль 1 лунö М. Н. Лебедев гижö пöт да тшыг йöз йылысь, а нёль лун мысти— ловзьöм буржуй йылысь. Статьяясыс «няньöн озыр крестьянин, пöт морт» йылысь. «Эмöсь татшöм крестьяна-буржуйясыс, мöд ногöн кö сиктса буржуйясыс дзик став грездъясын»,— пасйö М. Лебедев.
Август 15 лунö Максим Эжвинцевлöн петic очерк, кодöс нимтöма «Кузьмаöс öбидитiсны». «Кыз кынöма купеч да мироед-кулак» Кузьма Назарычöс öбидитiс революция. Сiйö ачыс та йылысь со кыдзи висьталö: «Воля менö öбидитiс, эсiйö проклятöй революцияыс, мед эськö сiйö му пыр мунас». Вежон мысти петic М. Войтыровлöн статья миян озырлун — помтöм-дортöм вор йылысь, сiйöс колана ногöн донъялöм да синмöс моз видзöм йылысь.
И тадзи во помöдзыс. 1918 воын петic «Зырянская жизнь» газет- лан 45 номер. И матö кызь номерын вöлiны М. Н. Лебедевлöн статьяяс да очеркъяс медся разнöй, но пыр зэв колана, медся ёсь темаяс вылö. Сэк жö сiйö заводитö печатайтны коми кывбуръяс. Кыдзи коми поэт да общественнöй деятель, и тайöс ми вермам шуны тыр правоöн, Михаил Николаевич Лебедев чужис Октябрьскöй революция бöрын, кор сылöн югöрыс сявкнитiс став Коми му пасьта, садьмöдiс коми войтырöс нэмöвöйся унмысь.
И тыр правоöн жö ми шуам М. Н. Лебедевöс коми сöветскöй литературалы подув пуктысьясысь öтиöн, тöдчана да радейтана поэтöн. 50 воысь дырджык сiйö уджалiс литератураын, сы лыдысь бöръя комын куим восö активнöя участвуйтiс коми литература сöвмöдöмын, гижис лирическöй и эпическöй кывбуръяс, басняяс и мойдъяс, поэмаяс и опереттаяс.
Михаил Николаевич Лебедевлöн нимыс сулалö Нёбдiнса Витторлöн, Тима Веньлöн, Жугыльлöн, Илля Васьлöн нимъяскöд орччöн. И. Т. Чисталёвкöд, Н. А. Шаховкöд, В. Т. Чисталёвкöд öтлаын М. Н. Лебедев унатор вöчис коми школа, сöвмöдöм кузя. Медводдза коми букварсянь талунъя лыддьысян книгаясöдз печатайтöны М. Н. Лебедевлысь челядьлы гижöм кывбуръяссö. Кызьöд воясö коми сиктъясын тшöкыда овлiсны гажа рытъяс, кöнi том йöз петкöдлiсны коми пьесаяс, сьылiсны, лыддисны коми кывбуръяс. Татшöм рыт йылысь медводдза юöртöмын «Зырянская жизнь» газет гижлiс: «Кöрткерöс. Август 4 лунö сетöма вöлi спектакль. Петкöдлiсны 3. Осетровлысь коми кыв вылö вуджöдöм драма «Лёк энька». Декламируйтiсны коми поэт М. Н. Лебедевлысь кывбуръяс. Хор сьылiс М. Н. Лебедевлысь сьыланкывъяс «Гажа тулыс», «Озыр морт», сыöн жö коми кыв вылö вуджöдöм сьыланкыв «Шондi петö, шондi лэччö». Сэсся вöлi висьталöма коми йöзлы поэт М. Н. Лебедевлöн тöдчанлун йылысь».
Taнi юöртöмас гарыштöма коми кыв вылö вуджöдöм сьыланкыв йылысь. М. Н. Лебедев кызьöд воясö вöчис зэв ыджыд удж паськыда тöдса роч сьыланкывъяс коми кыв вылö вуджöдöм кузя. Тайö уджыслöн тöдчанлуныс торйöн нин вöлi ыджыд сы вöсна, мый сiйö кадас коми композиторъяс эз вöвны, а комиöн сьывны кöсйисны быд сиктын — клубын и школаын, рытпукигöн и праздник лунö гуляйтiгöн. Уна роч сьыланкывлысь М. Н. Лебедев босьтлiс сöмын мотивсö да темасö, а кывъяссö гижис ачыс. Татшöм сьыланкывъяссö и талун сьылöны да кутасны сьывны коми грездъясын.
И век жö М. Н. Лебедев творчествоын медся тöдчанаыс лирическöй да эпическöй кывбуръяс, басняяс. «Коми му», «Гажа тулыс», «Вогöгöрса олöм» да мукöдъяс тшöктöны вöрзьыны пöсь сьöлöмсö быдöнлысь, кодi радейтö ассьыс чужан мусö, ассьыс народсö да сылысь быдлунъя уджын подвигсö.
М. Н. Лебедев сьöлöмсяньыс шыасис рöднöй страналöн, советскöй йöзлöн выль олöм стрöитöм кузя вермöмъяс вылö, сiйö радлiс аслас народкöд öтлаын, чуксалiс мудзлытöг стрöитны-сöвмöдны шондi югöра олöм, восьлавны пыр водзö и водзö югыд олöмö туй кузя, ковмас кö, вьн-эбöс да олöм жалиттöг дорйыны ассьыным шуда олöмнымöс. Поэт эз вермы чöв овны, кор став народ сувтiс дорйыны сöветскöй Родина фашистскöй зверлы паныд. А война бöрын пбöрысь поэт чуксалö дорйыны да ёнмöдны мир, мыжалö империалистъясöс выль война кежлö лöсьöдчöмысь. Поэт аслас медбöръя лунъясöдз вöлi шуда мирнöй олöм вöсна тышкасьысьяс радьпн. Кувсис сiйö 1951 вося март 5 лунö. А медбöръя кывбуръяс улас пасйöма сiйö жö 1951 восö.
Меным коли висьтавны ещö öтитор. Коми сöветскöй литература сöвмöдöм кузя зэв тöдчана да ыджыд уджысь СССР-са Верховнöй Советлöн Президиум 1939 вося январын наградитiс М. Н. Лебедевöс «Знак Почёта» орденöн. Тайö ещö öтчыд висьталiс, кутшöм места босьтö М. Н. Лебедевлöн творчествоыс коми культураын, кутшöм сылöн тöдчаялуныс.
Ассьыс ыджыд да югыд талантсö Михаил Николаевич Лебедев ставнас сетiс аслас народлы. Таысь сылöн нимыс нэм кежлö кольö коми йöз паметьын, таысь сiйöс нэмъяс чöж кутасны аттьöавны пыр выль и выль поколениеяс.
Г. Торлопов
Войвыв кодзув. - 1977. - 10 октября
