Перейти к разделу.
Дзоляястö эз вунöдлыв
Дзоля лыддьысьысьястö, весиг сöмын на кывзыны кужысьяссö, кодъяс оз на вермыны асьныс лыддьыны, Михаил Лебедев-Юсь некор эз вунöдлы. Зэв ёна радейтлöма найöс, тайö тöдчö челядьлы сиöм гижöдъясас быд стрöкаын, быд кывйын.
Михаил Николаевич Лебедев чужлöма 1877-öд вося йирым тöлысьлöн 22-од лунö Межадорын. Батьыс, Николай Павлович, писаравлiс. 124 во сайын, Михаил чужöм бöрын батьыс мунас вит во кежлö военнöй служба вылö. И ичöт кагаыскöд мамыслы лоö бöр мунны Нювчим посёлокö, кöнi олöмаöсь Лебедевъяслöн польпöчныс. Батьыс писаравтöдзыс уджавлöма на сэтчöс чугун сывдан заводас. Сэнi Миша велалас сёрнитны комиöн, бать-мамыс роч йöз вöлiны. Да и Нювчимас челядьдыр вояс чöжыс коми сёрнисö пöшти абу кывлöма. Бöрас нин Михаил Николаевич казьтылöма, посёлокас пö вöлi комиыс нач öти — конюк Кельсиян. Ciйö вöлöма зэв мича гöлöса, тöдлöма вичко книгаяс и, кор Нювчимса вичкоыс кольöма поп-дяктöг, нуöдлöма служба. Сöмын рочнас лёка сёрнитлöма, шуö пö вöлi «помьяни меня» — «я» вылас личкöмöн. Та вöсна став посёлокыс ciйöc кутöма шуны Помьяниöн.
Мишаöс велöдны бать-мамыс абу вермöмаöсь, öти во сöмын грамота перйöма карса школаын. Сэсся батьыс гортас велöдыштöма, а водзö — пыр ачыс. Миша ичöтдырсяньыс мыктавлöма да таысь яндысьлöма — челядькöд абу ворслöма, сы пыдди ёна лыддьысьлöма. Медшöр велöдысьнас пö вöлi книга, — шулывлiс гижысь.
Сёрöнджык нин Михаил Лебедев видлас асьсö гижан уджын. Босьтчас да смелмöдчас ыставны перöнас «гыжъялöмторъяссö» газет-журналъясö. Коркö и заводитасны бурджыкторъяссö йöзодавны. Михаил Лебедев лоö роч прозаикöн. Сылöн петас уна висьт, очерк, повесть, мойд-легенда, тшöтш и кывбур. А сэсся гöгöрвоас, мый колöны тшöтш коми гижöдъяс: ачыс ичöтсяньыс бура комиöн сёрнитö, олö коми йöз пöвстын. 1894-öд воö Лебедев-батьыс нуöдас семьясö Пермь губернияса Чердiн карö. Пиыс cэнi, кардiнса сиктъясын, уджалас писарлы отсасьысьöн да писарöн 1900-öд во помöдз да дзик нин выль нэм пуксьöм водзас бöр локтас гöтыраöн Коми муö. Сэсся нэм помöдзыс олас Нёбдiнын да Кöрткерöсын. Нёбдiнас велöдысь А.А.Маегов возъяс комиöн гижны. Мöд ышöдысьöн лоö Андрей Цембер, Cыктывдiн карса велöдысь, земствоса чиновник. 1914-öд воö ciйö лэдзас З.Д.Следниковлöн карса типографияын «Коми мойдан да сьыланкывъяс» сборник, кытчö сюяс тшöтш М.Лебедевлысь сизим кыв- бур. Сэсся коми поэзияысь лоö дыркодь кежлö эновтчыны: печатайтчыны вöлi некöнi. Выль вынöн босьтчас Михаил Николаевич 1918- öд воö да вочасöн лоö медся тöдчана коми поэтъяс лыдын.
Медся ёна Михаил Лебедев зiльö дзоляяслы лыддянтор вылын. Босьтчылам лыддьыны «Гажа тулыс воис»:
Гажа тулыс воис.
Гöгöр жургö шор.
Шондi лымсö сёйис,
Ловзис пулöн кор.
Ю кузя йи кывтö —
Тувсов ва оз узь.
Югыд енэж вывгтi
Лэбзьö дзодзöг, юсь.
Лыддян, и кывъясыс быттьö асьныс гольгöны-киссьöны. А öд тайöс гижлöма коркö 1913-öд воö. И авторыс сэки, гашкö, эз на тöд, кодi тайöс мöдас лыддьыны. 1917-öд во бöрас М.Н.Лебедев, дерт, кутiс нин стöча сины быд буркыв сiйö либö мöд лыддьысьысьлы. Со «Зыбкадорса сьыланкыв»:
Оввö, оввö, ичöт пиöй,
Сьöлöмшöрöй узь!
Пемыд войысь нинöм повны,
Войыс абу кузь.
Асъя кыа бöрын лоас
Бара гажа лун.
Зыбка дорысь тэнад мамыд
Некытчö оз мун.
Ог ме дона пиöс эновт,
Некодлы ог сет.
Менам зарни, мича кага
Бура узяс мед!
Эзысь лэптысьöма тöлысь,
Быттьö еджыд юсь...
Оввö, оввö, муса пиöй,
Сьöлöмшöрöй, узь!
Тайö лыддьöдлана кывбурыс кузь, дзоньнас кö висьтавны, тырмас кагатö унмвоськöдны.
Медся дзоляяслы зэв лöсялöны роч мойдъяс серти лöсьöдöм гижöдъяс, кыдзи «Бом, бом, бом, бом...» («Кошкин дом»), «Сёркни» («Репа»), мукöд. Юсьлöн сюрас быд арлыда йöзлы лыддянтор: кывбур, басня, оперетка. И — сьыланкыв! Михаил Лебедевлысь сьылöны «Олiс-вылiс вöрын», «Бур батькöд-мамкöд олöм», «Пукала кöть ветлöдла», «Мыйла нö шондiöй вöр сайö лэччöмыд...», «Зарни чикыш» — бöръя дiнас музыкасö лöсьöдiс Вацлав Мастеница. На пиысь кодсюрö, йöз костас уна вотö бергалiгад, шылялiсны-молялiсны, лоины топыдджык тэчасаöсь да важöн нин лоины «народнöйясöн». Сьывлiсны и «Смелджыка, вокъясöй, ветлöй» маршсö и «Коми мусö». Öткымын коми гижöд рочöдöмöн пуктылкны музыка вылö. Юсь и ачыс вуджöдлывлiс роч поэтъяслысь сьыланъяссö. Шуам, Михаил Исаковскийлысь «На закате ходит парень» сыьыланкыв.
Сiдзи и аддзан ус пырыс шпыннялысь поэтöс, кор кывзан либö лыддян «Ловъя юрöн мынтöмтор» сьылан, кодлöн вöлi и «Олiс-вылiс сямтöм баба» мод ним. Либö зэв вильыш «Алимент- частушкаяссö».
Михаил Лебедев кулiс 1951-öд вося рака тöлысьлöн 5-öд лунö Кöрткерöсын.
Геннадий БЕЛЯЕВ
Йöлöга. – 2001. - № 42
