Перейти к разделу.
Керöс весьтын кокни борд
Аски Михаил Лебедев-Юсь чужöмсянь 120 во
СИКТСА ПИСАРЛÖН чужис пи. Бур эськö, челядьтöмöсь на гозъя да. Межадорас тай сöмын тöдсаяссö эз на лöсьöдны—кодi вежайвежанялас? Вежанявны позьö и Полялöн чойыслы, Лиялы, буретш тай гöститö, Нювчимсьыс со локтöма да. Дерт, эз гöститны эськö лок—ыджыд чойыслöн медбöръя лунъяссö сьöкыда ветлöдлiг- кежлö жö воöма... А вежай пыддиыс вот кодöс и чукöстны тöдтöм сиктад? Гашкö, асьсö попсö?
—Отеч Михаил, позянаöн кö лыддьысьö, ло менам дзоляыслы бать пыдди. Сöгласитчас кокниа. И пыртасны Межадорса вичкоын тайö 1877 воас 21-öд детинкаöс, тайö кöдздöдан йирым тöлысяс 11 лунö (сэсся коркö, нелямын да джын во мысти, кадпассö вештасны 12 лун вылö водзö).
- Нимсö но бöрйöма?.. Вежайыслысь пуктам! Микайлö Николаев мед лоö. Псаломщик дзуртышталö перöнас, ньöжйö гижтö кыз вичко нигаö. Чужан лун весьтас пуктö “10”, пыртан лун весьтас—”11”. Сэсся —"Сего—от уезда, Корткеросскаго Успенскаго погоста крестьянинъ Николай Павловъ Лебедевъ, и законная жена его Апполлинария Павлова, оба православ. вероисповед”.
Абу первойысь, кужам гижныд—видзöдлас кö коркö кöть ачыс аркирейыс, некытчö оз крукась. Сэсся вежай-вежаньсö... “Восприемники— Приходской священникъ Михаил Поповъ, Нювчимскаго завода временнообязанного крестьянина Павла Васильева дочь девица Евлалия". Сэсся и кырымпасъяс.
А Николай Павлович кывлiс нин, да бара юрас воис: отеч Михаил Константиновичыс по Чуклöмысь священник жö Константин Поповлöн да сылöн гöтыр Антониналöн, верöс саяс петтöдзыс Куратовалöн, пи лоö. Taнi, Межадорас, Антониналöн Афанасий вокыс попавлöма, кытчöдз вежöрнас абу торксьöма. Тöлка морт эськö вöлöма, абу повлöма ни дышöдчылöма крестьяна пиянтö грамотаö велöдны. Вок сикасыс бурöн кывсьывлöмаöсь. Öнi на висьталöны, медiчöтыс пö, Иван, виршъяс гижавлöма абу этша. Татчö унаысь волöма, томöн тай кöнкö ылi йöз муын во-мöд сайын кулöма. Семинарияын жö эськö велöдчылöма пö, а попалöмсьыд чöвтчöма öтнас вок сикасысь. Учителялöма, сэсся водзö велöдчöма да, шуöны, кутшöмкö ыджыдкодь военнöй чинöдз волöма.
Кыдзи вот эталöн, купеляс тольснитлöмысь кань моз нявзысьыслöн, олöмыс пуксяс,— думыштчис том бать Николай Лебедев аслас пи йывсьыс. Да öд мый на вермис водзö вылö шуны, бать ним дiнас на велавтöм морт. Аслыс на 21 арöс, военнöй служба со виччысьö.
...Колясны вояс. Пиыслы, грамотаö писькöс детинкалы, писарлысь жö туй вöлi дасьтöма. Дерт, велöдны кö школаясын эськö. Но кыдзсюрö да кöнсюрö олiг-служитiгад кысь буратö да дыртö велöдны удайтчас. Челядьдырсянь пö зыртчи вöлöстьясса правлениеясын, шуас коркö дыр мысти Михаил Николаевич ачыс. Грамотаас батьыс велöдыштас, чунь рöчнас зутшйöдлöмöн. А сэсся ставсö ачыс, ставсö ачыс. Вöлöстьса правлениеясас, кöнi мыйкö лыддьыштны кöть вöлi сюрö. А лыддянторйыд тай вежöра мортыдкöд мыйкö ачыс вöчö. Сетö мыйкö. “Дас куим арöса детинкаöн ме босьтчи видлавны ассьым “вынöс” ли- тератураын—петi сiйö туй вылас, код вылö менö тойыштiсны книгаяс”. А кыдзиджык сэсся лои, позьö лыддьыны “Нечаянный талант” висьтысь, сiйö пöшти ас йывсьыс (висьтыс петалiс “В волостном омуте” небöгын, кодöс лэдзöма 1984 воö).
1894 воöдз Миша быдмö Нювчимын, Паджгаын, Кöрткерöсын, кöнi босьтöны нин писарлы отсасьны. 1894-1899 вояссö—Чердiнса сиктъясын писарскöй удж вылын жö. Сэнi верстяммö, гöтрасьö. Дзик выль нэм пуксьöмöдз некымын лунöн водз локтö бöр Комиö да та бöрын помöдз нин, дыр кежлö некытчö петавтöг, олас Нёбдiнын да Кöрткерöсын. Кор сиктас лöсьöдасны комбед, гижысь морттö сэтчö босьтасны секретарöн. Но комбедъяс, кыдзи тöдса, вöлiны дженьыд нэмаöсь. И 1919 вося рака 7 лунö Михаил Лебедев гижö карса важ ёртыслы: “Январь 10 лунсянь ме служита татчöс народнöй судья дiнын секретарöн. Нажöтка тöлысьнас 750 гöгöр шайт. Судьяьыс зэв шань морт, прöстöй зон, оз чег асьсö начальникöн, ме прöстöй морт жö, и ми сыкöд бура лöсялам...
Зырянскöй комиссиялы вылö öнioг уджав, сы вöсна мый карасинтöгыд рытъясыс весь вошöны, а луннас служба вылö ветлöдла”.
Зырянскöй комиссияыс сiйö “Коми комиссия”, сэки зэв зiля лöсьöдiс-чукöртiс коми литература, медводз коми школалы. Письмöсö гижö А.А.Цемберлы, “Коми комиссияса” секретарлы, кодi вöлi зiльö Юсьöс кыскыны оз сöмын комиссияыслöн уджö, но и дзикöдз карö.
Тайö письмо гижöмсяньыс Михаил Николаевичлы колис на служитны стöч кызь во, а овнысö быдса комын кыкöс. И— служитны, служитны коми ли- тературалы.
Олан туйыс помасяс Кöрткерöс сиктын, шöр Сöветскöй уличас тшуплöм ас керкаын, 1951 вося рака 5 лунö.
* * *
ЮСЬЛЫСЬ МУ вежандырся дай сыöдз уна гижöд ми ог тöдöй. Öнi кежлö сылöн уна статья да висьт воши важ журнал-газетын. Найöс некодi оз корсяв да чукöрт. 1918 восянь уна публицистика петалiс “Зырянская жизнь” газетын. На лыдын —’’Наше богатство” статья. Петöма 1918 воö моз-август 23 лунся 19-öд номерын. Кыдзи сямми, ме сiйöс комиöдi.
Дерт, лыддигад колö кутны тöд вылын гижан кадсö. Сэки М.Лебедев-Войтыровлы коми вöръяс и збыль на помтöмöн кажитчöмаöсь. Öд водзö оз лоны вöрöн прöмышляйтысьясыс, чайтiс, ни йöз муысь воöмыс, ни татчöс пöдрадчикыс (а Фома Лёкмортов коддьöмтö бура тöдiс!) Кужис öмöй сэки, гижан кадас, кодкö думыштны, мый кутшöмкö нэм джын мысти пусь-пась лоö этайö веж саридз-пармаыс. Сэк жö оз позь казявтöг кольны, мый авторыслöн и 1918 воас нин эм выль, öлöдана мöвп: революция сетiс тайö озырлунсö йöз киö, и колö лоны сылöн збыль кöзяинöн, а не сiдз “кöзяитны”, кыдзи вöчöны нин öткымын вöлöстьын.
Но талун сёрниыс медводз писатель-художник йылысь. А ciйö видзöдö вöр вылас оз куш кыдзи пöрöдан-кылöдан, пилитан да нуан-вузалан эмбур вылö. Художниклы пармаыд и мöд сикас донатор—духовнöй, лолыдлы колана, морт лов сöстöммöдысь-кыпöдысь да татчö, миян чужан муö, крепыда вужйöдысь. Лебедев сы вöсна и коми мусö, зырянскöй мусö гижö ичöт шыпассянь, мый видзöдö танi сы вылö оз кыдзи административнöй ли весиг географическöй юкöд вылö. Сылöн танi национальнöй вежöртас, коми йöзкöд, налöн олöмкöд йитчöмтор. Лöсьыда воссьö тайö коми мусö-коми пармасö сьылöдiгöн Михаил Николаевичлöн перöнас серöдан сямыс. А ми со матö 80 во ог лэптöй син водзаным татшöмторъяссö.
М.Лебедев гижис зэв дыр, квайтымын кымын во: “дас куим арöса детинкаöн босьтчи” и —медбöръя лунъясöдзыс. Öткымын гижöд петiс сэк, кор авторыс эз нин вöв ловъя. На лыдын, шуам, и “Зарни чикыш” кывбур.
Юсьысь öтдор ни öти мöд коми гижысь эз вермы эськö ошйысьны, мый сылöн сы мында кывбур йöз пöвстас, композитортöг, лои сьыланкывйöн. Юсьлöн гижан бордйыс шензьöдана “пеля” вöлöма да кылöма, мый коми йöзлöн абуöсь на профессиональнöй композиторъяс да сьыланторйыс содтöд нин колö. И тайö “борд” увсьыс петöны сэтшöм кывъяс—мылаöсь, быттьö асьныс сьывны вöзйысянаöсь. “Зарни чикыш”— сьыланкыв жö. Но композиторлöн нин.
Шуам, абу медся бурыс. Но медбöръя. Кокни бордъя чикыш лэбалiс Юсьлöн гу весьттi нин, кодi Эжвалöн джуджыд-джуджыд лыа керöс йылын, Эжва вомöн воськовтысь кöрта бетон поссьыс муртса катыдджык. Гашкö, коркö сэтысь жö гижысьлöн творческöй вежöрыс аддзис чужва вийöдысь да чурскысь Кöрт Айкаöс, пыжöн катысь Еджыд Памаöс, Айкасö венысь Изъюр да Эбöс нима зонъясöс.
Мед сiйö и водзö кывзас гу весьтас шувгысь пожöмъяслысь да козъяслысь помасьлытöм мойдсö. А миян мед некор оз вун Лебедев-Юсь.
Г. БЕЛЯЕВ
Коми му. – 1997. – 21 октября
Нэммöдiсны паметьсö
Коми Республикаса Юралысь Ю. А. Спиридоновлöн индöд серти енбиа гижысь, ХХ-öд нэмся коми литературалы подув пуктысьясысь öти Михаил николаевич Лебедевлысь паметьсöнэммöдöм могысь да районын культура сöвмöдöмын, общественнöй уджын возмöстчöмысь Кöрткерöс районса библиотекалы сетöма М. Н. Лебедевлысь ним. Öнi сiйö кутас шусьыны – М. Н. Лебедев нима Кöрткерöс районса библиотекаöн.
