Перейти к разделу.
Кодкöд письмöасис Михаил Лебедев
Александр Панюков, краевед
Михаил Лебедевлысь тайо пасйöдъяса неыджыд небöгсö аддзи архивысь. Аслас киöн сэтчö гижöма: «Памятная книжка- календарь». Гижöдъясыс роч, коми, латынь да весиг китай кыв вылын...
Пасйöдъяссö заводитöма вöчавны Перым губернияса Чердынь уездысь Покча сиктын писарлы отсасьысьöн уджалiгöн. Медвылыс лист бокас гижöма рочöн «Михаил Лебедев». Улынджык тайöс жö латынь вылын нин. Орччöн бара латынь вылын - «Иван Асафович Вишератин». Казьтышта, мый Асаф Иваныс лоö Лебедевьяслы зятьöн. Асаф Иван Из дорса заводö нажöтка корсьны мунiыгъясас сувтлывлöма Лебедевьяс ордö, Чердынь уездас. Та йылысь Михаил Лебедев пасйöма книжкаас. Но унджык гижöд пасйöдыс газет-журнал редакцияясö письмöяс, гижöдъяс, телеграммаяс ыстöм да сьöм корöм йылысь. Вайöдам гоз-мöдöс. 1895 воö М.Н.Лебедев ыстылöма корреспонденцияяс: Санкт-Петербургö апрель 20 лунö, Москваö июнь 25 лунö. Мöд воас мöдöдлöма письмöяс Улыс Новгородö февраль 11 лунö, Санкт- Петербургö июль 1 лунö. Квайтöд лист бокын карандашöн вайöдö китай да роч кыв вылын кывъяс: скрипка— ху-тя, гусли—ли-шо, певец—ном-ба, мау-зы— русские, ингу-о—англичане.
Чайтсьö, мый тайöс гижалöма 1911 во гöгöр, кор сiйö ачыс лои Роч Войвыв туялысь Архангельск котырса членöн. Тайö котырыс лэдзис «Известия» журнал. Буретш сэнi вöлi печатайтöма Каллистрат Жаковлысь Японияö ветлöм йылысь «Родственны ли зыряне японцам» туйвыв пасйöдъяс.
Очерк вылас вочакыв сетö Андрей Цембер, кодкöд Михаил Лебедев тöдса. Цембер шуö, мый китай, япония, коми кывъяс абу öти вужйысьöсь, кыдзи чайтöма Жаков, а öтмоза уналатi кылöны. Сы вöсна, мый уна нэмъяс пыр мунöмаöсь, но мукöд кывйыскöд абу сорассьöмаöсь. Вермис лоны, мый Михаил Лебедев гижалiс китай кывъяссö 1904-1905 воясö, кор Нёбдiнö, кöнi сiйö уджалiс вина вузалан лавкаын, воалiсны фронт вылысь салдатьяс. Налöн морöсаныс öшалiсны «За войну с Японией» да «За поход в Китай» медальяс. А Япониякöд война вылö ветлысьыс вöлi Эжва пöлöнса быд сиктысь. Вöлiны и Нёбдiнысь...
Водзö лист бокьяс... 1908 во. Ыстылöма письмöяс: июнь 1 лунö «Свет» журналö Г.В.Комаровлы, кöнi корö öдйöджык ыстыны гонорар «Дочь зырянского князя» да «Семёнов день» гижöдъясысь. Тайö жö лунас мöдöдöма письмö Чердынь уездса земскöй управаö, кöнi вöзйö содтöд лэдзны вузалöм вылö «Последние дни Перми великой» историческöй повесьтсö да быд экземплярысь сылы, Лебедевлы, мынтыны дас урöн—лоö кö лэдзöма сюрс экземпляр да кöкъямыс урöн, лоö кö лэдзöма кык сюрс экземпляр. Июнь 19 лунö «Досуг и дело» журналö ыстöма «Таня Осинина» повесьт. А гонорарсö пö редакторлöн шуöм серти. Ноябрь 1 лунö «Нива» журналö ыстöма «В волостном омуте» романлысь медводдза юкöн. Декабрь 12 лунö мöдöдöма письмо «Природа и люди» журналö, кöнi корöма мынтыны гонорар «Перед войной» висьтысь.
1909 вося март 7 лунö ыстöма телеграмма Екатеринбургö Г.В.Комаровлы.
Корöма 100 шайт гонорар. Комаров абу ыстöма да, апрель 4 лунö Лебедев мöдöдöма письмö, кöнi казьтылöма телеграмма йывсьыс да видöма, мый Комаровыд веськодя видзöдö сылöн корöмъяс вылö.
1910 вося март 1 лунö «Нива» журналö В.Я.Светловлы ыстöма «Зырянин Фома» гижöд. Апрель 14 лунö «Ниваса» редактор В.Я.Светловлы жö мöдöдöма письмö, кöнi корö ыстыны сё шайт гонорар...
Нöшта öти лист бок. Сэнi поводдя йылысь: «1911 вося апрель 19 лунö кык час бöрын рытыв-лунвылын вöлi медводдза гым. 1912 воö медводдза гым вöлi май квайтöд лунö вит час рытын рытыв-войвылын. 1913 вося май 16 лунö— нёль час рытын. 1914 вося апрель 13 лунö—дас öти час лунын». Став пасйöдыс Нёбдiнысь.
Михаил Лебедев медуна гижис Нёбдiнын олiгас, винаöн вузасян лавкаын уджалiгас, кöнi сiйö вöлi веськöдлысьöн, а гöтырыс, Елизавета Ивановна,—лавкаын вузасьысьöн.
Коми му. – 2005. – 15 октября
