Перейти к разделу.
Кöни Михаил Лебедевлöн повестьясыс?
КОМИ сöветскöй литературалы подув, пуктысьясысь öти Михаил Лебедев зэв уна гижлiс и Октябрöдз. Сэки ciйö медсясö вöлi прозаикöн, печатайтчис, гöгöрвоана, рочöн, но гижны видлiс тшöтш и комиöн. Сiдз, 1895—1896 воясса «памятнöй» (записнöй) книжкаас гижалöма «Тэ висьтав, висьтав, мича ныв», «О, вой тöв, ло мем другöн» да «Тэ мыйла сiдз любитан менö?» коми, кывбуръяс (нимъяссö тэчалi ме, медводдза строкаяс сертиыс). Сы перö улысь, 1894 восянь кымын заводитчöмöн, дасъясöн петöны пасйöдъяс, статьяяс, очеркъяс, коми-зырянскöй фольклор серти гижöм мойдъяс, балладаяс, преданиеяс, висьтъяс, по- вестьяс да весиг романъяс.
Пример вылö, 1895 воын аслыс пасйöма: «Разбойничье гнездо", роман в 2-х томах и 6-ти частях: начал писать с 5 августа, 1-ю часть (в 9-ти -глав.) кончил 30 сентября». 1900 вося майын роч писатель Павел Засодимскийлы письмöын юöртö (письмöыслöн чернöвик серти шуа), мый ассьыс медводдза романсö гижöма 17 арöсаöн (сы мындаыс Лебедевлы тыри 1894 вося октябрын).
Произведениеяссö сiйö кырымавлö быдсяма псевдонимнас (Абориген Вычегодский, Матвей Берестов), а сэсся пыр частоджык ас нимнас. Том авторлы, гöгöрвоана, окота на вöлi сöмын печатайтчыны да эз зэв видзöд, кутшöмöсьджык сiйö журналъясыс да газетъясыс, кытчö вöзъялiс гижöдъяссö. Эз чизрась и лёка мынтысьöмысь. «Разбойничье гнездо», романсьыс, пример вылö, мынтöмаöсь сöмын 100 шайт (336 лист бока произведениеысь!), да и то йöзöдöмсяньыс дыр мысти, властьяс пыр нин мырдöн корöм бöрын. М.Лебедев гижö шензьöдана уна. Сöмын «Досуг и дело» журналын петалöма, писательöн бöрынджык лöсьöдöм список серти кö, 32 либö унджык произведение.
Но шыöдчылö, да ыставлö гижöдъяссö ciйö зэв уна изданиеö. Гижас письмо, юасяс газетыслöн либо журналысьлöн интересъяс йылысь да сы дiнö ладмöдчöмöн сэсся мöдöдалö произведениеяссö. Сiдз, шуам, 1896 вося февраль 11 лунö ыстöма Нижний Новгородö «Волгарь» газетлöн издатель-редактор Сергей Жуковлы кутшöмкö роман джын да историческöй повесть. Лебедев пасйöма та йылысь «памятнöй» книжкаас комиöн: «Ысты по ciйöc, тшöтш романкöд, редакцияас. — Ыстам!». Мукöд пасйöдъяс да письмöяс серти артмö, мый историческöй повестьыс вöлöма «От турецкой петли к русскому боярству». И сыысь, и романсьыс «Волгарь» öткажитчöма. Öнöдз тöдса сöмын, мый тайö газетас 1899 воын петавлiс М. Лебедевлöн «Отец Телентий» висьт. Часто прозаиклы ыстывлiсны шогöдана письмбöяс. И сiйö вöчлiс аслыс пасйöдъяс, кыдзи со тайö: «Омöль делö.: оз пö туй!».
Вöлöстьса писарь семьяын быдмöм морт, ачыс писарлы öтсасьысь, сэсся вöлöстьса писарь жö, сiйö, тыдалö, 1911 во пом — 1912 во. заводитчигъясö тöдмалöма, мый кутас петны «Волостной писарь» журнал. И пыр жö шыасьöма ciйöc лэдзны лöсьöдчысь морт дiнас, юöртöма аслас писарскöй и литературнöй удж йылысь, сылы зэв нин, лöсялана нима журналö гижны кöсйöм йылысь. Издателькöд водзö письмöасигöн кöсйысьöма сетны журналас волостнöй писарьяс (кодъясöс пö нимтöны «деревнялöн язваöн», «пьяницаöн», «крючкотворöн») олöмысь повесть, кодлöн планыс таöдз вöлöма нин. И, тыдалö, абу сбöмын планыс, да сёрнитчöм бöрад босьтчöма водзö öдйö уджавны. Повестьыслысь водз юкöнсö лэдзöм бöрын редакцияыс тшöктöма авторыслы эштöдны гижöдсö да юöртöма, мый заводитасны ciйöc йöзöдны «Ратоборец» журналын. Мыйла «Волостной писарь» пыдди дзик мöд ним? Кыдзи гижö М. Лебедевлы журналыслöн кöзяиныс, «мöдыскöд öтувтчис воддзаыс». Буракö, «Волостной писарь» ним улас журналыс абу и петалöма, и кык нимыс «öтувтчöмаöсь» издательыслöн юрын.
И сiдз, Михаил Лебедевлöн повесть веськалiс «Ратоборецö» да кутic петны сылöн медводдза номерсянь (1915 вося январын). Кутшöм журнал тайö вöлi, кутшöм ныр визь босьтiс? Эз ясыдöс. Асьныд думыштлöй сы серти, мый пасйöма ним улас: «Журнал культурного преуспеяния родной земли. Орган общественных ячеек русской провинции и лиц, в них работающих». Но провинцияса литераторлы сьöкыд вöлi веськавны сто- лицаясса журналъясö да ещö нин на пöвстысь бöрйыны, кодöс кöсъян. Мöдарсянь кö кадыс вöлi Россияын первой революция
бöр нин, кор ревоюционнöй видзöдласъяс паськалiсны империялöн быд пельöсö. Лебедев мöд ног нин видзöдiс олöм вылас унджык аддзис да бурджыка гöгöрвоис и писательлысь могсö. Öд 1913 воын, большевистскöй видзöдласъяса Афанасий Маеговкöд аддзысьлöм да сёрни бöрын, сiйö оз весьшöрö бара босьтчы ышöдысь-чуксалысь коми кывбуръясö, кыдзи: «Коми збойлун», «Ыджыд чери да ичöт чери», «Гажа тулыс воис». Тшöтш и роч гижöдъясыс вежсьöны вочасöн. Йöзöдöм уджъяс, рукописьяс пöвстас частöджык паныдасьлö сэтшöмыс, кодъяслöн весиг нимъясыс уна висьталöны: «Подземные люди», «Бедный Иван», «В зырянских захолустьях», «На женском положении», «Грозный чиновник», «По пьяному делу»... Выль видзöдласыс жö велöдiс М. Н. Лебедевöс бöрынджык «вунöдны» ассьыс медводдза гижöдъяссö. Öд сiйö, кыдз аддзам, гижлiс. зэв томсянь, но верстьö вояснас пыр тöдчöдлiс, мый босьтчис писательлöн уджö сöмын 1900 воын, мый медводдза висьтыс вöлi «Иван Голой», кöть сыöдз петавлiс зэв уна произведение. На пиысь эз этша вöв и верноподданническöйыс, и сэтшöмъяссö авторыс бöрынджык кыдз сöмын вермис дзебис, торйöн нин комынöд вояссянь. Сылысь дзебассö вöлi аддзöма кувсьöм бöрас, керкасö косялiгöн. Гöбöчас гуавлöма быдса ящик. Тайö архивыс Кöрткерöсын сэсся сотчöма. Дерт, оз позь шуны, мый та вöсна М. Лебедевлысь томдырся гижöдъяссö некод эз тöд. Писательлöн архивын кольöма Öльöк Öндрейсянь (А. А. Попов) 1935 вося некымын письмö. Сэки сiйö вöлi Москваын аспирантöн, корсялöма да лыддьöма Лебедевлысь, тыдалö, став гижöдъяссö, кытысь мый сöмын аддзöма. Письмöясас донъялö торъя произведениеяс, писательлысь вель дыр кадся творчествосö, юасьö, кöнi мый ещö петалiс. Мый вочавидзлiс А. А. Поповлы Михаил Лебедей? Код тöдас!
Но бергöдчам сэтчö, кысянь заводитiм, дасöд воясö. Волостнöй писарь олöмысь произведение вылын уджалiгкежлö Лебедев ёна быдмис. Кыдзи художник, сэки сiйö вöлi вель бура нин велöдчöма роч классикъяслысь, сямыс шёдiс да лоис реалистлöн. Та йылысь повестяс висьталö унатор: веськыда, повтöг петкодлöма, кыдзи земствоын паськалöма взяточничество, кыдзй крестьянаöс грабитö да юö вöлöстьса начальство, кыдзи тайö нюрыс кыскö мичаа овны кöсйысь том мортöс, кыдзи весиг нимтöма повестьсö.
Сы вылын Лебедев уджалöма ёна. Вöчлöма абу öти вариант. Кöнi шусьö повестьöн, кöнi романöн. Первой сетлöма «Всеобщий подчинённый» ним, но мöвпыс джудждаммöма да паськалöма; и нимыс лоöма «В волостном омуте», медым лöсялiсджык содержаниеыслы, кодi эрдöдö важ : сиктса начальстволысь став няйтсö, а оз сöмын петкöдлы «всеобщöй подчинённöй» — писарлысь олöм-вылöмсö. Писательлöн Октябрöдзса творчествоас танi сылöн реализмыс кыпöдчис, чайта, медся вылö.
«Ратоборецö» сетiгöн повесть дiнас гижлöма водзкыв (эм писатсльлöн архивын), но сiйöс абу йöзöдöмаöсь. «В волостном омуте» петö журналас ичöтикаöн 1915 вося-дзик быд номерын, дасöдысь öтдор. Öтувтöм 11 —12 номерас, кыдзи и пыp, пасйöма, мый «водзö лоö на», но «Ратоборецлöн» тайö номерыс лои медбöръяöн: сiйöс тупкöмаöсь. Москваын, В. И. Ленин нима библиотекаын, повестьсö лыддьöм бöрын менам весиг думыштчис, ’ а эз-ö, мися, «культурного преуспеяния» журналсö тупкыны смела да ёся гижöм тайö произведение вöснаыс? Öд сэнi сэсся сэтшöм кодь гижöдъясыслöн и дукыс абу... Но писательлöн архивысь сюри редакцияса вöвлöм секретарыслöн письмо, кöнi сiйö Лебедевлы юöртö, мый журналыс тупкысис, рёдакторсö мобилизуйтiсны да, мый издательстволы дзескыд лои деньгаысь. И сöмын 10 шайт- öн тöлысь век, на мöдöдалöны М. Лебедевлы уджйöзсö (гонорарсö). Пйсьмöас висьтавсö сiдз жö повестьыслыс йöзöдтöм юкöнсö автор- ыслы бöр мöдöдöм йылысь.
«В волостном омуте» чужтiс менсьым ыджыд интерес, а ставнас лыддьыны лои некытысь. Водзö сiйöс некöнi абу печатайтлöма, и рукописьыс, эз сюр. Архивын корсьысигöн виччысьтöг веськалi повесть дiнас авторыслöн ещö öти водзкыв, 1938 вося! Гижöма рочöн жö, первой карандашöн, а сэсся выльысь: чернилаöн, сöстöма нин. Сiйöс, буракö, пöщти некод оз тöд, и вайöда дзоньнас.
Со сiйö, М. Н. Лебедевлöн 1938 вося водзкывйыс. Сетам комиöдöмöн. «В ВОЛОСТНОМ ОМУТЕ» повесть йылысь некымын кыв.
(Авторсянь)
Навернö, унаöн помнитöны, мый революцияöдз вöвлiны «вöлöстнöй правлениеяс», кодъяс местаяс вылын вöлiны государственнöй властьöн да пöртлiсны олöмö царскöй правительстволысь крестьянстволы инмысь став узаконениеяссö да индöдъяссö. Вöлöстнöй правление — сiйö сэтшöм учреждение, кодлöн могыс вöлi «обслуживайтны мужикöс» (кыдзи сэки шулiсны), тайö лоö видлавны да решайтны му кузя вопросъ- яс, юклыны да перйыны вот, веськöдлыны натуральнöй по- винностьясöн (туй лöсьöдöм, посъяс стрöтöм, вöрса пöжаръяс кусöдöм), судитны и радитны (ciдз щусяна «вöлöстнöй суд» пыр), страхуйтны стрöйбаяс, сетавны паспортъяс, удостоверениеяс, справкаяс да с. в. и с. в., а сiдз жö вывтi уна гижасьны крестьяналöн экономическöй положение йылысь, кöдзаяс, нянь и турун урожайяс, прöмысъяс, удждонъяс, вузасьöм и, öти кывйöн, вöлöстьлы инмысь быдтор йылысь статистическöй да став сикас мукöд тöдмöдантор лбöсьöдöм могысь. Вöлöстнöй правлениеын вöлiны этшаöн: вöлöстнöй старшина да вöлöстнöй писарь. Вöлiны, дерт, ещö сиктса старöстаяс, но вöлöстнöй правление уджö найö эз босьтчывны, сöмын асланыс сиктса общинаясын перйисны вот да водзöсавлöм нянь. Вöлöстнöй старшинаяс - унджыкысьсö вöлiны джыявыйö грамотнöй крестьяна, сы вöсна вöлöстьöн веськöдлан став тайö ззв ыджыд уджыс öшалiс вöлöстнöй писарь пельпом вылын. Сэк жö, писарь вöлi зз бöрйöм, а «медалöм» морт, некутшöм служебнöй право сылöн эз вöв и, содтöд, босьтлiс ззв ичöт нажöтка, кодi ньöти зз вештыв сылысь уджсö. Судзсьытöм вöсна уна писарь пöльзуйтчылiсны «гректöм» доходъясöн, либö «кесйöдлöмысь босьтлiсны крестьянасянь «аттьö», но сiдзсö унджык писарыс вöлiны йöзыслы коланаöн, кодъясöс, кыдзи и крест- ьянаöс, пöдтылiс став званиеса и ранга начальствоыс. Писарлöн став матыс вöлi сыын, мый, вöлöстнöй правлениеö пырöм бöрын, сiйö весь- кавлiс, шуны кö аллегорическöя, вöлöстьса йирö, кодi ciйöс быть кыскылiс. Лоны вöлöстнöй писарöн и видзны морт туй вöлi некыдзи оз позь.
Me челядь дырсянь и 22 арöдз «зыртчи» вöлöстнöй правлениеясын: первой отсаси аслам батьлы— вöлöстнöй писарлы, а сэсся служитi писарлы отсасьысьöн да писарöн некымын вöлöстьын, кöнi ас вылын тöдмалi, кутшöм тайö службаыс. Меным öнi 60 арöс, сiдзкö, тайö вöлi важöн нин, но вöлöстьысь революцияöдзса серпасъясыс менам паметьын ясыдöсь на. Me бура помнита «вöлöстьса олöмысь» унатор, помнита, кыдзи царской чиновникъяс тещитчылiсны вöлöстнöй писарь да мужик» вылын, кыдзи олiс сэкся сиктса интеллигенция, кутшöма овсис трудöвöй крестьянстволы.
Бать-мам гöльöсь вöлiны да меным эз сетны некутшöм образование, но, ас кежын велöдчöмöн, лои вель бур грамотаа мортöн да кутi сяммыны литературнöя висьтавны ассьым мöвпъясöс. Заводитi ме гижны 1900 восянь на. Öнi СПП-са член. И со, 1912 да 1913 в.в. ме гижи «В волостном омуте» ним улын повесть, кöнi, быттьö вöлöстнöй писарлöн казьтылöмъясöн, ceтi веськыд серпас эг сöмын вöлöстнöй писарь олöмысь да службаысь, но и став сэкся вöлöстьыслысь, сэкся крестьянствоыслысь, сэкся сиктса интеллигенцияыслысь, сэкся царскöй чиновникъяслысь, кодъяслöн вöлi татшöм правилö: мужиккöд нинöм ян- дысьнысö…
Тайö повестьсö вöлi заводитöма печатайтны выльöн воссьöм быд тöлысся «Ратоборец» журналын 1915 вося январсянь, но, военнöй кад понда, журналыс олiс сöмын öти во и тупкысис. Сiйö кад чöжнас вöлi йöзöдöма сöмын повесть джынсö (18 глава), а мöд джынйыс сiдзи и колис рукописьын, кодöс редакцияыс меным бергöдiс.
Меным кажитчö, мый повестьыслöн кыв шутöг эм историческöй интерес, а сы вöсна ме решитчи вöзйыны ciйöс Гослитиздатлы лэдзöм вылö. Та дiнö лыддя абу лишнöйöн содтыны, мый ме гижи повестьсö, «Ратоборец» редакциякöд сёрнитчöм бöрын, кодi босьтiс менсьым кыв (авторыслöн «поставила условием» — Г.Б.), «медым повестьын мöвпыслöн торъя революционность эз вöв, но медым, век жö, повестьыс правдивöя петкöдлiс вöлöстьлысь да вöлöстнöй самоуправлениелысь бытсö». Тайöиндöдыслы лöсялана ме и гижи повестьсö, тайö лоö, мый сэнi абу «торъя революционностьыс, а эм öти ЧИСТОЙ ПРАВДА (тöдчöдöма авторыс — Г. Б.), кoдi, шуны кö, ачыс вайöдö революционнöй мöвпъясас да действиеас.
Менам повесть планым вöлi ещö индöма куим глава, кодъяс повестяс абуöсь. Первойыс— земскöй начальник дырйи мунысь öти вöлöстнöй скод йылысь, кöнi видлавсис школалы здание стрöитöм йылысь земскöй управалöн предложение да вичколы выль жыннян ньöбöм йылысь татчöс поплöн, предложение. Земскöй начальник мырдöн cинic, медым кре- стьяна öткажитчисны стрöитны школалы здание, а сöгласитчисны эськö ньöбны жыннянсö. Мöдыс — вöлöсть пыр губернаторлöн мунöм йылысь, кодöс виччысигöн став верстьö крестьянаыс быдса вежон лöсьöдiсны туй да вайöдiсны ассьыныс керкаяссö «лöсялана видö». Коймöдыс — вöлостьö архирейлöн волöм йылысь, кодi ноксö вöчис губернаторысь эз этшаджык. Но сы вöсна, мый редакцияыс тзрмöдлiс помавны повестьсö, тайö главаясыс сiдзи и колины гижтöмöсь. Гослитиздат кö примитас повестьсö лэдзöм вылö, ме верми эськö öнi гижны тайö главаяссö. Сöгласитчас кö Гослитиздат лэдзны повестьсö, колö, дерт, водзвыв кырымавны договор.
М. Н. Лебедев 1/IX 1938 во.
Артмö, гижлöм рукописьыс ставнас вöлöма автор ордас дыр на да косйöма ciйöc лэдзны торъя книгаöн. Водзыкывсö (кодi помланьыс лоöма издательствоö письмö кодьöн) явö дасьтöма сы могысь.
Та йылысь жö юöртö «Ударник» журнал. 1940 воын республикаса общественность паськыда пасйис Михаил Лебедевлöн литературнöй уджö босьтчöмсянь быттьöкö 40 во (буретш сiйö «Иван Голой» висьтсяньыд, кодi петic «Досуг и дело» журналын 1900 вося январö да кодöс ми гаравлiм нин). Сэки «Ударник» йöзöдалiс юбилярлысь ре- волюцияöдзса некымын произведение, на лыдын и «В волостном омуте» повестьсö (3, 5 да 6 номеръясын). Печатайтiс рочöн жö, ещö на дженьыдджыка, «Ратоборецын» петавлöм юкöнысь дас öти глава (1 —VII,XI,XV,XVII, XVIII). Редакцияыс бара жö пасйöма, мый «дзоньнас повестьсö лоö лэдзöма торъя книгаöн».
Рукописьсö писатель дасьтылöма да сетлöма издательствоö. Сэтчöс важ уджалысьяс пиысь öткымынöн шуöны, мый ас синнаныс аддзылiсны сiйöс. Но сэки лэдзны, колö думайтны, мешайтiс война... Авторыс ачыс гижö, мый повесть вылас уджалöма 1912 да 1913 воясö. И век жö, тыдалö, абу стöч сiдзи. Михаил Николаевич танi, чайта, сёрнитö повестьыслöн сöмын бöръя вариант йылысь. Делöыс сыын, мый 1908 вося аслас «памятнöй» книжкаö ноябрь 1 лунö писатель пасйö, мый «Нива» журналö ыстic «В волостном омуте» романлысь воддза юкöнсö (171 лист бок) тöдмасьöм могысь. Лыддьöм бöрас корöма бöр ыстыны и юöртны редакциялысь условиеяссö. Абу примитöмаöсь «Ниваад»: вывтi пö ыджыд гижöд. Сэсся сiйöс жö 1910 воын вöзйылöма «Новый голос» газетö — эм сылöн редактор Красницкийлы письмö ыстöм йылысь пасйöд.
И ещö мыйсюрö стöчмöдыштны позьö. М. Н. Лебедев гижö, мый эз пöлучитлы дзик некутшöм образование. Век жö öти во збыльысьсö ветлöдлiс школаö, а сэсся, да, писарь-батьыс ачыс велöдлöма, медсясö чунь рöтшнас.
Оз позь, чайта, кыв шутöг примитны, вöлöстьса писарöс кö вывтi нин öткодялöны крестьянинкöд. Кыдз кöть эн видзöд, а тайö вöлi интеллигенция, кыдзи шуöма «В волостном омуте» повестяс, — сиктса «листократия», кодi босьтiс тöлысьöн век жö 15 шайт жалöванньö! И повестяс писарсö петкöдлöма, ме думысь, водзкывъяс серти стöч- джыка. Тöдчис, тыдалö, сiйö, мый öтиторсö гижöма 1912—1913 воясö да олöм сертиыс, а мöдторсö дзик мöд кадö, мöд нога олöмсянь важ вылас видзöмöн.
Кыдзи тыдовтчö гижлытöм куим глава йылысь сёрниысь, писательлöн планыс вöлöма ыджыд дай повтöм. Произведениеыс вермис лоны вöлöстьса «самоуправление» вылö збыльысь комедияöн. И сэки вöлi гашкö, эз повесть — роман. Индöма со, «Ратоборецыс» тэрмöдлiс пö эштöдны да сiйöн эз гиж сэки. Но, позьö думайтны, и полiс мый оз жö öд сет сэтшöм главаястö журналыс, да киыс оз лыö гижнысö...
«В волостном омуте» некутшöм издательствоын онöдз эз на петав. Но мыйла авторыс эз кыпöд книгаöн лэдзöм йылысь сёрнисö Великöй Отечественнöй война бöрын, кор бара кокньöдiс да издательскöй удж бöр öддзис? Кöнi öнi сылöн рукописьыс? Эм-ö нин быдсанас, тшöтш сiйö главаяснас, кодъяс эз петавны «Ратоборец» журналас 1915 воын? Некöнi талун со оз кывсьы. Дзикöдз цнн-ö пропадитiс?
Г. БЕЛЯЕВ
Югыд туй. - 1981. - 12, 19 ноября
