Перейти к разделу.
М. Н. Лебедевлöн мойдкывъяс
«Войвыв кодзув» журнал печатайтiс М. Н. Лебедевлысь «Кöрт Айка» мойдкывсö. Сiйö кыкысь петалiс роч кыв вылын: «Досуг и дело» журналлöн 1904 вося 4-öд номерын да торъя книгаöн З.Д. Следниковлöн типографияын (Сыктывкар, 1910 во).
Me комиöдi мойдкывсö и, чайта вöлi, некутшöм водзкывъяс либö мыйкö гöгöрвоöдöм оз ков. Но мойдкывйыскöд тшöтш петiс литературовед Г. В. Беляевлöн статья «Корт Айка» йылысь. Сэнi ведь унатор оз лöсяв мойдкывсö гижан историякöд. Та вöсна ме бура лыдди М. Н. Лебедевлысь став мойдкывъяссö. Лыдди и мукöд гижöдъяс, кодъяслы подулас пуктöма коми мойдъяс. Геннадий Васильевич статьяын быдторйыс эм. Весиг сэтшöмтор, мый «кодсюрö шуöны, быттьöкö Лебедев муртса абу чуксавлöма бырöдны коми вöрсö, вывтi-вывтi уна сiйö да». Либö серии сы йылысь, мыйла вежсис М. Н. Лебедевлöн проповедник Стефан да Пама вылö видзодласыс. Статьяас авторыс орччöн сувтöдö рочöн гижöм «Кöрт Айкасö» кывбура коми мойдкöд да «Кык тун» нима пьесалöн прологкöд. Но тайö — куим асшöр гижöд. Куимнаныслöн аслас сюжетнöй визь, аслас персонажъяс дай гижöдъясыслöн идеяыс торъялö.
Босьтам роч кывъя «Кöрт Айка», кодöс Михаил Николаевич гижис кольöм нэм помын либö тайö нэмлöн медводдза воясас, 1903 воысь не сёрöнджык. Сiйöс öд печатайтöма, кыдзи пасйим нин, 1904 вося апрельын. Сэсся «Досуг и дело» журналсьыс нин коми легендасö босьтic А. А. Цембер да квайт во мысти печатайтiс Сыктывкарса типографияын. Сёрниыс сэнi заводитчö збыль вöвлöмторсянь: кыдзи витсёысь унджык во сайын Комиö (сэки ciйöc шулiсны Перымöн) воис Устюгса том морт, вичкоын служитысьлöн пи, манак-проповедник, кодi сэсся лоис вежа нима епископöн.
Проповедник Стефан мöдöдчö Эжва йылö. Сылöн öти велöдчысь висьталö лёк кöлдун Кöрт Айка йылысь, кодi воöма Комиö кыськö Новгородскöй областьысь. Сiйö збыль кöрт дай кöртыс сылысь кывзы- сьö. А кöлдуйтöмыс сылöн медся страшнöй. Кöрт Айка да мöд кöлдун— коми тун Пама костын вермасьöм йылысь висьталöм бöрын Стефанлöн велöдчысьыс синва сорöн öлöдö проповедникöс Эжва катыдö мунöмысь. Но Стефан оз кывзысь и аслас велöдчысьяскöд катö пыжöн Эжва кузя, мед венны кöлдун Кöрт Айкаöс да паськöдны ен вера.
Сыктывкар да, буракö, Маджа грездъяс дорö сувтлöм бöрын Стефан воис Кöрт Айка оланiнöдз, венiс сылысь став кöлдуйтöмсö да пасьвартiс асьсö Кöрт Айкаöс.
Татшöм Кöрт Айка йылысь первой преданиеыс.
Мöд преданиеыс — кывбура мойд. Нимыс сiйö жö — «Кöрт Айка», гижöма 20-öд воясö, медводдзаысь печатайтöма «Ньыв пулöн шувгöм» книгаын. Петic сiйö 1929 воын. Киигаас вит мойдкыв: «Кöрт Айка», «Бурань», «Ягморт», «Юрка», «Куим йöй». Коми кывбура мойдын абу проповедник Стефан ни сылöн велöдчысьясыс. Абу индöма и стöч кадсö ни местасö, кытысь локтiс Кöрт Айка. Сöмын пасйöма:
Кыськö воис Коми муö
Ош кодь лёк да мисьтöм тöдысь,
Паськыд тошка, югыд синма,
Гашкö, саридз сайысь петысь.
Ас йывсьыс коми пармаö локтысь шуö:
— Меным, кöртысь дорöм тунлы,
Ловъя мортысь оз ков повны.
Me, Кöрт Айка, танi кута
Джуджыд керöс вылын овны.
И заводитiс Кöрт Айка дзескöдны коми войтырöс. Эжва вомöн ню- жöдiс кöрт чеп. Пыжаясöс лэдзöмысь корис быдöнлысь тулан ку.
Лыдтöм омöльторсö вöчис
Джуджыд керöс вылын олысь.
Пыксьöм некодсянь эз аддзыв;
Коми йöзыс вöлi полысь.
Но öтчыд Эжва берегын чужва вийöдiг Кöрт Айка аддзис: Эжватi сынтöг катö пыж. Тадзи локтö Еджыд Пама, кодлöн гортыс Ем ю (Емва) дорын. Аслас
кöлдуйтан вын йылысь сiйö шуö:
Me кодь ыджыд вына туныс
Эжва вожын эз на чужлы!
И заводитчис кык тунлöн венласьöм-вермасьöм. Но некодыслöн вы- ныс оз тырмы дзикöдз венны паныд мунысьсö:
Кыкнан тунлöн керанторйыс
Некыдз, майбырöй, оз керсьы.
Чужва öтилöн оз вияв,
Пыжыс мöдыслöн оз вöрзьы.
Памалöн да Кöрт Айкалöн тайö венласьöм йывсьыс висьтыс эм и рочöн гижöм преданиеын. Та йылысь проповедник Стефанлы висьталö сылöн велöдчысьыс, кодi быдмылöма Эжва йылын. Еджыд Пама да Кöрт Айка костын венласьöмыс помасис мирнöя. А
Эжва дорса коми йöзлöн
Олöм вывтi лои дзескыд,—
гижö поэт да петкöдлö, кыдзи йöзыс заводитiсны сёрнитны Кöрт Айкаысь мездысьöм йылысь. Волi и Войпель енлы ыджыд кевмöм. Но нинöмöн эз отсав енмыд. Сэки мукöд сяма мöвпъяс чужисны кык том зонлöн — збой да повтöм Изъюрлöн да Эбöслöн. Найö локтiсны Кöрт Айка оланiн дорö вит лун помся кыйöдчисны гусьöн. Квайтöд лунас Кöрт Айка ышмис, юис-бруньгис кода сур да уси. Тайö и колö вöлi Изъюрлы да Эбöслы. Найö уськöдчисны да кералiсны Кöрт Айкаöс.
Тадзи кулi мисьтöм тöдысь,
Эжва керöс вылын олысь.
Коми йöзыс сэки вöлi
Аслас пемыдысла полысь.
A öнi коймöд гижöд йылысь. Нимыс сылöн «Кык тун. Пьеса важ коми олöмысь». Зэв жаль, пьееаыслöн сöмын панасыс — прологыс. Пе- чатайтöма сiйöс 1940 вося «Ударник» журналлöн 5-öд номерын. Ставыс вит лист бок сöмын и эм. Михаил Николаевичлöн вöлöма мöвп тыр выйöджык, пыдiсянь, тыр-бура петкöдлыны коми йöзлысь 570 восайса олöмсö. И танi бара жö куим персонажсьыс сöмын кыкыс действуйтöны — проповедник-манак Стефан да тун Пама. Кöрт Айка абу.
Водзынджык висьталöмсьыс быдöнлы гöгöрвоана: куимнан гижöдсö йитöны наын петкöдлöм персонажъясыс — проповедник-манак, а бöрынджык епископ Стефан, колдун Кöрт Айка да тун Пама. Рочöн гижöм легендаысь ми аддзам вежа Стефанöс да Кöрт Айкаöс, кывбура коми мойдысь Памаöс да Корт Айкаöс, а «Кык тун» драмаын, авторыслöн мöвп серти, колö вöлi действуйтны Стефанлы да Памалы. Найö и эм кык туныс... «Кöрт Айка» йылысь статьяын Г. В. Беляев гижö: «Лебедев пöшти творчество чöжыс эз лэдзчысьлы Кöрт Айка йылысь сюжетсьыс. Сылысь сюрöссö Михаил Лебедев, вöлöмкö, важöн нин тöдö. Гашкö, сэксянь на, кор 22 арöса том морт бöр локтiс чужан муас Пермскöй губернияса Чердын уездысь».
Taнi висьталöмыс абу ставыс збыль, «Кöрт Айка» кывбура мойдлы сюрöссö, гашкö, и вермис босьтны Лебедевыд кутшöмкö важ мойдысь Нёбдiнын да Кöрткеросын уджалiгас. Буретш «Кöрт Айкалöн» кодь сюрöсыс, шуам, «Юрка» мойдлöн. Сэнi Юркаöс садьтöм кодöдз юкталö вежайыс. Ciйö и кöртавлö ён гезъясöн Юркалысь ки-коксö. Маджасаяс сэсся войтöны ciйöc джуджыд йирö. Грека ловсö казьтыштöм могысь пуöны пызя рок да öтвыв сёйöны ciйöc. Кöрт Айка кода сур ж" юö и сэки ciйöc кераласны Изъюр да Эбöс.
И нöшта на эм стöч татшöм жö сюрöса мойд — «Ягморт». Ciйö, гашкö, Кöрт Айкаысь да Юркаысь на ёнджыка нартитiс Изьваса олысьясöс да весиг гусялiс медмича нывсö сиктсьыс — Райдаöс. Сылöн жöникыс, Туган, чукöстiс ассьыс другъяссö. Ягмортлы паныд кыпöдчисны 36 морт, кыйöдiсны вöрöгöс вöрса туй вылысь да чорыд косьын виисны ciйöc. Татшöм кодь жö сюрöсыс нöшта öти мойдлöн — «Шыпичалöн». Мойдöны ciйöc уна ногöн и ачыс ciйö тунъяс кодь жö вына да вермö кöлдуйтны. Тайö сюрöс сертиыс Илля Вась гижöма поэма. Виöны ciйöc Коми му завоюйтны локтысь рочьяс, и Шыпича оз вермы водзсасьны кöлдуйтöмнас — слугаясыс васö этша ваялöмаöсь пельсаясö да бöчкаясö. Поэмаыс помасьö мича, кыпыд кывъясöн: Шыпича узьö пыдi гуын, а гöгöр быдмöны мича чветъяс да дука турунъяс... Тайö жö сюрöс сертиыс дзик мöд сяма гижöдыс Н. А. Фроловлöн. Кывбура драмаöн бöръя нимыс «Парма ловъя». (Воддза нимыс вöлi «Пемыд пармаын. Шыпича»). Cэнi уджалысь йöз кыпöдчöны найöс нартитысь Шыпичалы паныд да сотöны ciйöc аслас керкаын...
Со татшöмöсь сюрöсъясыс коми мойдъяслöн. М. Н. Лебедевлöн кык гижöд некыдз оз лöсявны тайö дженьыдик, öтсера, некутшöм бокöвöй визьястöм сюрöсъясыскöд. Öтиыс — роч кывъя легенда «Кöрт Айкаыд», мöдыс — «Кык тун» драмаыд.
Кыкнан гижöдыс заводитчö историяын збыль вöвлöмторсянь — Стефан Пермскийлöн Комиö воöмсянь (1379 во). Емдiнö Стефан локтiс 1380 воын. Збыль сылöн и Эжватi ва паныд катöмыс. 1386 воын йöгра чукöр (вогулъяс, öнiя нимыс налöн манси) уськöдчисны вылы Эжваса сиктъясын олысьяс вылö. Епископ Стефан мöдöдчис налы воча Эжва кузя пыжöн. Йöграыд ылiсянь на и аддзисны пыжтö. Стефанлöн чужöмыс кажитчис лöг, скöр. Паськöмыс быттьö ыпъялiс, а ачыс быттьö лыйсьö ньöвъясöн. Йöгра чукöрыд ставсö, мый грабитлiсны, эновтiсны да пышйисны. Тадзи гижö Епифаний Мудрöйлöн гижöд серти Г. С. Лыткин да та дiнö содтö Е. В. Кичинлысь пасйöд: буретш тайö кадас пö Стефан венiс рöзбойник Кöрт Айкаöс Кöрткеросын да пуктi подув Ульянаса манастырлы. Кичин та йылысь гижö «Северная Пчела» журналын, 1852 во, № 108.
«Кöрт Айка» предание йылысь, чайта, водзö сёрнитны оз ков. Пре- даниесö неважöн печатайтöма «Войвыв кодзув» журналын.
Сёрниыс водзö важ коми олöмысь драма — «Кык тун» — йылысь. Сылöн сюрöсыс, дерт, эськö вöлi ёна сложнбйджык, уна визьяса да уна сикасаджык. Та йылысь, дерт жö, Лебедев висьталöм серти журналлöн редакция гижö: «Пьесаын медся тöдчана персонажъясыс — коми тун Пама, манак Стефан да том морт Юсь, кодi вермасьö Памалы да Стефанлы паныд. Мед мездысьны Юсьысь, Пама тшöктöм серти ciйöc виöны».
Пьесаын автор кöсйö петкöдлыны тунъяслысь йöзкöд сёрнитöм, Стефанлысь да Памалысь вензьöм (найö вераяслысь «веськыдлунсö» биöн да ваöн испытайтöм, кыдзи та йылысь висьталö предание), чи- новникъясöн ясак перйöм да с. в.
Me висьталi нин: пьесаыслысь сöмын панассö — прологсö гижис Михаил Николаевич. Мыйла эз помав драмасö — некод оз тöд. Но а прологас кузь туйö петöм водзвылын Стефанкöд сёрнитöны Устюгса манастырысь архимандрит да Устюгса воевода. Налысь Стефанкöд сёрнияссö ог вайöдöй, неыджыд статьяад найö оз тöрны. Мый висьта- лiсны Стефанлы, мый корисны вöчны, бура петкöдлöны архимандрит да воевода мунöм бöрын Стефанлöн ас кежысь сёрниясыс.
Архимандрит мунöм бöрын. Стефан (öтнас). Господи помилуй! Тшöктöны кресттö саблякöд öтувтны. А евангелиеад мый шуöма? Христосыд вооружённöй воинъяскöд оз ветлывлы Дерт, колö паськöдны да озырмöдны Московскöй государствотö, колö ёнмöдны великöй князьяслысь властьсö, но öд та вылö эм мукöд йöз, эм воинство, а ме — Христослöн смиреннöй служитель.
А со Стефанлöн мöвпъяс воевода мунöм бöрын. Стефан (öтнас). Со мортыд: ошкö Памаöс... Ошкö Христослысь лютöй врагсö! Збыль, бу- ракö, босьтöма сылысь кыксö тулан кутö. А кыдзи сiйö увтыртöм йöз йывсьыд сёрнитö! Сылы абу жальöсь весиг роч крестьянаыс, кодъясöс ёна топöдöны. Да мый нö керан? Ачыс господь сувтöдiс му вылын татшöм ладсö. Кодi раб — раб! Кодi боярин — боярин!
Татшöм пролог бöрад лоö гöгöрвоана, мый кöсйис петкöдлыны ав- торыс.
Журнал редакциясянь гижöдын гарыштöма «вералысь веськыдлунсö биöн да ваöн испытайтöм». Епифаний Премудрöйлöн гижöд серти коми учёной Г. С. Лыткин тадзи висьталö: «Комияслöн вöлi пöрысь Пам, сiйö муас сотник. Олiс ciйö Эжва йывланьын. Комияс сiйöс ёнджыка пыдди пуктiсны мукöдъяс серти, кыдзи велöдысьöс, веськöдлысьöс. Тайö кöлдуныс тшöкыда волывлiс Емдiнö кор гусьöн, а кор и явö. Нуöдiс сёрнияс, мед йöзыс оз эновтны ассьыныс верасö. «Вöчöй сiдз, кыдзи вöчлiсны миян батьяс. Кывзöй менсьым, а эн Стефанлысь кывъяссö,— чуксалiс Пама.— Сiйö Мöскуаысь воис. Вермас öмöй лоны мыйкö бур Мöскуасянь».
Стефан вочавидзлiс та вылö аслас проповедьясöн, велöдiс бура овны, эскыны öти енлы.
Öтчыд татшöм вензьöмыс нюжалiс быдса лун да быдса вой, еёйтöг ни ютöг. Уна татшöм вензьöмъяс бöрын Пама вöзйис вöчны татшöмтор: кыкнанныс öтлаын мунасны би пыр и ва пыр. Кодi оз сотчы биын, оз вöй ваын — сылöн вераыс веськыд, сылысь ставöн кутасны кывзысьны. Öзтiсны керка. Стефан лэптiс кияссö, юрбитiс енлы да шуис сэтчö чукöртчöм йöзыслы: «Ме муна ен вера вöсна биö». Сэсся шуис кöл- дунлы: «Пырам биас öтлаын, öта-мöдлысь кияс кутöмöн, кыдзи и сёр нитчим».
Кöлдун эз пыр биö, повзис бисьыс. Стефан босьтiс Памалысь кисö да нуöдi ciйöc Эжва дорö. Сэнi писькöдiсны кык йöрдан — öтисö вылöджык, мöдсö улö. Шуöма вöлi кыкнанныслы пырны вылыс йöрданас, мунны йи увтiыс да петны улыс йöрданысь. Но Пама бара эз лысьт пырны ваас. Тайö пö, висьталöма гижöдас, вöлi 1382—1382 вося тöлын.
И медбöрын, кытысь да мыйла чужис татшöм мöвпыс, гижöдыслöн татшöм сюрöсыс? Та йылысь висьталöны ёна важ гижöдъяс. На йылысь висьтöн и помалам статьясö.
Роч академик, литературовед А. Н. Цыпин (1833—1904) М. Н. Лебедев чужтöдз 15 во водзджык лэдзис «Памятники старинной русской литературы» книга, 4-öд выпуск. Сэнi вöлi печатайтöма Епифаний Премудрöйлысь (?—1420) гижöд «Житие св. Стефана». Тайö гижöд сертиыс нин тöдчана коми учёнöй Георгий Степанович Лыткин (1835— 1907) лöсьöдiс коми и роч кыв вылын Стефан Пермской йылысь гижöд «Жизнеописание св. Стефана, просветителя зырян» (рочöн) и «Коми войтырöс Кристос нимö пöртысь вежа Стефанлöн олöм-вылöмыс» (ко- миöн). Коми и роч гижöдъяссö печатайтöма Г. С. Лыткинлöн книгаын — «Зырянский край при епископах Пермских», кодi петiс 1889 воын. М. Н. Лебедевлы ciйö воас тырис 12 арöс.
Вермис-ö тайö книгасö лыддьыны Михаил Николаевич? «Кöрт Ай- касö» лэдзтöдз явö абу лыддьылöма. Мукöд мойдкывъясас некутшöма оз тöдчы вежа Стефанлöн Комиын олöмыс. А «Кык тун» драмасö гижтöдз Г. С. Лыткинлысь книгасö лыддьöма. Тайöс гöгöрвоан и пролог сертиыс, и редакциясянь паейöд сертиыс.
Георгий Торлопов
Войвыв кодзув. – 1994. - № 9
