Перейти к разделу.
В. А. Савинлöн М. Н. Лебедевлы нёль письмö
Кык коми гижысь, кык поэт Виктор Савин да Михаил Лебедев бура тöдлiсны öта - мöднысö. Паныдасьлiсны и гижан удж кузя. Эз сюрлы лыддьывны та йылысь некытысь. И со ме Коми АССР-са госархивлöн лыддьысян залын. Пызан вылын куйлöны кельыдлöз папкаяс. Быд вылын öти гижöд: «В. А. Савинлöн Р-958 номера личнöй фонд». Быд папкаын — кадсьыс вижöдöм документъяс. Папкаяс пöвстысь бöръя нёльöс. Ставыс - поэт Лебедевлы Савинлöн письмöяс. Со — кад сертиыс медводдзаыс — печатайтöма машинка вылын лöз рöмöн:
«Ёна пыдди пуктана Михаил Николаевич.
Ми пöлучитiм тiянлысь «В нарсуд на разбирательство» и «Коми литература» статьяяс, кодысь ыджыд аттьö. Эскана, регыдъя кадöн лыддянныд миян газетысь. Водзö вылö постарайтчöй гижны дженьыдджыка. Сы вöсна, мый миян газетлöн ичöт ыджда вöсна оз тöрны сэтчö гырысь гижöдъяс. Ыстам тiянлы Потапов Василий Степановичкöд тiян воддза статьяясысь гонорар—2078 шайт (22 вося образеца). Редакциялöн конторалы колö гонорар босьтöм вылö тiян доверенность, - кыдзикö ыстöй ciйöc миянлы (датасö пуктöй важöс, 20 октября гöгöр). Сы йылысь, мыйла газетö эз пыр тiян «Пастыри добрые» статьяныд, ме нинöм висьтавны ог вермы, сы вöсна, мый ciйö вöлi воöма редакциялöн важ состав дырйи на, а ме жö редакторала сöмын сент. 20-öд лунсянь.
Гижöй унджык, торйöн нин сиктлöн олöм йылысь. Миян газетаным буретш татшöм гижöдъясыс медъёна оз тырмыны. Тiянлы тöд выланыд висьталам, мый öнi гонорарсö мынтам зöлöтöй шайтлöн курс серти öтисянь куим урöдз (хроника да посньыд гижöдъяс —1 ур, фельетон —2 ур, руководящöй статьяяс—3 ур). Гонорарсö мынтам быд тöлысь помын, и тi, вöлiны кö газетын кольöм толысяс йöзöдöма тiянлысь гижöдъяс, верманныд босьтны гонорарсö контораын либö асьныд личнö, либо доверенность серти пöпуттьö мунысь-локтыськöд.
Тiянöс пыдди пуктысь, «Югыд туй» газетлöн ответственнöй редактор В. Савин. 1922 во, окт. 28 лун.»
Ставлы тöдса «Настук» оперетка, кодöс Лебедев дырйи на унаысь пуктывлiсны Кöрткерöсса да мукöд сцена вылын. И öнi на ми поэтлысь ciйö уджсö вылö донъялам. А вот сэкитö, торйöн нин комынöд вояс заводитчигöн, донъялiсны гижöдсö мод ногöн. Кыдзи та йылысь висьталö В. Савинлöн «Лебедевлöн гижöд вылö воча кыв». Ciйö письмöсö сета дженьдöдöмöн. Нёбдiнса Виттор гижö: «Настук» опереткалöн авторсянь, М. Н. Лебедевсянь воис меным зэв интереснöй письмö. Ciйö (письмöыс), ме ногöн, представляйтö тшöтш общественнöй интерес. Сы понда ме ог кöсйы кольны ciйöc куш ас костын видзöм вылö, а юкся, кыдз шуласны, лыддьысьысьяскöд да гижысьяскöд. Со мый гижö Лебедев (рочöн ме петкöдла письмöсьыс медся «ён» местаяссö).
«В прошлом году (1930-м Н. В.) Вы писали мне, что предлагаете на музыку мою оперетку «Настук», что подготовляете ее к постановке на сцене и прочее. Но теперь оказалось, что эта оперетка ни к черту не годится. К такому заключению пришла, по крайней мере, коми критика, назвавшая оперетку кулацким произведением. В чем тут дело, хоть убейте, ничего не понимаю. Оперетку я писал весной и летом 1929 года, когда кулак еще не чувствовал «ад собой грозы и вел себя вызывающе. И, наконец, оперетка рисует только один маленький эпизод на фронте классовой борьбы, а отнюдь не классовую борьбу в целом, так что предъявлять к ней такие широкие требования — прямо смешно и неразумно...»
Татшöм взволнованной письмо гижö Лебедев. Me сылы воча кыв ceтi зэв спокойнöйöс. Гижи рочöн жö, индi татшöмторъяс: «Кöть эськö шензянатор, быттьö «Настукыд» тэнад босьтлiс 1929 воын конкурс вылын мöдöд премия, a öнi (1931 воын) сэтшöм чорыд критика улö веськаiс, — сöмын ме дзик жö ставнам сулала сiйö критика дор. Тэ öд ачыд тöдан, кыдзи донъялö öнiя пролетарскöй критик быд литературнöй произведение. Медвойдöр сiйö «видзöдö вужъяс» («зрит в корень»), кутшöм кадын петöма произведениеыс, мый ciйö сетö олöмыслы, кутшöм класслы вайö польза. Тэнад «Настукыд» петiс 1930 вося декабрын, кор вöлi мунö чорыд классöвöй тыш, кор паськыда заводитöма нуöдны наступленньö капитализм нога элементъяс вылö. Критикыд та серти донъялö произведениетö, сылы медэтша делö, кор гижöма произведениесö, а медъёна интересуйтö — кутшöм обстановкаын петöма ciйö светас...
Босьтам кöть миянлысь воддза коми гижöдъяс (Илля Васьлысь «Мунöны» поэмасö, Тима Веньлысь «Трипан Вась» висьтсö, тэнсьыд «Гажаджык, коми йöз, олöй», менсьым зэв уна кывбур), петан кадъясас найö вöлiны!, гашкö, актуальнöйöсь, öнi некытчö оз туйны. Ставыс либö мелкобуржуазнöй либö национал-шовинистическöй. Ме гижлi «Рытъя», кöсйи петкöдлыны кулакъясöс, кыдзи быран классöс, а артмöма лёктор. Сылысь лёксö, шогмытöмлунсö эрд вылö петкöдiс критика, миян коми критика.
Микайлö Николаевич! Тэ чайтан, ме эг ерепенитчы? Ок ёна первойсö дорйи ассьым произведениеöс. А кор пыдöджык видзöдлi да джуджыдджыка мöвпыштi — збыльысь некытчö туйтöм гижöд, ворсны сцена вылын оз позь. Сiдз жö и тэнад «Настук». Коймöд письмöсö В. Савин гижöма 1933 вося март 8 лунö, кор нин уджалiс радиовещаниелöн областнöй комитетын, литературно-драматическöй юкöнын ответственнöй редакторöн. Вайöдам дженьдöдöмöн жö:
«Кöрткерöсö Лебедевлы. Öнi радиовещаниеын мунö ыджыд перестройка. Радио газет бырöдiсны. 60—70 процент став вещаниеыс кутас сетсьыны художествоа кывйöн. 1933 воын лит.-драматическöй вещание—625 час, лоö сетöма 900 передача (быд лун кык час). Öнiöдз на миян гижысьяс оз матыстчыны радио бердö да оз сетны ассьыныс творческöй гижöдъяс».
Та бöрын Савин шыасьö Лебедев дорö. Корö, медым и ciйö отсалiс коми радиолы. Нёльöд письмöсö Виктор Алексеевич гижöма 1935 вося декабрь 26 лунö, кор уджалю Коми госиздатын художественнöй литература юкöнын юралысьöн. Письмöсö адресуйтöма тадзи: «Кöрткерöс, нарсудö.» И водзö гижö:
«Лебедев ёрт! 1936 вося август тöлысьын тырö Коми областьлы 15 во. Коми ГИЗ сэк кежлö кутас лэдзны литературно-художественнöй альманах, кытчö пырасны коми сöветскöй писательяслöн медбур гижöдъясыс.
Корам юöртны, мый тэ сетан, ыджыд-ö да кутшöм срок кежлö. Медбöръя срокыс миян — июнь öтиöд лун. Сетны позьö любöй жанрын (пьеса, повесть, висьт, кывбур, поэма)».
Улiас В. Савинлöн кырымпас.
Огö тöдöй, дерт, сетлiс эз М. Лебедев кутшöмкö воча кыв В. Савинлы, ыстылiс-ö кутшöмкö гижöд. Савинлöн фондысь тайö оз тыдав. Кадыс вöлi нин зэв кымöра. Унатор на мöвпалiс вöчны Нёбдiнса Виттор. Но эз удит. Олöмсö регыдöн торкисны пыр кежлö…
А. Панюков, Кöрткерöс сикт
Войвыв кодзув. – 1988. – 12 декабря
