Перейти к разделу.

 

Нимкодь, мый Кöрткерöсын олiс енбиа морт

М.Н. Лебедевлы – 125 арöс

 

Таво йирым 22-öд лунö Михаил Николаевич Лебедев чужöмсянь тырис 125 во. Тайö ыджыд тшупöда лунсö пасйöм могысь культура керка да лыддьысянiн котыртiсны гажказьтылöм. Сыктывкарысь корлiсны гижысьясöс, волiсны и Кöрткерöс районса школаын коми кыв да литература велöдысъяс, кывбур гижысьяс.
Гаж заводитчис лыддьысянiнын. Гижысьясöс вочаалiсны няньён-солöн да Лебедевлöн кывбуръяс вылö тэчöм сьыланкывъясöн. Сэсся лыддисны докладъяс Лебедевлысь олöм да творчество туялысьяс:
филология кузя наукаясса кандидат Марина Геннадьевна Плеханова, критик да исследователь Геннадий Васильевич Беляев, Нёбдiнса музейöн веськöдлысь Галина Генриховна Микушева да республикаса Куратов нима музейын уджалысь Лидия Дмитриевна Ильчукова. Висьталiсны Лебедев
йылысь сiйöс, мый ми важöн нин тöдам, нöшта и сiйöс, мый эг на кывлöй. Лебедевлысь творчествосö век на туялöны. Сэсся Кöрткерöсса музейöн веськöдлысь А.А.Панюков нуöдiс Лебедевлöн местаястi экс-
курсия, ветлiсны и сылöн гувылö, пуктiсны венокъяс да дзоридзьяс. Сэнi лыддисны сылысь кывбуръяссö, нималана гижысьяс пасйисны Михаил Николаевичлöн творчестволысь коми литератураын ыджыд тöдчанлунсö.      Гу дорö ветлöм бöрын бара чукортчисны библиотекаын. Александр Александрович Панюков “М.Н.Лебедев: Новое в творческойбиографии” небöг, кабалаяс вылö подуласьöмöн висьталiс Михаил Николаевич Лебедевлысь вужъяссö туялöм да олöм йылысь. Öтамöд бöрся лыддисны ассьыныс кывбуръяссö Кöрткерöс районын олысьяс - кывбур тэчысьяс да гижысьяс, кодъяс чукöртчылiсны воддза лунас гижысь котырлöн семинар вылö Сыктывкарын. Кöрткерöс районса гижысьяс лыдö пырöны Зоя Васильевна Шиликова (Шойнаты), Зоя Григорьевна Жижева (Одыб), Нина Васильевна Симпелева (Ыджыдвидз), Луиза Ивановна Юранёва (Пезмог), Катя Макарова (Шойнаты), Люда Ивашева (Ви­сер), Ганна Попова (Пёддельнöй). Нимкодь, мый томъяс гижöны жö коми кывйöн.            Гижысь котырöн веськöдлысь Елена Козлова вöчис кывкöртöд: - Том гижысьясöс, ставыс кö лоас бур, корлам Гожся универ­ситетö. Сэсся лыддисны ассьыныс кывбуръяссö нималана ги­жысьяс. Та бöрын лыддьысянiнса уджалысьяс юктöдiсны став гöстьöс тшайöн. А рытнас “Со­юз” кинотеатрын заводитчис М.Н. Лебедевлы сиöм концерт. Ветеранъ- яслöн хор сьылiс М.Н. Лебедевлöн кывбуръяс вылö тэчöм сьыланкывъяс. А челядь - Михаил Николаевичлысь кывбуръяс медбура лыддьысь костын ордйысьöмын вермысьяс - петкöдлiсны ассььныс кужанлунсö. Вöлiсны и Лебедевкöд öти кадö олысьяс да сiйöс тöдысьяс, найö казьтылiсны нималана гижысьöс. Корлiсны и Михаил Николаевичлысь рöдвужсö.    Кöрткерöсысь йöзкостса те­атр петкöдлiс “Мича ань” опереткаысь юкöн, а ТЮЗ - “Кöрт Айка” йöктöм.
Козьналiны и Лебедевлы сиöм викторинаын вермысьясöс. Гажыс артмис. Уна буртор вöлi шуöма нималана гижысь йылысь. Уна выльтор, кодöс эг на и тöдлöй, висьталiсны Лебедевлöн творчество туялысьяс. Лыддьысянiнын позис ньöбны коми кыв вылын гижöм небöгъяс, кывбур чукöръяс, висьтьяс, повестьяс. Нимкодь, мый миян сиктын олiс татшöм енбиа морт. Филология кузя наукаясса кандидат Марина Геннадьевна Плеханова тöдчöдiс: - Лебедев вöлi коми литератураын медводдза профессиональнöй гижысьöн.
Колö шуны, М.Н. Лебедевöс нимöдны волысьяссянь öнi нин воöны аттьöалöмъяс. Со мый гижö Н.В.Симпелева: “...Me аттьöала Кöрткерöсса шöр библиотекаöс М.Н.Лебедевлы чужöмсяньыс 125 во пасйыны вежавидзöмöн корöмысь. Тайö аддзысьлöмыс менам некор оз вун. Тайö тшупöда луныс öтувтiс поэтъясöс, прозаикъясöс, литераторъясöс да лыддьысьысьöс. А ме нöшта тöдмaлi интереснöй мортöс. Вежала томъяслы, öд найö вермöны öнiя кадö пöртны олöмас став кöсйöмсö...
Зэв ыджыд аттьö РЦБ-ын уджалысьяслы гажсö котыртöмысь. Мед эськö татшöм лунъясыс вöлiны тшöкыдджыка...”.

Жанна БЕРДНИКОВА
Звезда. – 2002. – 12 ноября

Корткеросская Центральная библиотека им. М.Н. Лебедева. 2014 год.
Республика Коми, Корткеросский район, с. Корткерос, ул. Советская дом 187, lebedevlib@mail,ru
8(82136) 9-24-80. 9-98-16.