Перейти к разделу.
Сьöлöмö чуксасян кывъяс
Михаил Николаевич Лебедев чужöмсянь тырö 120 во. Кутi пыдi- сяньджык тöдмасьны сылöн творчествоöн. Некымынысь лыдди сылысь кывбур "Эзысь тöлыся вой". Шензъöдiс роч вужъя мортыд коми кывбуртö гылыда да мичаа тэчöмнас. Но медся ёна йиджисны сьöлöмö öти кыввужъя кывъяс, кодъяс отсалiсны меным, коми мортлы, пыдiсянь вежöртны чужан кывлысь озырлунсö, гöгöрвоны, кыдзи коми кывйыд петö ас пытшсьыд мелi руöн, казявтöг, гусьöн. Аслад кыв дорö муслунтö казялан сöмын сэк, кор вежöртöмöн донъялан татшöм мортыслысь, кыдзи М. Н. Лебедевлысь, коми кыв дорö матыстчöмсö да кужöмöн сыöн вöдитчöмсö. Вайöда кывбурысь некымын визь, мед тi казялiнныд, кыдзи поэт вöдитчöма сьöлöмö чуксасян кывъясöн.
Тэныд норася ме,
Эзысь тöлысь, бур вок:
Муса ныв, зарни ныв
Оз нин ме дiнö лок!
Талун со кутшöм кыв
Ciйö горöдic мем:
Мун пö син водзысь тэ,
Менам выль мусук эм!
Вай тэ лöнь, колипкай,
Гажапырысь эн сьыв!
Долыдлун мем оз ло,
Эз кö ло муса ныв!
Паныдасим öткодь кыввужъя кывъясöн: муса — мусук. Кывбур- сьыс казялiм, мый лирическöй геройыс лоöма нывлы мустöмöн. Сiдзкö, тайö визьö содö коймод кыв: муса — мусук — мустöм. Медым матыстчыны на дорö, колö бурджыка вежöртны. Колö шуны, мый коми мортлöн йитöдыс öта-мöд дорö, вöр-ва дорö, эмбур дорö чужö вир-яйсьыс. Мед лоö гöгöрвоанаджык, тöдчöда, мый мортлöн сьöлöм кылöмыс (чувствоясыс) петö ас пытшсьыс, вир-яйсьыс. Видлам писькöдчыны кывъяс дорö прöстöй сёрникузяясöн (предложениеясöн). Босьтам татшöм сёрникузя: "Менам вокöй вир-яйсьыс усьöма". Висьталысьыс шуö, мый вокыслöн вирыс и яйыс омöльтчöма, мод ногöн кö, мортыс косьмöма, абу тырвыйö дзоньвидза морт, висьысь морт: вир-яйысь усьöма. Сiдзкö, тайö морт пытшсьыс вирыс и яйыс петöма.
Босьтам мöд кывтэчас: "вирыс пузис". Кор лёка сёрнитöны йöз öтамöдкöд, дöзмöдчöны, скöрмöдöны асланыс сёрниöн, сэк мортыс гöрдöдö. Вирыс öдйöджык ветлö морт пытшкас, тшöктö сьöлöмтö ёнджыка уджавны и быттьö вирсö петкöдö морт пытшкöссьыс. Медым эскöдны лыддьысьысьöс, мый комиыдлöн кывйыс петö виряйсьыс, вайöда нöшта öти кывтэчас: “вежыс петö". Йöз сёрниысь тшöкыда кывлан: "Нылыс сэтшöм мичаа да вöччöма, мый вежыд петö сы вылö". Шулывлöны и мöд ног: "Нылыс сэтшöм мича да муса, мый быдöнлысь вежсö петкöдлö". Мый сэтшöм "веж петкöдлöмыс"? Дерт жö, вермам думышттöг шуны: "Завидьыс пö петö". А мый сэтшöм завидьыс? Мый сэтшöм вежыс? Вежыс — рочöн кö, "зелень". Мый нö морт вир-яйысь петö вежыс? Бара визьнита тайö кывлысь вежöртассö. "Веж" — тайö мортлöн желчь, рочöн кö. "Вежыс петö" — кывтэчасыс индö, мый морт пытшкысь петö "желчь". Веж петö сöмын колысь, лёк мортлöн. Тайö кывлы эм паныд вежöртаса кыв "вежавидзны". Сiдзкö, татшöм мортыс кужö асьсö кутны, оз лэдз петны вежсö, желчсö. Шулöны и "вежавидзтöм морт", кодi оз куж кутны вежсö, желчсö, скöрсö, скöрлунсö. "Вежавидзтöм морт" кывтэчаслы эм синоним" яндысьтöм морт". Тайö кывтэчасыс петö сiдз жö морт пытшкысь, шулöны тай: "Яндзимыс абу, век локтö!" Яндзим — ciйö сiдз жö мортлöн вир-яй, рочöн кö — "половой орган". Медводдза вежöртасыс "морт, кодi туп- кысьтöг кушöн ветлö, оз гöгöрво дзебны ассьыс кучик-яй тэчассö, öти кывйöн кö, яндзимсö". Колö татчö содтыны со мый: йöз важысянь нин гöгöрволiсны, мый колö видзны вир-яйтö, тупкыштны. А кодi оз гöгöрво, (шмонитöм ради ли, янöдöм ради ли) чöвтöны татшöм кывъяс: "Талöн яндзимыс абу!" — ... тöг чужлöма". Тайö кывтэчасъяс пырыс вочасöн эскöда, кыдзи морт пытшкысь петöны кывъяс, кодъясöс öнi оз ёна вежöртны. Но тайöн ог помав ассьым сёрниöс, а бара на матыстчыла М. Н. Лебедевлöн кывбур дорö, кытысь сьöлöмсö йиджисны "муса" да "мусук" кывъяс. Тайö кывъясыс сiдз жö петöмаöсь морт вир-яйысь. Мус — сiйö, рочöн кö, печень. Коми йöзлöн эм сэтшöм шусьöг: “Дасьтöмторйыд мустö оз зырт!" (Запасы карманы не дерут. Запасы печень не трут). Тайö "мус" кывсяньыс чужис уна öткодь кыввужъя кыв: муса — мусук — муслун — мусатор — мусмöдны — мусукасьны и с. в. Став тайö кывъясыс нуöны öти вежöртас "радейтны". Колö шуны, мый "радейтны" кывйыс. коми кывйö пырöма рочысь, "радеет" кывйысь, кодлöн вежöртасыс "тöждысьысь". И колö чайтны, "мус" кывйыс чужлöма важöн, Урал подувйöзлöн мöда-мöдсьыс торъявтöдз на, миян эраöдз 2-3 сюрс во сайын. Босьтам кö финн-йöгра кывъяс да видзöдлам, кыдзи юргö быд кывйын "мус" кывйыс, то казялам: комиöн шуöны "мус", удмуртъяс — "мус", мариецъяс — "мокш", мордва — "максо", эстъяс — "макс", венгръяс — "май". Позьö гöгöрвоны и казявны, мый найö нуöны кывйыслысь öти вежöртас и юргöны пöшти öткодя. И тайö "мус" кывйыс матыстö миянöс аслас вужъясöн öта-мöд дорö, рöдвуж кывъя йöз дорö. Сiдзкö, муслуныд миян чужис муссянь, мортлöн пытшкöссянь. "Мус" кывйыс веськыд вежöртаснас öнöдз на кольöма миян коми сёрниын. Кор челядьöс ёна радейтöны, окалöны, век нин шуöны-лелькуйтöны: "муса ёкмыль", "менам мусатор". Такöд тшöтш чужисны и татшöм кывтэчасьяс:
Мускöй курдiс (Скöрми).
Мускöдзыс йиджöма. (Ёна дöзмöма).
Муссö оз зырт. (Кокниа олö, кокниа уджалö, оз шогав).
Быдтор сылысь муссö зыртö. (Быд удж сылы сьöкыд).
Сёрнисикасьясын дыш морт йылысь шулiсны тадзи: печорасаяс — "муссö пöжö", удорасаяс. — "муссö личкö", кулöмдiнсаяс — "мус вылын куйлö".
М. Н. Лебедев кывбурын "мусук" — ciйö радейтана зон. Кыв дорас содтöма ичöтмöдана, радейтчана суффикс (-ук), МУСУК. Мусукöн шулiсны важöн и радейтана нылöс, и радейтана зонмöс, и став радейтана рöдвуж котырсö. А миян быдмигöн “мусукнас" бать-мам тöдчöдлiсны, мый мусукыс — сiйö радейтысь, радейтчысь. Локтас кö пö тiян дорö, тошнас гильöдас и чушкас, чуткалас. Сэк жö вöлi содтасны: "Эн жö, барай, мусукасьöй, чуркаястö бöжаныд кутанныд кыскавны!" Миян кадö нывъясыд мусукъясысь ёна вежавидзлiсны да яндысьлiсны. Гашкö, и повлiсны мусукасьнытö. Со кутшöм мöвпъяс чужтic М. Н. Лебедевлöн кывбур "Эзысь тöлыся вой".
Мария ПЛОСКОВА
Войвыв кодзув. - 1997. - № 10
