Перейти к разделу.
Лебедев жизнь и творчество
Тун йылысь сьылöмöн ворсан мойд
1940 вося июнь 23 лунö Изьва, Печора, Сыктыв, Эжва, Мозын, Емва вожъ- ясысь ыджыд сяма да енбиа 400 гöгöр велöдчысь чукöртчисны Сыктывкарö художествоа олимпиада вылö. Нёль лун асывсянь сёр рытöдз жюри тöдмасис накöд, корсис-донъялiс сьылысь-йöктысьяслысь национальнöй аслыспöлöс- лунсö, водзö сöвмыны позянлунъяссö да кöсйöмсö, медым сэсся вермысьясыс петкöдчисны Москваын. Быд лун та йылысь гижисны газетын.
Нёльöд луннас жюри видзöдiс Визин школаса 9-10-öд классъясын велöд- чысьясöн дасьтöм Тун йылысь кывбура мойд. Юргисны cэнi и сьыланкывъяс. «Тун» спектакльыс вöрзьöдiс видзöдысьяслысь сьöлöмсö.
Тун йылысь мойдсö 1920 воын лöсьöдiс Михаил Николаевич Лебедев, а медвод- дзаысь йöзöдлiс «Ордым» журналын 1928 воын (сэтчöдз мойдыс ки помысь ги- жöмöн нин разалöма клубъясö). Но визинсаяс гижöднас тöдмасьöмаöсь 1940 воын петöм Лебедевлöн «Бöрйöм гижöдъясысь». Öти кадö дасьтысьöмаöсь и экзаменъяс, и олимпиада кежлö. Драмкружокöн веськöдлысьыс абу вöлöма да челядь лöсьöдчöмаöсь ас кежас. Кадыс вöлöма этша. Сэки зэв на том Прометей Чисталёв (сёрöнджык нималана композитор) во джын уджалöма Визинса школаын математикöн да мыйтакö отсалöма бöрйыны Михаил Лебедевлöн кывбура мойдлы шыладсö. Медым том артистъяс бурджыка петкöдчисны Сыктыв- карын, ворсан паськöмсö да декорациясö судзöдны босьтчöма театрса директор Иван Николаевич Попов.
Öнi эськö ставсö тайöс ми эг и тöдöй, эз кö висьтась та йылысь Сыктывкарын олысь Егор Михайлович Семенчин. Сылы кöкъямысдас кöкъямыс арöс нин. А 1940 воын Визинын ciйö помалöма 9-öд класс да ворсöма спектакляс Тунöс. 1942 воын мунöма тышкасьны фашистъяскöд. Доймалöм бöрын локтöма гортас, уджавлöма райкомъясын да обкомын. Егор Михайловичлöн висьталöм серти, Михаил Лебедевлысь гижöдсö том йöз ворсöмаöсь сьöлöмсянь да окотапырысь, а хорыс школаас вöлöма да сьылысьяссö корсьны-öтувтны абу нин ковмöма. Коми сьыланъяслысь юргöмсö челядь тöдöмаöсь нин, сöмын колöма кывъяссö да важ сьылан ладсö велöдны. Спектакляс уна сьыланкыв понда программаас ворсысьяс нимтöмаöсь «Тунсö» операöн.
«Сьылöмöн ворсанторсö» М.Н.Лебедев шулöма «опереткаöн». Оперетка — тайö öти сюрöсö гартöм ворсантор: кывбуръясöн сёрнитöны, тшöтш и сьылöны да йöктöны. 1920 воясö клубъясын ворсiсны нин сыöн гижöм «Мича ныв», «Бур ань», «Настук» да «Тун» опереткаяс. Видзöдысьлы кокни вöлi гöгöрвоны сцена вылын лоöмторъяссö, кор найос петкöдлöны сьылöмöн да ворсöмöн öтув. Михаил Лебедев казьтылiс: «Тайö опереткаясыс зэв ёна воисны сьöлöм вылö видзöдысьяслы. Найö некор на эз аддзывлыны чужан кывъя ворсанторъяссö». Öнi быдöнлы нин тöдса «Бур батькöд-мамкöд олöм» сьылан- кывсö йöзыс медводдзаысь кывлiсны буретш «Тун» опереткаысь.
Михаил Лебедевлöн «Тун» ворсанторнас тыр-бура тöдмасьны ме ветлi бибилиотекаö, сэнi жö корси газетъясысь олимпиада йывсьыс гижöдъяс.
Сюрöсыс опереткаыслöн татшöм: олiс-вылiс да печкиг туис-быдмис мича Са- шук. Мусмис сылы Павел зон. Кад воис чунькытшасьны. Кöлысь Bopciгac кыськö воис пöрысь Тун. Сiйö вордiс-мыйкö вочис — и Сашук воши.
Садьмö Сашук Тунлöн зарни керкаын. Вежöсас ставыс мойдын моз югъялö да дзирдалö. Сашук гöгöрвоö, мый сыкöд лои, кöсйысьö: «Бурöн ме Тунлы ог сетчы. Менам Павелöй оз вун, кута виччысьны сыöн мездöм». А Тунлы вочавидзö тадзи: «Дугды корасьны, йöй выжыв, мун да паччöр вылад вод!» Михаил Лебедевлöн гижöдлы сюрöсöн лои муслун да шуд вöсна Сашуклöн Тункöд вермасьöм.
«Менö пöльыштiс тöв, куci шондiыс мем», — кылö Сашуклöн Павел йылысь сьыланкыв. Сцена вылын Тун да сiйöс видзысь шыпурта йöз. Найö сьылöмöн ыдждöдлöны Тунлысь вынсö да озырлунсö, тшöктöны Сашуклы овмöдчыны пöрыськöд. Ныв водзсасьö. Тун дась виччысьны куим лун. Пырöны русалкаяс. Могыс налöн сэтшöм жö: сетны Сашукöс Тун сайö. Найö асьныс коркö муса зонъясöн öтдортöмысь вöйтчылiсны ваö да öнi Тун борд улын некутшöм шог оз тöдны. Киысь-киö кутчысьöмöн ветлöдлöны кытшöн да сьылöны: «Муса зонъясыс миян вунöма, синва кисьтöмъяс ылö кольöма». Русалкаяс вайöны Сашуклы чöскыд сёян- юан, «ма кодь вина сизим доз» да «дзонь чукöр уна рöма вöччан платтьö».
Сашукöс ворсысь 17 арöса нывка — Аня Беляева — чуймöдö видзöдысьясöс мича гöлöснас да лöсьыд мыгöрнас. Ворсöмсö сьöлöм пырыс нуöдöма да сы вöсна и вöрзьöдö видзöдысьясöс. Сашуклы оз ков озырлун, сiйö повтöм да шань: Тунöс мустöмтö, русалкаясöс жалитö. «Аттö дивö, кутшöм чорыд, кутшöм сямтöм тайö ань!» — скöралö Тун.
Керка стенö чорыда йиркöдчöны. Сашук шензьöмöн кывзö, чепöсйö места выв- сьыс да котöртö öшинь дорö. Кылö Павеллöн гöлöс Шы-пуртаяс пышйöны. На пиысь öтиöс вopcic Павел Безносов (бöрынджык Павел Александрович дыр юрнуöдiс Коми АССР-са Совминöн). Безносов да Тунöс ворсысь Егор Семенчин велöдчисны öтлаын, 1941 воын помалiсны школа да регыд мунiсны армияö. Па- велöс ворсысь Ваня Морозов сёрöнджык усьö Айму вöсна Ыджыд тышын.
Медбöръя петкöдчöмын Павеллы усьö тöд вылас, мый Тунлöн став выныс тош- кас. Ciйö чабыртö Тунöс тошкöдыс да корö Сашукöс ножичöн шырны тошсö, ме- дым бырöдны тшыкöдчан сямсö. Сiйö жö здукö вынтöмöм Тун кисö лэптöмöн усьö пидзöс вылас Павел водзö. Зон петкöдлö авъялунсö («Кодi водзсасьны оз вермы, ме ог керав сылысь юр») да шошаöдыс тойыштö Тунöс öдзöс сайö, тошсö сюйö вöнь саяс. Шуда мездысьлöн кыпыд сьыланкывйöн спектакльыс помасьö.
Тайö мойдсö Сыктывкарын мöдысь ворсiсны 1940 вося июнь 27 лунö олимпиадаын вермысьясöс пасйигöн. Аня Беляеваöс жюри шуис медбур вор- сысьöн да вöзйис велöдчыны артистö. Збыльмис-ö вöзйöмыс, ми ог на тöдöй...
Художествоа олимпиадаын вермысьяс пöвстын вöлiны и сьылысь Валя Кулакова да гитараöн ворсысь Доля Анисимов. Нывсö регыд босьтiсны Абъячойса колхознöй, зонсö — республикаса театрö. А Кекурысь мöд классö вуджöм детинка сюрс видзöдысьлöн син водзын зэв лöсььда лыддис кывбур. Челядь пöся клопайтiсны сылы да гораа ошкисны, а жюри вичмöдiс дона козин. Колис кад, и зонкаыс лои нималана гижысьöн. Олимпиада йылысь да сiйö кад йывсьыс Пётр Шахов казьтылö «Лöз патефон» небöгын.
Коми му. – 2011. – 14 мая
