Перейти к разделу.
Жугыль, кыпыд, вильыш
Юсь чужöмсянь 120 во тырöм водзвылын ми таво йöзöдлiм нин сы йылысь куим гижöд: “Велöдiс комиöс, югдöдiс юр” (кос му-апрель 12 лунö), “Син водзас пыр вöлiсны дзоляяс” (ода кора-май" 17 лунö) да “Артмылöма сылöн и роч вылысь” (сора- июль 15 лунö).
Талун сёрнисö нуöдам водзö. Казьтыштам М. Лебедевöс кыдзи сьылан-кывъяс лöсьöдлысьöс.
МИХАИЛ НИКОЛАЕВИЧЛÖН творчествоын и тайö вожыс тырвыйö паськыд. Позьö шуны, коминас гижны босьтчöмсянь ciйö корсялiс сэтшöмторъяс, мый сэки позьö вöлi шуны коми ногаöн ли мый ли: вомöн ворсöм улö, кокöн топйöдлöм либö восьлас улö шуавны. Сэтшöмöсь öд "Коми збойлуныс” (а тайö 1913 во на!), сэсся сы ног кымын жö роч вылысь артмöм “Смелджыка, вокъясöй, ветлöй” маршыс, “Коми му” (воддза вариантсö гижлöма 1918 воö) да мукöдтор. Опереткаясыс драматическöй поэмаяс быттьö, а музыкааöсь.
И тайö дасöд-кызьöд воясад колiс дай медся лöсялiс: сэки кызвынсö гра- мотатöм йöзыдлы сьылана либö восьлас улö шуаланторйыд (маршыд) кокниджыка паметяс колис. Та понда М.Лебедевлы лои пырджык тайöс тöд вылас кутны, а сiдзкö, “сьыланаджык” поэтöн и лоны. А тайöс тай йöзыд пельнаныс öдйö кыйöны,. Код тöдас, чайтлiс-ö Юсь, ыштö “Тун” опереткаысь Сашуклöн шог сьылöмыс коркö лоас коми йöзкостса сьыланкывйöн. А лоис! Сöмын сьыланкывйыдлöн аслас закон—сiйö оз овлы частушка кодь дженьыдöн либо вывтi кузьöн. И “Бур батькöд-мамкöд олöм” йöз костын шылялöм-ладмöм сьыланкыв лои Сашуклы вылö Юсьöн гижöмысь дженьыдджык. Сiйöс быттьöкö тшöтшкöртыштöмаöсь да топöдыштöмаöсь нывлöн прöщайтчан кывъяс вылас:
Me кула, кыдзи кулö,
Кöрт садöк пиын кай.
Бать-мамöй, муса зонмöй,
Прöщай, прöщай, прöщай.
Позьö вайöдны М.Н.Лебедевлысь дас кымын кывбур, кодъясöс зэв важысянь нин сюялöны песенникъясö да пасйöны: “Сьыланногыс йöзкостса”. Дерт, овлö и кутшöмкö да композиторлöн “обработка” йылысь пасйöд, но ме ог тöд, колiс-ö татшöмторйыс, шуам, “Кутшöм шоныд да лöнь” сьыланкыв дiнö? Буракö, ciйö нинöм вöчтöг сiдз войся ю мозыс шлывгö-визувтö, ззысь моз ачыс киссьö. Чайтсьö, и öнi на танi нинöмла выльысь йöзöдны кывъяссö сэтшöм сьыланъяслысь, кыдзи кык казьтылöмыс нин, сэсся “Пукала кöть ветлöдла”, “Мыйла нö, шондiöй, вöр сайö лэччöмыд..,”, “Олiс-вылiс вöрын...” Найöс важ ног тöдöны да сьылöны. Сэсся öд тшöкыда нимлунъяс да юбилейяс дырйи йöзсö чолöмалiгöн корöны сетны радейтанаторсö радио пыр, торйöн нин сьылöны кö Валентина Есева коддьöм. Коми радиоын Юсьлысь öткымын сьылантор видзöны некымын плёнка вылын, разнöй кадö, разнöй гöлöсöн гижöмаöн. Сöмын “Зарни чикыш” (танi сьыланногыс абу нин “йöзкостса”—Вацлав Мастеницалöн) гижлöмаöсь нёльысь: кыкысьсö сьыл В.Есева, коймöдысь З.Мерцалова, нёльöдысь Т.Каракчиева.
Мукöд сьыланкывсö вöчлöмаöсь да плёнка вылö гижлöмаöсь комиöн и рочöн. Тадзи артмöма Юсьлöн Александр Осиповкöд тэчöм “Видз вылын” да “На лугу”, “Зыбкадорса сьыланкыв” да “Колыбельная”.
Колбö шуны, Михаил Лебедев-поэтöс роч вылö, öнiя миян “ловъя классикъяс” серти кö, вуджöдлiсны ёна этша. А босьтчылöмаöсь кö вуджöдны, то, ритмика сертиыс либö нöшта мыйлакö, пырджык бöрйылöмаöсь буретш сьыланкывъяссö. Со киö босьтi 1981 воö Сыктывкарын лэдзлöм “Антология коми поэзии”. Сэтчö сюйöмаöсь Михаил Николаевичлысь сизим гижöд, сы лыдысь витыс—сьылан.
На пиысь унаöн ньöжмыдöсь, жугыль-шог руаöсь. Но Лебедев кужö морттö и шогö уськöдлыны, и сыысь пальöдны шмоньöн и серамöн. Ме чайта, сылöн медбур кыпыд гижöдъяс лыдысь -
Олiс – вылiс вöрын…
Олiс-вылiс вöрын, олiс-вылiс ягын,
Эжва дорын удал зон.
Аттö дивö-дивö, аттö ыджыд дивö,
Эжва дорын удал зон.
Усъяс сылöн лöсьыд, кудритчöма юрси,
Ачыс вöлi збой да сюсь.
Аттö дивö-дивö, аттö ыджыд диво...
И ciдз водзö. А сэсся:
Гортö локтic удал зон.
Аттö дивö-дивö, аттö ыджыд дивö,
Гортö локтiс удал зон.
Руч пыддиыс кыйис, руч пыддиыс вайис
Аслыс муса мича ныв.
Син водзад ciдз и сувтö ачыс ус пыр шпыньялысь поэтыс, кор кывзан либö мед кöть лыддян сэтшöм сьыланкыв, кыдзи “Ловъя юрöн мынтöмтор” (сылöн эм и “Öлiс-вылiс сямтöм баба” мöд ним). Либö “Алимент-частушкаяссö”— Юсьлысь, гашкö, медся вильыш гижöдсö.
Г. ДЁМИН
Коми му. – 1997. - 25 сентября
