Перейти к разделу.

 

Михаил Николаевич Лебедевлы - 130

 

Геннадий БЕЛЯЕВ

Коми му кузя тэ муна
Андрей Цембер вöлöма коми фольклор корсьöм-тöдмалöмын эжа лэптысь-косялысьöн. Дерт, коми мойдъяс да сьыланъяс войвылын, Печора ковтысын, чукöртлöмаöсь и сыöдз на. Но öдвакö Сыктывдiн карса коми нисьö роч (чекистъяс вылö арталöм öти документын шусьö и еврейöн) том учитель мыйкö уна тöдiс на йылысь. Сылы лоöма исследовательлысь туйсö писькöдны ёнджыка аслыс. 1901 восянь пö ме чукöрта Лöкчим вожысь фольклор. Окотапырысь, ыджыд интересöн отсасьöма Вихманлы, кор сiйö волiс миян муö. Нёль адрес кузя, нёль учёнöйлы, ысталöма уна мойд да сьылан.
Сэсся воöма сэтшöм мöвпöдз, мый колö уджавны оз сöмын мукöд вылö, а тшöтш писькöдчыны аслыс. Аслыс вылö и босьтчö чукöртны фольклорсö. Ми тöдам: 1913 воö Сыктывдiн карын Андрей Андреевич лэдзö «Коми мойдан кывъяс». Сборникас сюйöма дас вит гижöд — тайö прозаа да ас ногыс лыддьöдлана гижöдъяс. Найöс кывзöмаöсь да пасъялöмаöсь 1909—1912 воясö. Водзкывсö («водзыншуанторсö») Цембер гижöма 1912 воын. Колö кутны тöд вылын, мый сборник лöсьöдысь быдмис зыряна пöвстын. Öти-кö, ичöтик Сыктывдiныд (чиновникъясысь öтдор) вöлiс: нач коми карöн. Матiгöгöрса челедь ставныс комиöсь, а медся нин, гашкö, тöдчис сiйö, мый коми пöвстысь вöлöмаöсь пöчыс, мамыс, сэсся и гöтырыс. Содтöд на, Цемберъяс овмöдö- маöсь ас орданыс кутшöмкö синтöм корысь нывкаöс, кодлы детинка отсасьöма чорзьöм няньсö корны-чукöртны. Сыкöд да сы дырйи став сёрниыс, дерт, тшöтш коми.
Олöмыс да уджыс Цемберъясöс матыстöма сиктъясын олысь Лебедевъяскöд. Кыкнан семьяыс — вöлöсьтъясса писарлöн либö писарлы отсасьысьлöн семьяяс. Андрей да Михаил кузь нэм кежлö лоöны зэв матысса ёртъясöн дай другъясöн. Найö и арлыднас матысöсь, М.Лебедев куим да джын арöсöн томджык. Сiйö и шуöма коркö Андрей Андреевичлы, тэ пö польскöй еврей да овыд, стöча кö, Цербер. Та йылысь, чайта, Лебедев кывлiс батьясыслöн сёрниысь. А.Цембер пасйöма М.Лебедевлысь кывъяссö дневникас, но паныд кыв абу шулöма ни абу гижлöма. Гаш­кö, сiдзи и эм пö, Лебедев-батьлы кö тадзи висьтасьöма Цембер- зять.
Михаил Николаевич Лебедев кöть кыдзи, а быть лоис эськö Юсьöн, коми поэтöн. Став олöмыс дасьтiс да сетiс сылы тшук тайö туйсö. Лыддьысьысь тöдö, мый первойсö Лебедев, гашкö, абу öти дас псевдонима роч прозаик. Гижан уджнас сiйö висьмöма 13 арöссянь кымын. И вöчö зэв уна. Оз сöмын очерк, висьт, повесьт — весиг роман панö. Перо увсьыс петöм гижöдъясысь кызвыныс кöть дыр на оз воны газет-журналъясöдз да книгаöдз, юрыс öд уджалö. А сiдз кö, то и мыйкö «кисьмö» татшöм мортыдлöн. Ёна лыддьысьöмöн, роч гижысьяскöд да редакцияяскöд письмöасьöмöн, бумага вылын (кыв, сюжет, стиль, композиция-тэчас) мырсьöмöн том морт аслыс восьтö зэв унатор. Но öд сiйö олö коми сиктъясын, коми йöз пöвстын. А тайö казявтöг чужтö мöвп налы комиöн жö и гижны. Коркö 1894—1896 воясö Лебедев босьтчылöманин коминас гижны. Кыдз шуöны, кисö видлöма нин. Неыджыд блокнотын («Памятная книжка») карандашöн посньыдика гижöма некымын кывбур не кывбур, а комиöн асьсö, ассьыс вын-сямсö видлöма, кöть велöдчыны сэки некысь да некодлысь вöлi. Куратов, кöть Клочков, кöть П. Распутин колисны рöдня ордас сöмын рукописьясын на... На йылысь этша кодi и тöдiс. Вöлöсьтса писарлы ковмис лоны коми литератураын эжа лэптысьöн..       Тöлкуйтны ко коми литератураö писар Лебедев пилöн воöм йылысь — быть колö да лоö висьтавны и А.Цембер йылысь. Сiйö кыскö томджык ёртсö öтувъя уджö сэк нин, кор мöвпыштас лэдзны коми мойдъяссö да сьыланкывъяссö книгаясöн. Тшöктö чукöртны йöз костын чужöм-шылялöм татшöм произве- дениеяссö и тшöтш гижны ассьыс сьылан-виршъяс! Талы воча шуам: татшöм коланлунсö Лебедев, вöлöмкö, ачыс нин кылö (ог вунöдöй кöть «памятнöй книжкаас» карандашöн гижышталöм-рифмуйтышталöм строкаяссö). И колö чайтны, босьтчылiс: коми виршъяссö тэчны эз öтчыд. Ми öд ог тöдöй, мый на вермис содтöд кольны архивö, а мый эз веськав сэтчö Лебедевлöн бумагаясысь. И кутшöм бур, мый буретш сэки воöмаöсь Андрей Цемберлöн ышöдана письмöяс. Дай аддзысьлывлöмны найö абу шоча. 1913 вося тулысын (тыдалö, апрельын) Лебедев ыстö карса бур ёртыслы письмöтор да öти коми гижöд. Тайö Ыджыд лун водзын: Цембер вочавидзö «Воистину воскресе» кывъяссянь заводитöмöн, а гижö сiйö апрель 19 (май 2 либö) лунö. Чолöма кывъяс бöрас Цемберлысь лыддям со мый: «Благодарю также за зы­рянское стихотворение «Ытшкандыр». По-моему, написано хо­рошо. Лучше при настоящих условиях не написать никому». Водзö юöртö, оз кö пö мен ковмы мунны Сыктывдiнысь, видла лэдзны мöд сборник зырянскöй йöзкостса произведениеясысь. И сэтчö сюям кывбуртö. Сэсся — надейтча пö нöшта некымын зырянскöй сьыланкыв вылö, да бур эськö вöлi, тшöтш кö мойдъястö гижин зырянскöйöн. Водзö — А. А.Цемберлöн шань кывъясыс, М.Н.Лебедевлы найö некыдзи эз вöвны сэки лишнöйöсь, весиг и зэв на коланаöсь, чайта. Поляк, еврей да роч сора коми вира морт гижö, нинöмла пö сетны зырянскöй кывйыслы вошны, колö сiйöс вöчны этша лыда войтырлöн литературнöй кывйöн. Таысь пö коркö, дыр мысти, казьтыласны миянöс бур ногöн.
1914 воö мöд сборникыс «Коми мойдан да сьылан кывъяс» нимöн петö. Коми литература туй вылын тайö верстöвöй сюръя! Весьшöрö сiйöс оз зэв донъявны, öд сэнi 17 авторскöй гижöд! Печатяс та мындаыс некор на абу вöлöма. Дас кывбурыс дереваннöйса поп. Госдумаса депутат Дмитрий Поповлöн (интереснö, мый ставсö найöс Дмитрий Яковлевич гижöма депутаталiгас: быд кывбур улын «Питир», 1914 вося апрель 7 лунсянь апрель 25 лунöдз). Д.Я.Попов, быдтор серти, зэв тöлка морт, унатор вылö сямыс вöлöма. А вот мыйла поэзияыс сöмын öти тöлысь джынся?.. Дерт, сэсся воис сэтшöм кад, мый поп-комиссар веськалiс быттьö вабергачö. Колö чайтны, коркö-некоркö век жö гижавлiс; на и кывбуръяс, но найö вошисны сiйö жö вабергачас.
Эз öтчыд и мöдысь ковмыв мен лыддьывны, мый тайö 1914 вося сборникас М.Н.Лебедевлöн петiс 8 кывбур. Кодкö коркö со тадзи индывлöма, книгасö, буди, восьтывтöг, а сэсся тайö туйöдыс и мукöд туялысьяс исковтöмаöсь. Öд мыйла книгасö кытыськö корсьлыны да аслад синмöн видзöдлыны! Бара, ог нин медводдзаысь, кöсъя выль лыддьысьысьясöс öлöдны: кöкъямыс кывбурыс сöмын юриндалысяс, а пытшкöсас — сизим! Тыдалö, книгасö вурыштöм (брошируйтöм) бöрын нин цензура ли асьныс лэдзысьясыс нетшыштöмаöсь, но «Коньöр морт» эм сöмын юриндалысяс, а ас местаас абу!
1914 вося «Коми мойдан да сьылан кывъясын» кöрткерöсса авторлöн петöмаöсь:
Ыджыд чери да ичöт чери»,
«Коми збойлун» («сбой лун»),
«Ытшкандыр»,
«Тулыс»,
«Пöльлöн сьыланкыв»,
«Мича ныв»,
«Озыр морт, купеч морт».
Кык бöръяыслöн мотивъясыс сэсся казялана тöдчасны «Мича ныв» опереткаын (1919 во). Тайö гижöдъясыс лыддьысьысьлы вель тöдсаöсь. А вот кыдзи-кор чужöма «Ыджыд воля» кывбур, ме шуны ог вермы. Юсьлöн некутшöм изданиеö, тыдалö, абу веськавлöма. Гижöма явö коми анбур да шрифт лöсьöдтöдз. Гижöдыс сюри «Зырянская жизнь» газетысь, 1918 во, ноябр 8 лун. Но позьö на чайтны, мый лöсьöдлöма коркö 1912—1913 воясö жö, кор Лебедевöс босьтчöдлiсны (А.Маегов да А.Цембер медводз) коми гижöдö. Со тайö кывъясыс. Орфографиясö лои тöдчымöн вежöма öнiя серти.
Скобкаын моз кöть колö быть тöдчöдны, мый миян öнiя гижанног-орфографияыд шедöма зэв на и абу кокниа. Талунъя синлы кö, весиг посниторъясын öти кывйö волöмаöсь (вайöдöмаöсь!) кузь зыка венъяс пыр. Примерыс вель уна. Со нач öти: «Илля Вась да Сандрö Васьö кост Мöскуаын лыбöма венöм дефисъяс йылысь»,— гижö Н.Жугыль Тима Веньлы. А öд тайö письмöыс 1929 вося. Со кутшöм дыр вензьöмаöсь! Öнi колö шуны: и мед, öд гижöд кывсö кодсюрö босьтчылöмаöсь дефиснас веськыда шутны.
М.Лебедев — писатель-художник, и вöр вылас видзöдö оз
куш кыдзи кер пöрöдан-кылöдан, пилитан да вузалан озырлун вылö. Художниклы пармаыд мöдторйöн дона — лолыдлы колана, духовнöй, морт ловтö сöстöммöдысь-кыпöдысь да миян чужан муö вужйöдысь. Та вöсна, гашкö, Лебедев и коми-зыряна мусö гижö ичöт шыпассянь. Сiйö танi чужанiн вылас видзöдö оз кыдзи административнöй ли географическöй ним вылö. Шуи тай, «Комиыс» абу административнöй — национальнöй вежöртас.
Дас куим арöсöн пö босьтчи, и медбöръя лунъясöдзыс гижö. Öткымынтор петöма сэк, кор поэтыс эз нин вöв! Шуам, «Зарни чикыш» йöзöдiсны кулöм бöрас матö кык во мысти. Юсьысь öтдор öдвакö кодкö вермас ошйысьны, ыштö сылöн сы мында гижöд коми йöз пöвстас. Me шуа музыкатöм кывбуръяс йылысь. Найö лоисны сьыланъясöн композитортöг (гашкö, сöмын «Зар­ни чикыш» да содтöд öткымын вылö гижлöмаöсь музыкатö, но кöнi öнi сiйö?!).
Юсьлöн гижан бордйыс «ёсь пеля» вöлöма да кылöма, мый комиясыслы оз тырмы, мый колö. Вунас мöй, кыдзи сыктывса Рай грездын ичöтик детсадйын олiм. Елена Петровна, миян вос­питательница, лэччöдö джуджыд гöра йывсяньыс Визин ю дорö. Купайтчыны! А миянлы, буракö, вöлi 4—5 арöсöн (1944—1946 воясас кö-а). И ми горув восьлалам да мый вермам горш тырöн сьылам. Чайта, воспитательница сьылöдiс ставсö сöмын Юсьлысь. Гöгöрвоана жö: сэки «эз вöвны» Нёбдiнса Виттор ни мукöд. А Виттортö миян некодысь повтöг пыр сьылiсны.
Ми олiм-быдмим Райсянь верст сайын пуксьöм нöшта на ичöтик грездын. Колхозад сöнъяссö орйöдлытöдз пессьысь мамъяс, локтöм фронтовикъяс — кодi сой пöла, кодi кок пöла либö куснясьтöм кос кока таркöдö чуньяснас пызанö либо зымöдö протезнас джоджö, да сьылöны. И кывзан да шензян, кутшöм мичаа, гöлöсъяссö вежлалöмöн сьывлiсны!
Ставныс мöдар югыдö муналiсны: кодi ранаяссьыс, кодi арлыд сертиыс. Грезднымöс быттьö чышкыштiсны.
А сьылiм Лебедев-Юсьтö, ёна сьылiм пöрысь и дзоля!
Бöръяысьсö Юсь гу вылын ме вöлi дас во сайын. Сёрнитiсны, кыдзи кольöма паметьö, литература туялысь венгр Петер Домокош, коми гижысьяс, мыйкö и ме тшöтш. А пожöмъяс весьтас лэбалiсны чикышъяс. Гашкö, тшöтш сiйö зарни чикышыс, код йылысь Михаил Николаевичлбн кывбурыс вöлi петöма 1933 воö нин.
Таво тай бара корöны Кöрткерöсас. Вермам кö!
Мед кöрткерöсса джуджыд керöсас лэбалöны чикышъяс.
Ыджыд воля
Кыдзи тэ, гöль мортöй,
Саръяс дырйи олiн?
Кыдзи станöвöйысь, земскöйысь тэ полiн?—
«Öмöля, бур вокöй,
Сар дырйи ме олi,
Быдсяма лёк понйысь
Зэв ме ёна полi
Земскöй вöлi локтас,
Оз и сёрнит бурöн,
Мужикöс век кöсйö
Сёйны ловъя юрöн.
Воас станöвöйыс,
Сабляясöн грымгö,
Мышкуас гöль мортлы
Кулакъясöн гымгö.
Стражник да урадник
Лолыштны оз сетны,
Видзöдöны толькö
Балябöжö лöдны.
Лесник да объездщик...»
(и с.в.)
Кывбурыс артмöма кузь. Водзö Михаил Лебедевлöн перö улысь петöны пыр смелджык строкаяс. «Гажаджык, коми йöз, олöй, Шогсьыны, бöрдны оз ков». Шогсö пö мед нуалас тöв,— тайö öд 1913 во на, кор коми поэзиянас чуксалö буретш зыряна- крестьянаöс:
Збойджыка, вокъясöй, ветлöй,
Миянöс аддзасны мед!
Кутам ми смелджыка овны.
Миянлы шог — абу шог.
Дугдам ми лёк йöзысь повны —
Лёк вылö асьным ми лёк!
Кыпыдджыкатö шочакодь на артмывлiс сэки...
Николай Павлович Лебедевлöн, межадорса писарлöн, чужие питор. Зэв бур. Но тайö вöлöсьтас тай сöмын тöдсаясыс эз на лоны. Неважöн на тайö сиктас веськалiс: Лебедевыд. Курыдтортö вöлöм радейтö, сэсся и кывйыс каличтöм, кор юыштас. Начальствоыдлы воча пыр мыйкö и гальснитас. Уджаланiнтö лоö часто вежлавны. А тöдсаясыд кö абуöсь гозъялöн выль сиктад, кодi и вежаялас-вежанялас? Вежанявнытö, шуам, позяс Апполи- нариялöн ичöт чойыслы, Лиялы. Буретш тай гöститö, Нювчимсьыс воöма. Абу эськö гöститны, а Поляыс медбöръя лун-войтö сьöкыда нин вермöдчö да мамыс ыстöма. Отсыштан пö. А вежаявнысö кодöс чукöстан тöдтöм йöзсьыд? Гашкö...

1. Отеч Михаил, позянаöн öд лыддьыссьö, лоан кö менам выль олысьыслы вежа батьöн? Попыд сöглас лоö. И пыртасны Межадорса вичкоын 1877 воас 21-öд детинкаöн нин тайö кöдздöдан йирым тöлысяс чужан аскиас: сэсся коркö, нелямын да джын во мысти, сiйö кадпассö вештасны 12 лун вылö водзö.
2. Нимсö но бöрйöма?
3. Вежайыслысь пуктам дай. Микайлö Николаев мед лоö. Псаломщик дзуртышталö перöнас, тэрмасьтöг гижö кыз вичко книгаö. Чужан лун весьтас пуктö «10», сэсся — «Сего — от уезда, Корткеросскаго Успенскаго погоста крестьянинъ Ни­колай Павлов Лебедевъ и Законная жена его Аполянария Пав­лова, оба православ. вероисповед. Восприемники — Приходской священникъ Михаил Поповъ, Нювчимскаго завода временно- обязаннаго крестьянина Павла Васильева дочь девица Евлалия», Аполлинариялöн ичöт чойыс.

Николай Павловичöдз кывсььлiс нин, да бара юрас воис: отеч

Михаил Константиновичыс пö чуклöмса священник жö, Кон­стантин Поповлöн да сылöн гöтыр Антониналöн пи. Верöс саяс петтöдз Антонинаыс вöлöма Куратоваöн. Танi, Межадорас, сылöн Афанасий вокыс и попавлöма, кытчöдз вежöрнас абу торксьöма. Толка морт пö вöлöма, абу дышöдчылöма крестьяна пиянтö грамотаö велöдны, да вот тай... Вок сикас важысянь бура кывсьöны. Öнi на висьталöны, медiчöтыс пö виршъяс гижавлöма. И тайö вок ордас абу öтчыд волöма, да томöн тай кулöма нин во-мöд сайын кöнкö йöз муясын. Семинарияысь жö эськö петöма пö, а попалöмсьыд кöдзöдчöма öтнас вок сикас- ысь. Учителялöма, сэсся водзö на велöдчöма да, шуöны, кутшöмкö ыджыд военнöй чинöдз воöма.
«Кыдзи вот эталöн, купеляс тольснитлöмысь каньгысь-нявзысьыслöн, олöмыс пуксяс?— думыштчис Николай Павлович выль олысь йывсьыс.— Да öд мый верман водзö вылö шуны. Асьсö на со, 21 арöсаöс, военной служба виччысьö». ...Колясны вояс. Пиыслы, грамотаад писькöс детинкалы, тшöтш писар туй югзьö. Дерт, велöдны кö школаясад бурджыка эськö. Но кнсюрö да кыдзсюрö олiг-служитiгад кысь бура дыртö велöдчыны. Мишасö удайтчис дзик öти во кежлö сетлыны Сыктывдiн карö. Сэсся мынтысяна-бокын вердана наукалы та вылын лои шабаш.
А зонкасö кыскö книга-журнал: батьыслöн служитан вöлöсьт правленньöясса став литературасö лыддьö. Челядьдырсянь пö зыртчи вöлöсьт правленньöясад, шуас ачыс коркö дыр мысти. Сэнi и став «наукаыс», батьыс тшöтш «туйдöма» чунь рöчнас зутшйöдлöмöн. А сэсся быдтор ачыс, быдтор ачыс. И гижис М.Н.Лебедев зэв дыр.
Миян Рай грезд да ичöтик Кычаныб грезд öтвылысь и шусисны «Трактор» колхозöн. Сылöн вöлi чача кодь лöсьыдик, но кык судта правленньö. Сэнi и миян клубасисны. Дерт, клубыс вöлi жö, но сэтчö ми гежöда ветлывлiм — ылынджык. Вот тайö ичöтик правленньöас миян том йöз, 6-7 класса школьникъяс, ворсiсны Лебедевлысь «Мича нывсö». Слава вокöй менам вöлi куделя тошка озыр пöрысь жöникöн. А ме — джоджсяньыс видзöдысь. Сэки, буракö, медводдза во велöдчи. Йöзыс вöлi тыр!
Павел Александрович Безносов да Егор Михайлович Семенчин висьтасьлiсны мен, кыдзи Визинса шöр школаысь найöс бура велöдчöмысь да самодеятельностяс бура ворсöмысь лэччöдлöмабсь карбдз, мед сэнi ворсасны Михаил Лебедевлысь «Тун» опереткасö. Овмöдiсны пö миянöс «Север» гостиницаö, и миянкöд öти номерын олiс дзормысь нин мужичöй: тошкыс вожа, öти джынйыс дзор, мöдыс абу на... Ми пö шпыннялам. А мортыс этша сёрниа, весиг зумыш. Бöрынджык пö тöдмалiм, мый тайö и эм «Туныдлöн» авторыс! ...Уна гижлiс Юсь-Лебедев. Эз ставсö öтмоза. Вöлöма бурджыкыс и слабджыкыс. Быдöнлöн тай сiдз. Кöрткерöсса поэт колис коми литератураын ассьыс паськыд туй.

 

Корткеросская Центральная библиотека им. М.Н. Лебедева. 2014 год.
Республика Коми, Корткеросский район, с. Корткерос, ул. Советская дом 187, lebedevlib@mail,ru
8(82136) 9-24-80. 9-98-16.