Перейти к разделу.
Гöтыр йылысь казьтылöм
Агния Сухановалöн чужöмсянь 124 во
Агния Андреевна Сухановаöс гуалöм бöрын кык тöлысъ мысти, 1925 вося йирым 20 лунö, Сыктывкарын вöлi нуöдöма сiйöс казьтылан рыт. Сёрнитiсны рöдвужыс, велöдысъяс, гижысъяс. Сёрниыс помасис кывкöртöдöн: чукöртны сылысъ гижддъяссö, туявны олöм-вылöмсö, медым тайö шондi югöр кодь аньыс некор оз вушйы вежöрысь. Тайö кывъяссö медводз олöмö пöртысьöн вöлi Иван Александрович Суханов. Гöтырыслысъ олан туйвизьсö, уджсö сiйö бура тöдöма да тырвыйö югзьöдöма, но ассьыс гижöдсö абу кырымалöма.
Сыктывкарса архивын эм кык торъя фонд. Öтиас - Агния Сухановалöн серпаса гижöдъяс да сы йылысь казьтылöмъяс, мöдас - Сöвет кадся чина морт Иван Александрович Сухановлöн кабалаяс. Меным ковмис öтлаавны Сухановлысь гижан серсö да Суханова йылысь кырымпастöм гижöдсö. Лои гöгöрвоана: ассьыс да гöтырыслысь биографиясö гижöма öти морт - И.А. Суханов. Ас йывсьыс гижöма рочöн, а аслас меддона да медмуса морт йылысь - комиöн.
Йöзöдам И.А. Сухановлöн гöтыр йывсьыс казьтылöмъяссö. «Агния Андреевна Даныцикова велöдчыны заводитöма Вомынса школаын. Бура вöлöм велалö да, начальнöй школа бöрын сетöмаöсь Сыктывкарса прогимназияö. Сылöн батьыс вöлöма Земской Управаса членöн, пырджык карын олöма да, школаад кокниджык вöлi инавны.
Прогимназия помалöм бöрын, 1902 воын, Агния Андреевнаöс индöмаöсь велöдысьлы отсасьысьöн Ручса школаö. Мöд вонас ыстöмаöсь Волся вöлöсьтысь вуджис 1907 вося арын Пöддельнöй вöлöсьтö, Нöвикса школаö (сiйö буретш арнас воссис). Велöдiс сэнi 1915 воöдз. Сэсся 5 во уджалiс Кöрткерöсса школаын.
1920 воын Агния Сухановаöс ыстылiсны УОНО-сянь Устюгö политпросвет курс вылö, арнас корисны Сыктывкарö - уджавны библиотекаын инструкторöн. Сiйö тöвнас на окотитiс вуджны УОНО бердса нацмен юкöнö, коми небöгъяс лöсьöдан удж вылö. Taнi сiйö и зiлис кувтöдзыс (кувсис 1925 вося кöч (сентябрь) 13 лунö).
Гоз-мöд кыв тöдчöда Агния Андреевналöн удж йылысь. 17 воöн А.А. Сухановалöн ки пыр вель уна челядь мунic. Сiйö велöдiс школаын зэв кужöмöн. Уджалiс сьöлöмсяньыс, эз сöмын урокъяс вылын - расписание серти, шоч рыт коллявлiс челядьтöг. Öти рытö велавтöмджык челядькöд мырсьö, мукöд рытö лöсьöдчöны школаса кутшöмсюрö праздник кежлö либö нывкаяскöд вурсьыны-вышивайтчыны велöдчöны - тадзи и унджык рытыс кольлывлiс воысь воö. Челядькöд ciйö вöлi зэв мелi. Эз эновтчыв Агния Андреевна и школа помалысьясысь. Бурджык велöдчысьяс пиысь унаöс мöдöдiс водзö велöдчыны. Бать-мамыс кö оз лэдзны, некымынысь ветлас на дiнö, мырдöн сорöн мукöдсö гортсьыс кыскас да мöдöдас гырысьджык школаясö. Революцияöдзыд öд грездъяссьыд ёна этшаöн вöлi веськалöны карса школаясад. Сэсся Агния Андреевна школаад пырджык вöлi коми кывйö сетчö, та вöсна челядьыд кокниджыка сы дiнö сибöдчисны. 1905 вося революцияыд уна том йöзлысь восьтiс синсö, олöм йывсьыс мöвпалöмсö бергöдiс веськыд туй вылö. Уна выльтор тöдмалiсны сэки том войтыр. Водзын гырысь школаясад öд зэв этша бурторсö сетлiсны том йöзлы. Сöмын аслад велöдчöмöн, лыддьысьöмöн позьö вöлi тöдмавны пыдöджык олöмсö. Агния Суханова небöгъяс лыддьыны вöлi зэв зiль. Революцияыд выль небöгъяс да ыстöм революционеръяс пыр индiс аньлы грездад уджалан туйсö. Школаын удж кындзи, лои и мукöд мог. Медъёна сетчис сiйö нывбабаяскöд да вина юöмкöд водзсасян уджö. Вывтi мустöмöсь сылы вöлiны вина юысьясыд. Уна рыт Нöвикса нывбабаяс коллявлiсны Агния Андреевна ордын печкöмöн да вурсьöмöн, кывзiсны сылысь нывбабалысь сир курыд олöм кокньöдöм йылысь висьталöмсö. Татшöм уджтö сэки оз позь вöлi ёна йöзöдöмöн вöчны - cap правительстволöн и сиктъясад вöлiны ёсь синма видзöдысьяс да ёсь пеля кывзысьяс. Гоз-мöдысъ вöлi поп гижлöма инспекторлы царскöй лунö велöдöм да мукöдтор йылысь. Öти пöрйö инспектор вöлi грöзитöма чöвтны велодöмысь. Старшинакöд вензьöмысь, код юрöн вöлi локтöма да, ань судö веськавлiс, мыждылiсны да сэсся кыдзкö мездiсны.
Эз вунöд Агния Андреевна и ассьыс этша вёлöдчöмсö. Пыр вöлi шогсьö-элясьö ыджыд школаö веськавтöм вылö. Карас сэки гимназияыд эз на вöв, а сэнi велöдчытöг эз позь веськавны и высшöй школаö. Та вöсна сiйö ёна вöлi зiльö лыддьыны олöм тöдмалан небöгъяс - мый эз сет школаыд, корсис небöгъясысь. Ветлiс кыкысь-куимысъ курсъяс вылö Питерö. Кытысь позьö вöлi тöдмавны выльтор велöдöм, олöм кыпöдöм йылысь - сэтшöминад сьöлöмсяньыс мунлiс.
Октябрса революция восьтiс паськыд туй велöдчöм йöзлы мунны пемыд, велöдчытöм коми крестьянин дiнö сiйöс югдöдöм, кыпöдöм могысь. Революция быд ас кывъя йöзлы сетiс право ас кывйöн велöдчыны, кыпöд-
ны культура. Тайö уджас медся ёна и сетчис Агния Андреевна. 1918 воын Кöрткерöсын сiйö медвойдöр лöсьöдiс коми спектакльяс. Медводз коми кыв вылö лöсьöдi крестьяналöн олöмысь «Весёлые дни» пьеса. Сэсся Островскийлысь кык-куим пьеса («Бедность не порок», «Не так живи, как хочется» да мукöд) артельöн (велöдысь чукöр) коми кывйöн лöсьöдiсны. Ставсö ворсöма вöлi. Ворснысö зiлiсны тшöтш Кöрткерöсса том йöз. Тайö уджсö Агния Андреевна нуöдiс коми кыв кыпöдöм могысь.
Сiйö воясö Сыктывкарын, УОНО бердын, заводитiс уджавны коми велöдчан небöгъяс лöсьöдан комиссия. Сэнi пöшти гожöм шöрöдзыс уджалiс и А.А. Суханова. Уджалiс эськö и водзö, но гортас (Кöрткерöсö), нылыс висьмöма да, лоöма кайны. Комиссияас лöсьöдiсны коми кыв вылын школаясö медводдза лыддьысян небöгъяс. Сöмын найö петiсны во-мöд мысти на.
Комиссияын уджысь кындзи, Агния Андреевна мукöд велöдыськöд ветлiс Емдiнö коми котырлöн чукöртчылöм вылö. 1920 воын уджалiс губернскöй коми съезд вылын.
1920 воын, арнас, Агния Андреевнаöс вуджöдiсны уджавны Сыктывкарö. Индiсны эськö библиотекаö инструкторöн, но аньöс ёнджыка, кыскис комиöдчан уджö да вуджис нацмен юкöнö, мыйöн сiйö воссис. Сэки ёна лои уджавны. Дерт, сiйö эз öтнас уджав. Йöзыс вель уна вöлi. Но öд и уджыс вöлi тырмымöн. Коми кывнад муртса на заводитiсны лöсьöдны гижанторъястö. Небöгъястö колö вöлi регыдöн лэдзны, уна пöлöсöс. Дась гижöмыд абу, ставсö сэнi жö лои войтырыслы лосьöдлыны, кокниджык уджöн вель на эськö дыр небöгъясыд эз артмыны. Ёна уджалöмыд да омöля еёйöм-юöмыд (буретш тшыг вояс вöлiны) слабиник морттö вешiсны. 1923 воын Агния Андреевна висьмис туберкулёзöн. 1924 воын, гожöмнас, ветлiс бурдöдчыны Пöддельнöйса санаторийö. Неуна кокньöдöм бöрын уджсьыд бара на эз эновтчы. 1925 воын, тöвнас, бара висьöмыд öддзис. Тулыссяньыс бара мунiс бурдöдчыны Башкирияö, сöмын висьöмыд, ёна нин öддзöма да, ёна шоныдiнад дзикöдз личкöма. Сэсянь докторъяс индöмаöсь мунны кокньöд корсьны Мöскуаö. Сэнi нöшта на тöлысь санаторийын куйлöма. Пыр надейтчöма бурдны да бергöдчыны аслас радейтана удж вылас. Сöмын эз ло сылöн кöсйöм серти. Кöч (сентябрь) 13 лунö узигкостiыс мудзöм сьöлöмыд сувтöма». (И.А. Суханов. Коми Республикаса Национальнöй архив, ф. 962, о. 1, л. 1-2).
Надежда МИТЮШЕВА
Звезда. – 2008. – 22 января
