Перейти к разделу.

 

Ыпъялысь шондi кодь ань

Урасьöм (февраль) 20 лунö Вомынса культура керкаö воис уна гöсьт. Тайö лунö танi, аслас чужанiнас, медводдзаысь паськыда пасйисны гижысь, вуджöдчысь, велöдысь да общественной деятель А.А. Сухановалысь чужöмсяньыс 120 во тырöм. Агния Андреевналöн паметьлы вöлi сиöма Сухановскöй лыддьысьöмъяс.
Сiдз, ыджыд юбилей кежлö волiсны КР - са национальнöй политика Департаментöн веськöдлысь Е.Н. Рожкин, коми гижысьяс Е.В. Козлова да В. В. Ти­мин, а сiдзжö районысь коми кыв да литература велöдысьяс. Кыв босьтлiс «Доръям асьнымöс» общественнöй котырöн веськöдлысь Н.А. Митюшова. Сiйö быд боксянь туялöма А. Сухановалысь туйвизьсö. Сы кындзи Сухановаöс казьтылiсны рöдвужыс. На серти, Агния Андреевна вöлöма шань да зэв сьöлöма мортöн. Ыджыд удж вöчöма и Н.В. Суханов, кодi туялöма Сухановъяслысь рöдсö 1604 восянь.
Лыддьысьöмъяс помасисны «Ыпъялысь шондi кодь ань» рыт - казьтылöмöн. Тöд вылö уськöдам: АА. Суханова (Даныцикова) - челядьлы медводдза гижысь. Чужлiс сiйö Вомын сиктын. Агния Андреевна гижлiс да пуктылiс сиктса сцена вылын челядьлы коми пьесаяс.
Сыöн вöлi лöсьöдöма «Мойданкывъяс» да Челядьлы ворсанторъяс» гижöд чукöръяс. Пуктiс ассьыс пайсö и «Выль туйöд» да «Школаын лыддянтор» öтувъя сборникъяс лэдзöмö.
Сылöн зiльöмыс да коми кыв сöвмöмö пай пуктöмыс эз ло вунöдöма. Сiдз, 1975 воö Корткерöсса öти уличалы сетöма А. Сухановалысь ним. 1997 восянь районса «Вося велöдысь» ордйысьöм мунö сiдзжö тайö аньыслöн нима приз вылö.

Татьяна ДЕМЕНКО

Корткеросская Центральная библиотека им. М.Н. Лебедева. 2014 год.
Республика Коми, Корткеросский район, с. Корткерос, ул. Советская дом 187, lebedevlib@mail,ru
8(82136) 9-24-80. 9-98-16.