Перейти к разделу.
Коми кыв да коми войтыр - сылöн меддонаторйыс
Агния Андреевна Сухановалöн чужöмсяньыс 125 во тыригкежлö
Агния Андреевна Суханова (Даныцикова) - Вомын волöсьтса крестянинлöн ныв. Чужлöма 1884 вося январь 23 (важ ногöн 11) лунö. Велöдчöма Вомынын, Пöддельнöйын да Усть-Сысольскын. Та бöрын 1900 восянь 20 во уджалöма велöдысьöн. Нёль во кежлö веськавлöма Волся сиктö. 1905-öд вося революцияыд том аньтö танi и суис. Уна том йöзлöн синмыс сэки вос- сис, корсьöны вöлi веськыд туй олöмас. Сöмын аслад велöдчöмöн позис тöдмавны пыдöджык олöмсö. 1907-öд воын Агния Суханова вуджис Пöддельнöйбердса, Нöвик школаö, велöдiс сэнi 1915-öд воöдз. Сы бöрын вит во зiлис Кöрткерöсса школаясын. Октябрса революция быдöнлы ceтic позянлун ас кывйöн велöдчыны, кыпöдны культура. Кöрткерöсын олiгас Öньö Агни комиöдöма рочöн гижысь К. Лукашевичлысь ворсанторъяс: верстьöлы - «Гажалунъяс», челядьлы - «Са весалысь» да «Кöдзыд пöль». Сы бöрын сэсся Островскийлысь «Бедность не порок», «Не так живи, как хочется» пьесаяс комиöдiсны велöдысь чукöр. Тшöтш и «Лёк энька» да «Суклясьысь» ворсанторъяс вöлi пуктöма сцена вылын. 1920-öд вося гожöмнас ыстылiсны сiйöс УОНО-сянь Устюгö политпросвет курс вылö, арнас корисны Усть-Сысольскö карö инструкторöн библиотекаясö. В.А.Молодцов босьтiс Агния Сухановаöс коми небöгьяс лöсьöдан удж котыртны. Сiйö удж вылас сэсся и зiлис олöм помöдзыс. Kyлic 1925-öд воын сентябрь 13-öд лунö Москваын. 1925-öд вося сентябрь 20-öд лунö Усть-Сысольскын нуöдöмаöсь Öньö Агниöс казьтылан рыт. Сёрнитiсны рöдвужыс, войтырöс велöдöмын уджалысь котыр, гижысьяс. Шуисны йöзöдны тайö шондi югöр кодь аньыслысь уджъяссö, сы йылысь казьтылöмъяссö да фотосö, медым некор сiйö оз вун йöз паметьысь. Иван Александрович Суханов верöсыс дона да муса морт йылысь казьтылiс: «Школаын велöдöм уджтö нуöдic зэв кужöмöн, уджалö ёна сьöлöмсяньыс. Велавтöмджык челядькöд торйöн вöлi мырсьö. Гежöда рытъяссö коллялiс челядьтöг. Рытъясö лöсьöдчисны школаса гажъяс кежлö, либö нывъяскöд вурсисны-вышивайтчисны. Эз эновтчыв Агния Андреевна и школа помалысьясысь. Бурджык велöдчысьяс пöвстысь унаöс мöдöдic водзö велöдчыны. Бать-мамныс оз лэдзны - кымынысь ветлас на дiнö, дзик мырдöналöмöн мукöдсö гортсасьыс кыскас да мöдöдас гырысьджык школаясö. Сэсся Агния Андреевна школаад пыр коми кывйö вöлi сетчöджык, сы вöсна челядьыд кокниа сы дiнöсибöдчисны. Кысь-мый позьö вöлi выльтор тöдмавны велöдöм йылысь, олöм кыпöдöм йылысь - сьöлöмсяньыс сэтчö мунлiс. Школа удж кындзи лои мукöд мог. Медъёнасö сiйö сетчис нывбаба кост да вина юöмкöд водзсасьöм уджъясö. Татшöм уджтö сэки ёна йöзöдöмöн оз позь, вöлi вöчны - сарлöн и сиктъясад вöлiны ёсь синма видзöдысьяс да ёсь пеля кывзысьяс».
Бöръя воясö Агния Андреевна пырöдчис коми кыв сöвмöдан уджö. «Сэки уджавны лои ёна, - водзö казьтылö И.А.Суханов. - Дерт, сiйö эз öтнас уджав. Йöзыс вöлi зэв уна. Но и уджыс вöлi тырмымöн. Коми кывнад муртса на зaводитiсны лöсьöдны гижöдъястö. Небöгъястö колiс регыдöн лэдзны. Дась гижöмыд абу, ставсö сэнi жö ковмис войтырыслы лöсьöдлыны. Ёна уджалöмыд да омöля сёйöм-юöмыд (буретш тшыг вояс вöлiны) слабиник морттö венiсны. 1923-öд воын Агния Андреевналöн тöдчыны кутic туберкулёз висьöм. 1924 вося гожöмнас ветлiс Пöддельнöйса санаторийö бурдöдчыны. Неуна бурдыштöм бöрын бара босьтчис уджö. 1925-öд воын тöвнас висьöмыс нöшта öддзис. Сентябрь 13-öд лунö узигас мудзöм сьöлöмыс сувтöма».
Öньö Агни став вынсö пуктic коми крестьянинöс сöвмöдöм-кыпöдöм могысь. 1921 воын Агния Суханова да велöдысь котыр лэдзисны посни войтырлы «Шондi югöр» небöг. «Школаын лыддьысянтор» — мöд класслы велöдчан небöг, лэдзöма 1926 воын. Небöгын 210 лист бок, но джынсö лöсьöдöма Агния Суханова, мöд джынсö - В.Т.Чисталев да А.Н.Чеусова. «Выль олöмлань» да сы бöрын «Выль туйöд» велöдчан небöгъяс лэдзöма коймöд, нёльöд да витöд классъяслы. Агния Андреевна та могысь комиöдöма роч гижысьяслысь уна висьт, мойд, кывбур. Кыдз сiйö ачыс пасйöма, 1921 вося арын лöсьöдöма 26 гижöд школаын лыддьöм вылö. На пöвстысь «Сюзьбукуй», «Асъя кыа», «Шабдi», «Зэр войтъяс», «Туйдорся катшасин» йöзöдöма «Выль туйöд» лыддьысян небöгын. 1923-öд воын Суханова да П.М.Попов- Жугыль гижöны «Му тöдмалöм» небöг. Уна во Öньö Агни йытчылiс челядькöд став олöмнас да мöвпнас. Сэсся ачыс нин гижны кутiс. «Югыдлань» да «Чурка Максим» ворсанторъясын сюрöсас сиктса школа восьтöм да важ, нитшсялöм оласног бырöдöм.
«Регыд нин коньöрлöн овсяс» мойд - лыйлöм пöтка йылысь. Лэбач дорö локтö Орт да бурдöдö сiйöс, а водзöссö корö бордъяс. Но оз ло сы ног. Помасьö мойдыс лэбач кывъясöн: «Бордтöг да лэбавтöг бурджык меным кувны». Сiдзкö, мездлун, ас гажöн овны позянлуныс таладор югыдысь на донаджык овлö.
Öньö Агни быттьö ас йывсьыс тадзисö гижö. Сiйö олiгчöжыс коми йöз понда тöждысис, став сьöлöмсяньыс коми кыв сöвмöдiс. Коми войтыр да коми кыв сылы лоины меддöнаторйöн.
Н.МИТЮШЕВА
Йöлöга. – 2009. – 16 января
