Перейти к разделу.
Овлiс татшöм нывбаба
Сентябрь 13 лунö тырис 60 во тöдчана коми просветитель, роч кыв вылысь вуджöдчысь да гижысь А. А. Сухановалöн кувсьöмсянь. Сылöн нимыс тöдса районса олысьяслы: миян районын чужлiс тайö авъя да сюсь нывбабаыс, танi ciйö заводитiс уджавны, пуктiс подув коми культура сöвмöмлы. Сылысь нимсö дас во гöгöр чöж ниц новлöдлö Кöрткерöс сиктса улича.
Газет лист бок вылын дасьтöм гижöд сиöма А. А. Сухановалöн паметьлы.
Октябрьскöй революциялöн медводдза воясö Коми гижысьяслöн да культура кыпöдысьяслон лыдыс вöлi зав этша. Но найö ассьыныс став вынсö да сямлунсö сетiсны асланыс чужан мулы да йöзлы. Коми культура кыпöдöмын ыджыд пай пуктiс А. А. Суханова, кодi уджалiс тöдчана коми гижысьяс Небдiнса Витторкöд, Тима Венькöд да Илля Васькöд öтвылысь. 1918 1920 воясö сiйö водзмöстчылiс да кутчысьлiс паськыда сюйны театрö, газетö, школаö, научно-просветительскöй уджö коми кыв.
1917—1918 воясö Агния Андреевна уджалiс Кöрткерöсса начальнöй школаын учительницаöн. Танi ciйö котыртic культурно-просветительскöй кружок, вуджöдiс коми кыв вылö Лукашевичлысь «Гажа лунъяс» пьеса да А. Н. Островскийлысь «Гöльлун абу мыж» драма. Ас грездсаяскöд öтвылысь пуктiс сцена вылын коми спектакльяс. Тайö удж дорас босьтчылicны сiдз жö Кöрткерöсса учительяс И. А. Суханов, И. И. Иоль, М. В. Жеребцова, писатель М. Н. Лебедев, грездса том йöз да велöдчысь челядь.
Кöрткерöсса кружок йылысь «Зырянская жизнь» газет гижлiс 1918 воын: «Вöскресенньöö, август 4 лунö мyнic спектакль. Сувтöдiсны комиöн «Лёк энька» драма. Коми поэт М. Н. Лебедев лыддис кывбуръяс. Хор сьылiс М. Н. Лебедевлöн кывъяс вылö гижöм «Гажа тулыс», «Озыр морт» да сылысь жö роч вылысь вуджöдöм «Шондi петö, шондi лэччö» сьыланкывъяс. Сэсся висьтавлiсны Лебедевлöн олöм да творчество йылысь. Спектакль помасис струннöй оркестр ворсöмöн».
А.А. Сухановалысь Кöрткерöсын олан кадся удж йылысь казьтылiс Н. А. Шахов, кодi 1921-1925 воясö веськöдлiс Коми издательстволöн уджöн: А. А.Суханова кутiс йитöд Помöздинскöй да сэтчöс драмкружоккöд, а сiдз жö Яренскöй уездкöд. Ciйö гöгöрвоис, мый колö уджавны öтвылысь. Кöрткерöсын ciйö кутic йитöдъяс учительницаяскöд, М. Н, Лебедевкöд.
1918 воын Усть-Сысольскöй уисполком бердын вöлi котыртöма Коми комиссия, кытчö пырисны И. Т. Чисталев, В. А. Молодцов, В. И. Лыткин, А. А. Маегов да мукöд. Со кутшöм шыöдчöм йöзöдiс комиссия: «Комиссия шыöдчо йöз дорö, кодлы дона ас чужан кыв, кодлöн эм вын да морттуй, кодi кужö бура сёрнитны да гижны комиöн. Миян абу сэтшöм литература, кутшöм эм роч йöзлöн, миян абуöсь Пушкинъяс да Гогольяс... Мый, сiдзкö, гашкö, оз и ков босьтчыны коми кыв да литература сöвмöдан удж бердö? Энöй шогсьöй... Коркö-й рочьяслöн эз вöвны Пушкин да Гоголь. И миян вермас лоны литература, колö сöмын сiйöс кыпöдны да öтвылысь босьтчыны сöвмöдны».
А. Н. Островскийлысь «Гöльлун абу мыж» да «Эн сiдзи ов, кыдзи окота», Н. В. Гогольлысь «Гöтрасьöм» пьесаяс вуджöдöмсянь заводитчö А. А. Сухановалöн литературнöй да театральнöй биография.
Коми комиссия отсöгöн А. А. Сухановалöн пьесаясыс да вуджöдöмторъясыс разалiсны уна драматическöй кружокъяс да сценаяс вылö. Та вылö индöны и А. Савинлöн казьтылöмъяс: «А. А. Суханова уна- ысь ворслывлiс ачыс, весиг гижис коми пьесаяс дзик коми олöмысь. Сылысь «Югыдлань» пьеса, ме чайта, ворслывлiсны уна сиктын».
Кöрткерöсса школаын уджалигöн А. А. Суханова медводдзаöн пыртiс коми кыв вылын велöдöм. Челядьлы коми кыв вылын «Мороз-пöль» да «Кыйсьысь» пьесаяс. Агния Андреевна корис и мукöд велöдысьясöс сетны челядьлы тöдöмлунъяс рöднöй кыв вылын.
1920-öд воын учительница-общественница Сухановаöс мöдöдiсны Великöй Устюг карö культурно-просветительнöй удж велöдан курсъяс вылö, а сэсся индiсны Усть-Сысольскöй УОНО бердса библиотечнöй сек- цияö заведующöнöн. А 1920 вося декабрь тöлыссянь А. А. Суханова заводитiс уджавны выльысь котыртöм Коми издательствоын.
Тайö удж дорас босьтчöм бöрын сылы ковмис тöдмавны уна выльтор: книга лэдзöм да оформитöм кузя полиграфическöй удж. Издательствоын уджалiгöн ciйö лöсьöдiс школьнöй учебникъяс, уджалiс учебникъяслöн стиль вылын, вуджöдiс уна сикас удж, йöзöдлiс сиктса олысьяслы да нывбабаяслы сиöм статьяяс да брошюраяс.
1926 воын В. А. Савин «Югыд туй» газетлöн лист бокын гижлiс:«Коми кыв понда Агния Андреевналöн ёна висис сьöлöмыс. Дырджык кö вöлi оз петав газетын коми гижöд, пыр и локтас редакцияö да юалас: «Мыйла коминас онö гижöй ёнджыка?» Ачыс ciйö ёна гижлывлiс газетад, став гижöдсö ciйö веськöдic коми нывбаба вöсна тöждысьöм вылö да налысь олöмсö кокньöдöм вылö».
«Югыд туй» газетлöн 1923 вося номеръясын А. А. Суханова йöзöдiс татшöм статьяяс: «Коми йöзöс садьмöдысь», «Коми нывбаба, кылан?». «Винаыд мортыдкöд мый вöчö», «Кöйдыс весалöм», «Кытысь воöма Вомынö шева?»
...А. А. Суханова кувсис 1925 вося сентябрь 13 лунö Москваса больничаын. Дзебисны ciйöс Москваса студентъяс — Коми землячествоса членъяс — покончалöн тшöктöм серти музыкаöн да коми сьыланкывъяс сьылöмöн.
Вежон мысти. 1925 вося сентябрь 20 лунö, Усть-Сысольскын вöлi лöсьöдöма А. Сухановаöс казьтылан рыт, кытöн сёрнитiсны сылöн рöдвужыс да ёртъяс: совпартшколаса велöдысь Е. Г. Королева, облоноса заведующöй Н. С. Полещиков, Усть-Сысольскöй педтехникумса директор А. Ф. Богданов, коми гижысьяс В.А. Савин да Н. А. Шахов. Собрание вынсьöдiс решение: чукöртны Агния Андреевналысь гижöдъяссö да лэдзны найöс торъя кингаöн, йöзöдны биографиясö да разöдны портретсö.
Со мый вöлi вöчöма тайö решениесö олöмö пöртöм кузя «Школаын лыддянтор» нима книгаын. А. А. Сухановалысь йöзöдiсны 105 статья. Коми гижысьяс антологиялöн авторыс В. И. Лыткин сиис книгасö Сухановалöн паметьлы. 1929 вося «Школьнöй театр» нима серияын Коми издательство лэдзис «Чурка Максим» пьеса. Тайö книгасьыс лыддьысьысьяс аддзисны Агния Андреевналысь портретсö да тöдмасисны сылöн биографияöн. Тöдмалiсны, мый ciйö чужлöма 1884 вося январь 24 лунö Вомын сиктса крестьянин Андрей Даныциков семьяын. Ciйö вöлöма витöд ныв. Вомынса начальнöй школа помалöм бöрын велöдчöма Небдинса двухкласснöй училищеын, а сэсся Усть-Сысольскса гимназияын. 1903 воын ciйö за-- водитöма уджавны Руч сиктса учительницалöн отсасьысьöн, а сы бöрын учителялöма Вотча да Нöвик сиктъясын. Но аслас олöмнас да уджнас А. А. Суханова вöлi медъёна йитчöма Кöрткерöскöд.
...Коми йöзлöн бöрö кольöмлы да неграмогностьлы паныд тышын Агния Андреевна кужöмöн пыртic ловъя кыв, бур сьöлöм, ён характер. Литература да йöзлöн паметь вайисны миянöдз тайö мича, авъя, сюсь нывбабаыслысь öбликсö. Кöрткерöсса олысьяс сетiсны А. А. Сухановалысь нимсö сиктса уличалы.
Н. МИТЮШЕВА, республиканской историко-краеведческой музейса старшой научной сотрудник
Звезда. – 1985. – 19 сентября
