Перейти к разделу.
Мортыдлы колö лоны гöгöрбок мичаöн
Чехов шулöма, мый мортыдлы колö лоны гöгöрбок мичаöн: и чужöмнас, и паськöмнас, и ловнас, и мöвпъяснас. Тайö кывъяссö Антон Павлович быттьö гижлöма Агния Сухановайылысь. Лöсьыд статя, мича чужöма, мелi видзöдласа, шань нюма, сюсь вежöра, мода серти вурöм ковта-юбкаа, шляпаа. Татшöмöн Öньö Агни вöлöма, татшöмöн сiйö колис.
Талун Агния Андреевнаöс Комиын, слабог, оз на кö ставныс, аминь унаöн нин тöдöны. Сылысь нимсö сетöма Кöрткерöс районысь Вомынса лыддьысянiнлы да Кöрткерöсын уличалы. Тайö жö сиктса школалы кöсйылiсны жö, но эз артмы. Но та йылысь неуна сёрöнджык.
А öд ветымын во чöж Агния Суханова (вöвлöм Даньщикова) йылысь некод некор эз казьтыв. Быттьö мортыс эз и вöв. Весигтö матысса рöдвужсьыс кодсюрö сы йылысь этша мый тöдiсны — бать-мам челядьныслы эз ёна висьтасьлыны.
Но, бара жö коми ань, чужан му туялысь Надежда Митюшевалöн водзмöстчöм-зiльöмöн, вынöн Агния Сухановалысь бур нимсö лои бöр «ловзьöдöма» да сувтöдöма орччöн Илля Васькöд, Нёбдiнса Витторкöд, Михаил Лебедевкöд.
Надежда Алексеевна И.Куратов нима музейын зiлигас на босьтчис корсявны архивьясысь Öньö Агнилысь гижöдьяс, олöм-вылöм йывсьыс казьтылöмьяс. Матö во корсьысис-чукöртiсколанасö. И 1975 вося март 24 лунö, кор Кöрткерöсын пасйисны Агния Сухановалöн чужöмсянь 91 во тырöм, тайö аньыслы, гашкö, медводдзаысь на вичмис коми йöзсянь пöсь аттьöалöм да муöдз копыр ставсьыс, мый сiйö коркö вöчис налы бурсö.
Öньö Агнилöн коми литератураö пайыс, гашкö, абу сы ыджда, кыдзи водзынджык казьтылöм коми гижысьяслöн, но ань на моз жö висьöмöн висис коми кыв да коми йöз вöсна. Став сьöлöмнас, ловнас, выннас, вежöрнас зiлис югзьöдны комияслысь олöмсö. Медым лун и вой сьöд уджöн ноксьысь бать мамлöн челядьыс пырисны бурджык, сöстöмджык нэмö.
Кыдзи Агния Андреевна пасйö аслас олантуяс, грамота школа да кык класса училище помалöм бöрти пö водзö велöдчöм йылысь нинöм вöлi и мöвпавнысö. Усть-Сысольскса женской прогимназияö нывка сэки некыдзи эз вермы веськавны. Öти-кö, сiйöс сэтчö эз босьтны, кыдзи крестьянкаöс, кодi ни öти роч кыв эз тöд. Мöд-кö, батьыс Агнилöн велöдчöмö öти шайт весигтö эз окотит пуктыны. Питö пö, гашкö, велöдiс на-а.
Но буретш сэки батьсö, Андрей Апексеевичöс, кодi ачыс зэв бура кужис гижны да лыддьысьны, бöрйöмаöсь земскöй управаö да аминь ёна велöдчыны вöзйысьысь нывсö тшöтш босьтöма аскöдыс.
Сизим челядя семьяысь нывъяс пиысь мойвиис лоны велöдчöм йöзöн сöмын кык чойлы — Агнилы да Ульяналы. Ичöтджык чойсö Агния Андреевна нин ышöдiс велöдчыны акушеркаö. Кöть эськö таысь бать-мамыс нылыскöд нэмсö сэсся эз и гöгöрволыны öта-мöднысö. Найö жалитiсны, мый велöдчöмнас дзикöдз тшыкöдiсны кагасö. А Агнилöн вöлi сöмын öти кöсйöм — öдйöджык орöдчыны семьясьыс да петны асшöр олöмö. 1901 воö Öньö Агниöс ыстöны велöдны Кулöмдiн районысь Руч сиктса грамота школаö. Кык во мысти вуджöдöны Сыктыв районö, Волся земскöй школаö.
1907 восянь учителялö ас районас, Поддельнöй сиктса Новик грездын сöмын на воссьöм школаын. 1908 воын Пбддельнöйса бурдöдчанiнö пельшеравны воö Иван Суханов, кодкöд том ань тöдмасьлiс Усть-Сысольскын на велöдчигас. Иван Александрович вöлi коктöм — ёна кынмалöм бöртиыс ковмöма вундыны, но тайö эз ло мытшöдöн семья лöсьöдöмас. А регыд гозьялöн чужис Галина ныв.
Дерт, аньлöн ыпьялысь сьöлöмыс эз вермы бурмыны челядьöс сöмын расписание да программа серти урокьяс сетöмöн. И рытъяссö Агния Андреевна коллялiс быдтасьясыскöд: котыртлiс быдсяма кружок, кöнi велöдiс ныв-зоньясöс вурсьыны-кысьыны-вышивайтчыны, öтвылысь зонпосникöд дасьтысьлiс гажъяс кежлö. Кодкöдкö лыддьысис, кодкöдкö мойдчис.
Челядь кындзи Агния Андреевна дорö волывлiсны тшöтш и нывбабаяс. Рытпукъяс дырйи кипом удж вöчигöн велöдысь висьтавлiс налы выль олöм йылысь, кöнi коми ань вермас кокньыдджыка лолыштны. Ышöдiс найöс öтвылысь орöдчыны вичкоса попъяслöн да озыръяслöн нартитöмысь. Гöгöрвоöдiс мамьясöс, мыйла сюсь ныв-пияныслы быть колö водзö велöдчыны.
1910 воясын Кулöмдiнын да Ношульын воссьöны крестьяна челядьлы вылыс тшупöда начальнöй училищеяс. Но сэтчö мамьяс эз окотапырысь сетны быдтасьяснысö. Кодлыкö вöлi нинöм вылö челядьсö велöдны, а кодкö шуасис, мый нинöмла. Медбур велöдчысьяссö Агния Андреевна, позьö шуны, мырддьöмöн мырддьылiс мукöд семьясьыс. Ачыс найöс кöмöдлiс- пасьтöдлiс, ньöбавлiс небöг-перö, могмöдлiс сьöмöн.
1905 вося революция йöлöгаöн шыасис и Коми муын: татчö пондiсны ыставны сарлöн режимлы паныд сувтысь йöзöс. Налöн выль, прöстöй йöзлы лöсялана видзöдласныс нöшта на ёнджыка ыззьöдiс Агния Андреевнаöс дорйыны пемыд коми войтырöс. Быд водзмöстчöмын гöты- рыслы пондiс отсасьны и Иван Александрович, кодi чöвтчис пель- шералöмсьыс да Петербургын вося курсьяс помалöм бöрти тшöтш босьтчис велöдны.
Сиктса власьт кутысьяслы аньлöн татшöм водзмöстчöмыс, дерт, эз вöв кивыв. Найö зiлисны омöльтны сiйöс йöз водзас, быд ногыс няйтöсьтiсны, суклясисны. Полицияöн быд воськов бöрся гусьöн кыйöдöмыс эз лэдз тырвыйö бура уджавны Нöвикын да, 1915 воö гозья мöдöдчисны Кöрткерöсö. 1917 вося февральын Коми крайö воö юöр, император пö öткажитчöма монарх пуклöсысь. И танi пыр жö «пузьö» политикаыс. Кыдзи и 20- öд нэм заводитчигас, котыртчалö быдсяма партияыс. Сöмын оз нин ыстöм йöзлöн водзмöстчöмöн, а меставывса интеллигенциялöн ышö- дöмöн. Медыджыд чукöра да вына вöлi эсерьяслöн котыр, кытчö сибöдчис мукöдыскöд Агния Суханова.
Бöрыннас нин аслас олöм пасйöдын Агния Андреевна гижö, мый жалитöда гöрдöдöмöн казьтывлö сiйö кадсö, кор быттьö кодкö сайöдлöма вежöрсö да ань абу дзик пыр сувтöма большевикъяс дор, а ёна ыззьылöма эсерьясöн. Агния Сухановалöн олöмас тайö политическöй кадколастыс чукöстчис ёна сёрöнджык, кор 90-öд воясö кöсйисны сетны сылысь нимсö Кöрткерöсса школалы. Вöлi нин дась став колана гижöдыс, вöчöма бюст и быдсöн. Но Кöрткерöсса райкомö воö письмö, кодöс гижöма олöма ветеран, 1918 восянь партияö пырысь (ним-вичыс абу тöдса). Сэнi сiйö висьталö, мый зэв бура помнитö Агния Сухановаöс, сiйö пö вöлi районас медся водзмöстчысь эсеркаöн. Сикт-грездъясын йöз водзас сёрнитiгöн пыр кулитöма Ленинöс, шыöдчылöма, мед став Россияса Учредительнöй собраниеö бöрьясны эсер Питирим Сорокинöс. Эсеръясöс жö вöлi нимтöма контрреволюционерьясöн да киритöма Сöветысь. Эсерка Каплан муртса эз ви Ленинöс. A тi пö 1979 вося май 25 лунö сылысь нимсö сетiнныд юр- сиктса уличлы...
Со и öнöдз Кöрткерöсса школа нимтöм. Бур кöть, уличасö выль пöв эз «гижöдны». А сэки Кöрткерöсын, кыдз гижлiм нин, олöмыс «пуис». Агния Андреевна Михаил Лебедевкöд да мукöд ёртъясыскöд котыртöны драма кружок, кöнi роч пьесаяскöд тшöтш босьтчöны пуктыны и комиöдöмаöс. Агния Андреевна отсöгöн видзöдысьяс тöдмасьöны коми кыв вылын А.Островскийлöн «Бедность не порок», «Не так живи, как хочется» пьесаясöн, Н.Гогольлöн «Женитьбаöн».
И, дерт жö, Агния Суханова оз вунöд зонпосниöс. Аснаукöн босьтчö велöдны школаас челядьöс коми кывйö. Сылöн вöвлöм медводдза велöдчысьясыс казьтылöны, мый зэв чуймöдана вöлi босьтчыны лыддьысьны да гижны мам кыв вылын. Торйöн нин эз тырмыны небöгъяс. (Василий Молодцовлöн медводдза коми «Букварь» петлiс кызьöд вояс помын).
Медым ныв-зон тырвыйö вермисны босьтны тöдöмлунсö, Агния Андреевна ачыс заводитö лöсьöдны налы лыддянторъяс. Вуджöдö роч мойдьяс — «Теремок» (Повзисны), «Зимовье зверей» (Шоныд корсьöны), «Лиса и тетерев» (Руч таркöд) да уна-уна мукöдöс. Мойдьяссö Агния Андреевна дасьтö сiдзи, медым ичöт коми лыддьысьысьлы вöлi гöгöрвоанаöсь и геройясыс, и налöн öбичаныс, и олöмыс, и кöсйöм- мöвпныс. Ёна шыльöдö-мольöдö гижöдьяссö, мукöддырйиыс кык роч мойдысь вöчö öтиöс. Öти кывйöн кö, кыдз мый кужö, матыстö найöс ичöт войтырлöн сьöлöмöдзныс. Агния Сухановалöн перö улысь сiдзжö петöны дженьыдик пьесаяс — «Кыйсьысь» «Кöдзыд пöль», «Югыдлань», «Кань козин», «Чурка» Максим»; висьтьяс — «Тулан кыйöм», «Кер пöрöдiгöн», «Кöин», «Вöр», вогöгöрся серпасьяс — «Лэбачьяс ланьтöмаöсь», «Асья кыа», «Туйдорса катшасин», «Юрсигусь», «Лысва».
Кор Агния Андреевна 1918 воын Яренскын велöдысьяслöн сьезд- курсьяс вылын висьтасис коми кыв велöдöм йылысь, унаöн сы выйöдз повзьöмаöсь, мый весигтö грöзитчöмаöсь вины аньöс. Но век жö Агния Сухановаöс да коми гижысь Афанасий Маеговöс (Варышöс) кывзöм бöрын, съезд кывкöрталiс, мый Усть- Сысольскса уездын, зыряна пöвстын коми кыв вылын велöдöмыс колö. Та могысь шуöма йöзкостса велöдан юкöнын котыртны торья комиссия.
Тайö жö вонас ноябрь 28 лунö Усть- Сысольскса уисполком кырымалiс коми школалы да войтырлы литература гижан-чукöртан комиссия, дже- ньыда кö, Коми комиссия йылысь индöд. Сiйö газет пыр шыöдчис йöз дорö, медым быдöн, кодi кыдзи вермас, босьтчас чукöртны Коми му пасьтала разалöм мойдьяс, сьыланъяс, нöдкывьяс, шусьöгьяс, а сiдзжö, кодi сяммö, мед петкöдлас Коми мулысь да татчöс войтырлысь олöмсö, мичсö, öбичасö статьяясын, кывбурьясын, вуджöдöмъясын.
Усть-Сысольскса да Яренск уездса велöдысьяс дорö жö комиссияыс шыöдчис тадзи: «Комиссия корö ставнысö, кодлы муса мам кывйыс, кодлöн эм та вылö сям да вын, кодi кужö бура гижны-лыддьысьны коми- нас... Миян абу рочьяслöн кодь литератураыс, миян абуöсь Пушкиньяс, Гогольяс... Та боксянь ми гöльöсь. А, гашкö, сэсся, оз и ков босьтчыны сöвмöдны коми кыв-литературасö?... Эн шогсьöй, коми пиян! Коркö и рочьяслöн эз вöвны Пушкиньяс да Гогольяс!.. Миян тшöтш жö мыччысяс литература, сöмын сiйöс колö ёна лэптыны, босьтчыны сiйöс дасьтöмö öтув ставнымлы, кодi мыйöн вермас...»
Тайö шыöдчöм вылас дзик пыр и чукöстчисны велöдысьяс, гижысьяс. На лыдын тшöтш Агния Суханова ыстö ассьыс вуджöдöм пьесаяссö. 1920 вояс шöрын Сухановъяслöн семья овмöдчö Усть-Сысольскö, верöсыслöн чужанiнö. 1920 воö аньöс ыстöны Великöй Устюгö культурно-просветительскöй курсьяс вылö. Локтöм бöрас индöны Усть-Сысольскса уоноö (уездный отдел народного образования) юрнуöдны библиотека юкöнöн. Василий Александрович Молодцов отсöгöн Агния Сухановаöс вуджöдöны сылöн подотделö (тайö народнöй образование юкöнлöн торъя котыр — подотдел просвещения национальных меньшинств, дженьыда кö, нацменотдел). Подотделлы вуджöны Коми комиссиялöн могьясыс, а сы бöрти ставыс тайö öтлаасьö Коми небöг лэдзантö, кодöс восьтöны 1920 вося октябрь 6 лунö да кодон веськöдлыны босьтчö Василий Молодцов.
1921воö петö челядьлы лыддьöм вылö «Шондi югöр» небöг. Кык во мысти — начальнöй школаын гырысь класса велöдчысьяслы «Выль туйöд», 1926 воö «Школаын лыддьысянтор» нöшта öти велöдчан небöг. Найöс дасьтöм-лöсьöдöмын медыджыд пайыс Агния Сухановалöн. 1924 воö аньлöн петö и аслас книга: «Челядьлы ворсанторъяс». Агния Андреевна ошйысьтöг ни вышшитчытöг пасйö Коми небöг лэдзантын удж йылысь: «Taнi менам медшöр уджöн вöлi вуджöдны, чукöртны челядьлы школаын велöдöм, асшöр лыддьысьöм, сцена вылын пуктöм вылö литература. Сiдзжö вуджöдчи верстьöлы — политика, видзму овмöс, бурдöдчöм кузя литература да пьесаяс. Корсюрö гижлывла «Югыд туйö».
Но Виктор Савин 1925 воö аслас газетын гижö со мый: «А кутшöма Агния Андреевналöн висис сьöлöмыс коми кыв вöсна! Дыр кад кö газетаным нинöм оз пет коми кыв вылын, сiйö локтас редакцияö да шуас: «Мыйла тшöкыдджыка коминас онö гижöй?» Ачыс сiйö ёна ёртасьлiс газеткöд. Пöшти быд гижöд вöлi коми ань вöсна тöждысьöм, сылысь сьöкыд олöмсö кокньöдöм йылысь. Ачыс вöлi крестьяна семьяысь да бура тöдiс нывбабалысь шуд-талансö».
Сухановьяслöн Усть-Сысольскса патераыс, позьö шуны, вöлi карса культура шöринöн. Taнi тшöкыда гöститiсны гижысьяс, велöдысьяс, общественнöй удж нуöдысьяс: Иона Чисталёв, Василий Молодцов, Илля Вась, Афанасий Маегов, Николай Попов, Алексей Надеев. Ассьыс гижöдьяссö медводдзаысь лыддьылiс Нёбдiнса Виттор, öтвылысь индалiсны пьесаясас ворсысьясöс. Taнi жö чужис мöвп лöсьöдны «Сыкомтевчук» коми национальнöй театр.
Театрын вopcicны тшöтш и Агния Сухановалысь «Югыдлань» пьесасö. А мамыскöд сцена вылö тшöкыда петавлiс и Галя нылыс.
Уджыс Агния Андреевналöн вöлi юр выв тырыс. Небöгъяс дасьтöм, театрын ворсöм, газетö гижасьöм кындзи аньлöн вöлi нöшта öти сьöкыд «ноп» — «Коми му туялан котыр», кодöс найö лöсьöдiсны Иван Александрович верöсыскöд öтвыв РКП(б)-лöн Коми обкомса секретарь Яков Фёдорович Потаповкöд, историк- филолог Алексей Николаевич Гренкöд, коми лингвист, этнограф, фольклорист Алексей Семёнович Сидоровкöд, велöдысь Мария Александровна Молодцовакöд да мукöд сюсь йöзкöд 1922 вося май 16 лунö. Тайö котырсö бöрыннас, 30-öд вояс за- водитчигöн, нимтiсны Сöвет власьтлы паныд мунысьöн, «национал-шовинистическöйöн». Коми му туялысь пöвстысь унаöс мыжтöг мыждiсны, унаöн на пиысь эз воны бытшкасьысь сутуга сайысь бöрсö. Но Агния Андреевна тайöс эз нин тöдлы.
Водзысь-водз кусыньтчисны аньлöн векньыдик пельпомьясыс ас вылас босьтöм сьöкыд нопсьыс. Сьöкыд висьöм пысасис тыас, кодi ырыштчöмöн быттьö кöсйис петны морöссьыс помтöм курксöмöн. Агния Андреевна ёртъяс отсöгнас ветлiс эськö бурдöдчыны кумысöн Башкирияö, но сэнi сылы нöшта на лёкджык лоöма да, веськöдчöма лöньöдны висьöмсö Москваö. Сöмын шудыс и сэнi абу нин нюмдыштöма. Öньö Агни кувсьö Москваын 1925 вося сентябрь 13 лунö нелямын öти арöсöн. Сэтчöс шойна вылын аддзö аслыс бöръя инсö.
Нёбдiнса Виттор шога юöртö ёртъясыслы: чахотка висьöм пö нетшыштiс нин миян пöвстысь Вась Педöрöс (Фёдор Попов), Жан Морöсöс (Иона Чисталёв) и со öнi Агния Сухановаöс...
Но олöны сылöн гижöдьясыс, небöгъясыс. Нималöны сылöн велöдчысьяслöн велöдчысьясыс. Олö муса коми кывйыс. Кöрткерöсын быд вит во мысти нуöдöны Агния Сухановалы сиöм лыддьысьöмъяс, кöнi тöдмöдöны сылöн олöмысь да творчествоысь выльöн аддзöмторъясöн. Олö-вылö паськалöм рöдвужыс. Питерын таво 78 арöс кутас тыртны кывбур да проза гижысь Глеб Горбовский, Агния Андреевналöн внукыс.
Анжелика ЕЛФИМОВА
Коми му. – 2009. – 14 марта
