|
 |
Перейти к разделу.
Олöм визув шöрын
 Тэнад киын коми газет. Ciдзкö эгö на дзикöдз рочмöй. Рочмöдан нырвизьлы паныд мунысь пöсь сьöлöма войтырыд пыр вöлiны, Важöн и öнi. На лыдын Агния Даньщикова. Вомын сиктысь сюсь вежöра ань - велöдысь, гижысь, политик, философ, артистка, бур гöтыр да радейтысь мам.
XX нэм заводитчигöн коми сёрни-кывлы туй лои писькöдны косьöн-зыкöн. Водзын мунысьяслы кокниа лолыштны эз сетлыны. Ас кыв зэв сьöкыд вöлi пыртны школаясö. Агниöс весиг грöзитчöмаöсь вины. Мыйла? Роч вылысь пьесаяс вуджöдöмысь.
Кызьод воясö став оласногыс комилöн кутiс вежсьыны. Агния да сылöн нималана ёртъясыс котыртчисны. Быдся кöленалöн вын. Чуксалiсны пемыд йöзöс югыдлань, панiсны ас кыв сöвмöдан-паськöдан удж. Но школаясын важсьыс эз лэччысьны. Дыш, вöлöм, выль ногöнтö заводитны уджавны. Чукöртчылiгьясöн чужан кывлы паныд медъёна горзiсны, зымöдiсны кокъяснас велöдысьяс (унджыкыс комияс жö). А рочьяс пö öдзöсъяс швачкöмöн пышйылiсны, Серпасыс öнiя Думаын кодь.
Сöмын ёна вензьöмöн, вермасьöмöн доддьыс вöрзис. Челядьöс кутiсны велöдны ас кывйöн. Ыджыд олан öдыс вöлöма Öньö Агнилöн. Тöвнырöн пöльтöм бипур кодь, эз усав. Уна видöм, лёкöдöм да герчкöм кывлiс сiйö. Но ньöтчыд весиг эз мöвпыштлы кежны öтчыд бöрйöм туйысь.
Тадзи кымын жö олiсны-уджалiсны эня-ныла, енбиа велöдысьяс (снимокын), Öньö Агнилöн да авторлöн матысса рöдвуж. Шöрас пукалö Александра Григорьевна Макарова (Королёва). Нэмыс велöдiс челядьöс. Сы сайын сулалö нылыс - Нина Петровна Мишарина. Уджалiгас школаысь эз петавлы. Олö Ыджыдвиддзын. Важ кодьыс öдйö кыпалысь да водзмöстчысь коми ань. Зэв пыдди пуктöмöн сёрнитö-висьталö Суханова йылысь.
Агния 17 во велöдiс Руч, Вомын, Нöвик, Кöрткерöс да мукöд школаын. Гöль ныв-зонлы отсавлiс сьöмöн. Эз вунöд и на бать-мам йылысь. Гижис челядьлы небöгьяс, пьесаяс, мойд чукöръяс. Вуджöдалiс роч вылысь. Торъя книгаöн петалic сылöн «Чурка Максим» медбур пьесаыс. Сё вит гижöд пырис «Школаын лыддьысянтор» сборникö.
Агния Андреевна 1911 воын петi верöс сайö, лои Сухановаöн. На ордö чукöртчывлiсны тöдсаясыс да ёртъясыс, тöдмасьлiсны выль коми гижöдъясöн. Лыддьылiс ассьыс пьесаяссö Нёбдiнса Виттор. Пыр жö заводитлiсны бöрйыны артистъясöс. Унаысь Агния ачыс ворслывлiс. Öд сэки сiйö зэв на том да мича вöлi, лысва кодь сöстöм нюмъялысь чужöма, вöсни коска.
Чайта, мый тайö вöлiны кыпыд да гажа, шуда рытьяс. Сёрöдз кöнкö пукавлiсны карасина лампа би дорын, варовитлiсны комиöн. Нимкодясисны бур гижöдъясöн, мöвпалiсны аскиа лун йылысь. Быдсяма сёрниыс, дерт, кыптылiс ас кытшын. Повны некодысь. Разöдчигöн сиисны öта-мöдлы став бурсö. Татшöм коми рытпукъяс отсалiсны сöвмöдны-озырмöдны коми кыв, корсьны бурджык олöм пемыд йöзлы, ышöдiсны артмöдны коми войтырлы колана гижöдъяс да пьесаяс. Агни да сы ёртъясыс шмонитöмöн да гажа серамöн, сьыланкывъясöн пальöдлiсны шогсö, личöдлiсны сьöлöмсö, ловсö. 1920 во. Агния Андреевна Коми издательствоын редактор. Книга лэдзан удж лунысь-лун ёнмис.
Эз весь вош сылöн зiльöм-пессьöмыс. Казьтылам, ыдждöдлам коми дор сулалысь аньöс. Пьесаяссö ворсöны челядь котыръясын. Туялысьяс водзö тöдмалöны сылысь олöмуджсö.
Суханова йылысь гижöдъяс нимкодьпырысь позьö лыддьыны бöръя кадö петöм бура кыз мича небöгъясысь. Тайö куим тома Коми энциклопедия, 860 лист бока «Кадкостса йитöд» («Связь времен»), «Мича ывла, Коми вужвойтыр да морт инöдъяс».
А коми кыв паськöдан удж, кöть и мытшöдыс тырмымöн, мунö водзö. Велöдысьöс бара виччысьöны ыджыд вежсьöмъяс. Школасö кöсйöны мöдарö путкыльтны. Кадыс корö выль мортöс.
Эм да уджалö, «дзуртöмöн», дерт, «Кывъяс йылысь» республикаса оланпас. Петö чужан кывъя вит газет, кык журнал. Лэдзöны роча-комиа «Арт» да «Чужан кыв» («Родное слово») журналъяс. Коми войтыр лыддьöны ас кывъя небöгьяс, тöдмасьöны кывчукöръясöн. Корсьöма-пасйöма 50 сюрс коми кыв. Позьö ошйысьыштны сьыланкывлы сиöм «Шондiбан» да «Василей» уна йöза гажъясöн, республикаса фольклор театр уджöн.
Дас квайт падежа ас кыв велöдöны и школаясын (сöмын тай бöръя кадас коми кыв велöдан урок лыдсö чинтiсны-а). Челядьлы коми гижöдъяс эмöсь интернетын.
Мый эськö татчö шуас миян Öньö Агниыд? Вайö пö и водзö коми войтыр, некодлы эн сетчöй. Видзöй, асьнытö омöльтöмысь да кедзовтöмысь. Босьтöй бур тöдöмлун, быдтöй ловтö.
Мед мувывса войтыр костын кыпалас да нималас комиыс.
Тамара Королева
|
| |
 |
Корткеросская Центральная библиотека им. М.Н. Лебедева. 2014 год.
Республика Коми, Корткеросский район, с. Корткерос, ул. Советская дом 187, lebedevlib@mail,ru
8(82136) 9-24-80. 9-98-16. |
|
|