Перейти к разделу.
Öндрей Агни
ТАДЗИ АСЬСÖ ШУЛÖМА и кырымасьлöма öти зэв шань коми ань. Тыр нимыс сылöн - Агния Андреевна Суханова, нывдырся овыс Даньщикова. Коми литератураын тайö вель тöдса морт. Сентябрь 13 лунö сылöн паметь лун, кувлöма бур, пöрнöй арлыдöн чахоткаысь 1925 воö.
Менсьым юаласны, мыйла, сiдзкö, эг гарышт тайö мортсö сентябрь тöлысь кежлö «Коми литературалöн календарын» («Коми му», сентябрь 2 лунся номер)? Ылалi, стöчджыка кö, менö ылöдлiсны. Веритчи öти небöглы, а сэнi вöлöма öшыбка. Тайö книгаыс - «Парма» журнал дорö приложениеöн петic Москваын 1992 воö да шусьö «Сандрик Микол (Н. А. Шахов). Коми ёртьяс дiнö (К товарищам коми)», лöсьöдiс Г. И. Торлопов. Сэтчö пыртöма Шаховлысь «А. А. Суханова» неыджыд гижöд-некролог, кодi петалöма «Югыд туй» газетын 1925 вося сентябрь 15 лунö. Ог куж шуны, кодлöн да кор лои тайö öшыбкаыс, но гижöдыс заводитчö тадз: «Телеграф вайис дженьыдик юöр: «Август 13 лунö Москваын кувсис Агния Андреевна Суханова». (Тöлысь нимсö тöдчöдi ме).
А «История коми литературы» коймöд томысь (Сыктывкар, 1981, 367 лист бок) «1925 во» увсьыс лыддям: «13 сент. В Усть-Сысольске умерла детская писательница Агния Андреевна Суханова (род. 24 января 1884 г.)». Кöнi да кор нö либо збыль вылас кулöма? Да и, стöча кö, кор чужöма? Бöръя воясас Суханова йылысь эз öтчыд гижлы Александр Панюков, Кöрткерöсын народнöй музейса директор, архивъясын ёна корсьысьысь ёрт. Александр Александровичлöн öти гижöд - «Ыпъялысь шондi кодь ань» («Войвыв кодзув», 1993, июль). 49 лист бокын сэнi сылöн вайöдöма некымын мортлысь казьтылöмъяссö. Но медся эскöдана, ме чайта, Асыввыв народъяслöн коммунистическö университетын велöдчысь кутшöмкö А. Королевлöн кывъяс. Сiйö сэки, 1925 воас, гижöма «Сухановалöн паметь кузя» статья да ыстöма Небдiнса Витторлы, мед йöзöдас газетас. Гижöдас пö шуöма: «Сентябрь 15 лунö Москваын ми дзебим Агния Андреевна Сухановаöс… Поддельнöй вöлöстьысь Новик грездса начальнöй школаын мукöд лыдын Агния Андреевна велöдiс менö». Ciдзкö, некутшöм дзугласьтöг вермам шуны, мый Öндрей Агни, «коми школаяс вöсна тöждысьысь морт» (М. Лебедевлöн кывьяс), ланьтöма 1925 вося сентябрь 13 лунö. Öд гижö сылöн велöдчысьыс, гижö тэрмасьтöг, аслас учительницалысь донсö, мывкыдсö, шаньлунсö муртыштöмöн. И лоöма тайö Москваын, местасö быдлаын индöма öтмоза, а кыдзи да код мыж вöсна коми литературалöн история коймöд томас веськалöма «Усть-Сысольскыс», шуны ог босьтчы: сэтчö «хроникасö» чукöртысьыс вöлöма уна. Сандрик Микол, кыдз сöмын воöма шог юöрыс (гöгöрвоана, Сыктывкарын кö кулic мортыс Сыктывкарö жö юöрыс эз эськö лок телеграф пыр!), ачыс редактор пыр и гижöма газетас: «Тайö юöрыс дойдас сьöлöмсö быдöнлысь, кодi тöдлiс Агния Андреевнаöс кыдзи вынсö жалиттöг уджалысьöс да бур мортöс. Сiйö ачыс - коми крестьяна пöвстысь петöм морт, и пыр кылiс сьöлöм дойсö миян пемыдлун вöсна. Кыдзи сиктса учительница, сiйö медводдзаяс лыдын босьтчис коми школа лöсьöдöмö.
1918 воö на Кöрткерöсын сiйö М. Н. лебедевкöд öтлаын заводитö лöсьöдны чужан кыв вылын литература, котрытö неыджыд кружок, кодi заводитö петкöдлыны сиктын мнддводза коми спектакльяс.
1919 воö Агния Андреевна уджалö Коми комиссияын, а 1920 восянь Коми издательствоын. Сылöн мудзлытöм тöждысьöмöн лöсьöдöма öнöдз школалы став коми литературасö».
Сэсся водзö на бура казьтылö мортсö да шуö: «Тавося гожöмын Агния Андреевна мунiс Башкирияö бурдöдчыны кумысöн, но здоровьеыс ещö ёнджыка омöльтчис и сiйöс мöдöдiсны Москваö. Но сэнi эз нин вермыны отсавны...»
ЧУЖЛÖМА АГНИЯ ДАНЬЩИКОВА Вомынса збыльысь крестьянскöй семьяын, 1884 вося январь 11 лунö, важ стиль сертиыс кö (выль стиль сертиыс артмö январь 23 лун, а абу 24 лун: XIX нэмса дата вуджöдiгöн колö содтыны 12, а оз 13 лун). Помавлöма сиктса прйходскöй школа, сэсся Нёбдiнын земскöй училище, сэсся Усть-Сысольскын прогимназия. Сы бöрын, 1903 восянь Сыктывкарас бöр лэччытöдз, 1920 воöдз, вель уналаын учителялöма, кöть и уджалöма нин тшöтш Коми комиссияад. Учителялiгас на комиöдлöма А. Островскийлысь, Гогольлысь пьесаяс, некымынöс сэсся бöрын гижлöма ачыс: «Кöдзыд пöль», «Кыйсьысь», «Югыдлань», «Чурка Максим» 9бöръясö 1929 воö лэдзлöмаöсь торъя небöгторйöн, сiйöс оз ков сорны В. Ф. Поповлöн дзик татшöм жö «Чурка Максим» нима висьткöд, кодi петалöма 1923 воö «Трудовая кооперацияын» да кодi сэтшöм жö сюрöса). А. А. Суханова збыльысь став сьöлöмсяньыс висьöма коми школа вöсна да уджалöма збыльысь асьсö ньöти видзышттöг. Сiйö зэв уна комиöдöма челядьлы лыддьöм вылö, уна ноксьöма налы вылö жö комиöн гижысьяскöд, редактируйтöма... Но медся нин, вывтi уна ачыс гижöма. «Писатели Коми - детям» биобиблиографическöй словарын (Сыктывкар, 1978), кодöс лэдзлöма С. Я. Маршак нима библиотека, шуöма: 1923 вося «Выль туйöд» школьной хрестоматияын А. Сухановалöн 16 статья, а «Школаын лыддьысянтор» сборникын, кодi петöма сылöн кулöм бöрас нин, - 105 гижöд!
Öтчыд (öнi артмö, во кызь сайын нин) И. Куратов нима музейса уджалысьяс шуöмаöсь нуöдны Кöрткерöсын медводдза коми нывбаба-гижысьыдлöн паметьлы сиöм рыт. Сэтчö корöмаöсь Сыктывкарö буретш воöм Илля Васьöс, Владимир Поповöс да Иван Изъюровöс. Иван Васильевич казьтылö: «Ме том дырйи аддзысьлывлi Агния Сухановакöд, кор ciйö уджалiс Коми книга лэдзанiнын редакторöн. Уна негырысь гижöд кындзи, кодъяс сэки пырлiсны школаясын велöдчан книгаясö, Агния Сухановалöн вöлiны и челядьлы ворсöм вылö пьесаяс, сиктса челядьлöн важъя кадын олöм йылысь. Агния Андреевна уджавлöма Кöрткерöсын, М. Н. Лебедевкöд öтвылысь гижавлöмаöсь репертуар сиктса самодеятельнöй артистъяслы, отсасьöмаöсь сиктса клублы 20- öд воясö нуöдавны «Коми рытъяс». Та вöсна и кöрткерöссаяс казьтылöны ассьыныс сиктса учительницанысö да сиктса выль уличлы сетöмаöсь Агния Сухановалысь ним.
Ми, карса гöстьяс, воöм мысти медся водз ветлiм М. Н. Лебедевлöн гу вылö, кöрткерöссаяс бура жö казьтылöны писательöс (…)
Сиктса клубын мунic Агния Сухановалы сиöм ыджыд литературнöй рыт. Сиктса артистъяс петкöдлiсны спектакль.
Сёрнитiсны йöз, кодъяс помнитöны на Агния Сухановаöс. Выступайтiс тшöтш и Илля Вась. Ciйö бура тöдлöма Агния Сухановаöс да буретш велöдчöма Москваын, кор сэнi туберкулёз висьöмысь томöн на кувсис Агния Суханова.
Автобусöн карö бор локтiгöн Илля Вась дыр пукалiс чöв, мыйкö йылысь думайтiс, сэсся висьталiс думсö:
- Кöрткерöссаясыд пыр вöлi водзмöстчысьясöн. Taнi революция бöрад заводитчисны «Коми рытъяс». Тыдалö, сы вöсна, мый сэки сиктын вöлiны Агния Андреевна кодь нырщикъяс. Зэв рад: талун клубын уна жö вöлi йöзыс. Бур кöйдыс, сiдзкö, Агния Андреевна да Михаил Николаевич Лвбедевыд коркö кöдзлöмаöсь. Недыр мысти Василий Ильич ещö содтiс: Медся ыджыд козин миянлы - йöзлöн бур паметь... Кор бурöн помнитöны, бурöн казьтылöны... Сöмын бурöн казьтылöны комияс шань да мича ань А. А. Сухановаöс. Вайöй казьтыштам сiйöс и кулöмсяньыс сизимдас во тыригас, сентябрь 13 лунö.
Г. БЕЛЯЕВ
Коми му. – 1995. – 12 сентября
