Перейти к разделу.
Эз вöв сыла кокни
Сиöма А.А. Сухановалöн паметьлы (сылöн чужемсянь тавося январь 11 лунö тырис 110 во)
Вомын сикт. 1915 во.
Кызвын олысьыс — нывбаба, челядь, пöрысь йöз. Мужикулов фронт вылын. Окопъясын кынмöны, порок, тшын ньылалöны. Мöд во мунысь война виис нин вель, унаöс Вомын сиктысь, Сьöкыд олöмыс вöтлö йöзöс нажöтка корсьны. Коймöд тöлысь Богословын пес кералö и Пока Иван Каракчиев, а горт овмöсыс Öньö Марья вылын. (Öньö Марья — Агния Андреевналöн чойыс.) Отсасьöны, дерт, ныв-пиыс: Яков, Микулай, Наталь. Яков ямщикалö - колльöдчö. 20—30 ур ради катöдö чиновникъясöс Пöддельнöйöдз либö Шойнатыö лэччöдö. Кызь урыд, дерт, абу уна, но гöль семьяыдлы и ciйö отсöг. Мыйтакö колö вичмöдыштны и медыджыд нылыслы – Санялы, кодi Кулöмдiнын велöдчö. Эз эськö кöсйы лэдзны мамыс, но кутан öмöй том йöзтö. Öнi Öньö Марья виччысьö нывсö рöштво кежлö каникул выло. Яков, дерт, паныд кайлас. Бокын да лоö тай со майшасьны мамыдлы. Со и талун ышлолалö керка дорас ноксиг. Яков сэнi жö, юкталö вöвсö, доддясьö — Нöвикö мöдöдчö.
- Этайö ыж ку пасьнас Агни тьöткаыд мед гартыштчас, а ичöтджыкнас Галясö тöбас. Мед оз жö кынмыны. Эн нюжмась. Öти кокыд сэнi, мöдыс — танi. Войгкежланыд пывсян лоö дась, — велöдö мамыс.
Здук мысти ыж ку пася, ас вöчöм гын сапöга детинка рöдтiс нин вöла-доддьын катыдлань. Кос пожöма ягöд чукльöдлö тöдса туйыс. Сэсся Чукльöм шор воас. Öтчыд сэтi кайигöн вöвсö Яков öддзöдiс сэтшöма, мый доддьын пукалысь писарлы отсасьысь Ветошкинкöд лым пиас бускыснсны. Вель дыр сэсся пыркöдчисны.
- Тэ, Яков, мöдысь корасны кö öдйöджык гöнитны, содтöд дон кор.
Яков сiдзи и вöчны кутiс. Сэсся Пöддельнöйысь Виссар Иван Волоцкойлöн либö Калистрат Иван Юшковлöн лавкаысь 3-4 ур дон преник кампет вöлi ньöблö, Мамыс буретш Волоцкой ордас пыравны тшöктiс. Важöн нин Öльö Öньö Даныциковлöн Марья нылыс мöвпалö вурсян машина йылысь, но некыдз 35 шайтыд оз чукöрмы. Пока Иван Богословысь лым сылiгас на воас. Но и сы вылö абу ыджыд надеяыс. Со Якушевкаысь Каневъяс вöлöмаöсь Богословын. Нажöтканыс муртса локнысö тырмöма. Öнi вурсян машинасö ньöбны Марьялы кöсйö отсавны Агния чойыс. Арнас корисны нин Во- лоцкойöс вайны машинасö. Сiйöс и видзöдлыны öнi тшöктiс Яковöс мамыс.
Со и Пöддельнöй. Яков сувтöдö вöвсö Волоцкойлöн керка дорö, ныр улас турунтор шыбитö.
Бур гöстьöс моз чолöмалö сiйöс Иван Виссарионович. Жöч банкаын лампа- сей на сeтiс, висьталiс, мый эз на вайны вурсян машинасö. Войнаыд быдлаö инмö: этшаджык вöчöны и колана тöвартö. Но регыд пö ваясны жö Усть-Сысольскас, Благовещенньö гöгöрын Пöддельнöйын лоас.
Регыд мысти Яков бара нин рöдтiс Нöвиклань. Тьöткаыс, Öньö Агния Суханова, вöлi нин дась. Шоныда пасьтасьöмаöсь нывкаыскöд, кöлач да сакар тубрасын, неыджыд козинъяс сьöрсьыныс: Пока Иванлы сера дöрöм, Öньö Марьялы мича чышъян, Натальлы ситеч платтьö, Яковлы гач дöра, мамыслы, Максим Дарьялы, шоныд ковта. Рöдвужсьыс некодöс абу вунöдöма, быдöнлы мыйкö да эмыщт.
Агния, Андреевна туйö петö куим арöса нылыскöд. Ciйöс кольлас мамыслы видзыштны. Аслыс колö Усть-Сысольск лэччывны, училищнöй сöветö пыравны. Мамыскöд да чой-вокыскöд серни эм и. Пырджык серамбана Агния Андреевна талун зумыщкодь. Сьöлöм вылас сьöкыд из быттьö.
Сьöкыд думъяс бергалöны. Каникул помасьтöдз колö аддзысьлыны и накöд,
кодъяслöн ныв-пиыс велöдчö Кулöмдiнын, Нёбдiнын, Ношульын, Усть-Сысольскын. Агния Андреевна жö: ышöдiс та вылö. Торъя нин нывбабаяс вöсна тöждысьö сiйö, зiльö, мед пыркнитчасны. А татшöмторйыс оз кажитчы Пöддельнöй вöлöстьса озыр йöзлы. Ёна лöгалöсы вылö Поддельнöйса вичкоысь поп Шумков. Эз нин öтчыдысь Нöвикын закон божий урок бöрын дивитлыв Агния Андреевнаöс:
—... Нехорошо, противоречит установкам Министерства народного просвещения и православной церкви, - рочасис сыкöд.
Рöштво бöрын бара крам праздникъяс. Земскöй училищеын велöдысьлы- вичкоö ветлытöг оз позь. Шумков эськö öдйö норасяс Усть- Сысольскö. Шыасьлöма нин тай инспектор Успаский дорö, кодi сэсся Сухановаöс öлöдiс. Кык во сайын, 1913 вося майын, инспекторыс волöма Якушевкаö да Гришнскö. Школаын испытаниеяс вылын пукалöма. А Нöвикöдз эз волы - эскö Щумковлы. Вермас на и удж вывсьыд вештыны.
Нöвикö Агния Андреевна воис Вотчасянь, ёна вöзйысис ачыс, öд Вомынöдз тасянь абу ылын, а сэнi мамыс, чой-вокыс олöны. Найö отсалöны сёян-юанöн, а ачыс налы сьöмтор вичмöдыштö. И Нöвикын йöзыс бур сьöлöмаöсь, Кöть кодсюрö öнi й букыша сы вылö видзöдöны, вöлöстьса старшинакöд вензьöм бöрын.
А лои тайö со кыдзи. Тöвнас, Микöла бöрын, Семö Вась Королев ордö, кö- нi школаыс, пырис вöлöстьса старшина. Юыштöма, гораа бызгö-сёрнитö, класс öдзöс öтторъя восьтö-пöдлалö. Агния Андреевна и öлöдiс, мед оз мешайт уроксö нуöдны. Ёна и пузис старшинаыд. Чиршöдлыны заводитiс, повзьöдлö. А Агния Андреевна оз жö сетчы. Урадник Бобров сюйсис, сэсся вöлöстьса суд видлалiс делöсö. Дорйисны Агния Андреевнаöс сиктсаяс и Пöддельнöйса больничаысь врач – Анатолий Николаевич Кедровский. Тöд вылас, тыдалö, кутiсны, мый Агния Андреевналöн батьыс, Öльö Öньö Да- ньщиков, вöлi уездса земскöй гласнöйöн, уездса управаса членöн и недыр нö- шта веськöдлiс управанас. Гришинскын школа улö керка лэптiс, кодöс Öньö Вась школаöн öнi на шуöны. Абу нин ловъя батьыс. Кувсьылiс 1911 воын чахоткаысь. Онi вокыс вылын, Öньö Вась вылын, школаыс. Агниялы эськö зэв окота ас грездас, Гришинскö, локны учителявны, но местаыс абу. Позьö, дерт, и Якушевкаö вöзйысьны. Кольöм во сэтчö велöдны воис Мария Александровна Шумкова. Пöддельнöй вичкоса поп Шумков ена кöсйö, медым нылыс Нöвикö локтас, сылöн приходö. Но Якушевкаын оз ло уджыс Иван Александрович Сухановлы - верöсыслы. Протеза мортыд оз на вермы быдтор вöчны.
Татшöм сьöкыд думъясöн и сöлö вöв доддьö Агния Андреевна. И туйын ciйö ёнджыка чöв олö либö кывмöд шуыштас нылыслы да Яковлы. ,
А сэсся Яков дорö гажтöмпырысь шыöдчö. Ковмас пö татшöм гажа вöр-ваыскöд тыдалö, торйöдчыны, мöд вöлöсьтö мунны. И ставыс Шумковъяс вöсна. Дерт эськö и сэнi коми войтыр олöны. И найöс колö велöдны, кыз унмысь пальöдны.
- А миян Александра Степановнаыд уроктö сöмын рочöн нуöдö. Коми кывтö оз сет, — воча шуалö Яков да содтö. - Бур эськöн, тэ кö, Агния тьöтка, локтiн миянöс велöдны.
Сёрнинад дженьдаммыштö туйыс. Вöр сайысь шондi водзын дзирдыштлöны Вомынса Благовещенскöй вичколöн крестъясыс. Со Гришинск грездтi нин рöдтöны. Вичко дорö муртса вотöдз Öньö Вась керка дорö сувтöны. Найöс виччысьöны нин...
Александр Панюков
Звезда. – 1995. – 17 января
