Перейти к разделу.
Тенад туй кузя со кымынöн ми мунiм
Тiян газетын гозмöдысь нин гижлiсны Агния Андреевна Суханова йылысь, кыдзи сiйö став кужöмлунсö и вынсö сетöма коми кывлы, комисö югыдлань нуöдöм вöсна, зiльöма велöдны грамотаö челядьöс и верстьö йöзöс.
НИМТÖМ НА нывкаöс (кодöс шуасны Агаияöн) Пöддельнöй вичкоö пыртны нулiгöн бать-мамыскöд тшöтш вежанявны ветлiс Ирина Даныцикова. Тайö менам ыджыд мамöй, сöмын на чужöм кагаыслöн рöднöй чой. Мамныс - Дарья Максимовна, батьныс - Андрей Алексеевич, Даныциковъяс - Вомын сиктса Першинскöй грездысь крестьяна. Налöн вöлöма 6 ныв да 1 пи. Ириналöн сэсся аслас лоöма 4 челядь; Полина кулöма кага вайигöн; Ыджыд Марьялöн (семьяас поп пуктылöма öти ним кык нывлы) - 4 челядь; Дзöля Марьялöн - 1 ныв; Ульяналöн - 2 ныв; Агниялöн - 1 ныв; Василий вокыслöн - 7 челядь. Ставыс Öньö Агнилöн вöлöма 19 племянник да племянница.
И сiйö унаöс туйдöдiс велöдчыны. Öкмысöн асьныс лоины велöдысьясöн. Медыджыд Ирина чойыслöн Василий, Александра да Федор (Королевъяс), Ыджыд Марьялöн - Александра Ивановна Обрезкова, Наталья Ивановна Поздеева, Ичöт Марьялöн - Мария Павловна Каракчиева, Ульяналöн - Евгения Васильевна Марева, Василийлöн - Владимир да Юлия Васильевна, аслас - Галина Ивановна Горбовская. Ставныс найö дыр велöдiсны, сиктъясын нуöдiсны ыджыд удж, кыпöдiсны культура, бырöдiсны неграмотность.
Менам мам, Александра Григорьевна Макарова (Йриналöн нылыс), велöдiс Ыджыдвиддзын да Выльыбын. Кöть аслас 9 челядь, но луннас вöлi уджалö школаын посни челядькöд, а рытьяснас сiйö жö школаын велöдö верстьöясöс лыддьысьны да гижны. Me зэв бура помнита, кыдзи ичöтöн на ветлывлi да сэнi и велалi лыддьысьны да гижны. Дугдiс мамöй учителявны 1952 воын, кор ме локтi ачым нин велöдысьöн.
Шойнатыын дыр велöдiс Александра Ивановна Обрезкова. Böлi зэв активнöй: сьылiс клубын, сьыланкывсö ачыс гижлывлiс и. Сылöн аслас 2 ныв лоины учительясöн. Лилия Александровна Казаринова посни челядьöс коми сиктьясын велöдiс, артиставлiс тшöтш. Роза Александровна Юрьева роч кыв да литература велöдiс Ленинградын. Ыджыд Марьялöн мöд нылыс, Наталья Ивановна Поздеева, помавлiс комвуз. Сiйöс велöдлöма весиг Надежда Константиновна Крупская. Наталья Ивановна уджавлiс Аныбын, Удмуртияын, Амурскöй областьын и мукöдлаын. Пенсия вылö петалöм бöрын нин бара уджыштiс Нёбдiн сиктын, зэв ёна тöждысис выль школа вöсна. Мария Павловна Каракчиева (Ичöт Марьялöн нылыс) Кöрткерöсын да районын велöдiс физика.
Дереваннöйын велöдiс Евгения Васильевна Морева (Ульяналöн нылыс). Висерын, сэсся Сыктывкарын велöдiс Владимир Васильевич Даньщиков, а Юля чойыс первойсö уджалiс школаын жö, бöръя кадсö библиотекаралiс Пöддельнöйын.
Мамьяс туй кузя мунiсны налöн челядь. Марья Павловна Каракчиевалöн ныв помалic Горьковскöй пединститут, ноксис медпосниыскöд садикъясын, сэсся уджалiс Кöрткерöс роноын да минпросын, бöрыннас Сыктывкарын нин - бара садикъясын.
Ме школаыдлы ceтi 40 во, комынсö лои директоравны. Тайö зэв сьöкыд удж - эг тöдлы шойччан лун ни праздник. Йöз пöвстын нок пыр вöлi уна: агитатор, пропагандист, депутат. Клубса сцена вылö на унаысь ковмылiс кайлыны учительяскöд да велöдчысьяскöд öтлаын - гажöдны сиктса йöзöс. Сиктад велöдысьыдлы оз позь овны сöмын урок сетöмöн. Кык ыджыдтор век жö вöчöма чужан сиктлы - шöр школа восьтöма (вöлi семилетньöй) и лои кыпöдöма сылы кирпичысь выль стрöйба. Böлi кö ловъя Агния тьöт, эськö тшöтш нимкодясис, вермис и ошкыштны. Татшöмöсь öд и сылöн кöсйöмъясыс вöлiны. Агния Андреевналöн племянникъяс да налöн челядь пиысь петiс 18 учитель. Унаöн велöдiсны 40 да унджык во.
КÖРТКЕРÖС РАЙОНЛÖН администрация и öнi донъялö Агния Сухановалысь уджсö. Кöрткерöсын эм А.Суханова нима улича. Образование отдел быд во нуöдö "Вося велöдысь" конкурс, а вермысьясыслы лöсьöдöма А.Суханова нима премияяс.
Даныцикова рöдвужысь петiсны эз сöмын велöдысьяс. Эм уна юрист. Ульяналöн нылыс дыр уджалiс Вöлöгдаса областнöй судын председателъöн. Тайö Тамара Васильевна Вельсбах. Сылöн Володя пиыс и внукыс лоины юристъясöн. Николай Леонидович Ген - тайö вужйысь жö петöм морт. Кöрткерöсса РОВД-ысь начальник Александр Дмитриевич Даныциков - Суханова воклöн внук.
Унаöн уджалiны видзму овмöсын. Виталий Васильевич Даньщиков - заслуженнöй агроном, А.Сухановалöн племянник. Уджалiс "Сторожевскöй" совхозын, öнi олö Шойнатыас. Бурöн казьтылöны Кöрткерöсын да Лöкчим вожын олöма йöз Дмитрий Григорьевич Королевöс, кодi дыркодь уджалiс ветеринарöн. Челядьыс да внукъясыс öнi олöны Кöрткерöсын. Уна вын пуктic видзму овмöс кыпöдöмö Василий Петрович Макаров, кодi бöръя кадö вöлi Нившерскöй госпромхозын директорöн.
Агния Сухановалöн внукыс - Глеб Горбовский - писатель. Уджалiс Ленинградын "Аврора" журналын. Поэт и прозаик. Сылöн кывъяс вылö лöсьöдöма сьыланкывъяс.
Коми радиоын уджалö Наталья Макарова (Даньщикова). Журналистöн жö лои Маргарита Мишарина. Кöрткерöс культура керкаöн веськöдлö Алексей Леонидович Ген, бур музыкант. Сылöн дедыс, Николай Иванович, Ыджыд Марьялöн пи, уси фронт вылын.
Сухановалысь ме бура тöдлi 2 чойсö да воксö - Ыджыд Марьяöс, Ульянаöс и Василейöс (Вомынын шуöны Öньö Васьöн). Уля тьöт йылысь кöть дзонь небöг гиж. Kaгa вайигöн кулöмаöсь сылöн кык чой - Полина да Ирина. И Ульяна мунöма велöдчыны акушеркаö (важöн вöлi шуöны гöгиньöн).
Уна во бабитiс, отсалiс кага вайигöн, кымын нывбабаöс видзис кулöмысь. Унаысь меным висьтавлiс, кыдзи сiйöс новлöдлiсны вöлöн Кулöмдiн вожын и Шойнаты районын. Сылöн вöлi керка Дереваннöйын. Унаöн на сэнi тöдöны Ульяна Андреевна Вельсбахтö.
Даныциков вужйысь петöм йöзыс олöны Коми му пасьта. Эмöсь и Ленинградын, Ижевскын, Вöлöгдаын, Ярославльын, Владивостокын, Красноярскын, Минскын, Узбекистанын да с.в.
Ыджыд аттьö висьтала Кöрткерöсскöй районса удж да олöм петкöдлан музейысь директор Александр Александрович Панюковлы. Уна вын, кад пуктic, мед Агния Сухановалысь олöмсö туявны да музейын вöчны экспозиция. Корсис карточкаяс, ветлiс и Вöлöгдаö, кöнi oлicны Вельсбахъяс. Ыджыд удж та кузя вöчис Анатолий Антонович Смилингис, районын зэв нималана морт. Эз öти во лöсьöд музей.
Тайö зэв колана удж. Ас районысь петöм бур йöзсö оз позь вунöдны. А миян таланта йöзыс тырмö.
Нина Петровна МИШАРИНА,
Коми Республикаса заслуженной учитель.
