Перейти к разделу.
Выль вокöд встреча
Кор войся пемыд пытшкысь кыа-чой
Дзик первойысь на таво мыччис бансӧ,
Выль волы рапорт сетіс нин забой:
- Ме тэнад локтӧдз тырті тэнсьыд плантӧ!
- Збыль шуан. Некод тан эз подкачайт,—
- Мартенлӧн гӧлӧс юркнитіс вӧр вомӧн,—
Ме кольӧм во нин сывді локтан вося сталь,
И ставсӧ тайӧс тавося изшомӧн.
Эз терпит, тутӧстіс сэк паровоз:
- Ме сідзжӧ кольӧм воын таво пыдди,
Страналысь паськыд эрдъяс вуджигмоз,
Кык мында унджык километръяс лыдди.
Выль вокӧд паныдасис машинист
И шуӧ:—Видзӧдлы тшӧтш менсьым уджӧс.
Тэ локны татчӧ кольӧм во эн письт,
А ме нин тэнсьыд туйтӧ ставнас вуджи.
Стӧч график серти ветлан тэ, выль во,
Он вермы торкны ассьыд расписанье.
А менам мӧдног артмис: видзӧд со—
Ме воӧн тырті кык вося заданье.
Но век жӧ ассьым талунъя маршрут
Ме сиа тэн, выль во. И сӧмын тэныд.
Тэ став сӧветскӧй йӧзлы вайин шуд,
И выль путёвка киӧ сетін меным.
«Войвыв кодзув» Литературно-художественнöй да общественно-политическöй журнал
№ 1 1949 год.
