Перейти к разделу.
Сийö Агния Сухановалы
«Сьöкыд донъявны, кор ставöн öткодьöсь»
Ми юöртлiм, мый районын куим лун чöж мунiс-гыалiс «2001 вося велöдысь» конкурс. Вермасисны вит морт. На пиысь конкурсса лауреатъясöн лоины Галина Габова да Ольга Макарова, дона приз шедöдiсны Надежда Решетихина да Людмила Циммерман. Любовь Федосеева лоис вермысьöн. Сiйö жö кутас ордйысьны республикаса конкурсын.
Талун ми нöшта уськöдлам тöд вылö велöдысьяслы «пöсь» ордысьöмсö да сёрнитыштам конкурслöн тöрытъя, талунъя да аскиа лун йылысь. Миян юалöмъяс вылö вочавидзö велöдан юкöнса методкибинетöн веськöдлысь Н. И. Ветошкина.
- Нина Ивановна, конкурслы кывкöртöд вöчигöн Тi шуинныд, мый воысь-во пыр сьöкыдджык донъявны велöдысьяслысь конкурснöй уджъяссö…
- Сiдзи и эм. Сьöкыдыс сыын, мый велöдысьяс асланыс тöдöмлунъясöн, кужанлунöн öткодьöсь. А колö торйöдны медбурсö. Со и жюрилöн лыдпасъясыс торъялöны сöмын куишöмкö сёöд юкöн (сотая доля) вылö. Миянлы, жюриса членъяслы, вöвлi вывтi сьöкыд.
- Кодi Тiянкöд юкис тайö сьöкыдлунсö?
- Жюриын, кыдз и быд пöрйö, школаса да челядьлöн садса уджалысьяс, сöмын эз вöвны таво предметникъяс. Сюсь да ыджыд опыта йöз донъялiсны. Тайö В. Д. Бронникова – Аджеромаса школаысь веськöдлысьöс вежысь, Я. К. Зелинская – Усть-Лöкчимса школаысь веськöдлысьöс вежысь, Н. М. Ахновская – Мордiнса школаысь ичöт классъяс велöдысь, Р. Я. Коюшева – Кöрткерöсса «Лысва» челядьлöн садйöн веськöдлысь, Н. А. Макавкина – «Солнышко» челядьлöн садйöн веськöдлысь, Н. А. Елфимова – «Ёлочка» челядьлöн садйын велöдысь.
Меным, кыдз жюриса председательлы, вöлi накöд уджавны кивыв, найö кужöны гöгöрвоны öта-мöдсö.
- Кыдзи ышöданныд велöдысьясöс конкурс вылö?
- Воысь-во тайö уджыс сетчö пыр сьöкыдджыка. Дыр кад чöж ковмылö сёрнитны, ышöдны, тöдчöдны конкурслысь коланлунсö велöдысьлöн уджын. Мыйын помкаыс? Ог тöд. Но велöдысьяс воысь воö пыр сьöкыдджыка кыпöдчöны. Гашкö, вывтi вежавидзысьöсь, оз кöсйыны петкöдчыны йöз водзö. Мöд-кö, оз быд школаын мун асланыс велöдысьяс костын конкурс. Сöмын Шойнатыса школаын (веськöдлысьыс А. М. Захаренко) быд во нуöдöны сiйöс. Тайö школаыс некор на эз кольччыв районнöй ордйысьöмысь бокö, Кöрткерöсса школаын мунö сiдз шусяна «Фестиваль уроков». Быд велöдысь сетö восьса урок. Медбур урок сетысь и петö конкурс вылö. Шойнатыса челядьлöн садйын мунöны жö асланыс уджалысьяс костын ворсöмъяс, да таво нöшта Нёбдiнса садйын нуöдiсны. Со тайö велöданiнъясысь и кокни велöдысьöс конкурс вылö, а мукöдас ковмö веськöдлысьлы дыр кад чöж быд велöдыськöд сёрнитны, мед эськö кодкö водзмöстчас…
- Медшöр могыс конкурслöн?
- Петкöдлыны кужысь , сюсь, писькöс велöдысьöс. Тöдчöны сылысь тöдöмлунъяссö да сямсö.
- Кутшöм тшупöдъяс таво венiсны конкурсантъяс?
- Медводз уджвывса ёртъясыс тöдмöдiсны конкурсантъяскöд. Та бöрын быдöн сетiс восьса урок. Сэсся дорйис авторскöй удж, медбöрын нуöдiс урок-импровизация.
- Медся тöдчана вермöмъяс тавося ворсысьяслöн?
- Шойнатыса челядьлöн садйысь велöдысь Галина Ивановна Габова торъя дасьлун петкöдлiс авторскöй программа дорйигöн. Сылöн аслыспöлöс система, метдика. Занятие вылын быд экспонат вöлi места вылын и ворсiс ассьыс роль. Сiдзжö авторскöй програма дорйигöн петкöдлiс асьсö Одыбса челядьлöн садйысь велöдысь Людмила Сергеевна Циммерман. Сылöн чукöрмöма сэтшöм озыр материал, мый позьö на отсöгöн нуöдны оз öти занятие.
Кöрткерöс школаысь математика велöдысь Надежда Семёновна Решетихина шензьöдiс сiйöн урок вылын ставыс вöлi кыдз быттьö ёсьтöма, нинöм лишнöйыс, ковтöмыс. Уроксö сетан методикаыс традиционнöй, бура дасьтöма быд здук.
Шойнатыса школаысь ичöт классъяс велöдысь Ольга Серафимовна Макарова сетiс виччысьтöм мича сёрниа урок. Сiйö ышöдiс классын быд велöдчысьöс творческöй удж вылö. Урок помас челядь гижисны сочинение тöвся вöр йылысь.
Нёбдiн школаысь математика велöдысь Любовь Ивановна Федосеева чуймöдiс уроклöн теманас нин – «Симметрия в мире прекрасного». Уроклöн медшöр могыс – математика пыр нравственнöя велöдöм. Уроксö сетiс серпасалöмкöд, вöр-вакöд йитöдын. Рочöн кö: «привить любовь к математике через мир прекрасного». Тайö медводдза воськовъяссö колö отсавны подулавны.
- Конкурсын петкöдлiсны асьнысö и школаса, и детсадса велöдысьяс. А öд налöн уджныс торъялö. Кыдзи верминныд донъявны найöс?
- Донъялiгöн муртыштiм велöдысьлысь культурасö, сёрнисö, тöдöмлунъяссö, челядькöд öти кывйö воны кужанлунсö, уджачлунсö, творческöй кöсйöмъяслысь аслыспöлöслунсö, велöдан технологиясö да сiдз водзö. Но ми таво воим öти кывйö, мый конкурссö на костын колö нуöдны торйöн.
- Мыйöн торъялiс тавося ордйысьöмыс воддзаясысь?
- Таво велöдысьяс медводз ассьыныс уроксö быд боксянь. Тайö ыджыд отсöг жюрилы. Таво жö медводдзаысь лöсьöдiм Агния Суханова нима козин. Водзтiсö эгö тöдöй, кутшöмöн сылы лоны. Таво велöдан управление корис öткымын школаысь труд велöдысьясöс вöчны татшöм козинсö пуысь. Чайта, сiйö зэв бура артмис. Кужысь кияса йöз вöчисны быд боксянь мича козин.
- Кыдзи чайтанныд, колöны-ö татшöм чукöртчылöмъясыс?
- Колöны. Öти-кö, велöдысьяслöн эм позянлун аддзысьлыны мукöд сиктъясса велöдысьяскöд. Мöд-кö, асланыс уджö найö вермасны пыртны уна выльтор, мыйöн тöдмасявны конкурс вылын. Коймодкö, тайö – позянлун лэптыны квалификация. Нёльöд-кö, тайö – аттестациялöн формаясысь öти.
- Кöсъяннныд-ö мыйкö вежны водзö вылö?
- Огö. Гашкö, мыйкö ковмас содтыштны, чинтыштны.
- Уна-ö ставыс велöдысьыс районын?
- Витсёысь унджык морт.
- Конкурс нуöдöм – ыджыд удж, лоö ёна котравны-бергавны, сьöм корсьны, подулалöм…
- Сiдз и эм, конкурс нуöдöм – сiйö абу сöмын бумагаяс кырымалöм. Велöдан юкöнса быд уджалысьлы сюрö вель уна тöжд, майшасьöм. Но медыджыд пайыс танi, дерт жö, велöдан управлениеöн веськöдлысь И. Д. Даньщиковлöн. Сiйö вöрзьöдö, туйвизь индö, судзöдö… Быд во отсалö сьöмöн да ышöдана кывйöн муниципальнöй юкöнса юралысь Н. Г. Ливсон. Юралысьлöн нима козин – велöдысьяслöн ыджыд шедöдöмтор.
- Кутшöм пас колис тайö конкурсыс Тiян вежöрын?
- Меным нимкодь, мый ставыс артмис лючки-бура, мый миян велöдысьяс – збой да уджач йöз, оз сулавны места вылас, а пыр водзö мунöны, шедöдöны выль вермöмъяс.
- Аттьö сёрниысь.
Ангелина Фёдорова
Звезда, 2001, 20 марта
