Перейти к разделу.
Став сьöлöмсö сетöны челядькöд уджлы
Кöрткерöсса школаын тöв шöр 17 лунö ордйысисны классöн веськöдлысьяс. «Медся «класснöй» классöн веськöдлысь» -тадзи шусис тай медводдзаысь на котыртöм конкурсыс.
Быд во миян районын мунлiс «Вося велöдысь» районса конкурс, кöнi петкöдлöны кужысь,
сюсь, писькöс велöдысьöс, тöдчöдöны сылысь тöдöмлунсö да сямсö.
А таво районса велöдан управление котыртiс нöшта öти ордйысьöм - классöн веськöдлысьяс пöвстын. Конкурслöн могыс - петкöдлыны енбиа да мывкыдсьöдан
уджын творческöя уджалысь педагогъясöс, тöдмöдны на опытöн.
«Медся «класснöй» классöн веськöдлысь» ордйысьöм мунiс Кöрткерöсса школаын. Конкурс нуöдысьяс, велöдан управлениелöн информационно-методическöй кабинетысь специалистъяс Т.А. Коюшева да Е.Г. Попова корисны сцена вылö конкурсантъясöс да дженьыдика тöдмöдiсны накöд. Классöн медбур веськöдлысьлысь ним шедöдöм вöсна ордйысьöмö пырöдчисны квайт педагог: география да экономика велöдысь Е.В. Рябинина
(Кöрткерöсса школа), посни классъяс велöдысьяс Н.Ю. Ульнырова (Кöрткерöсса школа) да М.В. Захаренко (Шойнатыса школа), география велöдысь А.А.Габова (Висерса школа), коми да роч кыв велöдысь Е.Ф. Царёва (Керöсса школа), география да биология велöдысь Н.В. Тимушева (Нёбдiнса школа).
Кыдзи пасйис жюриöн веськöдлысь, районса велöдан управлениеöн юрнуöдысьöс вежысь Л.В. Нестерова, буретш классöн веськöдлысьяслы вичмö школаын медсьöкыд уджыс - велöдны-мывкыдсьöдны быдмысь войтырöс. Таво конкурсыс нуöдсьö медводдзаысь, но
чайтсьö, пырас сiйö бур традицияö и лоö быд восяöн.
И со пансис конкурс. Медводдза тшупöдыс шусис
«Вайö тöдмасямöй». Тайö юкöнын классöн веськöдлысьяс пиысь быдöн висьталiс ас йывсьыс. Артмис аслыспö
лöс тöдмасьöм. Велöдысьяс висьталiсны ас йывсьыныс кывбуръяс, сьыланкывъяс, челядьлöн серпасъяс серти. Унджык конкурсантыслы отсасисны уджъёртъясыс.
А Е.Ф. Царёвалöн отсасьысь котырын вöлiны и сылöн велöдчысьясыс. Челядь быд боксянь ошкисны ассьыныс мöд «мамнысö».
Мöд юкöнын педагогъяс тöдмöдiсны да дорйисны ассьыныс мывкыдсьöдан уджтассö. Конкурсантъяс висьталiсны, кутшöм нырвизьын уджалöны челядькöд, кутшöм мероприятиеяс нуöдлöны накöд, вöчисны быдтöм-велöдан уджлы кывкöртöдъяс. Ассьыныс уджсö дорйигöн велöдысьяс вайöдiсны ыджыд мывкыда йöзлысь быдтöм-велöдöм йылысь кывъяссö.
Классöн веськдлысь Е.В. Рябинина аслас уджын медшöр нырвизьöн бöрйöма экологическöй воспитание. Велöдысь лыддьö, мый буретш вöр-ва лоö сэтшöм гöгöртасöн, кöнi мортыс сöвмö кыдзи личность, да петкпеткöдчöны сылöн бур торъялöмъяс. Елена Владимировна тöдмöдс «Экоград» мывкыдсьöданногöн (воспитательнöй системаöн). Сылöн медшöр юкöнъясöн (компонентъясöн) лоöны дзоньвидзалун, радейтöм, мичлун.
Н.В. Тимушева лыддьö классöн веськöдлысьлöн могöн - аддзыны быд велöдчысьлысь аслыспöлöслунсö, пыдди пуктöмöн матыстчыны сылöн кöть неыджыд петкöдчöм дорö, медым эскöдны быдмысь мортöс сылöн туянлунын да отсавны сöвмöдны торъяланлунсö. Челядькöд уджын Надежда Викторовна кутчысьö татшöм видзöдласö: пыр гöгöрвоны велöдчысьясöс, пыдди пуктыны да радейтны найöс, некор не дöзмыны, нимкодясьны,
шогсьыны, шензьыны накöд öтлаын.
М.В. Захаренко тöдчöдiс, мый классöн веськöдлысь водзын сулалö уна мог, уджын эм уна нырвизь, на пиысь öтиöн лоö бать-мамкöд удж. Тайö нырвизьыс талун зэв колана. Öд бать-мам чайтöны, мый кагаöс велöдны-мывкыдсьöдны колö школалы, а налöн мог - отсавны
таын либö жö нинöм не вöчны. Татшöм ылалöм видзöдлас вöсна мывкыдсьöдан могыс школалöн да семьялöн сорласьö. Марина Владимировна чайтö, мый велöдысьлы колö бура аддзыны быдмысь мортлысь водзö сöвмöмсö да отсавны семьялы сiйöс пöртны, а сiдзжö
колö лöсьöдны велöдчысьлöн бать-мамкöд бур йитöдъяс, налысь арлыдсö, аслыспöлöслунсö тöд вылö босьтöмöн, да отсавны индöм могъяс пöртöмын бöрйыны
веськыд туй.
Велöдчысьыд овлö быд сикас: кодкö урок дырйи дурö, кодкö сералö, кодкö очсалö. Классöн веськöдлысь веськавлö вöвлытöм ситуацияясö да гöгöрвоöдö быд сикас юалöм. Та вöсна конкурслöн коймöд тшупöдыс шусис «Ыджыд мывкыда сюзь» («Мудрая сова»). Тайö юкöнын классöн веськöдлысьяслы колö вöлi висьтавны сьöкыд, вöвлытöм ситуацияысь петанног.
Конкурс нуöдысьяс шуисны разьны татшöм гöрöд: шуам, кутшöмкö помка вöсна мероприятие эз артмы. Кывкöртöдъяс вöчтöдз коли сöмын öти минут. Мый эськö найö дженьыдика шуисны велöдчысьяслы? Н.Ю. Ульныровалöн вочакывйыс вöлi татшöм: «Ми
старайтчим, но тайö пöрйö гажыс муртса-муртса эз артмы. Ми артыштам тырмытöмторъяссö да локтан мероприятиесö нуöдам бурджыка, кыпыдджыка». Пöшти
татшöм жö вочакывъясыс вöлiны и мукöд велöдысьлöн. А медым челядь кыпыд руöн мунiсны гортаныс, М.В. Захаренко вöзйис помавны гажсö ворсöмöн. Марина Владимировна тöдчöдiс, мый внекласснöй мероприятие нуöдiгöн классöн веськöдлысьлы колö водзвыв ставсö артыштны. Сiйö жö аслас классын став мероприятиесö помалi
ворсöмöн, öд ворсöм, кыдз шуласны, шыльöдö став ёсь пельöссö.
И бöръя тшупöдын конкурсантъяслы колö вöлi петкöдлыны, мый найö радейтöны вöчны прöст кадö. Тöдчис, велöдысьяс бура дасьтысьöмаöсь та кежлö. И кывбуръяс, и частушкаяс, и нöдкывъяс отсöгöн найöтöдмöдiсны асланыс лов кыпöдана уджъясöн. А сьöлöм сетысь уджыс педагогъяслöн вöлöмкö уна пöлöс. Шуам, А.А. Габова прöст кадас радейтö веськöдлыны автомобильöн, лыйсьыны пневматическöй винтовкаысь, а сiдзжö вöчавны кипом уджъяс, серпасасьны, вышивайтчыны. А медыджыд гаж Александра Анатольевналы
вайö челядькöд сёрнитöм. Буретш та вылö и вичмöдö велöдысь медуна кадсö.
М.В. Захаренко тайö юкöнын петкöдчис кыдзи фокус вöчалысь, тöдысь. Марина Владимировна сеталiс видзöдысьяслы нöдкывъяс, а вочакывъяс бöрын отсасьысьяс- уджъёртъясыс - отсöгöн неыджыд кудйысь перъялiс ассьыс уджъяссö. Прöст кадас сылöн радейтана уджöн лоö кысьöм, вурсьöм, консервируйтчöм, пöжасьöм да семьялысь фотоальбомъяс мичмöдöм.
И со лов шы кутöмöн велöдысьяс виччысисны жюрилысь кывкöртöдъяс вöчöм. Сiдз, конкурсын вермысьöн, медся «класснöй» классöн веськöдлысьöн шуöма М.В.Захаренкоöс. Мукöд велöдысьлы сетöма лауреатлысь ним. Велöдан управление нимсянь Людмила Витальевна став велöдысьлы козьналiс мича дзоридзьяс да небöгъяс.
Ассьым гижöдöс окота помавны М. Лермонтовлöн кывъясöн, кодъясöс конкурс дырйи вайöдiс М.В. Захаренко: «Воспитайтöм - медсьöкыдтор: чайтан, öнi ставыс помасис, но он на босьт, ставыс сöмын заводитчö».
Александра Доронина
Звезда, 2007, 30 января
