Перейти к разделу.
Вермысьлысь ним шедöдiс Ирина Ракова
Кыдзи водзынджык гижлiм нин, урасьöм (февраль) 10-11 лунъясö мунiс А. Суханова нима козин вылö «2009 вося велöдысь» конкурс. Тайö ордйысьöмыс лои нин быд восяöн и нуöдсьö сы могысь,медым сöвмöдны челядьöс велöдöмын выльпыртöмъяс, паськöдны водзын мунысь
велöдан опыт, а сiдзжö петкöдлыны енбиа, кужысь, сюсь велöдысьöс, тöдчöдны сылысь тöдöмлунсö да сямсö.
Тайö пöрйö конкурсö пырöдчылiсны сизимöн: география велöдысь Е.В. Рябинина,
посни классъяс велöдысь Т.Г. Киселёва, история да обществознание велöдысь И.А. Ракова
(Кöрткерöсса шöр школа), физкультура велöдысь М.Я. Ненева, роч кыв да литература
велöдысь Г.В. Черняева, математика велöдысь Г.Н. Каракчиева (Шойнатыса шöр школа) да посни классъяс велöдысь Т.С. Мишарина (Ыджыдвидзса шöр школа). Колö шуны, та
мында участвуйтысьыс вöлi медводдзаысь на.И нöшта öти торъялöм: таво ордйысьысьяс
пöвстын кызвын велöдысьыслöн вылыс квалификация и пöшти ставныс ыджыд опытаöсь. Сöмын медся том велöдысьлöн, И.А. Раковалöн, велöдан опытыс медэтша - 5 во.
Ордйысьöмыс вöлi кык тшупöда. Медводдза турын (заводитчис тöв шöр 13 лунсянь) велöдысьяс ыстiсны индöм формаяс серти материалъяс, а мöдын кутiсны кык экзамен
- тöдмöдiсны выльпыртöмлöн балаöн, нуöдiсны велöдан занятие да асьныс донъялiсны сiйöс.
Медводдза лунö велöдан уджын тöдöмлунсö да сямсö петкöдлiсны Кöрткерöс школаса велö
дысьяс, а мöд лунö - Шойнатыса да Ыджыдвидзса школаясысь педагогъяс. Кутшöмöн жö найö петкöдчисны жюри водзын?
Елена Владимировна Рябинина челядьöс велöдöмын вöдитчö сiдз шусяна проектнöй да сöвмöдан технологияясöн, пестö аслас быдтасъясын вöр-ва дiнö муслун. Сылöн урокыс челядьлы збыль вöлi интереснöйöн да вежöр югдöданаöн.
Галина Николаевна Каракчиева зэв бура тöдö велöдан методика, корсьысьö да повтöг пыртö велöдан уджö выльторъяс, торйöн кö, юöр сетан технологияяс. Сiйö кужöмöн нуöдiс уроксö сiдз шусяна интерактивнöй пöв отсöгöн.
Татьяна Семёновна Мишарина - творческöй велöдысь, сетö «Чужан кыв» велöдчан небöг дасьтöм кузя вöзйöмъяс. Сiйö нуöдiс урок Шойнатыса школаын, 1 классын, и кужис öдйö сибöдчыны челядь дорö. Велöдан занятие дырйи вöдитчис дзоньвидзалун видзан технологияöн, пыртiс ворсöмъяс.
Галина Власовна Черняевалöн велöдан стажыс 41 во. Методика боксянь сылöн урокъясыс мунöны вылыс тшупöдын. Велöдöмын сiдзжö вöдитчö öнiя кадся выль технологияясöн, сетö велöдчысьяслы зумыд тöдöмлун. Галина Власовна - ас уджын збыль мастер. Сылöн урокыс вöлi озыр сюрöса, интереснöй и воис сьöлöм вылö и жюрилы, и челядьлы.
Ирина Анатольевна Ракова - ыджыд творческöй позянлуна велöдысь. Велöдöмын сiйö вöдитчö сiдз шусяна кейс-метод выль технологияöн, зiльö сöвмöдны челядьлысь мöвпалöм, туялöм. Урок дырйи найö öтув уджалöны велöдыськöд, кокниа висьталöны да дорйöны ассьыныс видзöдлассö.
Татьяна Гелиевна Киселёва - аслас уджын мастер, паськыд тöдöмлуна специалист, пыр зiльö кыпöдны ассьыс кужöмлунсö, пыртö уджö выль велöдан формаяс. Челядьöс велöдiгöн вöдитчö сiдз шусяна проблемно-диалогöвöй да личностно-ориентированнöй технологияясöн. Урок дырйи Татьяна Гелиевна кужö лöсьöдны кыпыд лад, бурпырысь сёрнитö челядькöд, татшöм ногöн ладмöдö велöдчысьяс бура уджавны, босьтны бур тöдöмлун.
Марина Яковлевна Ненева урокъяс нуöдiгöн пыртi быд сикас ворсöм. Уджын вöдитчö дзоньвидзалун видзан технологияясöн. Велöдчысьяс, велöдысьяс да бать-мам пöвстын паськöдö физическöй культуралысь коланлун. Физкультура урок – методика серти зэв сьöкыд, но Марина Яковлевна пуктöм могъяссö вермис пöртны.
Жюрилы вöлö вель сьöкыд бöрйыны конкурсын вермысьöс, öд став ордйысьысьыс вöлi ыджыд кужöмлуна. Но век жö быд боксянь донъялöм бöрын «2009 вося велöдысь» конкурсын вермысьöн шуисны медтом педагогöс, Ирина Анатольевна Раковаöс. Мукöдыс жö лоины лауреатъясöн. Кыдзи пасйис жюриöн веськöдлысь Н.И. Ветошкина, став велöдысьыс, кодъяс пырöдчылiсны конкурсö, педагогическöй уджын мастеръяс, öд ставöн вермисны петкöдлыны
ыджыд кужöмлун район тшупöдын.
Конкурсын вермысьлы и лауреатъяслы вичмисны Почёт грамотаяс да козинъяс. Ордйысьысьясöс чолöмалiсны да пасйисны козинъясöн Шойнатыса да Кöрткерöсса школаясöн веськöдлысьяс А.М. Захаренко да В.В. Ульянова, а сiдзжö «Шойнаты» сикт
овмöдчанiнса администрацияöн юралысь Т.П. Потапова. Сиисны велöдысьяслы творческöй кыпыдлун, шуд и бур ваян уджын выль вермöмъяс.
Медпомын сьылöм-йöктöмöн петкöдчисны Шойнатыысь енбиа челядь.
Александра Доронина
Звезда, 2009, 17 февраля
