Перейти к разделу.
Вося велöдысь
Корткерöсса шор школаын коми кыв да литература велöдысь Лидия Игнатова - «Вося велöдысь - 2011» районса конкурсын вермысь. Сiйö велöдö 21 во. Лидия Николаевна - вылыс квалификацияя велöдысь - пыртö уджас чужан му туялан материалъяс, коми йöзкостса фольклор. Рольясöн ворсöм, балаяслöн (проектъяслöн) метод, котырöн да кыкöн уджалöм да сiдзи водзö - ставсö тайöс велöдысь пыртö ыджыд вермöмъяс шедöдан нырвизя велöдöмö. «Вося велöдысь» радейтö лыддьысьны, медсясö философия сюрöса небöгъяс.
Суботаö Кöрткерöсса шöр школаын вöчисны кывкöртöдъяс Агния Суханова нима козин вылö «Вося велöдысь - 2011» районса конкурслы. Ордйысьöмö пырöдчысь енбиа дас велöдысь пиысь сизимöс пасйисны конкурслöн лауреат нимöн. Медводдза да мöдöд места шедöдiсны юрсиктса шöр школаысь велöдысьяс, коймöдын лоис Шойнаты сиктысь велöдысь.
Конкурс восьтiсны рака (март) 3 лунö Локчимдiнса шöр школаын. Куим лун чöж районса велöдысьяс петкöдлiсны уджсикас серти кужöмлун-тöдöмлунъяссö. Нуöдiсны восьса урокъяс, мастер-классъяс, уджъёртъяскöд юксисны опытöн. Найö уджалiсны-ордйысисны Локчимдiнса, Адзорöмса да Кöрткерöсса шöр школаясын. Кыдзи тöдчöдiс конкурслöн жюриöн юрнуöдысь Анна Шрамм, ордйысьысьяс пöвстын вöлiны пö и ыджыд опыта, и том, велöдан уджö неважöн на босьтчысь, велöдысьяс. Та вылö видзöдтöг, ставныс пö петкöдлiсны ассьыныс велöдан уджсямсö. «Конкурс петкöдлiс, мый тайö велöдысьясыс - Енсянь велöдысьяс», - кывкорталiс доньялысь А. Шрамм.
Конкурслы кывкöртöдъяс вöчигöн медводз пасйисны лауреатъясöс. Найöс чолöмалiс велöдöмöн районса веськöдланiнöн юрнуöдысь Юлия Савина. Грамота да ловъя дзоридзьяс сетiсны ордйысьöмлöн лауреатъяслы: Ольга Федосеевалы (Нёбдiн), Валерьян Ивановлы (Ыджыдвидз), Татьяна Елохиналы (Поддельнöй), Зоя Черкасовалы (Локчимдiн), Валентина Бармичевалы (Керес), Валентина Забоевалы (Адзорöм) да Надежда Королёвалы (Поддельнöй).
А медводдза местаяс босьтысьясöс нимöдiс да чолöмалiс районса администрацияöн веськöдлысь Николай Доломина. Коймöд местаысь Грамотаöн да дзоридзьясöн сiйö пасйис Шойнатыса шöр школаын посни классъясöс велöдысь Наталья Макароваöс. Мöд местаöн чолöмалiс Кöрткерöсса шöр школаын посни классъясöс велöдысь Зоя Вольфöс. А медводдза местаöн - «Вося велöдысь - 2011» нимöн - Кöрткерöсса школаын коми кыв да литература велöдысь Лидия Игнатоваöс. Сiдзжö Николай Иванович бурсиис став велöдысьыслы: налöн тöдчана уджын выль вермöмъяс да тыр-бур олöм.
Медбöрын конкурсантъясöс чолöмалiсны велöданiнъясöн веськöдлысьяс, уджъёртъяс, велöдчысьяс да рöдвуж. Аслыспöлöс, кыпыд, козин вöчисны и кöрткерöсса велöдчысьяс. Мероприятие дырйи найö петкöдчисны сьöлöм вöрзьöдана сьылöмöн. Таöн мичмöдiсны да радлун вайисны видзöдысьяслы.
Звезда, 2011, 9 марта
